طريق الموت آت ....
الدنيا جانت باردة حيل بشهر كانون الثاني ...من سنة ثمانين
والكهاوي صارت سنطة ...مو مثل قبل ازدحام وهوسة
قبل جنت تكدر تسمع صوت استكاين الجاي طك على المواعين والبولي اللي يضرب الطاولة باعلى حسه ويصيح دوشيش ...
هسه يدوبك كم واحد كاعد وصافنين يحركون بجكايرهم كانما يحركون بايام عمرهم ...
انتجى علاء على الكرويتة لابس البالطو الاسود مالته واللفاف الرصاصي على ركبته ...
شعل اخر جكارة بالباكيت ...وغمض عينه وجر نفس ورة نفس...
الحيرة والقلق والخوف ...جان شاغلة عن اي شعور اخر ...وما ان فتح عين لمح زهير يجيه يمشي سريع ...يتكمز حتى لايمس بالطين
سلم وكعد ...
_شبيك ابو سمير شو دايخ ...شكالولك الجماعة اللي دزيتك عليهم !
صفن سمير وبلع ريكه كوة
زهير جماعتك حجيهم يكسر الظهر
_وتالي
_خايف عليهم لايترحلون الجهال شلون بهالبرد!
_ماسولك شي يعني!
_ماكو بس كالو الحل انه اطلكها قبل الترحيل ..حتى تضمن يبقون الجهال يمك
_اي هاهيه طلكها!
_شبيك زهير صدك تحجي بابا هاي مرتي شنو اطلكها شلون اعوفها وحدها
_علاء ..لا انت قابل تعوفها تروح وية الجهال ولا قابل تروح وياهم ولا قابل اطلكها وتبقي الجهال يمك وهنه بس هذني الحلول شتريد لعد ؟!
اكو شي ابالك
_ماتكولي اروح وياهم شلون شسوي بإيران؟!واني عراقي اصلا مايقبلون الترحيل الا اسقط الجنسية واذا اني سقطتها يتاءذون البنات هم ويايه فخرية وبدرية ...
شلون اروح مكان مااعرف شنو مصيرنا هناك ؟!
_خلاص لعد اني اشوف طلكها وبقي الجهال يمك هسه.
لحد مانشوف ربك يحلها يجوز الشغلة هينه وكلها اقل من سنة سنتين بالزايد وروح رجعها شتكول مو احسنلك ؟!
انت حجيت ويه امل بهذا الشي
_اي حجيت وماعدها مانع ...
وظلت تقنعني وتخوفني على الجهال بارده والحدود ثلوج اخاف الجهال يتمرضون لو يضيعون من عدنه ساعتها شسوي!!
استمر النقاش بين علاء اللي جان گلبه متكطع ومتحير شلون يطلك نرجس ويعوفها تترحل وتروح وحدها لايران وانوب ياخذ جهاله !
وبين انه يعوف جهالة ويه امهم ...
بس اكيد بالطريق حيتعذبون وهو سمع عن الطريق شلونه وشلون الوضعية هناك ... مستحيل جان يفكر ييقط الجنسية ويروح ورة زوجته معناها مو بس هو يتاذى حياذي اكثر من عائلة وياه ...
