#لمسات_بيانية
سورة الكهف (١)
سورة الكهف رح تاخذ منا مدة في تدبرها .. ما بين أسباب النزول والإعجاز اللغوي واللمسات البيانية .. ومع إني لا أفسر السورة الا اني باحاول اعطيها حقها من التدبر وبالتالي الفهم ..
ليش سورة الكهف بالذات ؟؟ واحنا معظمنا أصلاً فاهمينها ونقرأها يوم الجمعة .؟؟ . إنما إن شاء الله بعد الانتهاء من تدبرها رح نصير نقرأها بإحساس وعمق وفهم أكتر ..مثل ما عملنا هذيك الشتوية في سورة يوسف ..
سورة الكهف هلأ وقتها لانها سورة الفتن .. الفتن اللي صارت حوالينا لدرجة بطّلنا نعرف احياناً الصح من الغلط لإنه كتير أشياء صارت عااااادي ..واختلفت المسميات ..اللي بيخلينا نميز الصح من الغلط هو الفهم الصحيح للقرآن والسنة .. كلنا فطرتنا سليمة بس الحياة عم بتبعدنا عن الصح أوقات .. في ناس بتنتبه على حالها وناس بتنساق .. سورة الكهف بتذكرنا انه لما نشوف اشياء غلط بحياتنا نحاول نغيرها ولما ما نقدر نغيّر .. نلجأ للكهف .. يعني نشوف مكان نعتزل شوي ونروّق .. ننظر لحياتنا من الخارج.. تتضح الرؤيا أكتر من غير ضغوطات ولا توجيهات .. احنا نكون مع ربنا سبحانه وتعالى .. وهو رح يساعدنا نشوف أحسن .. ولو في (ران) أي نقطة سوداء على قلوبنا .. ننظفها بسرعة قبل ما يكتر السواد فوق بعضه وتغبّش الرؤية وينعمى على القلب ..
الكهف من اسمه اشي بيخوف وخطير وغالباً فيه حشرات .. إنما هذا من الظاهر .. من باطنه فيه الرحمة والسكينة .. احنا بحاجة لهم في عالمنا اللي طغت عليه الماديات والمصالح والمظاهر المزيفة والاحكام الظالمة نتيجة البعد عن الله عز وجل...وبنفس الوقت بتحس انه الكهف بيمثل كتير أشياء بحياتنا فيها ألم ويمكن ظلم ..بيتضح بعدين انه كانت رحمه من الله ومحبة لنا انه أبعدنا وصرف عنا أشياء أو أشخاص البعد عنهم غنيمة ..
نجدد النية ونتوكل على الله .. لنسترجع معلوماتنا ونفيد غيرنا بملاحظات ما كانوا يعرفوها من قبل ..
