صباح الخير يا قمراتي، خليني الأول اقولكم إني فجأة بقيت بحب الواتباد جدًا، تعليقات القراء ودعمهم ليا خلاني أحس بالندم إني فضلت سنين بمجال الكتابة رافضة أعمل صفحة وكنت بكتفي بنقل رواياتي على بعض الصفح، لكن لما عملت الصفحة بتاعتي دي اكتشفت اني كنت مخطئة، التواصل معاكم بشكل مباشر شيء ممتع وشرف كبير ليا حقيقي، وعشان كده جمعت لقراء الواتباد رد على أسئلتهم المتكررة على أخر فصول الرواية.
أول سؤال كان ليه مصطفى استنى كل السنين دي وجاي تحديدًا دلوقتي يكشف السر لادهم ويطلب منه يدور على ابنه؟
طيب يا حبايبي فاكرين لما مصطفى قال لآدهم أنه بعد ما بدل الاولاد فاق من غفلته! حاول بعدها يوصل لاي معلومة تخص الشيخ مهران بس مقدرش، تناسى الامر وعاش طبيعي لحد ما حالته الصحية اتدهورت وقعد على كرسي متحرك، فكل يوم بيخاف يموت وهو شايل الذنب ده ولو تفتكروا بردو في اول الرواية رن على ابنه وقاله انه تعبان وخايف يموت قبل ما يقوله على اللي جواه...
سؤال تاني اتردد كتير، ليه الشيخ مهران محماش خديجة من معتز مع انه كتب فارس باسم ابن اخوه وزور شهادة مزيفة لمعتز؟
هرد عليكم الرد المنطقي، بعيدًا عن انه شيخ ازهري وحافظ كتاب الله إلى إنه أب وسبق وفقد ابنه يونس، بعد خسارته اتيقن ان معتز شيطان مؤذي لو عمل اي حركة مش هيخسر غير ابنه التاني آيوب.
طب سؤال تاني بردو اتردد بكثرة على الفصل الاخير، ليه آيوب والشيخ مهران مصارحش يونس بالحقيقة؟
طيب انا عايزة ألفت نظركم لشيء، يونس بعد عن أهله ٥سنين ومحدش كان عارف هو عايش ولا ميت، ولما خرج كان مكسور ومطفي، ولو لاحظتوا بالمشهد اللي جمعه مع الحاجة رقية وللشيخ مهران لما كلمه بس عن معتز اتشنج وغضب ازاي وطلب انه يقعد لوحده، تفتكروا ده الوقت المناسب اللي يتكلم فيه الشيخ عن خديجة اصلا!!
بلاش النقطة دي، ده اب فقد ابنه وفكره مات تفتكروا أول ما يشوفه يقوله اللي ظلمك اجبر مراتك تخلعك وعمل فيها كذه كذه، مهو هيروح يقتله وهيرجع السجن تاني وهيعيشوا نفس الحالة المؤلمة بردو!! الشيخ مهران وآيوب أعقل من كده.
سؤال اللي اتسألته بردو، ازاي آيوب وآدهم لاحظوا الشبه بين فارس ويونس وعرفوا انه ابنه وهو معرفش؟!
ماشي همشي معاكم حتة حتة، دلوقتي أيه اللي خلى آيوب يخمن انه ابن فارس!! هل لان عيونه فيروزي زيه!! يعني معنى كده لو شاف اي واحد عيونه ملونة وفيه شبه منه هو شخصيًا هيبقى ابنه!!
اللي خلاه يشك انه ابن خديجة يا جماعة، خديجة اللي كانت في يوم مرات يونس، فالربط الاول لايوب استناده على جوازها السابق منه ولان الولد ابن خديجة فبالتالي نسبة شكوكه زادت لكن يونس ميعرفش انه ابن خديجة.
آدهم عارف من آيوب انها قاعده معاهم وحوار انه رفع قضية الطلاق واللي طليقها عمله فيها، فاكرين يوم ما كان آدهم جايب يونس وآيوب راح وصله في نهاية حوارهم سأله أيه حوار طليقة ابن عمك ده فبديهي انه حكاله لذا قفلت المشهد بعلامة معناها انهم اتكلموا وحكوا.
والنقطة الاخيرة إن يونس عمره ومن السابع المستحيلات يتخيل إن ده ابنه اصلا، لآنه مش متخيل انها ممكن تخلعه وهي حامل وتسجل الولد باسم حد غيره وده هنعرف اسبابه بالفصول الجاية.
يارب اكون جاوبت على أسئلتكم كلها، وأخيرًا انتظروا باقي الملحمة، بحبكم في الله..
#آية_محمد_رفعت
أنت تقرأ
الطبقة الآرستقراطية (صرخات انثى)
Mystery / Thrillerالجروح أدمت قلوبهن ومازالت كلًا منهن تحارب للبقاء، مذاق الألم لا يفارق حلقهن، جروحهن متشابهة ولكن لكلًا منهن حكاية خاصة هي ضحيتها، الأولى نهشتها الذئاب البشرية وتركتها كالخرقة البالية تعاني بمفردها، والثانية واجهت إنسان مريض نفسي يريد أن يُجحمها دا...
