شموع معطرة
في داخل كل منا حلم طفولي جميل
يحمل كل البراءة الي ولدت معنا بالفطرة
في داخل كل منا ذلك الطفل القابع داخل نفوسنا الصغيرة
التي مهما كبرت ومهمها مكبرنا لانزال ننتظر ذلك الامل كي يصبح حقيقة يوما ما
وان كنا في معظم الاحيان واثقين انه لن يحدث
وفي داخل كل فتاة مهمها كبرت
ومهمها اضاف لها العمر من تجارب الحياة المرة
تبقىى هنالك صغيرة نائمة في داخلها
طفلة حين كان كل همها دمية تضمها
او حذاء العيد الجديد براءحته المميزة
مهمها كبرنا تبقى تلك الطفلة تأن بصمت او بخشوع
ساعة ترقد في سبات وساعات تظهر للوجود
قيم كانت تحمل هذه الطفولة معها اينما كانت
الطفلة الي عاشت حياة ملئية بتناقضات ومواقف اكبر من عمرها بكثير
في البيت كان والدها بطلا شهما شجاعا مات شهيدا
وفي المدرسة كانه عينه المجرم الخائن المعدوم
في البيت امها التي قضت عمرها في ذكرى حب خالد وهي تفنيه لاجل اولادها
وفي الخارج كانت تلك الخياطة التي تطرق الابواب وطلبا للرزق
عاشت مخاوف مبكره حفرت في عميق ذاكرتها الخوف والرهبه
وانفجار التيقظ والانتباه
لم تستطع ابدا ان تنسى تلك اللحظات الرهيبة
حين كانت صغيرة جدا تختبئ داخل الدولاب عندما تطرق الابواب بعنف من قبل عناصر الامن
نعم كان لطرقتهم صوت معروف
في اي وقت كانوا يمرون
في عتمة الليل وفي فجرصباحه
ينشرون الرعب بين ثنايا الصوت المخبوت لامها وهي فزعة تجري لا تعرف كيف تتصرف
القلق والخوف يجرعان كاسهمها من عينيها
تحاول طمانة الصغيرين بابتسامة مرتجفة
ساعود لكم لاتقلقوا
كونوا اقوياء وشجعان كوالدكم
وبالفعل كانت تعود
لكن في كل مرة يقتادونها
كانت تعود لهم منكسرة
تبكي لايام وايام داخل حجرتها الباردة
تبكي بصراخ عالي احيانا
واحيانا بصمت متقطع
كانت قيم تراقب امها بعينيها الصغيرين
كيف تتلوى من الالم والخوف والبرد والمرض
ذلك الشعور المقزز ان تذهب للمجهول
ولاتعرف صنيعهم بها
لاتعرف هذه المرة ميف ومتى ستعود
كانت تجد في يد خالها علاء
يد المنقذ
يد الرسول الذي بعثه الله كي يحميهم
تضم راسها بين حنايا زوجته الطيبة
وهي تحاول ان تجمعهم باولادها
لذلك عرفت قيم
منذ نعومتها على عالمنا ذو الوجهين
عاشت الوجه الاسوء منه اولا
حملت معها هم مرض السكري بين حنايا جسدها
في حين حمل الاطفال سكاكرهم بجيوبهم الصغيرة وايديهم المتسخة باللعب
حمل الاطفال ضجة الحياة
وحملت هي مرض الموت البطيئ
هكذا كانت طفولة احداهن !!!
تتذكر قيم من جانت امهم توصيهم يسمعون كلام امل لحد ماترجع
وتوصي كريم يدير باله على اخته وهو رجال البيت
تتذكر دموع الشجاعة بعيون كريم وهو لازمها حيل ويباوع على امه وهي تروح للتحقيق
خايف ومرعوب لكن يدعي الشجاعة و يمسح الدمعة بسرعة ويمنع شفته من الارتجاف
يطمنها انه مايعوفها وحدها
كبر وياها قبل موعده وحس بالمسؤولية
تتذكر من جانت تشوف العصبية والصياح والعياط الي تعانيه امها من تجي تكللها ماما المعلمة تكولي انت ابوج مجرم وخاين وجبان
وهي تكللها ماما ميخالف اتحملي
همه مايعرفون بابا زين
بينما هي نفسها تنهار بعيد عنهم
قررت في يومها ان تواجه العالم لوحدها
وهي بعمر الثمان سنوات
بدات تقف ضد وجه العالم القاسي بيديها الصغيرة
مرادت تشوف عيون امها الحزينه من تشتكي الها
فضمت كلشي بكلبها وهي تبتسم فرحانه من تسمعها تكول لخالتها
جازوا منها بعد مايضوجوها
في حين هي الي جازت بعد ماتهتم ولاتنقل الي صار
هكذا بلور هذا العالم هذه الشخصية الصغيرة الي اتحملت الاستهزاء بعدة وجوه
مرة كان بسبب اسمها
وكانت ترد بابتسامة
ومرة كان بسبب قوامها لنحافته
وكانت تضغط على نفسها بالاكل لحد التقيا
ومرات كثيرة
ولعزلتها عن مشاركة الاطفال لعبهم وخططهم ومكرهم
ماتذكر قيم في يوم انها دقت جرس البيبان للجوارين وهربت مثل روان
ولا في يوم رشت مي عليهم وهربت مثل كريم
كانت على طول خايفة من النتائج انه ماتتحملها!!
لاتزال تروي وتذكر اول مرة فقدت بيها الثقة بنفسها
وكانت صغيرة وناعمة
وكيف اتعرضت للضحك والسخرية عليها من الاطفال وياها
من ركضت مثلهم مهزومة من المطر واتزحلكت ووكعت في حفرة الطين
وانكشفت بعض مناطق جسمها المشوهة بالابر
واول مرة ايضا عرفت بيها انهم فقرا
من عايروها الجهال لانه لبست نفس هدوم العيد تلاث ايام مو يومية قاط
ومن اول مرة عرفت معنى الحرمان
جانت في في كثيرمن الاحيان من تشوف نظيراتها يطلعن من المدرسة يصرخن بابا بابا وياخذوهم بالحضن
في حين كانت تحلم تنادي همسا كلمة بابا
بابا البطل الي ماشافت صورته معلقة على جدران المنزل مثل بقية الابطال
ولاكدرت في يوم ترسم خيال وجهه او ملامحه الجميلة !
كانت تتخيله في كل الشخصيات الكارتونية
يشبه ابو ساندي بيل
ابو جورجي
لو ابو سهى ومنى صديقاتها
كانت تتخيل مروره عليها من الجنة بخفية خوفا عليها من التعذيب
هكذا كانت طفولة احداهن!!
صقلت الاقدار القاسية شخصية قيم الناعمة
وبرز ذكائها وشجاعتها
من يشوفها يتخيلها عليلة عديمة الحيلة صامتة وهزيلة
بينما حملت هذا العالم الكبير على اكتفاها بل واتزن عليه ايضا
نعم هكذا كانت طفولة قيم ولربما المزيد!
كانت ولازالت ترسم لنفسها مستقبل مشرق
تؤمن بان الله سيعوضها كل ذلك الحرمان الي مرت بيه
لانه المعادلة يجب ان تكون صحيحة بنظرها
لا تعرف ان الاقدار رسمت لها شيئا اخر
تذكرت
عندما مرت بالتكسي لاول مرة لكليتها
كانت نافذة جديدة لحياتها البريئة
دخلت للكلية وكانت اللافت بيضاء ة مكتوبة باللون الاخضر
ممرترابي يسير على يمينك حيث كلية الادارة والاقتصاد جامعة بغداد
وعلى يسار بين الاشجار والنخيل قبعت لافتة كلية القانون
مشت وهي تتطلع على الهوسة الي تتوسط الساحة االصغيرة بين الكليتين
الكافتيريا الي كانت تجمع الطلاب
ومكتب استنساخ
حملت اوراقها وراحت تقدم
المفروض روان كانت تنتظرها يكملون المعاملة سوى
لكن صدفت عدها محاضرات
فرافقها كريم اخوها
يمشي ويعدل بنطلونه ويرفع هامته قدر مايستطيع
مشوا للتسجيل الي كان على يسار الكلية
غرفة قديمة متسخة تعج بالاوراق القديمة والموظفات القديمات كلش كان الزمن نساهم وتركهم هنا من نهاية الثمانيات
اتذكرت صورة عهود الي كانت مطابقة نوعا ما الهم
حتى كريم كال الها دوري بلكت تشوفيها خاتلة ليورة هههه
وبدوا ينظرون الى شباك الاقسام المتفرعة من قسم التسجيل
الاحصاء ,المحاسبة , ادارة الاعمال وغيرها
سالها كريم قدمي فايلج شوفي يكلولج
فراحت قدمت
من عرف الموظف الي يشتغل هناك بالكوة معدلها
صاح حتى يسمعوها وسط الهوسة الي تحيط بيه وبيها
ووسط الايدي الي تنمد يمنى ويسرى
انت يحقلج تقدمين اي قسم تريدين
وطبعا بتوصية الاهل قدمت الى قسم المحاسبة
بعدها بدى كريم يخلص الاجراءات
استنساخ وطبع
وصورة ومرة لخ استنساخ
ونسخة من كلشي اهمها البطاقة التموينية
وبعد ساعتين ونص
بدت قيم تمطر عرقا بسبب الحر الشديد والزحام
دخلت بتنورتها العريضة وكانت اول وحدة من البنات من يلبس موديل التنورة السمجة والتون
القميص وتحته يلك بردن قصيرة
كان الموديل توه نازل للسوك
بعدما خلصوا اتجهوا الى يسار الممرات
زكانت قيم تتطلع الى كليتها الجديدة شافتها كلش حلوة
تتوسطها حديقة صغيرة
وسقف واطي يفصل بين المرحلتين جمع الطلاب عليه الكراسي واجتمعوا حول بعضهم
راحوا كعدوا بكافتيريا الادارة للاستراحة
كانت الكافتيريا مفتوحة من البابيين وهي تربط قسمين للكلية
اقسام المحاسبة والاقتصاد بالاحصاء والادارة
فكانت ممر للداخل والخارج
بينما كريم كان يطلع بشغف على البنات وههن يروحن ويجن كانت قيم مدنكة تشعر ان العالم والشباب كلهم يباعون عليها
كانت صافنة وفاتحة حلكها على الطالبات
شلون كاعدات ويه زملائهن بنفس الطاولة والميز
هاي شلون اهلهم يقبلون هيجي تكعد!!
والمكياج واللبس القصير
والجنط والاحذية
جان موديل الجنطة الطويلة طلع
و راح موديل البوكس الي هي شايلتها
لازم تكول لامها
حتى تغيرهم
كان البعض يتطلع بالفعل لقيم
نحيفة وطويلة وخطواتها خجوله
صاحبه وجه مربع وعريض
وعيون واسعة ميزتها الرموش المبللة
كانت من ذاك النوع القليل من الاشخاص الي تتميز عيونهم بكثافة الرموش المنفردة والي تشعرك عند النظر الها انها مبلله
وبشامه صغيرة تحت العين اليمنى
ولانف مستقيم بدون انحناءات
وبشفتين هزيليتين
كان لون عيونها البنية يبين بالشمس اوضح
ويصبح تقريبا نفس لون بشرتها
الي هو مزيج من اللون الذهبي والبرونزي
واجمل مافيها كان اصابيعها الطويلة والنحيلة الرقيقة الناعمة بطيئة الحركة
عديمة الاظافر
عدلت حجابها وشمرت طرفي الشال حول رقبتها وكانت تسرق نظرات سريعة على المحيط وهي تشرب شويه شويه من بطل السفن في حين كان كريم خلص البطل الثاني
وكللها ها يلة نروح
هسه شويه ارتاحيتي من الحر!!
هزت راسها ومشت
المكانين الوحيدين الي تعرف بيهم قيم الاختلاط بالشباب
هو العيادة الطبية الشعبية والسوك
كانت تتخيل طلاب الكلية نوع اخر من الشباب
منزهين عن الاخطاء
مثقفين وواعين و و
وكذلك البنات
وهي تراقبهم يضحكون ويتشاقون بصوت عالي وسط الجوع
او يتجمعون على سيارة وسط الشارع المؤدي للمخرج
عرضة للناظرين
سرحت بنظرها وهي منتجية على شباك الفورت مالت الخط مالتها
يااا مرت ست شهور واكثر على دخولها الكلية
ابتسمت باستهزاء وهي تشوف طالبين ديمشون والجكاير بحلكهم وتتوسطهم بنية لابسة تنورتها للركبة
ابو الخط مالتهم هم صديق كريم ووياهم بالمنطقة اسمه تحسين كام يصيح
ها بعد اكو خاتونة مجاية
اندارت طيف صديقة قيم عليها وكلتلها ليش اتاخرتي بله اليوم هسه لومكبلة جان كلنا ميخالف
ابتسمت ورجعت تسرح بافكارها
مشكلة قيم كانت السرحان من وهي طالبة بالمدرسة ماتعرف شي اسمه انتبهي المعلمة او المدرسة تشرح
دائما تقرا وتعتمد على نفسها عود اذا مافهمت شي تسال
وهذه المشكلة صاحبتها بالكلية
طول المحاضرات كانت صافنة وسرحانه
ترسم عيون ودوائر وطيور
لو تكتب مقتطفات لاغاني عبد الحليم او نجاة او عمرو ذياب
وماتقرا الا قبل الامتحانات تكوم تركض ورة الطالبات ادور محضاراتهن تنقلهن
بذيج الفتر
كانت حفلات التخرج تقام يومية قسم وهذه يمكن كانت اخر حفلة
الهوسة المصاحبة لهذه الحفلات
والوقت الممتع الي يقضيه طلاب المرحلة الرابعة بالكلية قبل التخرج
كانت تجعل من هم في المرحلة الاولى يتوقون لهذا اليوم بكل صبر
اواخرايام الدوام كانت من اجمل الايام عند قيم وربما عند الكثيرين
حمل لون ورائحة ذات نكهه خاصة
خصوصا وهي الي كانت تحط ورد الكاردينيا بين ثنايا الوراقفي لفكسها
رجعت للبيت وظلت تمشي خطوات لبيت خالتها فخرية مثل ماوصتها امها الصبح حتتغدى ويه امها وكريم
اليوم اخر يوم وعهود حترجع بيتها بالليل
ومسوين عزيمة جبيرة
بطريق رجعتها لمحت سعد بالسيارة تفتر بدرابين المنطقة وكاعدة بصفة بنية
دنكت وكملت طريقها
وصلت ولحكت على كلبة جدر الدولمة
البيت جان هوسة وجهال رحاب يتراكضون منا ومناك وياهم بت سامي رشا
حلاة البيت بهوسته وجهاله
جان علاء كاعد يضحك وهو يفرغ مواعين الكباب
اني مصر انه سمير يتزوج لو هالسنة لو السنة الجاية مابيها مجال
و مالي علاقة اريد جهال بالبيت يملون عليه الضوجة والوحدة
باعت عليه امل واكلت لكمتها بصمت
بعد كل هذه السنين كانت لاتزال تتحسس من موضوع الحمل مع انه جميع افراد العائلة اصلا مو في بالهم الامر
كعدت بصف صديقتها روان وبدوا يتهامسون على الدوام
روان كانت بصف ثالث والثالث والاول يكون دوامهم واوفهم بنفس الايام من الاسبوع
والبنتين يقضون وقتهم سوى بالاوفات ماامكن
روان مكانت مثل قيم ابدا
كانت عايشة في عالم اخر
عالم الموسيقى والرسم والفن
كان عشقها الاغاني الاجنبية المجنونة
ميتاليكا وفرقة الباك ستريت بويز ومايكل بولتون
كانت ذاك النوع المهووس بالاسورات السوداء
والتقليعات الغريبة
كانت تاكل وتحجي وترفع نظارتها مع انه كان لها انف كبير مميز
دخل سعد وقطع الهوسة بصياحه بالمطبخ
جان يصيح على امه ويكللها يمه والله خزيتيني ياجاهل يشوفني بالشارع يكلي سعد امك تريدك ادري شتردين
خزيتيني والله خزيتيني قابل زعطوط وتايه بالشوارع ادورين عليه !!
ادري شتريدين بله
---ماتكلي انت وين جنت
وينك كلنا هنا ملمومين وانت ماكو
---ويني داافتر بالمنطقة
صاح عليه خاله
ولك ماكبرت انت!! شوربت وبعدك دور مدارس مال بنات ولك عيب دور على كد عمرك على الاقل اركد شويه
---لاتخاف عليه خالو من كل قطر اغنية عندي تشكيلة تخبل
صاحت عليه بدرية وثول فرحان يتباهى
---طبعا ابن اختج اسد ضرغام هههههههه
رجعت امه تصيح عليه وهي تناوش ميلاد جيس الصمون الثاني تاخذه للصالة
ماكتلي وين جنت
---مو كتلج افتر بالسيارة ويه صاحبي بالمنطقة
علقت قيم بصوت ساخر وهي تلف قطعة الكباب بالخبز اي ويه نهولة !!
طفرت اللكمة من خشم ميلاد وهي تضحك
---عزة نهولة الحولة هههههه هي هاي هم واحد يصادقها
---ولك يانهلة هاي بت ام نضال!! صاحت عليه خالته بدرية
هو عصب على ميلاد وكام يعيب عليها انه سمينة وتعلف مثل البقر
وهي تضحك عليه ويه روان وقيم
فاندار على قيم وانت شلونج على اساس !!
وحتى روان ماخلصت من لسانه
لكن وجود سمير لزمه شويه وغياب كريم خلاه يتمادى الى ان سكته خاله بكلمتين بالعظم اخذ لفتين وطلع
ظلت خالته ادردم عليه وفخرية تسكتها
مايجي من كلبها احد يحجي عليه ولوبالشقى
وكالتله والله مو كاطع الي مطلع عينه انت الي طلعتيها
بعد الغدا والجاي والجكاير
اتسحبت رحاب على كيف من غرفة عهود وبقى يمها نزار
وراحت لغرفة امها جان علاء كاعد ويه فخرية وامل وبدرية يتناقشون على موضوع رحاب
دخلت والخجل على وجهها وجلب بيها بشاريريد ربع يشتري ازبري
نور جرته واخذته ووجهها يقرا الف قلق وخوف
جانت خايفه اذا اتزوجت رحاب هم راح ترجع تتبهذل بين البيوت
لو تنجبر ترجع للمهجوم بيت خالها مثل ماتسميه سجن ابو غريب
كعدت على طرف الجرباية وكللها خالها انه هادي ابن خالة فاضل رايحله للمحل ويريد يتقدم لرحاب
وبين انه يريد يربي جهال اخوه وصديقه العزيز عليه
ويريد يتكفل باطفاله
وانت تعرفين هو عنده اربع بنات مو !!
--- اي خالو اعرف ودموعها نزلت
بس خالوا انت تعرف الموضوع مو هين واني مرايده زواج
لحد الان فاضل ويايه الله يرحمه ويحسن اليه
----خالو بعد انت بكيفج
اذا ماتريدين اني اردله خبر واكله ماكو قسمة والجهال مايضيعون وخالهم موجود
---لحظة شنو ماكو قسمة يمه فكري زين منو لاكيه زواج هالايام يمه بنات حديثات يتمنن الزواج
والولد معايزه شي
صح اهل فاضل متكفلين بيج وممقصرين بس مدايميلج
هياتها بدرية شسوولها اهل رجلها !!
سكتت رحاب ودنكت وهي تمسح خشمها ودموعها تكت بكل حرارة وصمت
كانت بدرية صافنة عليهة ودالغة تاخذها ودالغة تجيبها
قطع الصمت بخبر ثاني بلغه علاء الهم
---ها صدك اني ماحبيت اكللكم من البداية بس ابو غازي انطاكم عمره
---لا صدك تحجي علاء صاحت بدرية وهي تضرب ايد على ايد
وردت عليه اخته فخرية الى رحمة الله خطية بعده بعافيته ماوكع
----اي والله صح حتى ابنه من رحت عليهم كال مجان بيه شي
نايم بالليل الصبح مكعديه بلا نفس
--لازم نروح للفاتحة عيب منهم الناس ماقصروا ويانه
ولازم اخابرحنان خطية ابد ابد ماقصرت ويايه من رحنا لعمان
الف رحمه على روحه غازي حتى وهو ميت نفسه الطيبة ويايه
وذكرت قبل يومين باعت قطعة ذهب مشت امورها بيها
---خالو ليش ماكتيلي وطلع من جيبه علاء سفطة فلوس وناوشها اياه ماقبلت تاخذهن صاح نور وانطاها اياه
وهي تحلف ممحتاجة اهل فاضل مامقصرين ويايه
بس عمي هم مريض هالايام رجعتله الذبحه وملتهين بيه ديسفروه لعمان حتى يتعالج يمكن يسووله قسطره هناك هيجي كالت عمتي
وانت تعرف استحي اطلب منهم وهمه مخبوصين قابل اكللها وين المصرف
---خالو مو عيب هالحجي ليش ماتجين عليه صدك جذب انت ليش ماتحجين فخرية
---والله علاء توني عرفت مثلك والله ولاحاجيتلي
---هي اشبيكم والله ممحتاجة شي الحمد لله بيتي متروس تموينية والثلاجة مليانه
والنبي حتى من يدزون صناديق دجاج ولحم
مو ذتاك اليوم جبتلج يمه!
بس انتوا تعرفون يعني الواحد يحتاج مصرف جوة ايده
قاطعت كلامهم نورية وهي تمشي مترنحة على الجهتين كوة تصلب طولها
--صدك علاء ابو غازي مات شو هسه نور تكول
---اي تعالي ام سامي تعالي كعدي بمكاني
--شوكت هالحجي
---اليوم الصبح عبد الكريم خابرني
----الى رحمة الله لازم نروح الفاتحة فخرية ها
---اي لعد شلون
باجر غير علاء تاخذنا ؟
---اي ان شاء الله تحضرون نفسكم واني امر عليكم تجين انت هم بدرية مو
---اي اجي لعد لازم عيب من الناس الرجال خيره علينا من ايام الحرب شلون ننسى
فاشر لامل وكللها فد استكان جاي وقبل ماتكوم مرته صاحت فخرية على ميلاد تجددلهم الجايات
ماحجت ولا انطت راييها رحاب ذاك اليوم على موضوع هادي
رجعت للبيت ذاك اليوم مطمانه على اختها بتحسن علاقتها وية زوجها وانفراج الامل
باحتمالية حملها مرة ثانية
وانه حتى تكدر ترجع تمشي مثل قبل نزلولها فراش جوة لحد ماتصير تمام وترجع تصعد لغرفتها
اندارت على نور وهي كاعدة ليورة ويه الجهال من ديوصلهم سعد
بلكت الله ويصير عدها طفل ثاني خلال هالفترة خطية اتعذيت
----اي علواه والله
دعتلها نور وعيونها بالسما تريد الدعوة المستجابة الها هم ...
ورجعت تفكر بنفسها رحاب الي علقت الموضوع علمود الامتحانات وعلمود عمها ابو فاضل همين
ينتظرون رجعته بسلامة من عمان
بعد محرم وصفر رجعت نورية فتحت موضوع ميلاد ويه امها
رفضت ميلاد مهدي متحججة انه محافظات وماتريد تعيش برة بغداد
فراسا نورية وعدتها انه اذا قبلت بيه يجون يعيشون يمها وياخذون غرفة سامي
ومع ذلك رفضته ميلاد مره لخ
انقهرت عمتها واخذت على خاطرها هم من ميلاد هم من امها وكلتلها هاي صار ثاني مرة تردوني
فخرية جانت خايفة على بتها لايطلع مهدي مثل اخوه جعفر
من جانت تخابرها صاحبتها كرم ام فرح وتحجيلها
وشلون معاملة جان يعامل بتها بحيث ورة اسبوعين من الزواج خابرت على امها تبجي تريد الطلاك
شخصيته جانت محيرة وغريبة
مايعرف شيريد
يوم يحبها ويموت عليها
ويومين تلاثه ولايمه هاي مرته عروسه وشهر العسل
يعوفها من الصبح لليل ومن يرجع ينام على القنفة
عدى كمية المرواغة الي عنده
حست فرح انه ماتعرفه
مو هو نفسه الي جانت سنين تحجي وياه على التلفون ومتشوقه ومتلهفه عليه
يحمل في داخله عدة شخصيات
ماعرفت ويه اي وحده بيهم الي دتتعامل وياها
تكول لامها مرات جان يحسسني ملكة جمال العالم
ومرات يحسسني اني مو مرة يكلي انصدمت بيج!!
اني الي جنت حلم وامنية كومة شباب يكلي اي انصدمت بيج
جانت امها تفسرها انه يمكن خوفا منها حتى لاتشوف نفسها عليه
عدى انه ازعجها كلش بمقارنته كلشي بامريكا
هاي شنو العيشة هنا تعالي شوفي هناك بامريكا شوفي شلون عايشين وشلون وشلون
هم حاسبين نفسكم جنتوا عايشين
وصفلها الجنة الموعودة هناك
وبسبب خطا بالمعاملة الي هو نكرعليها وصورلها انه ماخذ الجنسية في حين كان هو منتظر استلامها
تاخرت فرح بسوريا وتاخر هو هم
فقررت ترجع لبغداد
على امل انه يكمل الاجراءات ويدز عليها بسفرها النهائي يمه
وهالمرة حيحول الفيزا الى عمان مو دمشق
رجعت فرح مكسورة خاطر واتوسلت باهلها تريد الطلاق
لكن وعلى الرغم بكسرة قلب اهلها ماقبلوا ظل الكل يطمنها انه حيتغير هذا شاب عاش حياة صعبة بايام رفح
وكضاها وحده برة بالغربة مامتعلم وجود امراءة بحياته
وهسه يتغير من تعاشرة وتتعرف عليه ويتعلم عليها وهي هم تتعلم على طبعه
مدامه ملتزم ومحافظ وماعنده مكسرات
لازايدة ولاناقصة
تصورا منهم الي ماعنده زايدة وناقصه راح يسعد بتهم ويعليها فوك الكمر!!
في حين كانت فرح تتمنى لو جان يشرب وسكران بس عشرته تكون حلوه من هو وصاحي
هذا لاهو هيج ولاهو هيج
مرار بمرار
رضخت لارادتهم ومكان الها متنفس غير صديقتها نيفين الي جانت دائما تحذرها منه
كالتلها فرح هذا مو مثلج ومايفيدج
بس الطلاق جان خيار كلش صعب وغير متاح بالنسبة الها في ذلك الوقت
هذه الامور خلت فخرية تتراجع عن التفكير باخوه
على الرغم من الفرق الشااسع بيناتهم
مهدي كان سبع وشايل مسؤلية عمته واخوه
واعتمد على نفسه من صغره وسواله تجارة باسمه
كان هادئ ومرتب ومثقف
حتى هو عجب ميلاد
لكن قلبها كان مع شخص اخر
كان مع عمران الي بدى يحجيلها عنه اكثر وعن اهله
وطبيعتهم الي تختلف نوعا ما عن طبيعة بيت اهلها
جان الاب محتوي اولاده الاربعة وبنته الوحيده
وبنفس الوقت فارض سيطرته وشخصيته القوية
كان عمران يحاول يعكس صورة ابوه على تصرفاته وكلامه
كان دائما يعلم ميلاد تصير نسخة شبه امه
فبدى يحسسه انه اذا كنت تقبلين بيه لازم تتعلمين الامور الي احبها
وطبعا ميلاد فهمت انه هذا عرض زواج غير مباشر
فبدت تمشي على رغبات حبيبها الي صارت طفلة صغيرة بين ايديه
عمران عوضها حنان الاخ الي يحاول ينصحها والي ماحست بيه ابدا
وغيرة الحبيب الي جانت تحلم بيه وتتمناه
جان يعلمها شلون ترد الموظفين بهدوء وبلباقة والابتعاد عن الاسلوب الجارح
او النظرات الغير لائقة
علمها شلون تكون من طبقى ارقى من طبقتها
جان ينتقد منظر ايديها من يشوفها ناشفة وهي تخجل تكله مو هوايه اغسل مواعين
وبدت تلبس جفوف حتى تبقى ناعمة ورقيقة
وكام يجيبلها من انواع الكريمات الموجودة بغرفة امه
وحتى في لبسها وطريقة مكياجها بدي ينطيها نصائح وهي تمشي عليها
الكل حس اكو تغيير عليها
لكن بمرور الوقت صارت ميلاد ميلاد مدمنة شي اسمه عمران
اتحول هذا الحب العفوي البسيط الى عشق متعب
في الاسبوع الي مايجي بي
تتمرض وتوكع بالفراش
في حين احيانا كانت تحس هو متقصد هذا الشي
كانت تتنفس الهوا عمران
تكعد تنتظر ساعات بالشباك من يجي
حتى من يحجي تحفظ كل حركة منه وتظل تعيدها ويه نفسها مرارا وتكرارا
تبتسم ويه نفسها بغبطة من تتذكر كلام الغزل الناعم الي تسمعه منه
تحس نفسها انثى بوجوده
اول مرة تحس نفسها اجمل امراءة بالعالم من يحجي عن اشتياقه الها
كانت تشوفه عالي بالسما
الشاب الي الكل تتمناه
ابن عائلة ووسيم جدا وراقي جدا ومثقف جدا
جان عنده طموح غير محدود
وجراءة غير محدودوة
هو الوحيد الي كان يسب النظام من كانوا يكعدون سوا
وجانت من خوفها تعوفه وتمشي هربا
كانت عيونه المبتسمه عالم ميلاد بحد ذاتها
اول مرة
وباول سلفة استلمتها
وهذا جان نهاية شهر السادس
راحت للربيعي كونه قريبه من المركز واشترت بيهن جنطة وحذاء اسود باطار جوزي
وبقى من عدها خمسة الاف انطتها لامها
جانت تلبسهم يوميه
ربما هذا اليوم الي حيجي بيهن عمران
لكن اسبوع اخر مااجى
وعلما اجى جانت كلش فرحانه بيه
وهو ايضا كانت الفرحة مبينة بعيونه
وبهذاك اليوم
مد اصابعه على ايدها على كيف
فزت واخترعت وسحبته
خافت كلش
وهو كام يضحك عليها
كالتله عمران اني جايين ناس يردوني
ابن عمتي الصغيرة الي حجيتلك عليها الله يرحمها
سكت ودنك راسه
حست بيه انقهر كلش وهو فعلا ضاج
كللها ميلاد لاتلويني من ايدي الي توجعني انت تعرفين اني هالسنة الجاية حبدي ادرس شلون اخطب واتزوج
انتظريني اخلص
على كد ما جانت فرحانه انه كللها انتظريني
على كد ماخافت من خافت من هذا الانتظار
بس يله ميخالف
هذا عمران
اتمنت ساعتها تحضنه وتضمه الها
وتشبع من ريحته الطيبة
ورجعت وهي رجليها مسايعتها الارض
طايرة للسما
ترددات عمران اله بدت تقل خصوصا بالصيف ودوام ماكو
وكامت ميلاد تحاسب نفسها على كل حجاية جان يحجيها
اخر مرة ذكرلها انه مايلوكلها السمن وانه هو يحب وحدة رشيقة خصوصا المراءة بعد الزواج كلش تسمن
هو مجان يكللها هذا الموضوع بشكل مباشر انما كان يشير الى فلانه جسمها يخبل
والى فلانه رشاقتها حلوة
وبدت ريجيم قاسي وياه رياضة
سابقا من جانت تنطفي الكهرباء تجر مخدتها وتتمد على الكاشي البارد لو تطلع بالحديقة وتشعل الراديو
هسه صارت تحط المسجل وكاسيتات عمرو ذياب تركص عليها
لو تكمز تلعب حبل
وياهو الي يشوفها جان يكللها ميلاد شكد حلو ضعفانه بينت ملامحج اكثر مر اكثر من شهرين وعمران ماكو
كان هذا الشي يعذبها اكثر
لابيها تسال عليه ولا بيها تتحمل ماتشوفه
نار واشتعلت بيها
بعدها بقترة مو قصيرة من عودة ابو فاضل للعراق وتحسنه من عمليته
زار هادي رحاب للبيت وجايب صوغة وياه كونه كان مرافق لابو فاضل برحلته العلاجية
وطبعا كونه رجال خلوق من كان يحجي وياها يوكف بالباب مايدخل والجهال داير مدايرة
ويدنك ومايخلي عينه بعينها من يحجي وياها
مجرد كللها كلمتين
ست رحاب اني اخ اذا تريدين انت
وزوج واب للجهال اذا انت تحبين
اني بس رغبتي تكون عيني على الولد الله شاهد
ماريد جهال اخويه يضيعون وان شاء الله مايضيعون وانت امهم
وهالمرة وبصوت مبحوح كوة خرج من حلكها
جاوبتها رحاب بعد التشكر منه انه هي عدها شرط موافقة زوجته على الموضوع
لانه هي صديقتها ومن يوم ما انفتح الموضوع ولامخابرتها ولاجاية تزورها
ابتسم ههادي
وكاللها اكيد ام زهراء قابلة واني فاتحتها بالموضوع وهي الي كالتلي اتوكل على الله
صفنت رحاب وجانت معتمدة على رده يمكن رادتها حجة رفض الزوجة حتى ماتصير
كللها خوش ان شاء الله نجي باجر نزوركم اني وام زهراء وتحجين وياها بنفسج
ابتسمت وكالتله هلا بيكم
وقبل ماتروح ويسلم عليها كالتله بس هم ضروري تاخذ موافقة بيت عمي
رجع عليها وكللها ام عباس قبل مااجيج اني حجيت ويه عمي وخالتي وهمه كلش رحبوا بالفكرة
اطمانت رحاب لهذا الرد
ووقبل المغرب اتصلت هي بنفسها بعمتها
بحجة تسال على ابو فاضل شلون صار
جانت عمتها مشغولة
لكن بطريقة سريعة
سالتها رحاب شنو رايج خالة بموضوع هادي
شو اني مترددة
مااعرف شكول
ولا دااعرف اتصرف
جاوبتها عمتها على استعجال اي عمة براحتج
الولد خوش ولد
ومحد يحن على جهالج مثله ولا راح تلكين ابد
صدكي
مابيها شي الزواج ستر ماماتي
وبدت تسولف ويه بناتها وحيدر علمود ابوه
حست رحاب عمتها مشغولة اترخصت منها
وماكو دقايق على كولة المصريين مسافة السكة
اندكت الباب وخوات فاضل الاثنين يمها
جانت رحاب وحدها ونور وبشار يم ام منة
وعباس ديلعب طوبة ويه الولد وعمار كاعد على الرصيف يلعب ورق كارتون ويه الجهال
اول مادخلوا حست رحاب جية خوات رجلها المرحوم مو خالية
راحت دتجيبلهم عصير
كالولها ماكو داعي السايق برة دينتظر هي حجايتين نحجيها ونروح
بس كوليلنا احنى بشنو مقصرين وياج
سكتت رحاب ماحجت راسا
بعدين دنكت كالت بتنهيده
حشاكم من التقصير محد مقصر ويايه
---محتاجة مصرف فلوس !
---لا ابد الحمد لله
---الجهال محتاجين شي ؟!!
---لا ابد كلشي تمام بس خير شنو هالسؤال
---مانعرف بعد ليش تريدين تجيبين غريب على فراش اخويه يعني
!!
اذا محتاجة مصرف من العشرة نسويلج مية الف
ماكو داعي ادورين دواج
ماتشوفين ابنج بطولج
اصلا حتى عيب
---ياغريب هذا رقية !!؟
اني المن جايبة غريب على فراش فاضل الله يرحمه
---موضوع هادي شنو لعد؟
---اول شي هو عرض عليه واني بعد مامنطية جواب
ولاتنسين ترة هو ابن خالتكم مو غريب وجان صديق روح بروح ويه المرحوم
صاحت فاكمة من يمها انسي الموضوع رحاب وعيب عليج تفكرين بزواج ورجال مستحيل اخلي ولد اخويه احد يريبهم
ماتستحين الولد توه مدفون توها خلصت السنة مالته وانت تكولين يازواج
وين صايره هاي شلون اجى من كلبج
بعد كل هذا الي سواه الج فاضل
بعد ماصعدج للسما وسواج ملكة واميرة
دمعت عيون رحاب وهي تتذكر زوجها شلون فعلا جانت بوجوده ملكة وشلون نزلت من عرشها من مات وصارت جارية يتصدقون عليها خواته
وظلت تحجي فاطمة وتكمل عليها رقية
ورحاب تتبلعم ماتريد تسوي مشاكل
وصلت درجة انه ياخذون جهالها منها بالقوة اذا فكرت بالزواج صدك
ويحرموها من المصروف
اخر شي بهدوء كلتلهم هذا كله حجي زايد
هذه حياتي واني حرةة بيها
اذا ردت اتزوج ام لا
وومحد يكدر يمد ايده على جهالي افتهمتوا
شاطن البنات وكامن يعيطن ركض عمار وشافهن يتعاركن ويه رحاب ويعيروها
منو من اهلج ورة مامات راحت اخذت رجال على زوجها
امج لو خالتج!!
شو كل وحده كاعدة ابيتها ومستورة
ضحكت رحاب وجوابها استفزهن اكثر
من كالت لرقية وانت ماجبت رجال غريب لجهالج!!
مو اخذت دكتور وخلفتي منه
!!
مو انت ذاك اليوم اتزوجت فاطمة وحامل من رجلج الجديد
ليش ماتحملتوا رياجيلكم وكعدتوا على راس جهالكم
وبكل صلافة يصيحن احنى وحد وانت وحد
وكبت عركة وعلى الصوت ركض عمار على نور
الي جتي انهدت عليهن
وراسا جيتت لزمت رقية من شعرها وسحلتها
بعد ماعايرتها كلتلها انت لاتدخلين ستري على روحج من اللططلة ببيوت العالم وعرفي اهلج منو وبعدين تعالي ادخلي بيناتنه
جانت نور تكفش بيهن وتصيح اي اني نغلة واني حشوفكم هاي التغلة شتوسي
فاطمة من شافت اختها انسحلت خافت على نفسها وانهزمت
انوبه رحاب كوة طلعت رقية من جوة ايد نور الي جانت اطول واضخم من عدهن
والاثنين حطتهن جوة ايدها
ادخل السايق وام منة ورحاب طلعوا رقية مملخة ربطتها وشعرها وحتى شككت هدومها
من الخنكة الي خنكتها الها نور
كوة كامت تتنفس
تبجي وتكح
ركبت السيارة وهي تتوعد لنور ورحاب
عصبت رحاب على نور على هذا التصرف
---لج انت مخبلة اكو وحده هيجي تتعارك
---شمدريني طلعت طلعت قهر كلبي بيهن كله
شكد اكرههن
لاتلوميني رحاب مااقبل احد يمسج بكلمة
وهنه لسانهن طويل
على اساس مايعرفون اهلي منو
غير رب العالمين خلاني علجة بحلوكهن
----استغفر الله ياربي روحي كومي غسلي
---خلي اسوى عشى للجهال
ساد الصمت ساعات
بعدها خابرت رحاب على بيت خالها علاء وحجت كلشي لامل حتى تحجيله ويكون بالصورة
ثاني يوم الصبح راسا رحاب خابرت عمتها وشكتلها كلشي
طبعا ام فاضل مارضت على الي سوته بناتها
واعتذرت من رحاب وكالتلها امسحيها بيه ومالج غرض باحد
تريدين زواج اتزوجي اني وعمج موافقين ومحد يكدر يحجي وياج
وحدتهن ماخذ اثنين رجوله وجايه تحاسبج شنو من صلافة هذه !!
لعد هنه ليش كل وحده بيهن ماكعدت على جهالها وسكتت لسانه نتعارك بالمحاكم ويه زوج رقية الاولاني
خو رجل فاطمة مو اجى وزرفلها البيت
شو محد حجى وكال عليهن يدورن رياجيل!!
معليج بيهن امي اني اعلمهن
اريد اشوف شنو هالجراءة وشلون يتصرفن من ورة ابوهن!!
كلام عمة رحاب ريحها حيل وطمنها اكثر
وخخلى الارتكاز اكثر بقرارها
وحسبتها على كلامه انه ماكو احد يجي يحب ولدها ويخاف عليهم اكثر من هادي!!
وبالفعل مثل ماوعدها هادي اجوي هو ومرته وبناته الاربعة بنفس اليوم العصرية
جانت زوجته ابتسامة حزينة على وجهها مو مثل كل مرة من تدخل بيتها
سحر جانت امراءة شديدة البياض لكن قصيرة نوعا ما
يتوسط وجهها المثلث الصغير ملامح باهتة غير واضحه
وفم واسع عريض غير بارز الشفاه
كانت في تكوينها شبه كبير من عهود
ربما هي اقصر منها
حتى انه بتها الجبيرة زهراء تقريبا جانت بطولها
انيقة جدا ومحتشمة بلبسها
صاحبة ابتسامة دائمة ولسان عسل
خدومة وقفت مع رحاب بكل ازماتها مثل زوجها تماما
من جوي كانوا محملين بالحلويات
ركض بشار عليها يحضنها ويبوسها وهي هم تحبه حضنته وبوسته
وطلعوا يلعبون ويه بناتها بس زهراء بقت ويه امها
قدمتلهم نور العصير والبتي فور
كعد يضحك هادي وكاللها ام عباس هاي امزهراء كدامج
اني هذه مو زوجتي
لا هذه امي واختي ورفيقة عمري مستحيل اكسر قلبها
وقسما بالله لو هي ماكايلة نعم ماجانت حجيت وياج بالموضوع
سحر احجي كولي
ابتسمت سحر بدون ماتظهر ملامح ابتسامتها وشربت العصير ودنكت
وهو ظل يباوع عليها منتظر جوابها
كالتله اي طبعا احنى ندور اجر ومرضاة الله
وماكو اعز منج رحاب وجهالج همه جهالي
افتهمت رحاب من نظرات عيونها انه هي قابلة لكن مرغمة
ابتسمت وماحجت شي
اترخص هادي حتى يعوف النسوان الصديقات يسولفن بيناتهن
ومن راح لزمت رحاب ايد سحر وكالتها سحر
يمكن احنى صديقات بشكل رسمي اكثر مما احنى حميمات يعني تعرفين شقصد
صداقة عائلية
وعمري مانسى وكفتج ويايه
وعمرج لاتتخيلين اريد اخرب بيتج
لو عيني على رجلج
الله شاهد عليه والعباس كفيلي
اذا فكرت في يوم بزوجج
وانا هسه من شفتج عرفت بيج مراضية من كل قلبج
وقبل ماتكمل حجايتها كامت تبجي سحر
دموعها نزلت وبدت تحجي بعبرة
كالتلها شوفي رحاب والله اني هم احبج ومثل اختي حاسبتج
انت ماتعرفين اني ماعندي اهل ببغداد
ومن امي وابويه ماتو ماضل لي احد غير هادي
هادي هذا كل حياتي
روحي بالدنيا
شوفي احنى مثل ماتعرفين من الديوانية
ابويه رجالفقير على كد حاله ومخلف 13 جاهل
تدرين قبل مايفكرون شلون تتربى الجهال امي الله يرحمها تخلف وتكول الكاع تربي
ماتدري احنى بالهم والغم تربينا
جان ابو هادي صديق ابويه مرات يمريمنا هو وولده
ومن هادي لبس عسكرية
نقله ابوه يدوام يمنا
وصار يمر علينا من ينزل مرات على السريع
امي الله يرحمه تحضرله جدورة اكل وخبز وكليجة وياخذهن وياه
علمود الطريق خطية ميلحك ينزل لاهله
من خلص عسكرية اجى هو وابوه كالوا نريد وحده من بناتك
احنا سبع بنات
وكل وحده عمرها 15 لو 16 سنة امي تزوجنا
جنا اني وخواتي اثنين نفس العمر
بس كال ابويه لامي اني من يمي عطت انه اريده
حتى امي دكتني وكتلتني كالت عيب بعد تكلين اريدن رجال
بس ابويه ماكسر بخاطرني زوجني اله عمري 16 سنة وانخطبت ومن صرت 17 سنة زفوني ورحت للنجف
من مات ابو هادي جينا لبغداد
تعرفين جانت الحياة غير شكل وهسه شكل
والله شفت الصيم والقهر والجوع
لحد ما وكف هادي على حيله
ويمين الله وانت مامحلفتني داريته مثل المي بالصينية والواحد يحجي الحق حلال عليه كلشي
عمره ام عباس والله ولامرة في يوم ضاربني
وانه اسمع خواتي يتشكن من رياجيلهن مشوفيهن الويل
اكول الف الحمد لله والشكر
وابوس ايدي وجه وكفى عليه
بس ربج ماراد ينطينا بس خلفة بنات
اني جنت اعرف هادي ينقهر من جنت اسفطهن وحدة ورة اللخ
واعرف بنفسه ولد خصوصا من اشوفه شلون كلبه يهف على ولد فاضل الله يرحمه
اكول خطية هم بنفسه
والحق ينحجي من جبت بتي الصغيرة كمت ابجي تدرين والله ماسويت سونار كلت ماريد اعرف اخاف تطلع بنية واظل الحمل كله ابجي
جنت اندعي تسع شهور يطلع الحمل الولد
بس شوي مصارت
وهو الله ينطيه على كد نيته يارب جان يزعل مني من يشوفني ابجي
يكلي بابا هذتي البنات رحمة من الله
هذني يخلن الجنة وابد لافي يوم كسر بخاطري ولاخاطربناته
وبيومها
ومسحت دموعها بعد مارحاب جابتلها مي وظلت تحضن بيها وتبوسها
بيوم الي جنت يمكم وسمعت نور تتوسل بيج ماترضين بسامي
اني هيجي على لاهيتي
مااعرف كل حجاية لكلبي احجيها اله
كتله يمكن ابن عمة رحاب سامي رايدها
وراها بيومين تلاثه اجاني حاجاني
وكلي هيجي وهيجي
ماريد غريب ياخذ رحاب اخاف ياذون الولد
وانت تعرفين معزة فاضل وجهاله شلونها عندي
زين انت شتكولين هم اجر وثواب وهم منها نجيب اخوان للبنات
شريد اجاوبه ام عباس شريد
عمره ماكسر بكلبي ولا بخاطري
واجاني ياخذ رايي ماكو هيجي رجال يحب مرته
جان يكدر ياخذ اي وحده بالسر بس هو اجاني وجايبلي محبس ذهب
وكلي اذا ماترضين مااغصب عليج انسيها
شلون اكسر بخاطره
طبعا كتله موافقة
شكول لعد ماجى من كلبي اكول لا ماريد وحده تشاركني بيك
وانه اعرفه حتى لو ينقهر يضم بكلبه مايحجي
كتله موافقة ومستعده اروح اكللها بلساني
شفت الفرحة بعيونه شلون لمعت
بس سجينة وصارت بقلبي
حتى خواتي ظلن يضحكن عليه
يكولن بس المخبلات هيجي يسون احنى ندور وره رياجيلنا وانت تروحين تسلميه بيدج
!!
سكتت رحاب وماحجت شي ووعدت صاحبتها ام زهراء انه عمرها ماتكسر بخاطرها
وهي حترفض لكن مو هسه
حتى لايحس اكو شي
خليها بعدين
الخبر جان مي بارد على كلب نور قبل كلب سحر
اطمانت انه رحاب مراح تتزوج
بعدها بشهرين تلاثة
اجى سامي ظهرية لبيت اهله
الي جان عايفه من ورة ماطلق مها مرته
جان جاي وكت غدا
رحب بيه امه وتهلل وجهها لملاكته
---جوعان يمه الغدا حاضر شلون تبسي مسويتلكم والله مكانك خالي اكعد اتغدى ويانه
----ابويه وانزار وينهم لعد
---ابوك بالجامع اليوم صلاة جمعة ونزار بسوك الغزل
---خوش لعد صبيلي خلي اكل
--ماتنتظرهم تتغدون سوى
--- لايمه اريد اكل وياج كعدي عندي حجايتين اريد اسولفهن الج
---كول يمه بس اريد اعرف ما ضجت هيجي عايش وحدك منو يداريك منو ياخذ باله عليك
والله حتى اسما هناك بالغربة متكرضمة عليك تكول بس اخذ الجنسية اسويلهم معاملة لاخوتي واسحبهم يمي
---سلميلي عليها هوايه حطيلي خضورات وخبز احب اكل التبسي ويه الخضرة
--صار بعيني
---شوفي يمه اريدج تحضرين نفسج نروح نخطب
---وي يمه
ضربت نورية على صدرها حيل
--ليش يمه ليش تتزوج خو رجع مرتك الاولانيه
---يوم هم راح نرجع لنفس الموضوع كتلكم ماريدها نفسي تلعب منها مرعبلة ومايفيد وياها ولايغزر كلشي
ماريدها
---والله البنية شريفة وحبابة ليش ماتريدها
---ماريدها وخلاص
تجين اخطب لو لا
اذا ماتريدين تجي مو مشكلة اخذ وحدة من عماتي
يطيرن من الفرح بس اطلب منهن شغلة
---ومنو هاي المسعدة الي راح تاخذها
---تخبل يمه تخبل صغيرونه وحلوة بت بنوت
اسمها هالة
---شكد عمرها هذه ؟
--19 سنة توها صف اول كلية
---ومنين عرفتها جانت تجيني للمحل شفتها وحبيتها
---واهلها منين ؟
---تروحين وتعرفيهم
ها شكلتي الخميس الجاي عليها؟
---الله كريم يمه الله كريم كالتها بصوت حزين ومكتوم
رجعت نورية خابرت على فخرية دتكللها علمود شغلة سامي وكل ظنها انه هم راح تحجي عن ميلاد
لكن من عرفت الموضوع يخض سامي وغير بنية اطمانت واسترسلت بالحجي وياها
وشجعتها خلي الولد يوشف نصيبه احسن من عيشته وحده
جانت ميلاد واكفة تتسنط لايكون الموضوع عليها
وراها افتهمت مو يمها السالفة رجعت لجربايتها والقهر كالتهل خلص الصيف وجيات عمران مصارت الا كل شهر مرة
صار هو يبتعد وهي تتعلق بيه اكثر
وفي يوم منهاية شهر كانون الثاني عام 2001
اتاخر عمران عليها
حتى للدوام مكام يجي رغم خلصة عطلة نص السنة
ظلت تحوص والقلق والغيرة اذتها حيل
كل ظنها انعجب بسهاد الطالبة الي وياه
وصارت صاحبته
راحت دورت باضبارته بالخفية واخذت رقم تلفونه من المعلومات الخاصه بيه
لانه هو مناطيها الها
ولا طلب تلفونها رغم مرور سنتين على علاقتهم
كانت ليلة خميس على جمعة
وسعد اتاخر وامها نايمة
سحبت التلفون على كيف من غرفة امها واتصلت عليه وهي ترجف
ايديها كانت ترتعش وحتى رجليها وصوتها ماكدر يطلع
دكت عليه واول مرة شاله صوت رجولي خشن سدته
خافت وظلت تفكر شتسوي
يمكن هذا ابوه
صارت ساعة دعش وجانت كاعدة تباوع برنامج مسابقات اغاني على تلفزيون الشباب
وكانت اغنية تملي معاك لعمروا ذياب
وجعها قلبها عليه اكثر
جانت كل اغنية بيها قصة حبها لعمران الي اتعلقت بيه يمكن حبته حتى اكثر من نفسها
ومهمها نبهتها معالي من تجنب المشاكل والابتعاد عنه مارضت
خافت عليها صديقتها انه هذا ديلعب عليها!!
بس مفاد اجى بعدها سعد وصبتله عشى
حجى بالتلفون شويه وسده ونام
وهي بقت على واهس التلفزيون دتباوع هالمرة الفلم الاجنبي وبالها ابد مو يمه
الى ان جرته مرة لخ وخابرت عليه
هالمره سمعت صوت ناعم كلش
واسلوب غريب
وهو يكللها الو
بصوت ناصي
كلبها دك
هو هذا صوته
رجعت سدته بوجهه وكامت ترجف من الخوف
جانت عينها على غرفة سعد لايكوم ويلكفها تخابر
رجعت دكت مرة ثانية
والصوت هو نفسه لعمران
كام يكللها لاتسديه
اني هم مشتاقلج
هي ابتسمت ويه روحها
وظلت اصابعها ترجف ومن الخوف ماطلع حسها
مجان يطلع صوتها
حاولت مكدرت
وظلت تسمعه وهو يحجي وعينها على الباب
لكن بعد الجملة الاولى والثانية
طلع مايقصدها
طلع عمران ديقصد غيرها
وبدى يحجي بطريقة وقحة
وهو دينتظر صاحبته الليلة الي تخابره
وبدى يتوسل بيها تحجي وياه ولاتشلع كلبه
ظلت ميلاد تفر براسها وهي تسمع الكلمات القذرة الي تطلع منه
والي يطلبها منها تسوي نفس الشي الي سوته قبل يومين
اشياء مقززة واباحيه!!!
وهو متعجب هالمرة طولت بالصمت
وكللها اخاف ماتكدرين تحجين عمتج يمج هم !!
هذا يعرف العائلة هماتين
كامت تبجي ميلاد ونزلت دموعها الحارة وهي تسمع سيل الكلمات الي بعمرها مسامعتها بحياتها
تمتمت وهي مخنوكة بحشرجتها اني ميلاد عمران!!!
وسدت التلفون
كامت تتلوى بفراشها ذيج الليلة
وظلت للصبح منايمة الى ان صبحت مريضة وواكعة بالفراش وحلكها كله فراكيس
