شهر كانون الثاني عام تسعة وسبعين ....
الدنيا مغربية وفخرية جانت حاطة الصوبة بنص غرفة البنات ودتمشط لميلاد وسعودي يلعب بصف بيبيته اللي كاعدة تشرب استكانهاالجاي الثاني ...
عهود متمددة على بطنها دتقرا وتكتب الواجب ورحاب كاعدة على جربايتها صافنة بكتابها ...
ساعة تقرا وساعة تاخذها صفنة ....
ومجان ينسمع بس صوت بخارالمي طالع من الكتلي وفوكاه قوري الجاي ....
مدت راسها عهود تسال امها
ماما صارت بالستة ؟! !
لا بعد شوية
جانوا الجهال ينتظرون ساعة ستة حتى يطلع الكارتون ثلث ساعة بالزايد وراها الكل ترجع للقراية ...
بهالاثناء اندكت الباب..
...
ركضت عهود فتحته ...
فخرية جان عدها علم منو الجاييهم ...
وجانوا بيت غازي ...اندارت فخرية على رحاب كومي يمه بدلي لبسي تنور جوزية وقميصج الحني لاتلبسين الوان فاتحة عيب مهمها كان هذا رجلج ...
قشعريرة غريبة تصير برحاب من تسمع هذه الكلمات
هذا خطيبج !
هذا رجلج!
هذا حلالح !
وهي ماتحس الا بغربة مخيفة تحيط بيها من تسمع هالكلمات ...
طلعت فخرية تستقبل ضيفوها جان كاطع بعده نايم اليوم مطالع د ينتظرهم ...
صاحت فخرية على رحاب تكعد ابوها وهي ترحب بضيوفها
فعلق ابو غازي خلي يكعد ...خلي يكعد ابو سعد شعنده نايم ليهسه
موزينة نومة المغربية ابد موزينة ....
جانت العائلة كلها جاية ...حتى حنان بتهم المتزوجة هم وياهم ...
اجى كاطع وهو يتنحنح ...سلم عليهم وكعد ...ودخلت رحاب بابتسامة حزينة على وجهها وقدمت الجاي والكليجة والكعك ...
وماكو نص ساعة يوالف وحجي عادي ...
وراها طلع ابو غازي ماخذ ابنه الصغير وياه وعاف زوجته وحنان بالبيت ...
همه كانوا متفقين يمرون عليهم ويباتون ليلة حتى ياخذون رحاب ثاني يوم من الغبشة لسجن ابو غريب تزور زوجها وطبعا فخرية هم تروح وياها خوما تعوف بتها وحدها ...
وخصوصا رحاب فقيرة وكلشي ماتعرف ...
فخرية اخذت عباية ام غازي منها وحضرتلهم غرفة عمتها ينامون وياها هالليلة ...
وطمنتها انه كاطع محيرجع الا ورة نص الليل ...راحن للغرفة وجرن وياهن كونيتين غراض واكل ...
فاستغربت فخرية هاي كلها لغازي
...فجاوبتها انه تاخذله هدوم واكل نواشف وكم كيلو كليجة وكعك وفواكه وحتى كرزات ...
صفنت فخرية شوية ووصت رحاب تكوم تلف كبة حتى هي هم تاخذها وياها ...وكعدن لفن يجي صينية كاملة ...
وثاني يوم من الغبشة قبل الفجر حضرن نفسهن ولبسن رحاب ربطة صغيرة على شعرها مثل مالت حنان ...جان ابو غازي متفق وية ابو تكسي يمرلهم للبيت ياخذهم للكراج ومن الكراج صعدن باصات تصيح ابو غريب...
المسافة جانت كلش طويلة من الكراج لما يوصلون ...والدنيا بعدها ظلمة وكل واحد من هاي الناس شايلين كونية على جتفهم ياخذوها لولدهم ...الناس جانت روج ورة روج مو نفر زنفرين وازدحام كتل ...
صفنت رحاب على الطريق الظلمة وفكرت بنفسها ...شنو مصيرها هسه ...
واشافت من عمرها ابوها هيجي شمرها هالشمرة
ويكولون رجلها حينحكم اقل شي ست سنين...شتسوي هي بهاي السنين !
