دكت الساعة عشرة ونص بالليل ، اصوات غريبة جانت تنسمع بالدرابين الضيكة ...
الوضع برة ابد مو تمام سميرة ركضت لمت هدوم كاطع وكلتله هسه تنزل تروح لبيتك مااريد مشاكل ، الشقة جانت بعمارة قديمة جواها محلات مال حدادة ونجارة واللي بصفهم عطار بس اكيد معزلين هيجي وكت ومنزلين الكبنكات ...
نزل كاطع وهو يتوسل بصاحبته يبقى اكثر ماقبلت ...
اتعرف كاطع على صاحبته ىسميرة قبل سنة ونص ... امراءة بنهاية الثلاثينات من عمرها ...
سمرة وشعرها احمر وعيونها عسلية ...
عدها بنية صغيرة عمرهاىخمس سنين وولد معاق ذهنيا عمره تلاث سنوات ...زوجها هجرها ورة ولادة ابنها ...
مجان يقبل يصرف على ابنهم المريض ...ومايشتغل ...والنهار كله سكران بالبيت ..
وبعد ماكبت مشاكل وعرك بيناتهم لم هدومه وعافها وين راح ماتعرف ولا حتى اهله عدهم خبر ...
ليش وشلون اتعرفت على كاطع فهذه تمر على هواية نسوان مثل حالتها كتلتها العازة والجوع وهي عدها استعداد وماعدها رادع
ومنا كاطع مصدك وحدة بجمالها وترتيبها انه تصير اله وطبعا هو جان متخبل عليها
لا...جان مستعد كلشي يسوي علمودها حتى زواج عرض عليها بس ماقبلت ....
نزل كاطع يطوطح على الدرج المكسر والضيق الاظلم وكوة يشوف بضوة الجداحة مال الجكاير صح هو متعود عليه يومية بس اليوم جان ضايج لانه نزل من وكت
جان اكو صوت مراكض بالدرابين و الانضباطية يلحكون مجموعة من الشباب...والاصوات تبتعد وتقترب
الا ان لمح واحد ركض بصفه ىشايل كومة اورق طلع كدامه ورجع اتقرب عليه
دفع كاطع و كعده على حافة دجة المحل وفتح قبغ المنهول وذب بيها كومة اوراق وكتب ومنشورات ...وكاطع مذهول يباوع عليه ...
سد المنهول وانهزم
كاطع ظل يعاين بالظلمة و فاتح تك عينه ...وورث جكارة وكعد على حطته يدخن ...وشوية
وجان يلمح اثنين يركضون عليه ..
واتاريهم اثنين من الانضباطية يتراكضون ويصفرون بالصفارة ...وكفوا بصفه وخلوا اللايت اليدوي على وجهه اتمعنوا بشكله زين
واحد منهم اتقرب عليه ...من شم ريحة الخمر تعط منه عافوه وكملهم مطاردتهم ...لاحجوا وياه ولا هو حجى وياهم
عاد هو كام وكوة جر روحه يمشي ويعرج بتك رجله الى ان وصل لراس الشارع ...وانتظر شي نص ساعة اخذ تكسي ورجع للبيت ...
اول مادخل جانت الكل نايمة صاح على فخرية كالتله
اني بالحمام معبالي ترجع اليوم هيجي من وكت ...بدل وكللها حضروا نفسكم جايين خطابة بيت ابو غازي
سكت شويه وفخرية حاطة ايدها على گلبها تنتظر يكمل حجايته وحتى نفسها انكطع
فكمل كللها رايدين رحاب لغازي
ظل يتنهد واتمدد على الجرباية وماكو ثواني
سمع صوت رطم بالحمام عيط على رحاب وبدى يجر روحه كوة على الصوت...
اللي جانت تخاف منه فخرية صار ...
عاد شافها ممدة على الكاع سحبت نفسها على الحايط وانتجت عليه وهو يكللها طلعي هاي اختنكتي من هوا الحمام ...
سحبت رجليها لفت روحها وطلعت بدلت وعيونها تجري دم مو دموع ...
واول ماوعت شوية ...جابتلها رحاب والنعس بعيونها ...كلاص مي بارد ...شربتها واشرتلها تطلع من الغرفة ...
خوية كاطع ...
_خيرج
وكعت على ايديه وشعرها مبلل اطشر على ظهرها ...
ابوس ايدك لاتزوجها لرحاب ...ابوس ايديك ورجيلك اروح فدوة الك لاتزوجها لغازي ولاتبطلها من المدرسة اتوسل بيك ...لاتضيع البنية من ايدي
دفعها كاطع على كيفه ...
وجان يكللها
فخرية اتجفي شري وخليني انام ترة روحي واصلة لخشمي لاتخليني اطلع قهري بيج الليله ..
طلع قهرك بيه
شتسوي بيه سوي اني رحاب ماازوجها
_هييي والله ومن شوكت اني انتظر من جنابج حجاية لو تنطيني رأي !
ابو سعد اروحلك فدوة ...البنية شاطرة بالمدرسة اصلا انت ماتعرف عنها شي
هاي رافعة راسك طالعة الاولى على صفها والثانية على المدرسة ...
_يعني فكرج لو مازوجتها لغازي حخليها تدخل كلية !
والله انت مخبله اخر وكت بنات كاطع يكعدن بصف الزلم بالرحلة تهي بهي
_يعني شنو قصدك ؟! ناوي تكعدها بالبيت
_بابا افهمي اني كلت خطية يجملن دراستهن للسادس حتى يصيرن متعلمات مال تكوليلي تبدل وتتزوك وتروح للكلية كطنة وشيليها من اذنج ...
عاد فخرية ظلت تلطم وتضرب على وجهه ليش ليش ابو سعد تحرم البنات يصيرن ويتعلمن ...ووحدتهن تشيل شهادة قابل هنه اول اخر بنات هاي مو خالتهن بدرية صارت واتعلمت وشهادتها اهاكبراته على صدرها وين ماتروح!
_دنجبي بله انجبي فرحانه ببدرية جانت تك....د هناك لعد شلون اتزوجت اياد؟!
فرحانة
اكص السانج اذا تكولين او تجيبين طاريها كدام البنات
واسمعي دااكلج
اني انطيت حجاية لابو غازي ...الرجال دينه كسر ظهري ...
وكتله موافق ووكت مايردون يكبعوها وياخذوها ؟!
_يعني هيجي ...اتبيع بتك علمود بيت وفلوس
_مو هذا اللي حضرت جنابج اللي ردتيه بيت ...ييت بارقى منطقة
وكام يتمسخر منها وطردها من الغرفة حتى تخليه ينام ...
طلعت فخرية وبحضنها سعودي وفرشت بالصالة وعينها ماغمض الها جفن للصبح ...منتجية على القنفة وحاطة ايدها جوة راسها تبجي وتنوح ...
ضاعت البنية من ايدي ...
شسوي ياربي
ومن جهة رحاب حضنت مخدتها وكامت تبجي ...مصدكت الحجي اللي سمعته من ابوها ...هيجي ينطيها ويتخلى عنها وهي طول عمرها ماطالع حسها ولانفسها بالبيت !
وحاولت فخرية مرة ومرتين وتلاثة تحجي وية كاطع يغير رايه ماكو راسه والف سيف حجاية وحدة ماتنزل الكاع
انوبه حتى امه وكفت وياه ماعدنا بنات يروحن كليه !
شلون حظ وبخت ....
ايست فخرية بعد ماضربها اخر مرة انه تسكت وتصم حلكها وماتفتح الموضوع ...
عاد خابرت نورية تجي تحجي وية اخوها بلكت الظهريه تمر عليهم شوف شتكدر تسوي...
من حضرت نفسها صاحت على سامي ديوصلها لبيت خاله كاطع ...
نزل سامي من غرفته يركض ...احلى خبر عنده من ياخذ امه لبيت خاله...بدل على السريع ...واجى على امه شافها ضايجة وادردم ...
شبيج يمه شو ادردمين على عمتي فخرية
_البطرانة تريد مني احجي ويه خالك علمود ليزوج رحاب اذا الرجال منطي كلمة اني شكدر اسوي بله
_لايوم كولي غيرها
انت مو تعرفين اني رايد رحاب مو كتلج قبل فترة احجي ويه خالي وحجزيها اليه
_خايب دولي كله طولك شبر ونص يريد يحجز ويخطب ويتزوج
دشوف دراستك الاول كله عمرك خمسطعش سنة مو عيب
_شنو عيب يمه اني رايد بت خالي شنو العيب بيها
_دولي من شكلي وصلني وارجع اقره ...
اخلص من فخرية يطلعلي سامي افندي
الطريق كله سامي عيونه حمر ومغوركة محد جان حاس بيه وماخذه جديات ...
لما وصلت نورية طبعا ماتكدر تغير شي بس فرت عقل فخرية بحجيها انه الزواج احسنلها من ما تبقى يم ابوها ...على الاقل خوش عائلة وكلهم متعلمين اول تالي ابوها يبطلها ومايخليها تكمل...
