ပြန်လည်မွေးဖွားပြီးအကျင့်ပုပ်တဲ့ယောက်မကိုနှိပ်စက်မယ်

chapter 128

Chapter 128 sister in law
Chapter 128December 21, 2023
(အံ့သြဖွယ်အမျိုးသမီး)

ယခု စုမုန့် သည် အဘိုးဝေ့ အနားတွင် ရှိနေသောကြောင့် သူမကို ချဉ်းကပ်ရန် မသင့်တော်ပေ။ စုမုန့် တစ်ယောက်တည်းရှိချိန်အထိ စောင့်ဖို့ သူ ဆုံးဖြတ်လိုက်သည်။

ယခုအချိန်တွင် ရှောင်ချမ် ၏ နှလုံးသားသည် စုမုန့် ထံ ရောက်ရှိသွားပြီဖြစ်သောကြောင့် ပွဲ၌ရှိ‌သည့် အခြား သခင်မလေးများကို မကြည့်တော့ပေ။သူ စုမုန့် ကိုသာ တစ်ချိန်လုံး ကြည့်နေမိသည်။ ဝေ့ရွှယ် နှင့် စကားပြောနေတာကြောင့် အဘိုးဝေ့က စုမုန့် အကြောင်းကို မိတ်ဆက်ပေးနေသည်ကိုပင် သူ မကြားလိုက်ရပေ။သူ သတိပြန်ဝင်လာသောအခါ အဘိုးဝေ့ စကားက အဆုံးသတ်သွားခဲ့သည်။ မကြားလိုက်ရ၍ နှမြောစရာကောင်းသော်လည်း၊ သူကတော့ ဤအကြောင်းအရာတွေကို ဂရုမစိုက်။သူ့မှာ ပန်းတိုင်တစ်ခုသာ ရှိသည်။ထိုအရာက ယနေ့ပွဲပြီးလျှင် စုမုန့်ကို သူ လိုက်ရပေမည်။သူနားမထောင်သော်လည်း အခြားသူများသည် အလွန်အလေးအနက်ထား နားထောင်ကြသည်။

အဘိုးဝေ့ စကားဆုံးသောအခါ လူအုပ်ထဲမှ တစ်ယောက်ယောက်က “စုမုန့်...ဒီနာမည်က ဘာလို့ ဒီလောက်ရင်းနှီးသလိုခံစားရတာလဲ…အရင်က တစ်နေရာရာမှာ ကြားဖူးတယ်ထင်တယ်"

အဘိုးဝေ့က အခုမှပြောပြီး၍ အားလုံး တိတ်ဆိတ်နေသဖြင့် ထိုလူ၏ အသံမှာ တိုးလျနေသည့်တိုင် ဧည့်သည်အများအပြား ကြားနေရဆဲ ဖြစ်သည်။

တစ်ယောက်ယောက်ကလည်း ပြောသည်။

“မစ္စစုမုန့်က ဝေ့မိသားစုရဲ့သခင်မလေးပါ…  ငါတို့အရင်က မသိပေမယ့် သူမရဲ့ ဂုဏ်သတင်းက သေချာပေါက် ကြီးမားနိုင်ပါတယ်…အဘိုးဝေ့ရဲ့မြေးချွေးမက ဘယ်လိုလုပ်ပြီး နာမည်မကြီးပဲ နေမှာလဲ"

"ဟုတ်တယ်..ငါတို့သာ မသိတာ...သူမက အရမ်းနာမည်ကြီးမှာပါ"

စောစောက ပြောသူသည် အခြားသူများ၏ စကားကိုကြားသောအခါ ဆက်တွေးမနေတော့ဘဲ လိုက်ပြောလိုက်၏။

ထိုလူများ၏ စကားပြောသံကိုကြားလျှင် စုမုန့် အားကိုးရာမဲ့ ဖြစ်သွားသည်။ သူတို့တွေဟာ သိသိသာသာပင် ‌ မြှောက်ပင့်နေကြသည်။အဘိုးဝေ့ ကျေနပ်စေရန်အတွက် သူတို့မသိနားမလည်သော အကြောင်းအရာကိုပင် မတွေးဘဲ ပြောဆိုနေကြလေသည်။