شهر نيسان وقبل نهايته ينتهي الفصل الثاني من الدراسة بالنسبة للمتوسطة
ميلاد طلعت اعفاء مثل العام
بس رجعت تبجي وعيونها مورمة واول مادخلت على امها
جانت فخرية دتطبخ وتفتر بدشداشتها تلم البيت
من شافت ميلاد من شباك المطبخ وهي تفوت للبيت تعيط وتبجي فزت وركضت عليها
تصيح لج شصاير شبيج تبجين
صاحت ميلاد ويه نفسها
والله حرام عليكم والله حرام بس اريد اعرف شفكرتي من سميتيني ميلاد شفكرتي
وفوكها ابويه كاطع
يعني حتى فرحة بنجاحي مااكدر افرح صرت نكته للصف يضحكون عليه ميلاد كاطع طلعت الاولى
----وشبيه اسمج من ثول عبالي صاير شي
--- شنو شبيه اسمي ماما يعني شفكرتي بس كولي شفكرتي من سميتيني هذا الاسم !!
---ماما مافكرت الدكتورة سمتج لانه جيتي براس السنة هاهي بعد انجبي ولاتلحين
-ساعة السودة اللي اجيت بيها اي والله
واسمعي ماما اني دااكلج
السنة الجاية تنقليني من هاي المدرسة ماريدها
عرفتي والله ماريدها
---ماما ادري شبيج اتخبلتي لو انت طايح حظج بكلشي ادري الناس تفرح تطلع الاولى واعفاء انت جاية تبجين
---لانه حقيرات ويايه كلهن حقيرات
بس يعيبون عليه
---ليش يمه يعيبون عليج شبيج شناقج شعايزج؟
ماما ناقني وعايزني اكون مثلهن ياريت لو تعرفين هنه شلون يلمعن واني شلون ارح للمدرسة
--كافي يله كافي لادوخيني يوميه نفس السالفة ابد ماتشبعين شكد ماسويلج
دخلت غرفتها ميلاد
بعد مااخذت مكان رحاب بغرفة عهود وصارت الغرفة لشعد وحده
ميلاد كلش ضاجت من امها نقلتها لهاي المدرسة الجديدة
تختلف بيئتها عن مدرستها القديمة
الطبيعة الطبقية جانت طاغية عليها نوعا ما عليها
جان تشوف صفها
منقسم الى ثلاث اقسام
الكصار يكعدون اول سراوين ليكدام
والشاطرات بالسراوين اللي وراهم
اما المقاعد الاخيرة فجانت للطوال والاكثريه للبنات الوكحات مثل ماتسميهم ميلاد
عادة السرة الاول يكونون فقيرات كلش ومن بين كل تلاثة منهن اكو اثنين من يكومن يشرحون باليومي لازم يطكطكون اصابيعهم ولازم صوتهم ناصي مايطلع ولازم بصفهم الجنطة يلزكون بيها من يكعدون على الرحلة
السرة الي بالنص معظمهم شاطرات ونصهن غشاشات
حتى الشاطرة تغش لصديقتها بالامتحان وكانت ميلاد من هذا السرة
جانت حايرة بين ...وويامن تختتلط
السرة اللي وراها
هنه الوكحات مالت الصف
وعادة احلاهن وماخذات حريتهن حيل
اكو بيهن من تصادق ولد طبعا هذني مايختلطن بكل البنات بس اللي بيناتهن ومثلهن ويصبغن شعرهن ويحفن حواجبهن وعادة اكبر من بقية بنات الصف لانه عايدات السنة مرتين وتلاثة وعددهن مايتجاوز الاربعة خمسة اما البقية فهنه الي احتون على كل الصفات
شاطرات وغشاشات ووكحات ولسان
عادة مايكونن هن القياديات اللي يحركن الصف وبقية الطالبات
واكيد هن اصحاب الجوقة الموسيقية للصف
مع اول خمس دقايق تاخير للمدرسة تركض وحدة تشمشم الاخبار
وتجيهم ركض وهي دك وتركص تصيح شااغر شاغر
وطبعا هذا خبر تسري حلاوته على الشعبة حلاوة تاجيل الامتحانات
وراها راسا تنسد الباب بالرحلة ويبدي الدك على الهندسة ويصعدن فوك الرحلات يستعرضن مواهبها المكبوته بالرقص عدى انه دائما اكو وحدة صوتها حلو تتولى عمليه الغناء والبقية يقومون بالرد وراها
بنات السرة الاول يكعدون بمكانهم ويبدن يسولفن بصوت ناصي لو يتفرجن
اما السرة الكلش اخير يكعدن على الشباك ويقصقصن باخبارهن العاطفية واخبار الشباب الي ينتظروهن بباب المدرسة ومنو معجبة بفلان وعلان
هذا بالنسبة للشاغر لكن الفرحة الاكبر
من يكون اكون امتحان ويصير تضارب بالجدول مع انه نفس الجدول من بداية السنة بس هم يصير تضارب
ويتاجل الامتحان
وتبدي الهلال وتتوزع الحلويات وفاء للنذور انه الامتحان اتاجل ليوم اخر
ميلاد ضاعت بين هذني البنات
لاكدرت تصير من بنات السرة الاول الفقيرات لانه هي مو فقيرة ابدا
ولا السرة الثاني لانه ماتقبلوها كونها من طبقة اجتماعية اقل
ولا السرة الاخير
لانه عدها شكد عيب البنية تصادق وتعرف ولد وعليها سمعة
فظلت متخبطة مابين الانعزال ومابين الاختلاط بيهن وتحمل كلماتهم وتعليقاتهم اللاذعة عليها
بطبعتها ميلاد كفتاة برج الجدي
كانت مميزة بعيونها اللوزيه الواسعة والرموش الكثيفة والحواجب الدقيقة المرسومة وبانفها الناعم الصغير وجبهتها العريضة وبشرتها الترفة النقية وشخصيتها الجدية العنيدة الطموحة
صحيح هي كانت تمثل عدم اهتمامهاللبنات بالصف وطريقة تعاملهم وياها لكن من ترجع للبيت تصب جام غضبها على عائلتها وامها بالاخص
جانت دائما تتعارك ويه امها
تريد هدوم جديدة صدريات اربعة خمسه وجنطتين تلاثة مثل بقية البنات الزنكينات وياها بالصف
حتى وصلت مرحلة تعاير امها بزواجها من ابوها !!
وتكللها مالكيتي الا ابويه تزوجيه عفتي الناس والضباط كلها الا ابويه
ماصرتي مثل عمة رحاب ام فاضل
شفتي شلون ماخذه واحد ممبقي شي بنفسها
ممبقي بحسرتها مكان مرايحي وحتى بناتها مثلها مفترات عكة ومكه
عمة نورية بشنو احسن منج كوليلي
اتزوجت ضالط وشوفيها شلون عايشة هي وبتها
كل سنة احوالهم تصير احسن واحسن
احسن عيشة عايشين وبتها ارقى لبس تلبس
شفتيها اخر مرة من جتي شلابسة كله اورزدي
شمعنى الا اني !!
الا اني ابويه هيجي وانوبه اسمه كاطع !!
فخرية جانت تبسط ميلاد على هذا الحجي
وتكللها هو اني قبلت بيهم وجان ابوج يعايرني لميتج من الشارع ووكلتج وشربتج
ومن تذكرها انه هي احسن من امها وخواتها تلبس وتكشخ
--- لج جنت اطير من الفرح البس الجنطة كونية وامي مخيطتلي بيها قوبجتين
وعندي احلى جنطة انت مرتين بالسنة تشترين اغلى وحدة
شو خواتج مرادن مني خلف الله عليهن جانن عاقلات
اشتري بس وحدة ويتراوسن بيها يلبسنها بالمدرسة
ماتفكرين منين اجيب
هو منو ديشتغل بهذا البيت !!
