إقامة جبرية
من مذكرات مريم
الجزء التاسع والستعون ...
كعدت من نومي غسلت وبدلت كنت امام صراع داخلي امام المرآة ..البس الحجاب لو لا ؟؟؟
من بعد تفكير قررت ابقي وماانزعه ..
احس صار جزء مني وتعودت عليه
طلعت للجامعة ...واني مدري شنو منسقة من ملابس لابسة بنطرون بيج وعليه بلوزة زيتوني قصيرة وبوتين ...
طلعت بالخفية ليشوفني وسيم..بس يشوفني يسوي عززا ويلحكني هو وسياراته
طلعت مخبوصة وصوت الهورن يصدع صدع
صعدت متذمرة طبكت باب السياره كل قوتي ...عليش اددددق هووورن عليشش
...مو كلت خاف متسمعين
..مرة الخ لا ادق هشكل ..الفرع كلو طلع عالصوت عرس خما عررس عيب والله
..اي صار ماتنعاد
مشينا واني راس عالجامة
هذا ابو الخط فد واحد غثيث
اسمه صعب ...يعني مو صعب اللفظ لا ..هو اسمه صعب يعني من الصعاب
يكون جيرانه وموظف بمعمل الادوية...وميداوم اصلا
لان بالاساس ماكو معمل.. من التحرير وموظفين الادوية ميداومون لان ماكو معامل تفلشت من الاساس
مواليده 80 ..اعزب شكله مريب
خشن ومعضل بس احسه بلا شخصية يشبه فهد زوج شهد
مالكيت انسب منه يوصلني ...شكد بحثت عن اشتراك خط من نفس المنطقة لجامعة مالكيت
اضطريت اصعد ويا
امه صارت صديقة نرجس ويومية تجي تشرب القهوة يمنا..بحكم باب يم باب
صعب ياخذ مني الضعف في عشرة مبلغ
وقدملي عرض اذا جبت بنات عالنفس الطريق يقلل من المبلغ باعتبار اني ماخذة خط كامل لوحدي
وصلت الجامعة ساعة 12 الظهر
اداوم يوم واحد بالاسبوع ..دوام مسائي
مع العلم عندي استثناء اداوم حكومي صباحي
لكن خالتي اثناء التقديم ... تكلمت مع بعض الاساتذة ...وكان اكو موظف اقترح اسجل مسائي
لمزايا عدة
اولها احترام فول من الدكاترة بحكم الطلاب ذو اعمار كبيرة
وثانيا ماكو التزام 100٪ مثل طلبه الصباحي
وثالثا الاساتذة متساهلين مع الطلاب بسبب الاغلبية من الطلاب هم موظفين وجايين يكملون الجامعة وياخذون الشهادة من اجل رفع المخصصات المضافة للراتب
واقنعني.. سواء كان صباحي او مسائي ميفرق شي بس الصباحي تعب اكثر
كل هذة المعطيات دفعتني اكمل مسائي
ولا سيما عمري عدا
الي موجودين اني اكبر منهم تقريبا كانو دفعة ال 99 او ال 2000
وصلت الجامعة ...
صعب يجي ياخذني من بعد ماارمش اله انتظره ربع
نزلت وشفت واحد لابس مدني واكف بالبوابة
ووياه واحد لابس نضارة يدخن
وووين كتاب المباشرة
... وليش تصيح..ماعندي كتاب ورقي بالموبايل هو
...اي نشوف بالموبايل
....ماشيلي موبايل ولا تعطلني رجاءا
...مرة ثانية تحضرين شي ثبوتي قبل لا تدخلين
...اي لا تعيش الدور زايد ..الكل يدخل بلا هويك ابتعد
