كانت السماء لونها فضي
لون غريب ورائحة طرية منعشة
تبعث ذاك الشعور بالغبطة والنشوة
ازاحت امل البردات عن بقية الشبابيك وفتحتها
تسللت ذيج النسايم الباردة الحلوة
هذه اول مطره بهذا الموسم
واخيرا حيبرد الجو بعد صيف طويل حار وجاف
كامت متململة لمت مواعين الريوك وشالت هدوم بتها روان المشمرة على اطراف الجرباية وعلى الميز
روان المدللة الي صارت 14سنة وهسه صف ثالث بكلوريابتها الي ماولدتها لكن هي ربتها
وافنت عمرها وشبالها عليها وعلى اخوها
وصفنت امل وراح بالها يم بتها ذيج الطفلة الحيويه المطيعة
ابتسمت وهي تشيل بجامتها وعليها اثار رسم الوجوه بالقلم الجاف
دققت امل زين شافتها وجوه كارتونية
من يومها روان كان عدها حس فني
تحب الرسم
رسم الاشياء والوجوه الفكهاية
ودكتوراه بالدوائر والمثلثلات
بزاوية كل صفحة كتاب اودفتر جانت الحافة ممتلئة بالرسومات الفكاهية والمضحكة
متقلبة المزاج في يوم تشوفها منعزلة وماتحجي وفي يوم اخر كانت العمس تماما
يمكن بسبب طبيعة تربية ابوهم الشخصية الرزنة والهادئة
وانعزال امهم صاروا قليلي الاختلاط
مع ذلك كانت امل تتفاجا انه انسانه اجتماعية بالمدرسة عكس البيت وعدها كم موقليل من الصديقات
صديقات من كال الطبقات
عكس ميلاد الي جانت انتقائية
وقيم الي جانت هادئة وغير اجتماعية
وهذا الشي مرات جان يضايق امل
مجانت تحبها تختلط كل اللبنات
وخصوصا الماخذات راحتهن مثل ماتسميهن
جانت تخاف عليها لايجرون رجلها
وتكوم ادور علاقات وحب وطلعة من ورة اهلها لو تلفونات الليل
جانت تخاف انه يستغلون الشكل البري لبتها والي ينطي انطباع الشخصية الساذجة بنظاراتها العريضة وملامحها الناعمة
بينما هي عكس ذلك تماما
عقلها يمكن كان اكبر من عمرها بسنين
ويمكن معرفتها واختلاطها بطبقات مختلفة من البنات
خلاها تعرف كلشي عن المجتمع الي انعزلت عنه
عن العلاقات بين الشباب والبنات المحرم الحديث عنها بالبيت
ومعرفتها يمكن اكثر مما تتخيل امل او ابوها علاء
روان الي تعلمت دائما تخفي مافي قلبها
طبيعة بشرية يحملها الكثيرين ممن يتخيلون انهم انضج من غيرهم
حالها حال هواية بنات بعمرها
تحب تسمع الاغاني ومهووسة بكلشي ينزله المطربين العراقيين والعرب
جانت تحب اغاني الهوسة والركص
بيضة ونحيفة وعدها شكار خفيف لكن ماتشبه امها هواية
كانت تلبس نظارات من هي وصغيرة وخشمها بيه علو
تكرهه وتموت منه
حتى اخوها من يعيب عليها يصيحلها ام خشم
طويلة ومصفوكة صفك
ومن كثر ماتكره الضعف جانت تحاول تقنع امها تشرب دكسن
المودة الي اجتي وهواية بنات صاروا ياخذون الدكسن حتى تصيرلهم خدود وتبرز ملامحهم الانثوية
لكن طبعا امل رفضت هذا الشي
وصارت مثل الزعلة بيناتهم
مهمها كان هي عمرها صغير وتوها ثالث متوسط
فكرت امل ويه نفسها وقطع التفكير رنة التلفون بالصالة
ابتسمت وراحت تمط برجليها حتى تجاوب
واتفاجاءت بصوت مخنوك وحزين
وبلغة عربية متكسرة لكن الصوت مالوف
--امل كيف انت ؟
-نزيرة شلونج؟ صارلك شكد متخابرين وين صرتي؟
امي شلونها
كعدت امل وانتجت على القنفة وحطت رجل على رجل وهي من طبعها تظل تفر وتلعب بواير التلفون من تحجي بيه
----اني زينه امل انتو شلونك
---شبيج شو صوتج مخنوك امي خوما بيها شي ! سالت امل منتفضة وهي حاسة اكو نبرة حزن بصوت اختها الي تتصل من ابعد مكان بالعالم
---امنا مات امل مات
---لا تكولين نزيرة عزة لعزاني
سودة عليه ماتت وماشفتها !!
---اي هم رادت تشوفك امل قبل لايموت
انهارت امل على خبر وفاة امها المفاجئ
بس الي ريحها انه اختها بلغتها بعذابتها بالايام الاخيرة وانه ارتاحت اخيرا
اصلا جانت تتمنى الموت السريع حتى ترتاح
كبر عمرها مانفع وياها اي علاج
ظلت امل تبجي على امها وحدها بالغرفة وتعاين على السما الي انقشع عنها الضباب
تولد اشعة الشمس الي تشق طريقها بين السحاب الكثيف تطلع
ولاول مرةجانت خايفة
ماتعرف منو شنو خايفة
من مصير امها
لو من الغربة الي حتكون بيها لو كسرة قلبها اذا سمير وروان رجعوا لامهم
ياترى اذا ماتت حيكونون يمها
شكد اتمنت طفل يكون من عدها
بس حتى لو من عدها او لا
مو هياتها عافت امها تموت بعيده عنها شسوت لامها هي
---حيييل يوم من سافرت بالستينات وبعد ماشفتج!!
سبحان الله الي رب العالمين ماكتب الهم خلفة لاهي ولا اختها الي حاليا جانت مستقرة بلندن
احتواها علاء بايامها الصعبة
وسوت عزاء بسيط بالبيت ثواب لامها
وجتي فخرية وبناتها وبدرية ونورية
وحتى ام فاضل هم جتي
كانه اجتماع تجدد الحزن فيه على فقدان كل شخص عزيزعليهم
فخرية اتذكرت امها وابوها واخوانها جاسم وراضي
رجلها وعمتها والعزيزة زهوري
بين التعب عليها حيل هالايام
روان جابت صور امها الي دزتهم اخر مرة وكعدوا يتفرجون عليها
شكد انقهرت من شافت نرجس هذا الوجه الحلو شلون هيجي تعبان وذبلان
جان الحرك واصل لحنجها وشويه من ركبتها
صح هو مو كلش يبين
بس يمرد الكلب من تشوف العيون الزركة الوسيعة
ذبلها البجي واختفن
ضاعن ويه تجاعيد الوجه
وابتسمت من شافت سهيلة
لساها بعدها هي هي
----سهيلة المسلولة هههه
ولاسمنت شوف اني شلون انفرشت وهي نفسها هم شايله جاهل بحضتنها وواكفه صفح هههه
الله يذكرج بالخير والله جانت وفية
وجهال نرجس اخوان روان
كلهم شكر على امهم سبحان الله
وظلت ادور تباوع الصور
وشافت رجلها
رجل مربوع ملتحي
عيونه مبطنة وصغيرة ووجه عريض
الشيب غزا شعره ولحيته وانطاه عمر يمكن اكبر من عمره بسنوات
سمير!!! صاحت فخرية
----ماعدكم صور جهال جوري الله يرحمها ؟
---لا والله عمة بس الي نعرفه عمو سنان اتزوج بس ماعنده جهال من زوجته
---اي ادري كلي علاء متزوج عراقية استاذه مال تاريخ مهزومة وحدها هناك
الله يسهل يارب
هم خطية هاي المسكينة راحت بعز شبابها
على الخير سمير على الكلية سمعنا طلعتلك هندسة مو بله
---اي عمة هندسة الحمد لله
---اي الثولة طلعت علوم وخبصتنا حطلع صيدلة امم
امل جانت صافنة تباوع على الوجوه وبالها بغير مكان
يم امها الي من تلاثين سنة طلعت من العراق
طلعت بليلة سودة مهزومة وخايفة
ومن هذاك اليوم صارت بس تسمع اخبارها وصوتها بالتلفون
وبين فترة وفترة اختها ادزلها صورهم
هي اللي اختارت تبقى يم ابوها
وتاليها حتى ابوها مات وهو بكلبه شي عليها من اتزوجت علاء
انقهرت حيل من اختها حجتلها عن امها
وشلون ابد مجانت ناسية العراق ولاجيرانهم
وجانت تشتاق لمنطقتهم وبيتهم
واتمنت
اي كلش اتمنت ترجع تندفن هنا
بمكبرتهم الي فلشوها وسووها بالكاع
يا الله نبقى نحن لبلدنا ولو تغربنا عنه سنين ولو ابتعدنا عنه دهر
تبقى ذيج الذكريات العميقة تشدنا اله
وصارت عينها بعين رحاب الي ابتسمت الها وحضنتها وبوستها
فسالتها شعجب عمتج هنا يمكم
---والله بيبة فاضل هم مريضة كلش وتعبانة خطية
---سلامتها ماعدها الا العافية
رحاب جانت تفرح من تلتقي باهلها
تخلص شوية من هوسات جهالها وطلباتهم المستمرة
عبوسي يروح يم قيم ووروان وعمار يم عهود اما بشار ففخرية تجره وظل تلعب وياه وهو يكركر
جات ساعة ترتخي بيها وتفكر
فاضل زوجها الفترة الاخيرة
مجان مرتاح كلش صار يتعب وصحته هم بالنازل
من يوم الي استلم بيها شغل المحاسبة مال المجمع الي يشتغل بيه وهو خايف ومرعوب
خصوصا من عدموا ولد عمه الاثنين العام وية التجار
من يومها وفاضل شال هم على همه وحمل على عاتقه جبير
عمه صار يعتمد عليه بكل الامور الادارية مالت المحلات
ومن جهة جان يخاف لا الامن في يوم هم ياخذونه
وخصوصا همه ملوا الاسواق والمحلات يدورون على كل من يتاجر بالممنوعات الدولار والجكاير ومواد الحصة
والادوية
واندارت على البنات فخرية
قيم وروان وحدة كاعدة بصف اللخ ويبسبسن
جانن كلش صديقات
شوفي شلون كبرتن
كومن لمن المطبخ
خلي نروح بعد
الوحيدة الي جانت مجاية من البنات ميلاد
وسعد هم اللي مايهتم اصلا بهاي السوالف
وزعلان من خاله بعد مارزله اخر مرة
ميلاد جانت مصابة بالاحباط وخيبة الامل
ويمكن نكدر نقوسها بنوع من الصدمة
جانت متخيله معدلها حيدخلها ارقى كليه بس 86 ماتسوي شي هسه
المعدلات صعدت وصارت عالية
الطبية صارت مية وفوك
بوجود درجات الاضافة
درجتين عدم رسوب
وخمسة للاصدقاء وغيرها للشهيد
اضافة الى اخطاء الانسيابية الي عندت الا هي تسويها
طلعتلها كلية العلوم جامعة بغداد قسم حاسبات
القسم جان زين وحلووو كلش حلوهم
لكن هي نفس كل مرة جان لازم تصاب بالاحباط تجاه اي شي جديد هي ممفكره بيه
مع انه الكل شجعها وفرحوا بيها
بس هي جانت ضايجة
وكعادتها
ما رادات اداوم وبالملحة والصياح والعياط يله قبلت
وراحت فخرية طلعت جم فلس من عدها جهزتها بالهدوم اشترتلها قميص جينز بستعة الالف جان نازل موديله من السوق العربي
وقماش كابريني اسود المترة باربعة حتى بدرية تخيطه تنورة عدلة ام الجاكة فاخذت مترة وربع
وجنطة بوكس جلد جوزيه وبيها خطين اسود اخذتها بسبعة الالاف
وحتى ملابس داخليه جديدة هم اشترتلها
بوكتها جانت نازلة احذية الكاتربلر
ولحت ميلاد تريد واحد
وفخرية معنده ماتقبل لعبت نفسها منه
جنه حذاء مال عمال
وصار عراك بنص الشارع
احمرت بدرية وصعدت عدها على ميلاد الي تمشي وراها مطنكرة
جرت شعرها بنص الشارع كلتلها تمشين عدل لو اتفل عليج كدام العالم كلها
وذبي العلج من حلكج هاي رابع مرة اكلج بس الك.... ب هيجي يعلجن بنص الشارع
كامت ميلاد تمشي عدل وانكطع صوت الدردمة من عدها
وراحت مرتين وتلاثة فخرية على المحلات مالت الاحذية تباوع منا ومناك وتباوع على رجلين البنات شلابسات
اخر شي اشترتلها مثل متريد
كاتربلر بس انصى واحد
وهي تكول ويع وايع اخر وكت وين الانوثة وين البناتي بالموضوع؟!!
رجعت وجان ليلة خميس
مغربية ووية رجعتهم
وتوها جانت لامه عبايتها فخرية وادردم بالمطبخ على ميلاد وتسب بيها
جانت عهود تكرط خيار
تغسل وتاكل
وميلاد ركضت ختلت بغرفتها
جانت فخرية تصيح وتعيط على كلشي
على ميلاد على الاسعار النار
شنو حذاء بعشرين منين اجيب يالمهجومة يا بت كاطع
مجنت ادري ابوج عايفلي البنك وراح
واندكت الباب وصوت هورن سيارة
يطن طن
صاحت فخرية على عهود
روحي شوفي يمكن المهجوم اللاخ رجع ويريد احد يفتحله الباب اني مو ميت مرة كتله لا تطلع بالسيارة وانه ماكو
دخلت السيارة بالكراج وصوت الهورن مابطل
ثاحت فخرية انهجم بيتك ان شاالله ولك شبيك
عرس امك راحت ذبت عبايته ودتطلع ترزل سعد
شافت عهود لافه دشداشتها على خصرها وشايله بشار يصفك ورحاب ادك هورن
فتحت حلكها امهم
وهي ادور على فاضل ماكو
على ابن خالته ماكو
ابن عمته او عمه هم ماكو
--- ولج رحاب هاي منو جابج!!
---ماما اني جيت عيني
---كولي غيرها
هنا طلعت ميلاد بتك نعالها تركض تريد تشوف هالهاوسه شنو
---واخيرا جيتوا تاخذوني
----ههههههه لا عيني اني حبات يمكم
اخاف اسوق بالليل مامتعلمة
---شنووو انت سقتي
--- عيني مفاجاءة
---والله مفاجاءة يارحوبه جاوبتها امها وهي تضحك وتتناوش منها الجهال
ونزلت نور الهدى نزلت الجنطة من السيارة
هاي شوكت ويامتى
شو ماحجيتي
---اي ماما رت اسويلها الكم مفاجاءة
جانت تحجي وميلاد متفاجاءة تريد تسع القصة شنو
-- من رجعت من عمان عمي جابلي هاي السيارة هي صح شويه تعبانه بس علمود اتوماتيك
وفاضل وابن خالته اشتغلوا عليها وصلحوها
وعمي دفعلنا نص فلوسها واحنى النص الثاني
ووهاي كل جمعة نطلع اني وام منة نسوق ومرات من تجي ام فاضل يمنا هم تعلمني
ومن جابت نور الهدى هنا هم جلبت بيها تعلمني قبل لاتاخذ بيبي يمها للعلاج
---صجك شلون صارت بالنا يمها ... سالت فخرية
---يمكن يسفروها لعمان خطية
حالتها تعبانة
يا ماتدرون
مو رقية اطلكت!!
----يااا سترك ياربي لييش؟
----مع انه فطومة الي جانت زعلانة هاي صارلها شهرين
وعمتي طكت روحها ماتكدر تطلع وتطب اشو خابرونا رقية مطلكها رجلها
مااحجيلكم شلون متخبلين
عود هاي جانت مسويه رجلها محبس بايديها
وكامت فخرية جابت عبايتها وصعدت
وصاحت على بتها
--- امشي وصلينا لبيت بدرية خلي تفرح تشوفج تشوقين
---يمه مااعرف اسوق بالظلمة
لج امشي هياته دااشوفج شلون تسوقين
---ماوصيج باول عمود صدك اخذوني يمها بلكت عدها خياطة صعدت عهود ويه امها
وعافن الجهال على ميلاد ونور
نور الهدى الي من اتمرضت بيبية فاضل جتي يم رحاب ام فاضل ماقبلت تبقى يمها على ابو عدها ولد اعزب وشاب صغير بعده مايصلح تبقى يمهم وهي حديثة وحلوة وصغيرة
وصدك راحن لبيت بدريو
الي ظلت صافنة على رحاب وهي تروح وترجع مرتين تلاثة لا والرابعة يله دبرتها وطبكت السيارة بالكراج
جانت تباوع عليها من فوك نظارتها الي على طول نازلات لطرف خشمها والسلسسلة مالتها جها طويله وجهة مشدودة
----على الخير هعلى الخير
زين والله سويتي اتعلمتي عفية عليج
جتي قيم وهي تنزل دشداشتها جانت لافتها على بطنها وتمسح
هاي شنو رحاب على الخير عليد بصوت ناصي وناعم
قيم جان عدها سنونها الامامية مو معدلة وحدة فوك اللخ بس مو كلش مبين لكن تلفطظ الراء غين والسين بيه صوفرة خفيفة مرات تنسمع واضحة
ذبت الماسحة وبوستها
تعالو فوتو هسه اسويلكم جاي
----لايمه لا لاتمسحين انت عوفيه جبت عهود خلي تنظف البيت حناخذ امج نتعلل هناك ومن يجي سعد يمر عليكم يجبكم لو انتن تعالن مشي ورة ماتخلصن شغل
---فدوة اروحلج فخرية توها جتي الكهرباء
بس تنكطع اني اجيبهن واجي
جاوبتها بدرية وهي تلملم القطع وترتبهن حتى تشوف ياهو الي حتخيطه بالاول
والاحد بدى دوام ميلاد بالكلية
وكل يوم ترجع جانت كئيبة وحزينة
مجانت الامور مثل ماخططتلها
اتصورت اول ماادوام بالكلبة حيوكفون الشبابسرة عليها
طبعا جانت تتصور نفسها احلى وحدة بخواتها
وعدها جمال وجاذبية لاتقاوم
لكن الحقيقة على ارض الواقع غير شكل
وخصوصا مجتمعات الجامعات والكليات
جانت العيون تتجه على الليابوها شنو يشاغل
وشكد متمكننة ماديا
يوصلها السايق مال ابوها
لو ابو الخط الخصوصي لو الخط كوستررات
لو ابو الكيا
شكد تلبس ذهب وتروح
كل هاي جانت العوامل الاهم حتى يوكف الشباب عليها بالطابور
اضافة الى الشكل الحسن والطول والقوام
عرفت حينها انه جمالها لاشي كدام الحسنوات ذوات الشعر الاشقر والعيون الملونه
اللاطول منها والارشق
وذات المنحنيات المغرية
ربما ميلاد كانت جميلة بالمقاييس العادية
لكن هي اقصر من رحاب واسمن منها ومن عهود
وابيض منهن لكن عيونها اصغر ايضا
شعرها سرح وناعم لكن رقبتهاقصيرة ايضا
هي مكانت شايفة هذه الامور الى ان فتح نقاش بين البنات بالكروب وصارن يحجن على كل وحده وشنو حلو بيها وشنو لا
وبحفلة التعارف يكوم كل شخص بالشعبة يعرف عن نفسه وعن سكنه ونبذه مختصره
لاحظت الاهتمام يكون باللي ساكنه شارلع الاميرات بالمنصور
واللي لابسة للركبة تنورة
واللي خالة كومة مكياج وحمرة حمرة
بينما هي وبقية مثلها
يادوبك لحكت تكول اسمها ووين ساكنه
ومن كالت ميلاد
نطق بعض السباب مستظرفين
تشرفنا ميلاد سعيد
وهنا انزعجت ميلاد يل
شي جانت متوقعته انه يتم النصب على اسمها
الى ان خلصت الحفلة وجانت ميلاد حاضنة لفكسها متجيه نفسها على باب الشعلة وصافنة
الشعبة فرغت
ومابقى بيها احد
اول اسبوعين ماكو محاضرات
مجرد اجراءات التقديم والتسجيل واستلام الكتب
صافنة جانت وتباوع على الرايح والجاي
اتقدم منها شاب
هي جانت تحس انه يباوعلها من بعيد لبعيد
بس مجانت تهتم
كالت بنفسها هذا يلبس تيشرتات من الباله يعني حتى ماعنده ياكل ويشتري هدوم
باعت عليه بنطرة خاطفة
وحفظت كلشي بيه
طوله المتوسط بطولها جان يمكن شويه اطول
نحيف وبشرته بيضا وعيونه بنيه وشعره لونه فاتح
ابتسم وهو يتقدم نحوها
كلها ---لاتضوجين اني هم يقلدون على اسمي
وعادي صرت اتعلم
اسمي شمس الدين
اندارت عليه وكالت اي اتذكرت
انت موجنت بالمسابقة مال المدارس
---اي صدك انيجنت هناك
بس مااتذكر شفتج
لا اني اتذكرك من اسمك شمس الدين
---يعني طلعنا عرف
---هه اي عرف
اترخص اني اروح يمكن ابو الخط ينتظرني
-- براحتج توصلين بالسلامة
بس بالحقيقة راحت هي بوجهها وكعدت بالنادي
وهو من دخل وراها وشافها
كلش انقهر وانعقج شكله
بس هي ماهتمت
جانت مهتمة تدور على واحد عنده امكانية
مثل حيدر برازيلي
لو وليد
لو لهيب
الله ياميلاد لو لهيب يتزوجج احلى نقلة بحياتج
لهيب كان شاب طويل
ابيض ملوحته الشمس ويزين صفر ويعوف سكسوكة
يركب سوبر بيضا مزديلها مو كلش قديم
يعني الطالب وعنده سوبر بذاك الوكت لا هذا طكوك
ولابس سلسة ذهب وحذائ هالمتن يشبه البسطال
اوووف
هذا شلون احصله
اكيد كتل عليه
رجعت ميلاد وتفكيرها انحصر شلون تخلي نفسها مميزة
منين تجيب فلوس
لا هدوم رحاب تصير عليها ولا حتى عهود
وانوبه رجلها اصغر منهم حتى الاحذية ماترهم شلون حظ
التفت على بيت ام صلاح
وصارت تصادق بناتهم حتى تبدل وياهم الهدوم والجنط
اضافة الى الهدوم الي يوميه بدرية مغير موديل قطعة منها
مجانت تقبل تلبس من البالات مثل عهود
جانت تستنكف وتستحي يعيبون عليها
ومع انه اعتاركت عهود وياها حتى تحجبها
بس ماقبلت جانت تصيح وتعيط انت شبعت ونسه بالكلية وهسه تريدين تحجبيني مااريد
وبشهر الواحد من سنة 94 طلع تعيين عهود
راد يصير بيها سكته من خابرهم زهير
وكللها بعد ليش مستشفى طلع تعييج مدرسة
بس المشكلة المدرسة جانت بسبع البور
حييل شكد بعيدة
علق سعد على اخته
هاي منطقة تعبانه شيوديج
---ميخالف اروح اروح
عمي زهير كلي داومي فترة وانقلج قريب عليكم
خلي اروح واشوف
صفنت عليها فخرية وسالفة تاخذها وسالفة تجيبها
بله لايكون انوب اني اصرف عليج فلوس الكروة
---كولي يالله يمه دخلي اداوم والزم الراتب بيدي
بس هم شغل خالة بديرة مااعوفه
يفيدنا على الاقل شايل مصاريف الزايدة والناقصة
وراسا فتحت قاصتها وطلعت سبعة الاف ونص لامتهم من الصيف لحد الان على ربع وخمسمية
واشترت بيها متر ونص قماش سترة
واداينت فلوس المتر وربع تنورة
بعدين كلتلها بدرية القماش مال التنورة مايكفي كبس لازم تشتري بعد
وراحت اداينت من رحاب وجملت عليهن
خيطتلها سترة ام السراوين
واهم شي الجتافية علوها شبر
ولونه جان اخضر زيتوني سادة
والتنورة مشجرة سوته كبس مفتوح
وظلت متوترة الليل كله شلون حداوم ثاني يوم
جانت باردة والفجرية زخت مطر
بس هسه شويه احسن ماكو شي
راحت اخذت اوراق التعيين الي جابتهم من الوزارة وبدت تسوي معاملة المباشرة
وتركب فورت وتنزل من فورت ومابقى واحد بالكراج مسالته
الى ان وصلت للمنطقة
ماكو شارع بس طين
الطريق بعده ممبلط
وغركان بالمي
جانت باردة بس الشمس ادك بالراس
ويمكن من قهر المكان بالزايد راسها وجعها
ظلت تمشي وتسحل بالطيانه مالتها
وتسال ويكللها
الى ان واحد ابو عربانه كللها يابه بعيد امشي صعدي
اني اوصلج صدك جذب انت مبين مرتبة شجابج هنا!!
والله وصعدت ماكو حل ثاني هم خلف الله عليه
واتخيلت لو واحد من اهلها يشوفها وهي هيج مطينه وصاعدة بعربانه ابو الطيحن يجرها حمار الطيان مغطيه رجليه
وصلت للمدرسة الي جانت توها مبنية وجنها متروكة
حالها يكسر الكلب
الشارع كبال المدرسة زين جان مبلط
بس هم غركان بالمي والطيانه
وهي يمكن جاية من جهة غلط عليها
فكرت هاي سعبيش اطلع الصبح حتى اوصل بثمانية
الساحة كانت كلها طين
والفراشة تجيب بهاي وصلة المسح وبالزايد تلغمط الكاشي مال الادارة مع انه هي ابتدائية
وقبلت عهود اداوم بيها
والمفروض هي اداوم كلية
انصدمت خطية بالواقع
وظلت تبجي الطريق كله
وتندعي معقولة ياربي ماعندي حظ
الا هي المدرسة
ظلت اداوم بيها يوم يوم لا همه اصلا موكلش ملتزمين
الطلاب قليل بيها وقليل يدامون اصلا المنطقة شبه مهجورة وين ماتمشي بيوت مسكربه
وشبه طين وكبالها الكوسترات المزنجرة والقدينة
اتوسلت بعمها زهير
وحتى رادت تبوس ايده ينقلها
وصدك بواسطات قويه كلش منه
وركض ركض علمودها
وعدها بنقل على نهاية السنة
وبشهر الثاني وبعز برد العجوز
جانت ساعة تلاثة ونص باليل
اندم التلفون بيت رحاب
ركضت نور الهدى وشالته
نور الهدى الي بقت بيت فاضل
عايشة يمهم وتساعد رحاب بالبيت
اصلا كلش شالت عن رحاب هم الجهال والبيت
بذيج الساعة شالت التلفون وجانت ام فاضل تبجي تبلغهم بوفاة بيبته
كامت نور الهدى ادك وتلطم عليها
راحت المرة العجوز الطيبة الي ربتها
والي ماعرفت لا ام ولا اب غيرها
اصلا مشافت حنان الا منها
هذه الطفلة الي ربت في بيت صغير على حلم صغير
صار عمرها 16 سنة
كبرت وشبت في بيت بيبة فاضل
وجانت كلش خايفة تموت وتتبهذل وراها
وجانت بيبيته تتمنى تزوجها وتتطمن عليها قبل لاتموت
لكن الموت كان اسرع من امانيها
الصدمة كانت اكبر لفاضل
لانه قبلها بكم ساعة خابر امه وكالت كلشي تمام وصحتها زينه
وميحتاج ياخذوها لعمان
اصلا قرروا بعد جم يطلعوها
شلون هيجي ماتت
هي الساعات الاخيرة بدى جسمها يرفض اي علاج
وماتحملت الابرة الاخيرة
اتوقف القلب
اتوفت السيدة الطيبة
وصارت اكبر فاتحة الها
وانشغلت رحاب وحتى اهلها بيها
لمدة اسبوع كامل
ودخل فاضل في فترة حزن وحداد على بيبيته امه الي ربته
وكان بصعوبه ياكل ويشرب
كل شويه يمر طيفها على باله يبجي ويبجيهم وياه
وازداد عنده الالم بالكلى
وكامت رحاب تشغل السيارة وتركض بيه بالمستشفيات
وحدة من كلاته تعبت كلش
وبدى ياخذلها علاج مكثف
وبقت ميلاد تجيها كل ليلة خميس هم تبقى يم نور الهدى اذا صار على فاضل شي
وهم منها تغير جو شويه
خصوصا مع شعور الاحباط الي يصادفها
جانت تحصل من رحاب على جم فلس تصرفهن بالكلية
بدت بذيج السنة الشركات الوطنية بالتصنيع
صح البضاعة كانت رديئة لكن احسن ماكو
ودخلت المنتجات عن طريق الاردن للعراق
جانوا بس الزناكين الي يشترون قوطية الببسي بالنادي
جان اول شي سعرها الف وبدت تقل شويه شويه
جانت مرات يعجبها تكعد تعزم صديقاتها مثل البنات الزنكينات الي يسون هشكل
تصفن يارب هي منين يجبون فلوس
التقت مرتين او تلاثة بسامي الي مكان يرفض النظرات المتطيرات الي كانت ميلاد تبعثها بين فترة واخرى بالعكس
جان يسامتع بيها بدوء
الى ان اتجراءت واخذت امها وياها لمحله
ومن شافت المحل وترتيبه
ونوع البنات الي طاب طالع
انفتحت عينها اكثر عليه
ملى سامي جنطة مكياج كاملة لميلاد الي ماعرفت من فرحتها شتوسي
لكن فخرية وعدت انه تسدد فلوسها بالاقساط وهو يباوعلها من جوة ليجوة
بنطراته الحادة الثاقبة الي ماتحوي على اي رد فعل منه
ماعرفت ميلاد تقره تظراته
ولاتفهم غموضه
هذا معجب لو بس يتحارش
لو ديجربني
مثلا
واخر شي من ديطلع انطاها جيش صغير بيه نوع عطر باهض
وكال لمرة خاله وعيونه على بتها
لاتفكرين خالة بالفلوس هاي هدية نجاح ميلاد
ولزم اصابيعها وعصرها حيل
بينما جانت فخرية مدنكة تعدل عبايتها وتشيل المسواك وتطلع
احمرت ميلاد
وهي عيونها لزكت بالكاع من الخجل ماتعرف
دوخها تصرف سامي وخلاها تحسب غير حساب
ولا واحد من المعجبين بيها اتجراء انه يخطو اي خطوة مع شخيصيتها الحادة
يمكن بس شمس الدين الي لكفته اكثر من مرة بالقاعة وهو صافن عليها
ومع ذلك مجانت تنطيه وجه
اللهم الا وكت الغش تكعد يمه حتى يغششها وتسغله بهيجي مواقف
لكن سامي
وصل بيه درجة اللمس
لا هوايه
يمكن هذا متعود ينام ويه اي وحده يريدها عباله اني هم هيجي ؟!! سالت نفسها وهي تشعر بالتقزز والخوف والرهبه اللذيذة
وتفكيرها صار مشتت بين حلمها الزواج من لهيب الي اصلا مامنتبه عليها
لو سامي
الي شعل بيها اشتياق مو طبيعي
وفكرت الف مرة شنو حيكون ردة فعل اهلها اذا رادها للزواج مثلا
لو هو شنو قصده وياها !!
مع ذلك ومع انه مجانت حابة الدراسة كلش لكن كانت شاطرة
تنجح يعني
عكس سمير الي حالفه سوء الحظ
فمع انه تم قبوله بالهندسة الا انه من شروط القبوي كانت شهادة الجنسية الاصلية للام
راوغهم سمير لحد نص السنة
وكل مرة يدزون عليه ويكول باجر
الى ان فكر علاء يجيبله وحده مزورة
بس زهير مانصحه بهذا الشي
كله كلشي يصير ليش ينسجن الولد بتهمة التزوير
لانه حتى تبعية ماعدهم
ظل يراوغ الى ان زهك وخصوصا من اجتمع بيه رئيس الاتحاد وراد يفهم ليش مايقدم
كله بصراحة امي مطلقة وماعدنا اوراقها
بعدها انقطع سمير عن الدوام
وراد ينقل بغير كلية
كل الكليات العلمية تطلب هذا الشي اضافة الى الادبية ذات الدرجات العالية
كليات قليلة مجانت تطلب هذا الشي
مثل الادارة والاقتصاد
والاداب بعض اقسامها
بس هاي وين لطموح سمير هو بلا كلشي جان خال عينه على المجموعة الطبية ومحصلها
ومن حصل هندسة مدني تروح من ايده
شعر باحباط فضيع
جمر نفسيته
الى ان تلاحقله ابوه
وقنعه يروح لكلية اهلية
وجان خياره القادم المنصور قسم علوم حاسبات
