إقامة جبرية
من مذكرات مريم
الجزء الثاني والثمانون ...
واني روحي لزكت اباب البلكونه
شفت صارت هوسه يم الباب بس الدنيا ظلمت
سمعت صوت سيارات مال عرس ...
ايديا ترجف مبعد اسيطر
مبعد اشوف سارت كلش هوسه بس مشفت خالد
لمحت خواتها وتمارة شايله طفل وتهلهل
نزلوها وصوت هوساتهم والهلاهل
طفيت الضو ورجعت ادحك
شفت نايل واكف بصفحة ..وكفت يم الباب يعدلون بفستانها
وبقت واكفه ماطبت وصوت عمه مدري شيصيح
الا طلع خالد
وتعالت الهلاهل
واني انفجرت بجي احس اوضاعي تخربطت والكل طب جوا للبيت
ركضت لباب الغرفة اشهك واكتم شهكاتي
صوت نسوان يم الدرج
وصوت هوسة والباب انفتح
فتحت الباب شويه ..وصوت خواتها يهوسون
ردت اطلع بس كلت راح اصير مسرحية ومضحكة
ساده حلكي وابجي لحد ماصعدت هي وفستانها
ومسويه الشعر اصفر كركم وتسحل بالفستان
وخواتها وخالاتها ونسوان اخوانها يهلهلون
كلهم طبو وياها للغرفة
طلعت خالتها تشبه لميعة صعدت
صاحتهم ينزلون وتكول ...زلمتها راح يصعد
انتو رجعوو وانه وام وسام نبقى
نزلو كلهم وسدو عليها الباب محد ظل مسحت وجهي وردت اطلع واطب لغرفتها واطلع قهر گلبي بيها بس دحكت لايديا ترجف رجيف
حتى صحتي ولياقتي انعدمت بسبب القهر
رحت ليم البلكونة بعد اكو زلم كاعدين بالحديقة
رجعت للباب الغرفة وفتحته شويه وبقيت واكفه واسمع صوت خالد يصيح
ويتعارك ويغلط ويكول محد يظل
شويه وصعد متوجه لغرفتي
ابتعدت من يم الباب
طب وسد الباب مد ايده شغل الضو
شافني منهارة اجه حضني ...يااازي يبويه خلها تولي ومن باجر اگلعها جوووا
حضني واني الكلمة متطلع من حلكي
...اشتعلووو ليش هالررررجفة
شالني عالتخت ويقيس السكر
ويدحكلي ...بردددانه ليش هالرجفه مررريم
اريد احجي الفك السفلي ميثبت
....مريم السكر طبيعي دحكيلي
عافني وطلع اسمعه يصيح نور بعلو صوته
رجع طب ويلزم كصتي
نور...خيرر ابو شهم شبيهااا يمه اسم الله شصاير الها
....جسمهااا ثلج طلعي الها منشفة وفتحيلي دوش داافي بسرررعة
لزمته من ياخته وابجي واشهك نزع ملابسه
واجه ...حضني وشالني للحمام ونور ورانا طبت
خلاني جوا الدوش اني وملابسي احس رجليا انحلت
...ابوو شهم.خلي ناخذها للمستشفى
...مبيها شي هسه تفك
...الماي حار احس نعست استندت عليه سد الدوش ولفني
...ابو شهم هيان جبت الها ملابس
...لا خلها تبدل بالغرفة
مشاني للغرفة واني ارجف
كعدني عالتخت ونور اجت بدلت الي
ونشفت شعري وخالد متخصر بقلق
هاهي خيتي
...شتحتاج انه كاعدة بس صيحني
..ممنون متگصرين
طلعت وهو قفل الباب وراها خلالي مخدتين ورا ظهري وطلعلي غطا خفيف خلا عليا
وبدل ملابسه
واجه يمي طب بالفراش ضمني لحضنه
ويمسد لشعري
...تخلين بالي تخلين گلبي يرجف عليچ
