شهر تشرين الثاني من عام 87
كانت عصرية ... والجو بدى يبرد
لا ابرد من قبل بهواية
كانت ام كاطع تصيح على سعد بصوت متقطع وكوة تسحب نفسها
سعد كان يضرب طوبته على حايط المطبخ المطل على الحديقة
وصوت الضربات كان يرج المطبخ كله
كانه جدار مرمى لكرة القدم
ظلت تصيح وتتوسل بيه يجوز من هالضرب
تكله كافي مو كاعد تضرب براسي
والله حتموتني انت
فخرية جانت رايحة لكريم ام صلاح اللي ولدت بتها الثامنة مع تلاث اولاد وياها
وميلاد كاعدة بالغرفة وسادة الباب وتقرا
ظلت تتنهد ام كاطع وتووسل بسعد يجوز من الطوبه وماكو
اما مجان يسمعها
او جان يسمع ومايهتم
ورة شي ربع ساعة تقريبا
رجعت فخرية واول مشافته كفخته حيل وكلتله كوم بدل كافي عاد تضرب بالطوبه فلشت الحايط
صارت مغربية يله طب جوة
دخلت وبوجهها نزعت العباية وراحت على ام كاطع تنطيها الدوى وتتطمن عليها
صاحت على ميلاد تسويلها جاي
وظلت تسولف وياها وهي بس عيونها تتحرك وتردد هذا سعد حيموتني فلشه لراسي
--- شفتي عمه بله هاي من كل عقلها بعمري والها واهس تخلف والله بطرانه
بس ماشا الله عمه شلون بنيه حليوة جايبه ولاتكولين بتها
تخبل
عود فرحانه مسميتها نهاية حتى بعد ماتخلف بس بتها الجبيرة سهير ماقابله
مسميتها نورة
فدوة شلون نورة
والله صفنت عمة على البنات روج رايحة وروج جايه هذني شوكت يتزوجن ومنو يتزوجهن هي سهير بتها يمكن بكد عهود لو اكبر بسنة
يمكن سنة تحبل وسنة تكعد والله حيرة ماتفكر منو يعيشهن ورجلها ليل نهار بالبيت
ام كاطع مجاوبتها جانت متمددة صفح وصايرة خشبتين يابسه
كلبتها فخرية وعدلت منامها
--كلتلها شوفي البيت جنه فارغ من اتزوجن البنات
-- اي عمة والله ومسحت دموعها
البنات كسرن ظهري هيجي عافني
يمه والله مكانهن خالي اخذن الضحكة والفرحة من هالبيت
خو هاي رحاب من يوم اللي جابت مامرت عليه
مااعرف شجرالها
واني هم لابيه اعوفج واروح عليها
ولا بيه اخذج ويايه
التوبه من طلعة البارحة شفتي شصار بيج
هاي عود هيجي زيارة سريعة رحنا وجينا انت كلش تعبت
--- لايمه بعد مابيه اطلع
جابت ميلاد استكانه جاي وجتي
صارت عصبيه عليها امها
شنو استكانه من شوكت هيجي اسوي اني
--- ماما هو منو حيشرب جاي ! بس انت
اندارت عليها فخربة وعينها وكعت على فراش رجلها ونزلت دموعها
وزمت شفايفها وكالت ميخالف تجيبين الصينية مثل كل مرة
وراحت سوت مثل مجانت قبل تحضر كل عصرية
حضرت الصينية وحطت بيها كاسة جبيرة وفرقت بيها الاستكاين ودارت عليهن مي حار من الكتلي وبصفه ماعون كعك ابو السمسم والشكردانة
وجتي
ام كاطع جانت غافية بس هم كعدت يمها وتعاين من بعيد لبعيد على طرف التلفزيون جان طالع كارتون والجهال ديباوعون صاحتهم يشربون جاي وحليب وكعك
اجوي على السريع جابوا كلاصاتهم وصبوا وراحوا
كامت شالت الصينية وصفنت على نفسها
جانت شابه احلى من كريمة بهوايه
بس هم هوايه سمنت وعرضت
وظفيرتها تخللها الشيب شويه منا ومناك
وملامحها
ظلت تباوع على نفسها هوايه وهي شايله الصينية
شبالعجل مات كاطع وعافها ارمله ؟
شبالعجل فخرية مر هيجي العمر وخلص قهر بقهر
شفهمتي منه وشعرفتي ...
