الفصل الخامس
من انتم؟
المقطع الخامس
....
وفاة خالتي كان صدمة الي بالذات
بقيت فترةطويلة مااستوعب الحدث وعندي امل انه في يوم ما ستطرق الباب وتاتي لاهثة تكعد على اقرب كرسي واركض اجيبلها مي
طول فترة الاربعين يوم
كنت اعاني من حالة ضعف شديد
ضعف جسدي وفي كل حواسي
وحتى نظري
من كثرة البجي يمكن
ويمكن من قلة الاكل !
او السكر او اي تاثير اخر
استعدينا نسوي الاربعينية
رحنا اني وامل نظفنا البيت الي انترك طول الفترة السابقة
ماتتخيلون شلون جانت صعبة عليه واني اخطي برجليه مكان الحادث
وهنا اتخربطت خالتي وهنا شلتها
وعلى هذه القنفة كعدتها جانت
وهنا بالذات على هذه المدة جانت كلما نكعد نسهر على فلم تمد نفسها وتحط ايدها مخدة الها وتغفى
سمعنا رحاب حترجع من عمان
كانت متخبلة تجي تزور امها وسام يكول تعبته حيل هناك وحالتها النفسية ابد مجانت زينة
اتخربطت امورهم كلها
من جهة شغله واولاده ومن جهة رحاب جانت صحتها حيل تعبانة
الصبح قبل الاربعين رحنا اني وامي وخالة امل الصبح فتحنا الباب وبخرناه وعلكنا قران وشويه اندكت وجانت عهود وميلاد ورحاب سيارتها وراهم اني ركضت على رحاب لانه صارلي فترة طويله مشايفتها وبقلبي شوك لبسام اخذته منها وهي مشت كوة واول ماوصلت للمطبخ جيتت و نامت على نفس المكان الي جانت توكف خالتي بيه تطبخ
ظلت تطب حيل بايديها على الكاشي
وتصيح وعهود لازمته تكللهن هنا جانت توكف امي هنا هاي الكاشية حملت امي اكثر منا
تبوس بالكاع وتكللها ريحتج بعدها موجودة شلون يعني شلون تبقى الاشياء واصحابها يرحون!
نفس الجملة كالتها من اتوفى زوجها فاضل الله يرحمه
ظلت ترجف وهي مجلبة بهذاك المكان في حين ميلاد راحت نامت بمكان امها على الجرباية وغطت راسها بمخدتها وظلت تنوح وعهود لفت فوطتها عليها
مكدرت اتحمل
طلعت كعدت بالحديقة
ياربي كلشي يذكرنا بيها
هنا جانت تكعد كبال المرجوحة وصينية الكعك والكليجة والجاي تنتظر جيتنا جانت دائما تضملي مصقول من ظهر امي لانه متقبل اكل تحطه بجيب دشداتها صفح
وهنا ياما وياما التمين
وضحكنا وبجينا
راحت خالتي وراحت لمتنا ويايها
راحت واخذت كل الخيروياها
جان صوت امي عالي بالصياح مكدرت اشتت افكاري مهمها حاولت
حسيت بيها بكسرة ظهر جنها هي فكدت امها مو بس بنات اختها
ياما وياما جانت من بوكة عمي ابو كاطع وامه تدزلنا فلوس واكل ومسواك
ياما فرحتنا واحنى باشد عوزة
الله يرحمج وينورعليج قبرج مثل ما جنتي تفرحينا
طبيت جوة وجانت عهود حاضنة دشداشتها
ورحاب وجهها يخوف هالة سودة جبيرة داير مداير وجهها وجلدها اتغير اتحول الى بني غامق
حجت بصوت مخنوك والظاهر همه جانوا قبلها ديسولفون ميلاد مشتكية تريد ترجع تكعد بالبيت ماتريد لايم خالي ولا حتى ابيتنا او حتى بيت عهود
اتوسلت بامي تبقى هنا
فعرفت انه رحاب مقدمتلها فيزا لعمان تروح وياها تبقى هناك فترة
بقينا شويه والتحقنا بالموكب الي حضره خالي نروح لللاربعينة لكبر خالتي
عز الشتا ومطر دك والطين للركب
نمشي ونجر كيلوات طين ويه رجلينا حتى وصل لخاصرتي
خالي جان مسوي الكبر مرمر
وقطعة معلية فوك
مااعرف ليش انصدمت من قريت اسمها
شلون خالتي تنم هنا ومااكدر احضنها
شلون مااكدرالزم ايدها التعبانة والمليانه تجاعيد
شلون مااشم ريحتها شلون؟
