الفصل الخامس
من انتم!!؟
المقطع الاول
من انتم؟ ومتى استخلفكم الله ارضه!
من انتم وكيف تحكمون
باي دين هذا الذي تدينون
من انتم ومن اين جئتم لنا
اي رب هذا الذي تعبدون
اي ارض مسخة لفظت جذوركم
من اي ام نزقة كنتم رضعون
نعم قولوا لي من انتم!!
من خولكم ان تنصبوا محاكم الله على عباده
هذا يعيش وذاك يفنى
واطفالنا بين الاصلاب تقتلون
لم تستبيحوا اوطاننا ودمائنا واعراضنا فحسب
بل حتى انفسنا
خيالاتنا
احلامنا
شعورنا بان الغد افضل مات على ايديكم
قولوا لي هيا اجيبوا صرخاتي من انتم ؟
من اي حدب تنسلون ؟
من انتم حتى قتلتم ابي وانا لم اولد بعد
من انتم حتى جعلتم اطفالنا بين يتيم وفقير ومشرد
من انتم حتى بحكم الله رقابنا تقطعون
اي رب هذا الذي اباح لكم ان تقتلوا طفولتي
ان تصلبوا ابي
ان تنحروا اخي!!
ان يختفي زوجي في الظلام
ان تحترق امي وهي تلثم ثوب عبائتها ممسكة بااكياس الطعام
من انتم يامن زرعتم الموت في كل زاوية وشارع
اي عقيدة هذه لكم
لاتقواوا اننا نعبد نفس الله
فانا ربي رؤوف رحيم
وربكم ظالم قاتل لايرتوي من دمائنا
ربكم هذا وحش مجنون
يامركم بان تفنوا من يخالفكم
او حتى لايعرف من انتم
تقتلون لاشباع شهوتكم الشيطانية
تفجرون وتحرقون
اصبحتم انتم شبح الموت مترقب بين ثنايا الزمان والمكان
صرنا نخرج ونحن اننا اليوم بطريق اللاعودة
امتزجنا مع ذرات الغبار الي خنقتنا
انها انفاسكم العفنة تجوب الشوارع
تمتص الق الحياة
تمتص منا تلك الرغبة في العيش
كالجراد اينما حللتم بارض فيها تفسدون
صرنا كدمى متحركة
صارت الحياة امل... والعيش في ظلكم امنيه
حتى عندما نموت نكون محظوظين
ان عثروا لنا على جثه اة قبر
كم من شاب اغتيلت احلامه بحز راسه البريئ لانه فقط لايعرف من انتم
كم من طفلة تناثرت اشلائها واختلط لحمها ودمها ببقايا ثيابها
فقط لانها لم تعلم
انكم خلف تلكك الابواب بنا تتربصون
كم من ظفيرة محترقة توسدت الشوارغ الملغمة
كم من معول على مسطر الرصيف ينتظر صاحبه كي يناديه احدهم ليوم عمل
للقمة في فم ابنائه
ليدفع دينه
واذا بمعوله يطير مع راسه في السماء
لانكم قررتم انه ينتمي الى هذا المذهب او ذاك
لا لا هذه خدعة المذهب لم تنطلي علينا فعندنا الراس يباع بالدولار!!
من انتم!!
انت الشيطان مجذب لحيته
مرتديا عبائته
بالاموال تشترون اتباعكم
بالجنس والشهوة يقلدونكم
نعم كلنا نعرف من انتم
قيم!!
انا قيم ... الفتاة الوحيدة لامي
والاخت الوحيدة لاخي!!
اعدم والدي وانا لم اولد بعد
كنت لازلت اسبح في بحار جسد امي الدافئ
لم اكن اعرف اني ساولد يتيمه
لكني ايضا ولدت بصرخات مدوية
وبدل ان يسعدوا بي
كنت كاخر قطعة حية من والدي
اخر ذكرى منه
استقبلوني بالدموع
وبعبارة خطية جتي يتيمة للدنيا
ويامكثر الذين هم مثلي
ولدت
لاب نام مطمئنا تحت التراب دون حتى ان يعرف ان كنت صبيا ام بنت!!
ولدت في عام 80
الحرب العراقية كانت بادية للتو
والعراق كان في اجمل ايامه واتعس ايامه
كانت الحياة تضاد الموت
الحياة في ابتسامة الامهات وهن يحملن اطفالهن من خارج المستشفى
والموت في نهاية الشارع الاخر ملفوف بعلم عراقي
كانت مدينتي من اجمل المدن في المنطقة
وكنا من افضل الناس
عشت ايام طفولتي بين تضاد اخر
فانا سعيدة اني كنت امسك اطراف ثوب امي
ولكني اشعر بالحزن من تختفي نهار كامل واحيانا لايام
اذكر بيتنا الاول بيتنا الي نملكه والي ابويه كتبه باسم امي من تزوجها
كان خالي من الاثاث تقريبا
نعتمد على مادزه بيبتي ام ابويه النا
وعلى بيت اهل امي
خالي علاء او خالتي فخرية
عمرهم ماقصروا ويانه
وحتى من جانت ماما تغيب ساعات هواية لازم احد بيهم يكون يمنا
خالة فخرية خالة امل
رحاب او حتى عهود
من جنت صغيرة جنت كلش احب بيتنا
حديقتنا الصغيرة المهملة
يوم امي اداريها وايام تتركها
غرفنا الصغيرة وصدى الصياح بيها لانه معظم الاثاث جان متكوم بغرفة وحدة
بالصيف نلعب اني وكريم
كريم اخويه الاكبر مني
وصديق طفولتي وجان يلعب ويايه كل الالعاب
هههه حتى العاب البنات جان بالختلة وبالظهاري يلعبها ويايهة حتى لاحد يعيب عليه
جنت احب العب التوكي وسبع سيفونات
واحب العب الدعبل وياه والطنب ههه
كريم اكبر مني بسنيتن
بس جنت احسه بكبر بابا
لانه دائما جانت امي تلزم ايدة وتكوله كود اختك ابد لاتعوفه
وين مانطلع جانت تكله عينك على اختك
دير بالك عليها
امي الي جانت وجه مبتسم ويانه وحزين وحدها
جنت اراقبها من تختل بالغرفة وتعد تبجي وتشتكي لبابا
جانت حالة صورته بالكنتور تخاف تعلكها
تتعب هواية من تركض على العيشة والمستشفيات
اني جنت مريضة
طفلة معلولة مثل مايكولون
قليل اطلع بره والعب ويه الجهال
وحتى لو طلعت ابقى اتفرج عليهم اخاف العب اتعب وتظل امي تبجي عليه
اي ماتعرفون شكد شلعت قلبها من جنت صغيرة
نظراتي دائما متطلعة الى غيري
جنت اسرح بخيالي اكثر من واقعي
اتعلمت اعيش عالم طفولي اخر
اصدقاء اخرين خياليين
احجي وياهم والعب وياهم
لكن هذه الحالة استمرت ويايه للكبر وبقت فترة طويله
ارسم القصص واعيش بيها كبطله او راوية
ويمكن لاني قضيت معظم وقتي اسمع امي وهي ترويلي قصصهم
قصص حقيقية وخيالية
قصة طفولتها
وزواج اختها
وقصة حبها وحب بنات عائلتها
اتعلمت من امي طريقة الاصغاء وكيفية رواية الحكاية
جنا نجتمع كلنا بغرفة وحدة خصوصا بالشتا
بيتنا جان بارد معظم الوقت
امي جانت تخلي مكينتها والتلفزيون وتفرشلنا بالكاع وانام بصف الصوبة
ونسد الفتحات ببطانيات صغار
من يخلص الكارتون جنت اشمر ظفايري وراية اعلى المخدة واتمدد
توني غاسلة ومدفاية
واشيل الكتاب اراجع
بدشداشتي البازة الموردة ولازم لابسة جواريب
وكريم بصفي كاعد يحل واجب الرياضيات وبصفه صينية الجاي والكعك
الله لحد الان ريحة الدفو بخشمي!
جانت ايامانه صافية وحلوة
جان الجو صافي والدنيا هادئة
حتى الشوارع جانت حلوة ونظيفة
جنت احب اروح وياها للاورزدي واثعد وانزل من الدرج الكهربائي
افتر وراها بقسم الملابس واختل بين الهدوم
مجانت تخاف عليه احد ياخذني وينهزم
ولاجانت تخاف عليه اضيع هناك
كلهم الي يشتغلون مبتسمين
وعينهم عليه
جنت احب الضحكة بوجه امي من نخلص وهي مشتريتلنا كلشي
وصوت العلاليك الناعمة الزبدة احضنها واظل اشمشم بريحة الهدوم هههه
الله جنه العيد قبل يومين
جنت دائما الطفلة الوديعة البسيطة الجبانة ربما بعيون الاخرين
الى ان حدثت حادثتي ويه عباس بعد حرب ال91
من تهنا ورادت مرية غريبة تخطفنا
جانوا يخطفون الجهال حتى يكدون بيهم بغير محافظات
واتذكر وكتها الشرطة جانت هواية تلزم هيجي عصابات
تغيرت نظرة الكل عليه
وصار وجودي ممكن!!
القصة الي انذكرت بكل محافل اجتماعات العائلة للصديق والغريب
هذا الشي ركبلي جناحات جديدة اسمها الثقة بالنفس
جناحات عمري ماكدرت اطير بيها!!
وبعدين!!
من كبرت وبديت افهم
عرفت اني اختلف عن هواية بنات بعمري مو بس لانه مريضة بالسكري ولا لانه ابوي معدوم وعلية علامة اكس
لا لانه اتعود وصرت مااهتم
بالعكس
جانت امي دائما تكلي ابوج بطل
بس لانه متاخرا حسيت على نفسي انه جنت طفلة منعزلة
صارت عندي عادة غريبة وهي مراقبة حركات الناس وقراءة معانيهم
جنت اعرف المعلمة اليوم من تدخل علينا معصبة لو فرحانة متعاركة ويه زوجها لو ويه المديرة
جنت احس من صديقتي تسلم عليه وتقترب مني تريد شويه من لفتي
صارت كل التفاصيل تشدني وتجذبني
وخصوصا الايدين
مولعة بالانامل
اعرف اي نوع وطبيعة اي حياة يعيشها هذا الشخص
من ايديه
فهذه المدرسة مثلا كانت تعيش حياة قاسية قبل زواجها
اثار التعب مبين على ايدها
اتزوجت شخص مرتاح ماديا
فتحاول بكل طريقة اخفاء هذه الاثار
لاهي كادرة تصيرمن الطبقة الراقية
ولاهي كادرة تمحي ماتركته السنين
هذا الشاب الجالس امامي بالعيادة
ايده نظفية ومقلمه ناعمة وطويله ومفاصلة ظاهره
هذه كل حياته الدراسة والرياضيات
ويمكن مهندس او مبرمج حاسبات
وهكذا صرت اتميزبهذا الشي
جنت ولازلت اؤمن ان البنت الغبية هي التي تظهر للناس انها ذكية
ليش
لانه مجتمعنا هشكل
يحبون المراءة الي ماتفتهم وتعتمد على الرجل يمشيها يمنى ويسرة
لكني تربيت في كنف امراءة متحررة
امراءة اثبتت للناس كغيرها مئات
لا بل الاف ان المراءة تستطيع ان تعيش طول عمرها دون رجل
وتربي اطفالها ايضا افضل مايكون
دون ان يشيد احدهم بها
لانه اتعودوا عليها جبارة
لكن
ان وجد رجل وهم قله بهذه الصفات فهو عملة نادرة
فاليتم في زماننا هو يتم الام وليس الاب
والعائلة اصبحت تضيع دون ام في مجتمع اكل الرجال احدهم الاخر
مراهقتي كانت متعبة جدا
متقلبة في يوم ما انا راهبه معتكفة
وتاتي ايام لاانقطع عن سماع الاغاني الاجنبية وحتى الرقص!!
انعزلت اكثر واكثر
وصار شي واضح اني فاشلة اجتماعيا
كل اختلاطاتي كانت محصورة بين بيت خالتي فخرية وخالي علاء
ومرات قليلة جدا كنا نروح لبيت جدي لابويه
نشوف بيبي قبل ماتموت الله يرحمها
وعمتي الي ربما انا ورثت منها الكثير
لانه في مرة تستقبلنا استقبال حار
واخرى حتى سلام ماتسلم علينا
نعم كنت كذلك
يوم ما انسانة وديعه هادئة
واخرى ثائرة افكر بالهرب من واقع مرير
كل امنياتي كانت محصورة بالسفر
اي مكان خارج العراق
اي مكان
جنت اريد فقط اكسر القيود المكبلة
لكني عرفت فيما بعد ان هذه القيود
هي من قومتني!!
كانت احلامي تعبر المحيطات وتطوف الفضاءات
بينما لازالت اقدامي لاتعرف طريق العودة من السوق للبيت
بالفعل اكثر من مرة تهت اذا اخذ طريق نختصر
واكبر فشل الي كان بالاعدادية
بعد كل ال11 سنة بتفوق
فشلت بصف السادس
جتيني حالة الاكتفاء
مجنت اكدر اقره
من الزم الكتاب ادوخ وراسي يجعني وسكري يصعد
جنت متاملة بكلية زينة
لكن القدر صادف ان اقتنع باللحاق بصديقة طفولتي المقربة بت خالي علاء روان
روان الي جانت تختلف عني بكلشي الا بالعمر
كنا متقاربين نوعا ما هي بعمر كريم اكبر مني
بس جنت احب رفقتها
احب اعيش بعالمها الي ماجنت اكدر اخلقه حولي
جنت احب اسمع قصصها الجريئة عن صديقاتها
صديقاتها الغريبات الي عمري مافكرت اقترب من اي وحده منهن
لكن هي مكانت تهتم
حتى السحاقيات منهن
اي نعم لميس وميساء
جانت تحجيلي عنهم وكيف انه هي الوحيدة الي تقبل تحجي وياهم وبنات الشعبة كلها مقاطعيهم
جنت احاول اكسب جزء من الجراءة الي عدها
ولو جزء بسيط
لكني مع ذلك جنت احب اسمع واعيش بخيالي
جانت روان تحجيلي كلشي
نحجي سوا بلا توقف
جانت جادة كلش
وجنت حالمة كلش
مع ذلك مكانت تسخر مني ومن افكاري
واقعية والي يميزها جديتها وبلادة مشاعرها
عدها قدرة غريبة على التمسك بالدموع واللامبالاة
في اي موقف كنت انخرط اني بالبكاء في حين كانت مثل تمثال الشمع
صامتة بالكاد ترمش عينها
كنت ارسم واتفاعل ويه الرسمواقرا الروايات والقصص
وابكي واعيش الحالة
في حين كل همها كان متابعى برامج التوب 10 للاغاني
وشننو اخر فلم رعب طلع على التلفزيون
كنت مرات يعني مرات كثيرة اتمنى لو انا كنت اعيش حياتها
لكن هي ربما هي ماتعرف قيمة الي عدها
خالي علاء كان نعم الاب
حتى اليه
لذلك اتذكر في احدى المرات كنت جالسة بصف صديقتي كنا بالخامس ابتدائي دنكتب تعريف معركة جالديران وانتبهت صديقتي تكلي اليوم مااكدر ارجع وياج
كونا كنا نرجع سوى نتمشى ونظل نغني كل اغاني الكارتونات لو الاغاني النازلة ههه
الله اغاني السفرات نسميها
انا المسيجينة انا
وهي وهاي وهي
ياطير غني غني على جناحك طيرني
كلنا يريد بابا يريد
هيا هي هيلا هي هاي جانت المفضلة عندي لانه الكلمات بيها شبه مني ابحر بينا ابحر بينا ياعالم الاطفال!
اي وهواية هواية نظل الطريق كله نغني ونشبخ برجلينا ياهي الي تصير شبختها اكبر
اي اتذكر بذاك اليوم
كالتلي اليوم هم بابا حيجي عليه يوصلني
اوكف بالباب يم الفراشة اودعها وهي تصعد بسيارتهم البيضا بالصدر
كانه عروس بليلة زفتها!!
ظلت حسرة بكلبي
لاتتخيلون اليتيم مايحس انه ماعنده ب
لا كل تصرف ويمكن ابسط التفاصيل تحز بقلبه وتذبحه ذبح
مو بس اليتيم حتى الي ابوه موزين ومايحس بيهم
اتذكرميلاد من جانت تحجي لامي
جانت تحس باليتم مثلي تماما!!
يومها من زارنا خالي جانت الحرب خلصانة هالسنة
كعدت بصفه ودحست روحي بينه وبين روان
خالي من يكعد ثني وحدة من كباته ويكعد ياكل
هو راسا عرف عندي شي
سوالي لفة وانطانه اليه
جنت راجعة من المدرسة فظل يمسد على راسي ويضمني اله ويلعب بشرايطي البيض
كتله خالوا ورفعت عيني عليه
باوعلي نظرة عمري بحياتي مراح انساها
حسيت بيه ابويه صدك كلي عيون خالو
جانت مغوركة عينه يمكن عرف اني محتاجة حنانة
باسني وكلي كولشي شتريدين
كتله بعيوني البريئة ونظرتي الحزينة
انه يعجبني يجي عليه باسيارة يوصلني
مثل صديقتي!!
ضحك عليه كريم وكالي ها غوارة
طنكرت وظلوا هو وسمير يضحكون عليه
شرب مي وطبيعته جان يشرب من راس الصراحية وراسا امي تمدله الكلاص ههه
كلي صار خالو باجر اجي عليج
كتله خالو مو تنسى ضحك وبيدهالي بيها اكل من بعيد حضني مرة لخ ومااعرف مافتهمت شكال لامي
بس حسيت بنشوة نصر ساعتها على كريم وسمير
من ذاك اليوم
خالي علاء عمره انساني
ولحد الان هو ابويه الي الله عوضني بيه
جان بالاسبوع يجي مرة عليه لحد ماطبيت للسادس اعدادي
حتى هو الي جان يروح يشتريلي ملازم المواد
بعدها خالي كبر وكثرت مسءولياته
من دخلت كلية
جنت اميل للاشخاص الي عدهم نفوذ
هذا ابوه بالشرطة وذاك بالجيش وهذا بالمخابرات
يبووو جنت اخرب على اي واحد يشتغل بالامن
صح جنت اخاف منهم
بس جنت اتمنى ههه اعرف شغلة مستحيلة
يمكن لانه اريد اشعر بالامان
جنت اريدلي ظهر يحميني
الا ان تزحزح هذا الحلم وصار يقتصر على الحرس الي بالباب هههه
من تخرجت وللمانة حاولت ميلاد تعيني ورة حرب 2003
لكن هي جانت تكول مايحبوني ويعينون بس العرف والواسطات
حاولت الي ولكريم وحتى لسمير مصارت
لمعت في بالي شغلى المنظمات
بعد ماحجالها كريم لامي عن صديقه
بعد صراعات عديدة ومشاكل وشد وجذب
رحت على خالي وتوسلت بيه
وعادي راسا كام واجا ويايه
وطبعا كلمته ماتنزل للكاع
يم صغيرنا وجبيرنا
خالي حبيبي
عمري ماتمنيتله يوم انه يتاذى
عمري ماتمنيت دمعته وهو الي جان يمسح دمعتنا
يوم الي جتي رحاب علينا مكطوع نفسها وكالتنا سمير اتصوب
اني مابجيت على سمير بجيت على خالي
رفعت راسي للسما وبشهكة يتيم كتله ربي بعمري ماتمنيت شغلىة حتى من خاب املي وماحصلت الكلية الي اريدها
رضيت بقسمتك وسكتت
بس هالمرة لا
بدموعي الي جانت تفيض من عيونهي صرخت وانا ادعي بصوت اليتيم الي ماعرف طعم الابوه
كتله ارحم خالي بس هاي رايده منك
لانه اني اعرف سمير شنو بالنسبة اله
رحت ويه امي اركض ولساني ماوكف لحظة عن الدعاء
ماتحملت من شفت منظره متغطي بالدم
تعبت حيل وجان الجو مو مال طفل
اخذت ابن رحاب بعد ماتوسل بيها وسام ترجع بالجاهل
اني اخذته ورجعت
رحاب الي جنت طول عمري اعتبرها ايقونة الرومانسية والعالم الخيالي الاسطوري
الانسانة الي طلعت بالخطا بهذا الزمن
عيونها المنذهلة تمسح بيهن وهي تردد الكلام بسرعة بسرعة وتعيد وتكركر وترجع تمسح خشمها وعيونها وحلكها
محد جان مستوعب
كلي الي كالته عن بسام جنت اعرفه ومسويته
وهناك استمرت العملية عدة ساعات لريم زوجة سمير لكن سمير طلع قبلها وكانت حالته بعدها مو مستقرة تحت المراقبة والعناية المركزة
الممر الي كانت بيه صالة العمليات انملئ من افراد العائلتين
رجعت للبيت وحدي
تخذت تكسي ورجعت خالة بسام بحضني
حتى مسالت منو يوصلني
كانه هالمرة ردت اختبر استجابة دعائي العميق
واني اعرف رب العالمين مايرد الدعاء من القلب الصادق
وصلت للبيت وميلاد اشرتلي انه مااحجي
اخذت بسام وبوجهي لغرفتها شربته مميته وبدلتله وعفته ينام ورحت بغرفة خالتي فخرية اتمددت حتى انام
من سالتني خالتي كتلها طالعين علمود عرس سميرديحضرون ماحجت ولاسالتني
خالتي فخرية ظلت كاعدة بالهول وحدها دتباوع تلفزيون
وميلاد كاعدة على الانترنيت تسولف ويه عراق...
جنت اعرفبيها لانه جانت تحجي كدامي واني كاعدة
يعرفون بيه بير وصندوق مقفول الي عندي مايطلع
امي تكول مثل ابوج
مات وماكدروا يطلعون منه حجاية!!
الاطباء قبل فترة حذرونا انه خالتي حالتها تعبانه وقلبها مايتحمل صدمة واصلا كانت تراجع ذيج الايام لانه الطبيب كان قلق بشان وضعها
جانت ميلاد كانت متعاركة ويه عمران قبلها بيومين وهم جانت يمنا بالبيت من خابرته وحجت وياه
صار معظم حجيهم بالتلفون ينتهي بعركة وكل مرة عمران يعيرها همزين مااخذتج جان هيجي سويتي بيه
اخر شي ظل يتصل وهي ماتشيله
وبس تبجي
بطبيعتي مجنت اعرف اواسي احد
وهي جانت تضوج احد يواسيها
جانت عدها نزعة الانتقام بدل الانكسار
حسيت انه
كلبها مل من عنده رغم انه هي الي رجعتله
لكن ماقطعت علاقتها بيه نهائيا
اما عراق فجانت تحجي وياه على النت
على المسنجر بس
وجنت حتى اقرى حجيهم
جانت تشغل اغاني اليسا تموت على اليسا وتسمع وتسولف
شافته مؤدب وخلوق وكانوا يحجون بمواضيع اغلبها عامة
بذيج الليلة ختلنا اني وياها خفنا نطلع وتشوفنا خالتي والدموع بعيونه
ظلت تصيح عليها ميلاد اخوج وين
عهود شو مارجعت
من ورة الباب جانت تجاوبها انه كلهم بيت خالو علاء!!
بس خالتي فخرية جانت حاسة ااكو شي لانه اختها مابينت ومحد ماكو فجاءة اختفوا الكل
ظلت تدردم عليها تكوم توسيلها جاي
ونروح نكعد يمها احسن مما عايفيها وحدها
ظلت ميلاد مترددة كتلها كملي حجي بسرعة وتعالي وراية شو سمعت صوت بسام ديبجي
رحت عليه والله شفته يناغي
شلته وبوسته
جنت احبه اموت عليه لانه اغلب الوكت اني جنت يمهم اداريه
ركضت عليه وشلته وكمت الاعبه واخذته لخالتي وشويه ميلاد طلعت من الحمام غسلت واجتي
خالتي من يمها جانت حزينة خاله ايدها جوة خدها وصافنة على اغنية وردة
شكو اغاني قديمة ومسلسلات قديمة جانت اتابعها
بس هي من زمان تحب وردة وامي جانت تحب نجاة الصغيرة
اتذكر جانت تكلي قبل يتعاركن هاي صوتها احلى من ذيج
جانت الاغنية
اكدب عليك لو قلت بحبك لسه!
اتنهدت ميلاد كالت اي والله على الجرح
اندارت عليها امخا وكالتلها وهي تمد ايدها تريد بسومه
---ليش يمه على الجرح شعندج؟
---لايمه ماعندي شي انت ليش حزينة شبيج شو صفنة تاخذج وصفنة توديج
---كالت اهه شلون مر الوكت من طلعت هاي الاغنية جنه ذاك اليوم يمكن مر عليها تلاثين سنة
هيجي راح العمر ركض
اتذكر من طلعت كمت ابجي
جان ابوج اصلا محاس بيه
دائما جنت اسال نفسي اني هم عشت شبابي!!
هم عشت قصة حب مثل النساوين!
---يمه صدك انت بحياتج ماحبيتي هم جنت تحبين ابويه
صفنت على بسام واسترجعت حييل ذيج الايام
كالت يالخمسينات جان زين ويايه ويحبني هوايه
بس مااعرف تغيرحيل عليه من اتاخرت بالحمل
وبدن يقرن براسه
ايه بعد راح الله يرحمه
مرات اكول ياريته باقي حتى على سوءخلكه
على الاقل نفس ويايه
ساعة حلوة ساعة مرة
دمعت عينها من من صاحت وردة شوف كنا في ايه وصبحنا في ايه
شو بسومه كام يكركر من يمه
ضحكت ميلاد كالت هذا جنه بشار للهوا يضحك صدقة لعمره
---لا يمه بشار جان احلى بس هذا هم حليو ماخذ من رحاب وابوه يمه ريحته شكد طيبه ظلت تبوس بيه
وصفنت كال كون الله ينطيني عمر واشوفهم يتزوجون
غصت ميلاد من سمعت يتزوجون واتكر سم
---كومي قيم سويلكم عشى لاتبقين هيجي موزين عليج اتجوعين كومي خالة وشوفي امج ليش اتاخرت والله بالي عليها شو ممرتاحة اني
اتصل خالي علاء بعدها بفترة شي ساعة ونص
طمنا الحمد على سمير
بس ريم جانت بعدها حالتها حرجة
وكاللها تخابر او على الاقل تحصل خالة نرجس حتى تكللها لاتجي للعراق
لانه محضرة نفسها تجي للعرس
كال مابيه اتحمل بعد
كوليلهم ام ريم سوت حادث واجلوا العرس
وظلينا ساعتين ونص
خالتي فخرية كل شويه تغفى على القنفة وتكعد تكول رجعوا ونكللها اي وترجع تنام
خطية جانت تغط بنومه عميقة
صارت ب12 بالليل لا احنى حصلنا نرجس ولا احد رجع
انطفت المولدة بعد ورة ال12 مايشغل
ركضت ميلاد شغلت المولدة الصغيرة علمود خالتي وبسام
كالت راتبي كله للبنزين الله لاينطيهم فوك الازمة يبيعوه بضعف السعر
واخيرا حصلنا خالة نرجس على تلفونها الارضي لان همه هم مجان عدهم موبايل مو كلهم
فزوجها كللنا هي بقم وانطانا الرقم
وتعالي فد نص ساعة لخ اندك يله حصلناها
جانت واصلة لقم وتلم كرايبها وتجي للعرس
هي ماشكت ابد انقهرت على ام ريم
وكالت لعد اتاخر شويه مراح اجي بنفس الوقت بس ضروري لازم انزل لبغداد اريد اشوفكم
همه هناك حسب مايكول سمير جانوا الستلايت ممنوع بس بطهران هم مو كلهم
لانه الناس هناك ماتخاف من الحكومة
بس المحافظات يخلوه بالحمام لو بالحديقة ويضموه جان ممنوع
وفجاءة صار صوت انفجار
فزينا كلنا ومنها فزت خالتي وصارت تصيح علينا وينه سعد
الحمد لله ساعتها جوي سعد ورحاب ووسام
بس امي وكريم بقوا بالمستشفى
خالتي من شافتهم
كامت ترجف
خصوصا رحاب جانت منهارة على خالي فد نوب
حجوا نفس القصة جانوا بالمستشفى علمود ام ريم
مسويه حادث وماخذيها للمستشفى
وصدفت انه مارين على الانفجار مفجرين دويرة للحرس الوطني وبصفهم مارة سيارة شرطة
كلهم ميتين
ورحاب جانت هم تبجي عليهم
شلون شباب مثل الورد
ليش هيجي راحواالمن ماذين!!
نمنا كليتنا وعيونا للسما ربي ينجي العروسين
ظلت رحاب تحجيلنا على الحالات الي مرت عليهم
وشلون اكو مرة حجتلهم بت اخوها هم عروسه وكاتليهم بالطريق
حتى امها لفت تابوتها ببدلة عرسها
اخذت كفنها شهر عسل
تكول الناس بدل مياخذوهم للمستشفى اكو بيهم بايكين ذهبها
لكن الي عمري مانسيته هو الي مر عليه بعد كم يوم
جنت توني داادوم وصاير انفجار ببغداد الجديدة
وجوي موظفين ويانه راحوا للمكان يحجون قصة شاهد عيان مو نقلا عن متحدث
يكول الشرطي نزل من سيارته يركض عل مرية تركض وتنزف دم فيكول اتوقعت هاي من حلاة روحها تركض متحس نفسها متصوبة
يكول واني كرشي ماتخليني
وادوس على روحي واجيت عليها
اكللها خلة انت دتنزفين
لفيتها بالعباية وهي تدفع بيه لما اشوفلك
الله لايشوف احد شايلة ايد مكطوعة من الذراع لابسة كومة بتوت ذهب
اتاريها ماخذتها من الانفجار وتنهزم بيها
يحلف يمين يكول كمت اتقيا!!
جانت ايامي الاولى بالشغل كلش صعبة
عالم جديد وحياة متوترة
واني بالي يم خالي
الا ان طمنونا انه اهلها رتبوه كلشي وحيطلعون لمصر يعالجوها
لانه حالتها بعد ممستقرة الخبر ريحني
واشال عبئ كبير عليه
رجعت للبيت ركعت سجود شكرا لرب العالمين لانه استجاب دعائي
لكن شلون خالة امل حتعوف سمير بهذه الحالة يسافر ويعوفها
تروح وياه لو تبقى يم روان وهي حامل وحملها ووحامها جان متعبها
