#لمسات_ايمانيه {وَمَا أُبَرِّئُ نَفْسِي إِنَّ النَّفْسَ لَأَمَّارَةٌ بِالسُّوءِ إِلَّا مَا رَحِمَ رَبِّي إِنَّ رَبِّي غَفُورٌ رَحِيمٌ } ذكر الله عز وجل على لسان امرأه العزيز .. ان النفس لأماره بالسوء (أمّاره يعني مش بتأمر مره وحده وخلص!! لأ انما بتضلها تزنّ وتأمر !!).. اعترفت انها غلطت بس حطت الحق على نفسها اللي امرتها بالسوء.. كتب ومقالات بينحكى عن النفس الأمّاره بالسوء..بأختصر الموضوع وأقول لكم .. انه طبيعي جدا الواحد يكون عنده نفس تأمره بالسوء.. هيك الله خلقنا .. كل واحد عنده بداخله ملاك وشيطان.. وحسب هو بيسمع كلام مين .. وبيتصرف حسب أي تفكير .. رح يروح إما عالجنه أو عالنار ..النفس هي كل الانواع مع بعضها .. نفسك المؤمنه والمقصّره والمسيئه والمحسنه ...النفس هذه زي كإنها سياره واقفه عالطريق بنص الجبل .. تخيل حالك بريكات السياره فلتوا !! الستيرنج طلع بإيدك!! الاضواء الاماميه مش شغاله!! الشيء الوحيد اللي شغّال هو المسّاحات الاماميه!! في بنزين!! بس شو بدك فيه اذا انت عم تتخبط وبتنزل لتحت بفعل الجاذبيه الارضيه .. الى الهاويه؟؟؟ .. الستيرنج (الايمان)والبريكات (تقوى وعفه)والاضواء (هدى وبصيره)..خارطه الطريق (القرآن والسنّه)!! مش جاهز ؟؟ احسن لك صف عاليمين !! وتسلح بهذول كلهم بعدين سوق سيارتك...هيك ما بتخبط وبتشوف قدامك صح...بتدعس عالبنزين وبتضلك طالع .. طالع لفوق .. الطريق الصح رح يوصلك للجنه.. نفسك اذا ما ضبطتها رح توديك لجهنم.. إتبع هواه وكان أمره فُرُطا.. يعني يعمل اللي بده اياه .. يعيش على مزاجه من غير ضوابط ولا قيود... يقول الامام الشافعي: اذا حار أمرك في شيئين..ولم تدر حيث الخطأ والصواب .. فخالف هواك .. فإن الهوى يقود النفس الى ما يعاب..
