الطبقة الآرستقراطية (صرخات انثى)

كلام مهم

السلام عليكم يا بنات، في كام نقطة مهمة كده حابة أرد عليها.
أولًا أنا مش شايفة عمران مزودها مع أيوب نهائي، كل شخصية وليها تفكيرها ومنطقها وشخصية عمران شايفة الموضوع من جانب تاني، وسبق ونزلت وجهة نظره في مشهد صريح بينه وبين الشباب وبين وبين ممدوح بس هقولها هنا بالعامي يمكن تتفهم أكتر، مفهوم شاب مصري مغترب فجأة كده يا جماعة متهم في قضية قتل تخص عيلة كاملة من اليهود!!!  انتوا متخيلين حجم الكارثة اللي ممكن تحصل!   طيب مجاش في دماغكم خوف عمران الرهيب على ضياع مستقبل شاب بسيط زي ايوب وياريته هو وبس عيلته كلها هتتضر وخصوصا أبوه اللي ربنا رزقه بأيوب بعد عشرين سنة صبر!   طيب لو تفادى النقطة دي نيجي لتاني نقطة عم آديرا اللي قتل ابن اخوه وكان هيقتل اخته بمنتهى البرود تعامله مع شاب مسلم زي أيوب هيكون ازاي يا سادة!!
بعيدًا بقى عن كل ده عمران مرعوب ان يحصل شيء بينه وبينها والكارثة هنا بالنسباله لو حملت منه مصير البيبي ايه يا جماعه!  الولد طبيعي هيكوز مع الأم والام مازالت عبرية يعني ابن أيوب اللي جده شيخ أزهري مصيره ايه؟!
من فضلكم بلاش نحكم على الامور من الظاهر حكاية آديرا وأيوب صعبة ومفهاش مجال للتهريج ولا للهزار، ان كان موضوع عمران باين بشكل كوميدي فده شيء مبهج لينا بس ياريت مننساش الاساسيات.

ثانيًا.
كل اسئلتكم اللي تخص موضوع أدهم مقدرش أحرق الرواية وأجاوب ولا أسرع الاحداث وأظلم الرواية، كل اللي اقدر اقوله ان كل الاسرار هتتحل أول ما آدهم يرجع مصر وعلى فكره وقت نزوله هيحصل شيء هيصدمكم جدا وهتتفاجئوا بيه ❤

ثالثًا... قولت قبل كده وهقول تاني علي وعمران الاتنين ابطال رئيسين.. بعض التعليقات بتقول ان عمران غطى على علي!!  ازاي والبطولة متقسمة عليهم.. دكتور علي ليه دوره القوي وعمران ليه دوره القوي.. مفيش واحد يقدر يغطي على التاني لا دكتور علي الخلوق يقدر يكون عمران الوقح ولا عمران يقدر يكون دكتور علي منبع اسرار العيلة والحضن الحنين لفريدة هانم وزوحته وأخته حتى زينب وأحمد وكل اللي حوليه.. في فرق بين الاتنين ه اللي بحاول اوصله ليكم، لو عمران بيظهر كتير فانتوا فاكرين انه اخد البطولة من علي فده لطبع علي أساسا هو مالوش اصدقاء شخص هادي بيحب العزلة والابتعاد عن كل شيء ومع ذلك بيظهر كتير مع اصدقاء أخوه...

كمان ظهور عمران هو اللي بيربطنا بجمال ويوسف وسيف وأيوب يا جماعه.. شخصيته كده بيحب يخرج مع اصدقائه فطبيعي اغلب ظهوره معاهم فمن فضلكم بلاش نقلل من شخصية أي حد لانهم كلهم يعنوا لي فيهم قصص حقيقية بالفعل زي جمال ويوسف ويونس... وفيهم قصص من وحي الخيال بس كلهم بعزهم جدًا والرواية كلها عندي في مكانة تانية.. أقولكم سر!
دي الرواية الوحيدة اللي بعيد قراءة فصولها بعد النشر أكتر من مرة من كتر حبي فيها 🫢 وده السبب اللي خلاها من ١٥فصل بنوصل لفوق التلاتين ومكملين أهو.. فأرجو اننا منستعجلش وننتظر باقي الاحداث... وكالعادة هختم كلامي وأقولكم دمتم في محبة من الرحمن... بحبكم في الله ♥