من دكت الساعة بالعشرة
رحاب جمدت بمكانها
عيونها جفلت ومعرفت شتسوي
معقولة ياربي اربع ساعات وهمه ماكو وين راحو!!
ظلت كل الافكار السيئة تحيط بيها
وبدرية تلوب ماتعرف شتسوي
حرات ومابقت مكان مادورت بيه
اخر شي دخلت للحضرة دور مرة لخ
ومددت رجليها وانتجت على الحايط من شدة التعب
وظلت اتباوع على مرقد الامام
صفنت عليه وكالتله دخيلك ماترجعني فشلانه
معقولة اطلع منك وايدي فارغة
سيرت عليك جدك الحسين حبيب الله
تكون تنام بتي بحضني الليلة
وظلت تندعي وتحجي وتعاتب وعبايتها توكع وترجعها بدموعها
الى ان ماحست بنفسها غفت ثواني
وحلمت
كانه اياد راجع يمشي عليها والدنيا ليل
نفس اياد بابتسامته الهادئة ونظرته الحنونة
لابس قميض ابيض وبنطلون سمائي
ولاف على ركبته يجماغ اخضر نفس لفة زهير من يلفها داير مداير ركبته بالشتا
اجاها اياد كايد قيم وهي صغيرة جنها عمرها اربع سنين
وفزت بدرية من صاحوا عليها
شعرج طالع خالة
فتحت عينيها وانتبهت على نفسها
عرفت انه غفت وهي دتكوم
صاح مايكروفون الاذاعة
تم العثور على الطفلين قيم اياد وعباس فاضل واستلامهما من قبل والد الطفل عباس
ماعت روحها بدرية
وكامت تمتمت هاي بتي
لكوها
هاي قيم هاي بتي
وماتدري شلون ركضت وطلعت ولمحت مرة بعبايتها تركض
عرفتها رحاب من طولها
هداءت وهي راحت
عرفت بداخلها بتها بخير
اياد جابه الها
--الف رحمة على روحك ,عمرك ماعفتني
وتحس بيه بكل شغلة تصير
فاضل جان حاط عبوسي وبحضنه على الكرسي المتحرك
والشرطي وابن خاله لازمين قيم بيدهم
ركضت رحاب على ابنها حضنته وبوسته ودموعها تجري عليه
وبنفس الوقت تجر قيم من ايد الشرطي تكله اني خالتها
وفاضل يكللها على كيفج رحاب الشرطي هواللي جابها
---ماعرفتوا وين جانوا ومنو ماخذهم برة الامام؟
جاوبها الشرطي بالي افتهمه من حجي قيم
وصلت بدرية وضمت قيم الها حيل وهي تتمسده تكون سليمة مابيها شي
جانت الدنيا ليل وهي كوة تشوف بلا نظارات وعيونها كلها دموع
وظلت تندعي لضابط الشرطة
---الله ينطيك الصحة والعافية ويستر عليك وعلى اولادك الله يحفظكم يارب ........
البنية جان حلكها مبيض ومتيبس وعيون شبه محوله من الخوف والبجي
راسا طشت على وجهها مي من المطارة وظلت تفرك بيها وتغسلها
وعرفت امها انه سكرها صاعد ولازمها ابرة انسولين
فركض ابن خالة فاضل يروح يجيب السيارة حتى ياخذهم لاقرب مستشفى
جانت بدرية حاضنة قيم وتبجي كلمة مانطقت ورحاب تحاول تهديها هي وفاضل ان شاء الله ماكو شي
هسه يعالجوها
ظل فاضل يتشكر من ضابط الشرطة وافتهم منا السالفة
ومن صعدوا السيارة ظلوا يرددون عليها
---مابيها شي لايظل بالج ان شاء الله تصير زينه
نوع غريب من الطمانينة دخل بكلبها بدرية وهي تودع الحضرة الكاظمية بدموع الشكر
انه مارجعها خالية الوفاض
وانتبهت وهي حاطة بتها بحضنها ودتركز عليها زين خصوصا من يضرب ضوة الشارع عليهم
انه بتها عليها اثار ضرب وعض على زندها وايدها
وراحوا للمستشفى وكوة وبالواسطات والفلوس انطوها حقنة انسولين
فحصها الطبيب وطمنهم عليها ورجعوا
من رجعوا راحوا لبيت فخرية
الي الكل جان قلقهم عليهم خصوصا من اتصل فاضل وكال رايح وراهم وراها مارجع اتصل بعد
عهود وميلاد جانن يفترن بالحديقة
وفخرية منتجية على سعودي تكوم وتكعد بالممر
الكل ظل باله
حتى نورية
الي جتي صدفة تعايدهم عصرية هي واسما
هم خطية انقهرت عليهم بقت منتظرة الى ان يرجعون
اول ماوصلوا الكل جيت عليهم
والقلق جان ماكلهم اكل
ومتفاجئين بمنظر رحاب وبدرية
اكيد صاير شي
رحاب من شافت اهلها دموعها نزلت وهي تضحك وطمنهم انه ماكو شي
وابنها رجع الها
وعهود اخذت عبوسي الي نام بحضن امه بالطريق
وركضت هي اخذت عمار للغرفة حتى تنطي الدوا والحليب
والتموا الكل عليهم يسالون ها شكو شصاير
بدرية اخذت قيم ومددتها على جرباية فخرية واول مانزعت هدومها
فزن البنات من منظر بطنها
كله اثار الابر داير مداير البطن وحتى الافخاذ والزند
اثار بعضها خفيف وقديم وبعضها مزرك وبعضها حديث
ظلت عهود تباوع على قيم وميلاد وهمه مقهورات عليها وجتي اسما
باوعت عليها وطمنتها لامها انه ماعليها شي
وكلوها شجراذا عدكم
ويكون ني هذا احسن شي للسكري او حتى بيتنجان ني خلي من ترتاح تكعد تكرط بيه
ضحكت ميلاد على حجيها كالت شجر وبيتنجان ني شنو طلي ؟
كرصتها عهود من جوة وطلعتها من الغرفة
بقى الكل كاعد شي ساعتين منتظرين البنية تصحة وتحجيلهم القصة بالتفصيل
بعد ماسمعوا مختصر للموضوع الي نقله الهم ضابط الشرطة
صارت ب12 بالليل تقريبا والهوسه بعدها بالبيت وانتقلت السوالف للحديقة من انكطعت الكهرباء
سعد جان واكف برة وصاح على عمته انه سامي اجى خلي عمته تحضر نفسها
وطلعت نورية وهي ظلت تسولف ويه فخرية المنتجية على ميلاد
انه يخابروها يطمنوها على الجهال
والسوالف ماتحلى الا بالباب
وكامت ميلاد فتحت الباب زايد وصارت عينها على سامي وهو يفتح باب السيارة لامه
انبهرت بيه
بطوله وقيافته وسماره ونظرته الحادة الحزينه
وهمست ويه نفسها
حيل صارلي شكد مشايفته
يمكن خمس سنين لو اكثر
شكد متغير
صايير شخصية وجذاب
ظلت ميلاد
وهو حس بهاي النظرات
اندار عليها
وسلم
--مرحبا شلونكم
وخطف نظرة خاطفة عليها
وهي بقت مبتسمة
-- الحمد لله
محد انتبه عليها وهي صافنة والي شفعلها عتمة الليل لكن سعد جان شايل اللالة يم السيارة ويضوي المكان ل عمته واسما حتى يصعدون
ومن ديصعد سامي اخر شي
سلن على سعد ورفع ايده ديسلم عليهم
خطفف نظرة ثانيةلميلاد
نظره ثافبة صارت عين بعين
سلم وراح
ميلاد الي صارت 18 سنة قبل كم شهر
ودتمتحن بكلوريا
جانت مقررة اول ماتدخل للكلية تتزوج
محد جان يعرف بشنو تفكر ميلاد
هذه البنت الطموحة الي تضج بالحياة والعفوية
مكان اكو حد لسقف طموحاتها
جانت تشوف نفسها احلى اخواتها واكثرهم ذكاء وجراءة
يمكن لانه تربت بعيدا عن قيود ابوها
يمكن لاه حست بطعم الحرية المبكرة الي انحرموا منها خواتها
جانت تشوف في نفسها انه تختلف عن اخواتها بكلشي
بتفكيرها وبشكلها
وبكمية الجاذبية الي تكفي ان تدير اعناق الشباب من تفوت باي شارع
رادت تتخلص من حالة الفقر والخنكة مثل ماتسميها
الي جانت عايشتها بيت اهلها
مجان اكو شي يضايقها غير حالتهم المادية الصعبة
جانت يعجبها تكون مثل بت الرائد الفلاني
بت العميد الفلاني
جان يعجبها تتباهى مثل صديقاتها باخر موديل جنطة وحذاء
لو سترة جديدة ام الكتافية
وغيرها وغيرها
ووضعت في بالها
خطة انه لازم تحصل على طموحها بحياة مرفهة
واقصر الطرق لهذا الشي كان بالزواج
مثل مكانت تسمع عن فلانه تزوجت فلان وسوالها كذا وكذا
وفلانه انخطبت لفلان عنده سيارة مرسيدس ومابقى مكان ماخذها
جانتىمرات تسال امها انت ليش مو مثل ام فاضل
ليش مختاريتي رجال زنكين يدللج
اني ليش مو مثل وحده من بناتها
وامها تضحك على نفسها
وتتذكر شلون رضت بكاطع وفوكاها همه الي جانوا مراضين بيها
لذلك حطت ميلاد في بالها اسهل طريقة للزواج والاختيارات المفتوحة تكون بالكلية
ولازم يكون شخص بالمواصفات الي تريدها وانه تكمل حياتها وياه
بدون ماتشيل هم باجر
انه لازم تروح ويه عهود بهالحر تخبز وتتكسر اظافيرها
وتاخذ هدوم اخواتها القديمة لخالتها وتغير موديلها وتلبسها
لو تشتري احلى جنطة وحذاء بدون ماحد يكللها ماعندي
وهذا الشخص زين لازم تحصله من كلية زينة
والكلية الوينة ماتجي اذا مو معدل عالي
فكبت نفسها على الدراسة
جانت مراقبة فخرية وتربيتها الصارمة
منعت ميلاد او اصلا مجانت تفكر ان تحب او تسوي علاقة حتى لو بغرض الزواج وهي بعدها بالاعدادية
رجعت ساعتها لغرفتها وهي صافنة وتفكر
وترجع تتذكر سامي
وحطته تحت المجهر
جانت الكهرباء بعدها مجاية بس كل واحد راح لغرفته بدرية بقت يم اختها بغرفتها
وفاضل ورحاب بالصالة وكريم ويه سعد بغرفته
وميلاد وعهود بغرفتهم
عهود جانت تحضر للتخرج
خالتها خيطتلها كوستم
القميض جان قماشه جديد بس التنورة راحت اشترتها من البالات
اخت الجديدة
بما انه انتشرت البالات بالاسواق وصارت تجارة لهواية ناس
البالات هي ملابس مستعملة تجي من دول مختلفة بعضها متبرعين بيها لمنظمات خيرية هذه المنظمات ترسلها للدول الفقيرة والمحتاجة
وصارت تجارة انتشرت بشكل واسع بين الطبقات الفقيرة والمتوسطة
طبعا هواية اكو ناس جانت تحبها كونها بالاسم اجنبية على اعتبار كلشي اجنبي ماركة ممتازة
والكثير همين كانت نفسهم تكش منها خصوصا من يسمعون ان بعضها لاموات او مرضى وهكذا
جانت عهود تفتر بالغرفة تلملم اوراقها وملازمها
وادردم ويه نفسها
حايرة بلون الحذاء اسود تلبس لو تاخذ مالت رحاب الذهبي
الذهبي محلوة وياه الجواريب مو ميلاد؟
ميلاد متمددة على بطنها ورافعة رجليها وخيال اصابع اقدامها الصغبرة وهي تتراقص بالهواء
كان يشير سخريتها
فجانت مبتسمة وبالها يسرح بغير مكان بينما هي تكلب بكتاب الاحياء
---اكلج عهود بدت ميلاد تفتح باب للحوار ويه اختها
فكرج منو الي راد يخطف قيم وعبوسي!!
---والله مااعرف حالة غريبة بعد الله يعلم شنو حنشوف !!
زين عهوده بله سؤال
صدك عمة نورية ددور عروسة لسامي؟!!
--اي كالت اليوم حتى وصتني اشوف وحده من صديقاتي
--زين هو سامي يشبه نزار
يعني الله يفك اسرة ويرجعه بسلامة
نفس الطبع
لو يختلفون
كعدت عهود على حافة قريولتها وفكت شعرها وانتثرت الكفشة
صارت حارة وبدا العرك يصبعليهم
شالت المهفة الخوص وكعدت تهفي لنفسها
-والله شعري يرادله كص حسه طولان
وكام يلزك على ركبتي
لا طبعا مايشبهه
اصلا كلش يختلفون
---شلون يعني
--وليش تسالين شجابهم ابالج
ولو اني لكفتج صافنة مسنحة على سامي
--- مسنحة هههه صرتي مصرية
ولي مجنت صافنة عليه
بس استغربت من شفته
شكد متغير
لو اشوفه بالشارع مااعرفه
تدرين من قبل لايتاسر نزار اني مشايفتة
من يوم العركة يعني
جانت تحجي عنه وتوصفه وشلون صاير رجال ونظراته غريبة
تحجي عنه بحماس
وكلما زاد حماسها زاد ضيق عيون عهود عليها
---بابا انت شنو!!
يعني بشنو تفكرين بله !
كتلج هم الزواج؟!
---اي اريد اتزوج اخلص من هالعيشة الفكر
---احمدي ربج واشكريه ناس تتحسر على وضعج
اشرت بايدها ميلاد انه معاجبها الكلام
لكن عهود ارتخت على جربايتها وصفنت على خيال البنكة بالسكف
سامي مايسمع لاهله مو مثل نزار كلشي اي اي وصار
يعني تختلف شخصيتهم
بس هو كلش حنين وكلبه طيب
----يكولون العصبي دائما كلبه طيب
--- اي صحيح بس منعزل هم عن اهله
وهم مااتذكر عنده هواية اصدقاء
بس واندارت على اختها
وحطت ايدها جوه راسها كالت
-- بس هو ابو بنات درجة اولى تدرين لو لا
ليل ونهار يقصقص وياهن بالتلفون
وانت مخبلة اذا فكرتي بيه
نسيتي ياثولة جان يحب رحاب
---هاي شبيج انت راسا سويتيها افكر بيه وعلاقة ويحب اختي
اعرف جان يحب رحاب
ورحاب اتزوجت وعدها تلاث جهال والعدد اشرته بااصابيع ايدها اليمنى وهي تكلب بالكتاب
---انت من كل عقلج يعني صدك تحجين
لو عاجبج هيجي الزواج جان كلتي لامي تقبل على هذا مااعرف شسمه الي خطبج قبل فترة
---بشرفج وراسا كعدت عدل
منو خطبني قبل فترة وليش محد كلي
--- شمدريني خالة بدرية كالت لامج سدي الموضوع خليها تكمل دراسة زواج شنو
---وماعرفتي منو؟
--- كالو اسمه بس نسيت يمكن دريد مااعرف
---اهووو هذا دريد الي بيتهم براس الفرع عنده كوستر مو؟
دخلي يطير احسن ما كالولي
--- عيني اميرة ديانا
طفي اللالة خلي انام
وظلت ادردم ويه نفسها على اساس شلون حتجرعين زهير ونورية ثاني يوم تنهزمين بطرك الاتك
وهي كانت تطفيها اجتي الكهرباء
كامت بطريقها شغلت الثلاجة والكهربائيات
لانه مرات من تجي الكهرباء تجي قوية تحرك غراض البيت
رجعت ميلاد لغرفتها وهي تحاول تطرد نظرة سامي الاخيرة من بالها
في حين جانت دموع عهود تنزل بهدوء وبكل الم من تتذكر نزار
ماتعرف ان كانت تبجي تشتاقله
لو تبجي على ايامها وياه
لو تبجي على نفسها !!
,وعلى ساعة ستة الصبح
التموا على قيم وهي بدت تحجي الي صار وياها
هذه الطفلة المريضة
انقذت نفسها وابن بت خالتها من خطف غير متوقع
اول مضايعة من امها مدورة عليها بالحضرة ومفترة تصيح عليها
اخر شي من عبوسي كام يبجي مضوجها
ماخذته ورايحة واكفىة يم الكيشوانية
بس عبوسي خابص الدنيا بالبجي ومساكت خايف من الهوسة
وجتي مرة سالتهم شبيكم
خايفة منها قيم وكالتها يريد امه هسه تجي
المرة كايلتلها
اذا انتوا ضايعين امشي اخذكم للاذاعة حتى يصيحون باسمكم
وهمه يجون ياخذوكم
