الملاحظه الاولى: لما راحوا على جنب وصاروا يتهامسوا شو بدهم يعملوا .. قرر كبيرهم انهم يرجعوا لوحدهم من غيره . هو رح يضل مع اخوه اللي باقي بمصر ومتهم بالسرقه...السؤال ليش يعمل هيك؟؟ هو ابوه ناقصه سمّه بدن ؟؟ يوسف من قبل وهلق بنيامين كمان يزيد الطين بلّه وهو ما يرجع ؟؟ هو شكله خايف يواجه ابوه لانه هو الكبير اللي فيهم ولانه ابوه حلّفهم قبل ما يجيبوا بنيامين انهم يديروا بالهم عليه .. إلا ان يحاط بهم .. يعني يصير اشي غصبن عنهم ! وهااااي صار هالحكي..
الملاحظه الثانيه : قال لهم يقولوا للاب شو صار وانه اذا مش مصدقهم يسأل القريه ويسأل العير .. القريه جماد والعير حيوان مش رح ينطقوا .. بس هذا اعجاز بلاغي بالقرآن .. كلمه القريه حتى أبلغ من لو قال الله تعالى (أهل القريه).. لانه اهل القريه اللي ساكنين فيها.. اما القريه بشكل عام يعني كل اللي كان موجود من اهل القريه والعابرين السبيل اللي كانوا حاضرين وقتها .. وفي السوره مذكور (أذّن مؤذن) يعني الكل سمع ووصله الخبر .. والعير المقصود فيها الناس اللي في القافله معهم اللي راكبين العير .. وكمان شغله تانيه ممكنه .. مش انت نبي يا أبانا؟؟ خللي القريه شوارعها وبيوتها وشجرها والعير الحيوانات اللي كنا راكبينها .. هم اللي يقولوا لك شو صار معنا لانك نبي والله بيوحي لك وممكن تفهم لغه الجماد والحيوان..
الملاحظه الثالثه: قالوا{وَسْئَلِ الْقَرْيَةَ الَّتِي كُنَّا فِيهَا وَالْعِيْرَ الَّتِيۤ أَقْبَلْنَا فِيهَا وَإِنَّا لَصَادِقُونَ}لما كانوا فعلا صادقين..إنا لصادقون على الاكيد .. بس لما كذبوا على ابوهم في قصه الذئب اللي أكل سيدنا يوسف {قَالُواْ يَٰأَبَانَآ إِنَّا ذَهَبْنَا نَسْتَبِقُ وَتَرَكْنَا يُوسُفَ عِندَ مَتَاعِنَا فَأَكَلَهُ الذِّئْبُ وَمَآ أَنتَ بِمُؤْمِنٍ لَّنَا وَلَوْ كُنَّا صَادِقِينَ}..يعني اعترفوا بكذبهم ضمنياً وقالوا له مش رح تصدقنا حتى لو كنا صادقين..
الملاحظه الرابعه: لما قالوا لأبيهم {وَمَا شَهِدْنَا إِلَّا بِمَا عَلِمْنَا } الشهاده انك تشوف الاشي صاير قدامك بس ما بتعرف حيثياته.. العلم هو درجه اعلى لأنه فيه يقين .. علم باللي فعلا صار.. ولو هم فعلا شهدوا بما علموا يبقى ليش يشهّدوا عليهم القريه وكل شي فيها وكمان القافله وكل من كان معهم؟؟ ولما هم ما شاء الله عالمين وعارفين بحقيقه اللي صار وإنه اخوهم طلع سارق ، ليش كمان يقولوا لابيهم {وَمَا كُنَّا لِلْغَيْبِ حَافِظِينَ }..ليش يجيبوا سيره الغيب والله اعلم لما هم متأكدين؟؟ .. هم كان لازم قالوا (ما علمنا الا بما شهدنا).. وهيك بيطلع اخوهم يمكن بريء..وعلمهم بيكون محدود باللي هم شافوه بس..
