ابد ماارتاح العراق ...لا من قبل ولا من هسه ...
بذيج الفترة بداية الستينات بدت المظاهرات يومية بالشارع وناس تناوش على ناس...القوميين الناصريين والشيوعين من جهة والبعثية من جهة وعبد الكريم قاسم وجماعته من جهة...
الوضع كله يغلي والشارع مضطرب والاعتقالات على اوسع ابوابها وحرب الموصل...الي راحوا ضحيتها مئات كلها جان الها تاثير بتغيير مستقبل العراق فيما بعد ...
بس مع ذلك كان اكو تحسن اقتصادي
ومشاريع هواية تم تاسيسها كانت ولحد الان اللبنة الاساسية للعراق الحالي ...
الا ان في شباط اول اسبوع منه اغتالو عبد الكريم قاسم ....رئيس جمهوريه العراق السابق
كان الانقلاب بقيادة صديقه المقرب عبد السلام عارف ...
واعدامه تم بعد محاكمة صورية في دار الاذاعة والتلفزيون على الهواء مباشرة وهناك بعض الصور الي انتشرت فيما بعد توضح عملية الاغتيال ....
بوكتها جان رمضان والناس صايمة
هواية منهم انقهروا عليه ولحد الان يحبوه ويترحموله ...
ومن كثر حبهم اشاعو ظهور صورة اله على الگمر
واكو بيهم من تشمتوا بيه وكالوا حوبة الملك واهله انقتلوا مظلومين...
وناس شافته عسكري لايصلح ان يكوم رجل دولة ورئيس حكومة
وناس تعلمت تصفك لليجي جديد والي يخدم مصالحهم ...
اختلفت الاراء لكن الجميع اتفق انه الوحيد الذي لم يستغل منصبه لمنفعة شخصية وانقتل وماكو الاجم فلس بجيبه ...
ومع ذلك بقى الشارع العراقي يغلي وابد مابرد ...
ومن ذلك العهد لا قبله هم اتعلم العراقي يشتغل محلل سياسي وهو كاعد بالكهوة يلعب طاولي ويشمر زار...
نرجع لجماعتنا
وبشهر الثالث وورة مطلعت السنة مالت المرحوم راضي اخو فخرية صارت زفة نورية لزهير ابن ام سامي ...
ام سامي مرة كردية من خانقين وزهير كان ابنها الثاني والي جان ست خوات واخ صغير توها من والدته ...
ومن خواته الستة كانوا اثنين متزوجات ومخلفات همين ...
اول ماسووا الحنة ...وام كاطع سوت ذيج الجنة لبتها ...
عزمت بيها كل جوارين المنطقة وجابن صينية الحنة ...ووزعن الدنابك وبدن يدكن ويركصن ...
والتمن النسوان ووزعن كاسات الحنة والي جانت جفية يخلون بيها ملبس ومصقول وجكليت وينطون بيد كل مرة وحدة وطبعا الجهال الهم حصة الاسد ..
وبوكتها الناس حسدت زهير على مااخذ من بنية حلوة وشاطرة ..
وكعاداتهم كعدت نورية ويه عيالها اول سنة بيتهم جان كلش جبير ...وطابقين
عمة نورية ام سامي مرة بعدها شابة وقوية ولساتها تحبل ويه بناتها ...تحب الخلفة ورجلها يشجعها ...
جانت شكرة و كصيرة ناعمة وضعيفة ووجها عريض وعيونها عسلية وعلى طول تكص شعرها كصير لجتفها يعني هذا الشي مجان وارد يم النسوان بذيج الفترة ...
بس هي تحب على الموديل توصي ابنها شكو مجلات تنزل للسوك يجيبلها منهن ...مثقفة ومرتبة وصاحبة عزوة ..روحها خضرة ودمعتها صعبة ...
جانت هي اللي تدير البيت وعلاقتها طيبة وية كل الجيران
صح ابنها سامي الجبير حاله جان حال جاسم اخو فخرية من شقاوات المنطقة بس جان ياخذ بالحق ويصيحوه بكل عركة وطلابة يدافع عن الفقرا ...وبكل مظاهرة هو مشارك ومرة من هالمرات جان راجع للبيت بنص الليل جيتوا عليه جماعة عدهم ثار وياه وكتلوه بالطريق ...
الله يرحمه كثر مكان ضخم وسبع جانوا يسموه سامي البطل ...وحتى زهير من جان يحجي يتباهى باخوه المرحوم..
نورية جانت سبعة وكدرت تتعايش وية عائلة رجلها الجبيرة وصارت هي اول جنة الهم والجنة الجبيرة جانوا ياخذولها اعتبار وحتى هي ام سامي حبتها ودارتها و علاقتها زينة وياها جانو مثل مايكولون دهن ودبس ...
وماكو كم شهر وصارت حامل ...
بذيج الفترة بعد مافرغ بيت ام كاطع وشغله صار كله على فخرية وزهوري الا ان الاخيرة جانت حركة ماتكعد بالبيت شالت المسواك والخبز والصيدلية ...
ام كاطع جان عدها هوس ويه الادوية تكوم وتكعد جيس الادوية بجيب دشاشتها ....
فيومية لازم ادز البنية تروح للصيدلية ...يعني تقريبا مشوارها ثابت
الا ان
اول عيد جان اتفقت نورية وامها يروحون للمكبرة على ابوها ومقبلت زهوري تروح وياهم..
من الصبح كعدت صاحبتنا فخرية لبست نفنوها الوردي وبيه وردة بيضه صغيرة وسرحت شعرها وهدته وشالت قسم منه ليورة بقراصة ...
وحطت صينية الگيمر وخدرت الجاي ابو الهيل وعلت صوت الراديو وعلى حسها كعدو اللي بالبيت وكاموا اتريكوا ووزع كاطع العيديات عليهم
وحضروا نفسهم وراحوا
بقت زهوري و فخرية بالبيت علمود رحاب مالها خلك جانت تطلع سنون متنحسة واسهال ...
زهوري جانت بنية نشيطة حركة يعني...وماتعرف تكعد ابد
بس عدها حالة تعيش بغير عالم وتحجي ويه نفسها يومية هي بشخصية بالبداية جانوا يضحكون عليها لانه طفلة بس هاي حالتها بقت وياها لما كبرت بذيج الصبحية جانت عايشة دور فنانة وممثلة مثل ليلى مراد ...تغني وتركص بالحوش والطرمة وتسرح بحلمها على الرغم من انه هي مو صغيرة يعني فرق العمر بينها وبين نورية سنتين بس ...
لكن اللي يشوفها يكول هاي عقلها هواية اصغر حتى اهلها يعاملوها على اساس هذا الشي ...
واول ما طلع كاطع واهله بلشت فخرية تغسل بهالحضاين مكومات من البارحة ...
جابت طشت مي حاار وصابونة ركي وتفرك بيهن وزهوري تشطفهن وتشر وهي تركص وتغني ماكو اغنية محافظتها وماكو فلم مال سينما ينزل اذا ماتروحله ...
ورة ماخلصو شغل تقريب بالعشرة ...ظلت زهورة تلح على فخرية يطلعون يفترون بالامانة اببغداد ويشوفون العيد وهوسة العالم برة
الامانة قبل جانت مرقمة والها مكان محدد من منطقة معينة للكراج فقررو يروحون للكاظم وبعدين من الكراج يرجعون للبيت ...
كون مايتاخرون حتى كاطع لايحس بيهم ويسويلهم مشكلة
وصدك والله سوون جيس لفات واخذن حضاين زايدة لرحاب اللي جانت توها تمشي
هاي الصغيرة اتاخرت هم بالمشي هم بالحجي ...
وصدك بدلوا وديطلعون وهالمرة زهوري لبست عباية بعد اخوها كاطع مايقبل تطلع بلياها ...وفخرية تضحك عليها تكلها والله وحكمج اخوج بالعباية طالعة جنج عودة مال مطيرجية وذيج تضحك وتفر بالعباية وتفتر بيها بنص الحوش ...
يله عينى ست ليلى مراد خلص الفلم خلي نلحك نروح ونرجع قبل الظهرية وشيلن غراضجن وطلعن ...
والطريق كله يشوفون الجهال لابسين هدوم العيد وفرحانين يلعبون بهالدرابين الضيكة...
يمشن ويعايدن بالناس وبالجيران والمواعين تتراكض من بيت لبيت اليوم شطابخين يوزعون لجارهم ...
وصدك صعدوا بالامانه ومثل عادتهن كعدن بالطابق الفوك ..
اول ماصعدن فتحن جيس اللفات وبدن ياكلن ويباوعن من الشباك جانت هوسة والناس طالعة تعيد ...المراجيح انصبت واهل العرباين مال الحصونة يملون العرباين جهال ويفروهم ...بذاك الوكت الناس صدك جانت تحس عيد ...كلها تلبس جديد حتى الفقير يروح يشتري من البالات ويلبس جهاله ...العيد الجبير جان باول ايام شهر خمسة يعني
والجو بدى يحتر بس الواحد من الونسة والهوسة مايحس حتى الامانة جانت مقبطة والجعال يلعبون بيها صاعدين نازلين ...ازدحامات بكل مكان ومحد بحال احد شيلبس شيسوي شياكل ...
ورحاب همين تلعب على واهسهم تروح ورة الجهال وزهوري تركض تجيبها
وبدت السوالف جانت فخرية تتمنى تروح تزور اهلها بس تخاف يوصل خبر لكاطع راحت من وراه وهي كوة يخليها مرة بالشهر تروح ...جانت تصفن وتسال زهوري هسه بدرية وامي شديسوون ...
ماتعرف هاي المرة المسكينة تشيل قهر شنو وشنو ...من جهة اهلها ومن جهة من حبلت نورية كل العيون صارت عليها حتى تحبل هي هم
بس شتسوي قسمتها بعد ماديصير عدها حمل...
فاندارت على زهورة وبدت تحجي وياها ...
لج زهوري شسمها الدكتورة الي تروحلها نورية وحبلت على ايدها ...
ام نجم !..جاووبتها زهورة وهي تعض بلفتها
شكد فطيرة ام نجم شنو دااكلج دكتورة مو ام الخيرة
فهي كملت اخر قطعة باللفة بلكمة وحدة
مو كتلج ام نجم هي مراحت لدكتورة راحت لام الخيرة شبيج انت
يااا ولج يا ام الخيرة اشو مكتيلي !
فخورة انت ولا مرةسالتيني ...وين تروحين وية نورية
يا لعد ليش متاخذيني !
زين عود هاي شسوتلها بله
والله مااعرف سمعت امي تكللها اوديج يم ام نجم ...سالي امي تعرف ...
لج اخاف هاي ام الفنجان شسوي بيها اريد دكتورة تسويلي حمل ...
صفنت فخرية مابقت وحدة مرحت عليها ...كلهم يكولون مابيج شي لعد ليش مااحبل!
وبعدها ممكملة حجايته جرت زهورة العلاكة واخذت لفة لخ
فضحكت عليها فخرية كالتلها اللي يشوفج هيجي معصعصة مايكول هاي هيجي تاكل ...لج جوزي من الفرفرة بين البيوت لمي روحج خلي تصير بيج لحمة متو ياخذج وانت جنج عودة
هههه شسوي بالزواج بعدني صغيرة ...عود انت لميهن ...ترة كاطع مايحب الضعيفة وديدور على مربربة
وانت شمدريج ياحوبة
