الفصل الخامس
المقطع الرابع
من انتم!!؟
صوت الانفجار خلاني ثواني انفصل عن العالم الخارجي وشه باذني صارت مااعرف من الخرعة والفزة لو من الصوت لو من منظر الباب الي طارت
بس اني الي متاكدة منه اخر شي لمحته هو خالتي من ركضت عليها ظلت اتردد بشكل مريب راح الولد مني... يمه راح الولد
خالتي الفترة الاخيرة كلش ذبلت وفقدت هواية من وزنها
والصبح امي كوة كصت ظفايرها خلتها تبجي عليهن مجانت راضية بس خفنا عليها تتمرض ورة العملية
شعرها طويل وهي ماتتحمل الا تسبح
لحد الان اذكر وجهها الفزع
ونظرة الخوف والصدمة عليها
جنت لابسة ازار الصلاة توني اريد اصلي
ماعرفت افكرظليت اترجف بمكاني ومن شفت النار بدت تدخل للمطبخ وهوسة الجيران برة
سحبت خالتي كوة وحسيتها كلش ثقيلة مجنت اكدر اسحبها ظليت اصرخ لحكولي حنحترك
الحريق جان بباب الكراج كتله نار تفور من السيارة الكيا
والمطبخ كله كزاز والغراض مطشرة من قوة العصف
امشي واسحل خالتي واخاف انجرح ماعرف عقلي شلون جان ساعتها يشتغل ولما وصلت بره المطبخ
جوي ثنيين شباب ابو طيف وواحدثصاني اخذوا خالتي مني
بس لزموها وشافت السيارة لهب
ماعت روحها وصاحت صيحة يمه راح سعد مني
اتخربطت وكوة طلعناها
اتخبلت بالزايد من شفت خالتي بدت ترتجف وتفر براسها
عرفت بيها شي
ماهتميت للبيت ولا بالي عليه
كل همي افلت اني وخالتي براته
من طلعت شفت الناس جانت ملتمة ودتطفي بيت
والنسوان التمن عليه مااعرف شحجوا بس افتهمت امج وين اخوانج وينهم اكو احد جوة هيجي شي
واكثر من سؤال يطمنون بيه عليه
صاح عليه ابو طيف لازم ناخذها للمستشفى خالتج موزينة
رغم انه شتا بس ابوطيف جان يكت عرك
صعدت وياه بالتكسي واني اتراجف ومجلبه بيها واحاول اطمنها
خالة سعد مابيه شي الكيا جانت فارغة
كلي صعدي خيتي بسرعة هاي خالتج فقدت مبين عليها
ضربتها راشديات خفيفة خالة خالة
لسانها ثكل ووغف حلكها
واصفرت وازركت بدقايق
طلع بينا للمستشفى جتي الشرطة والاسعاف بطريقنا عرفنا هاي جايين علينا كمت ابجي مااعرف شسوي
عفت البيت هيجي وحده
عيوني انرعبت من منظر النار والدخان ومن صدمة الصوت القوي
الله لايوكع احد بهيجي حالة
من كعدت بالسيارة بديت اضرب خفيف على صدر خالتي وانتبهت اني طالعة بتك نعال ورجلي الثاني دتنزف دم من الكزاز
بس ماهتمت حسيت خالتي حبيبتي دتروح مني
ساعتها والله حسيت قلبي حيوكف من الخوف جانت ايديه ترجف وشفتي مااكدر احجي
حلكي جمد
اريد اطلب من ابو طيف يتصل بواحد من الولد بس صوت الهئهئة يطلع مني
اني من خبصتي كلشي مااخذت ويايه لاجنطة لاتلفون لافلوس بطرك روحي
ابو طيف عصب حيل ومجان يسمعني التهى يصيح ويعيط من الاازدحامات والشوارع المكطعة كمنا نصعد رصيف وننزل حفر ونمشي رونغ سايد ويصيح انفجار انفجار عدنا جرحى
يمعودين المرة حتموت انطونا طريق
حتى الناس بلكت تنطيه مجال
لكن حجايته من كال المرة حتموت
المرة حتروح من عدنا
جفلتني اكثر
كانه بوق وانطرش اذني بيه
ظليت افرك بايدين خالتي حيل واشلح الازر مني خفت
خفت كلش وارتعبت من هاي الكلمة شلون خالتي حتروح من عدنا
ييارب ساعدني
اندار علينا ابوطيف وارتعب من شاف شكلها
لاتصد ولاترد واخر حركتها لزمت كلبها حيل
ووكعت ايدها
كمت اهمس باذنها خالة
خالة حبيبتي الله يخليج والله سعد مابيه شي
كلنا بخير
جان حادث هذا مابيه شي والله
اندارابوطيف من شافني جزعت صاح عليها من اصفرت وابيضت شفتها كلها خالة ام سعد كفيلج العباس كومي
ياخالة كومي
الولد مابيه شي
لا تروحين من عدنا
كام يعيط واني اعيط خالتي انكطع نفسها
كمت اخضها حيل كتله ماكو نفس ابو طيف ماكو نفس
جانت تنازع بين ايديه
وكفنا بازدحام اندار عليه كلي بصوت ناصي ودمعته نزلت خالتج تنازع لقينها الشهادة خيتي
بجيت بحركه
كتله عفية لاتكول هيجي الله يخليك لاتكولها
شلون يعني تنازع وين صارت هاي المستشفى
كلي ماكو طريق ماطبيته وطلعت منه صايرة انفجارات اليوم من الصبح
ظل يسوق ويكول لقينها الشهادة خيتي
خالة ام سعد اتشاهدي
صار يرددها و هم بلا وعد
ماسمعت حسها بس تمته شفتها
محمد
محمد
علي
محمد
بصوت محشرج ونفس مكطوع
اني صرخت بداخلي كتله يامحمد يانبي محمد رجعلي خالتي ياتوسل بيك يا الله لخاطر محمد رجعها اليه
ورجفه قويه بشفايفها صارت ماسمعت شكالت بس محمد
يارب بحق محمد مهد النا طريق نطلع بيه
يارب
انطوت الارض تحتنا
ووصلنا المستشفى
خالتي فخرية فقدت خلاص
مجنت اعرف عايشة لو لا
بس شلناها اني وابو طيف
و الصدمة جانت مال المستشفى خلتنا نوكف
الناس متروسة بالباب
ومراكض يمنه ويسرى
والله حتى جثث متفحممة شفت
الكل يتراكض
وكمت ابجي من شفت مريه لابسة عباية شايلة بنية صغير بملابس المدرسة
شايله بقايا من راسبتها ودماغها صاير طشار
لازمته حيل على راسها وتصيح بتي اتصوبت عفية احد يشوفلي بتي
ماتدري خالة خالة ياخاله
صحت عليها وركضنا وراها
ردت اكللها خالة ترة دماغ بتج ديتناثر وراج
غصيت بعبرتي وانياحاول اجاري ابو طيف واباوع على المشمورين بالكاع
وكعت عيني على واحد مكطعه ايديه باوعلي وهو ينازع روحه
شتحمل ياربي شنو هالمنظر
كتلها للستر دتركض شوفيه هذا ديموت
جرت خالتي مني وكالت احشائه كلها طالعه خليه هسه ثواني ويموت
جانت تجاوبني كشخص متخدر
كملاك موت ينطي اذونات مو مثل ماتعلمناالممرضة ملاك رحمة!!
يمكن همه هم كلبوا اتحجر من هول الي شافوا ويشوفوه كل يوم
بس خلت امي على سدية متكسرة وراحت
ابو طيف كلي ابقي يمها ادور دكتور يشوفها
جانت الغرفة شويه بعيدة عن الممر
لزكت ببابها واني اعاين على خالتي
اقتربت منها وخليت راسها بحضني
ظليت العب بشعرها الاشيب الكصير بوستها حيل كتلها لاعوفينا ماعدنا غيرج
والله سعد مابيه شي
وانتظرت ومحد ماكو
اتذكرت بالافلام شايفة من قلب شخص يوكف يظلون يضربون بيه
اني هم بديت اضرب
اول شي على كيف كلت خطية اخاف تفز
بعدين كلما زدت الضربات جانت صرعاتي تزيدصرت متيقنة انه خالتي ماتت
ماترد عليه
كمت اصيح واضرب
صدى صياحى وصراخي كان يضيع ويه صدى الالام والتاوهات لعشرات الناس المرمية بالغرفة
ناس بالكاع وخاليها كانوله لو لافيهم شلون مجان
وناس عافوهم يموتون
جابوه سدية ثانية بصفي جانت لشاب متروس جسمه شظايا
مزرف ومديعرفون منين ومنين يسدون النزيف
ركضت على الدكتور وجان شاب صغير كتله ابوس ايدك دكتور بس شوف خالتي
قلب...
عدها قلب دكتور الله يخليك
هو يلفلف بجراح الشاب اني لازكه بيده اتوسل بيه مجاوبني وماحجى جان مخبوص حتى ملاحظني
من جتي سدية ثانية بيها مرة حامل تنزف
عافنا وركض عليها كال للستر هسه تجيبوها
اندار عليه وينها خالتج
وراح عليها واني قلبي قبل عيوني تعاين عليه فحصها وباوع عليه كلي
الحجية ... وزم شفايفه مانطق سعاد صاح على الممرضة الي وياه اخذوها واشر مافتهمت وين
جرينا السدية اني وياها لنهاية المرر
سووللها صدمة كهربائية انتظرنا شويه يله اجانا السرة
قبلنا جان رجال شايب
هم اعلنوا وفاته
وظلوا يضربوها صعقات كهربائية تصعد للسما وتنزل
وعدة مرات
ماكو ماتحركت خالتي
عيونها غمضت ومافتحت
كالتي يمه الحجية ميتة صارلها فترة
جرت السدية وعافتها بالممر
اي هشكل بكل بساطة
ظليت افر براسي اريد اركض وراها شنو انت تحجين
هاي خالتي فخرية
ماتموت
ماتموت
شكول لامي ياربي شكللها اختج ماتت بين ايديه ومسويت شي
ملك الموت اخذها وماكتله شي؟!
اتهسترت وجنت احس برجفه قوية تهزني حيل
ريح مرعدتني
وحسيت بدى سكري يصعد
ومكدرت بعد اقاوم نشف حلكي وبدت شفايفي تلزك وحدة باللخ
بقيت بالمر الوب مثل الطير المذبوح والله افتر داير مدايرها الزم ايدها واكللها كومي هسه يجيج سعد
واجاني ابو طيف يركض بين الناس اتاريه جان يدور عليه
واكع الازر مني ومحاسه انطانيه اياه وظل يردد لاحول ولا قوة الا بالله
انا لله وانا اليه راجعون
لج قيم صارت صدك وخالتج ماتت يولي
لج قيم كومي لطمي وصيحي خالتج ماتت
عزة لعزاني
شلون اذا شافتني امي
شكوللها شحجي
شكول لخالي علاء
وشحجي لرحاب
لج قيم شلون فرطتي بيها هيجي
شلون مو انت
انت الي جان يعتمدون عليج
كعدت على الحايط وكمت اضرب براسي وابو طيف عيونه دمعت وكام يمسح بيها
كال والله هضيمة شوفي هاي الناس شنو ذنبها
سيارة مفخخةبنص السوك!!
زين ليش
ليش تكتلوهم
منو انتو!!
وشتريدون منا
ظل يباوع عليه واني ادك على راسي
كالي خيتي شبيج
شو مو طبيعية انت ؟
انت مريضة شي!!
مجاوبته بس ظليت ابجي
كالي حصلت سعد وكتله احنى هنا
هو سامع بالانفجار وراجع عليكم
خطية جان منهار
امج وين اخوج وينهم
ماحجيت ولاجاوبت مجنت اكدر احجي جنت ارجف واهتز من رجفة مثل الي مغطسيه بمسبح ثلج
ظل يكلي اختي شبيج
ابقي هنا اودي خالتج للمشرحة
دفعها واخذها واني اريد اكوم وراه مااكدر لفيت الازر عليه كوه وكمت اسحل بروحي سحل وعيوني عليه كون مااتيهه
وسمعت صوت امي من بعيد وسط كل هاي الهوسة الي يمكن اذا صرخت الحامل الي تولد محد يسمعها
وسط صراخ الاهالي الفكدوا ولدهم
سمعت صوت امي وبديت ابجي بالزايد شكلج يمه
جانت تصيح قيم
قيم وينج جاوبيني خلي اشوفج
خالتج وينج
قيم
وسعد شاف ابو طيف لانه اجانا من جهة المشرحة
وخالتي لمحتهم وركضت وراه
كعدت بالكاع وانتجيت على الحايط
من شفت امي تركض
انهد حيلي اتسمرت ومجان بيه اتحرك
لميت رجلي وغمضت عيني
مجنت اريد اشوف جزعة امي على اختها
ولا اسمع نواحها عليها
ظليت افر براسي وجانت عيوني مغوشة مكمت اشوف زين
وكل شويه وحدة تمشي وتعثر بيه
واللخ وكعت عليه وشالت روحها
واجى رجال كايد ابنه ويركض بيه اتعثر بيه وانجبح
عيوني صار بيها سواد وخبت الصوت
حسيت بنفسي بديت انطفي
ابد مانداريت جهة امي جنت خايفة
صوتها وحده جان كافي انه يشك قلبي شك
لزمتني الباردة وحسيت سطل مي وانكب عليه
وماسمع الا صوت مرة حسيته بعيد
جانت تخضني من جتفي
قيم قيم انت زينة ماما شبيج
جانت ام منة ويه بتها
لزمتها حيل وشبكتها جنت اريد اي احد اعرفه يحضني يكولي ماكو شي جذب
جنت اريد احد يلزمني ويخضني يكلي اصحي
يضمني
اي جنت اريد احد يشبكي كمت اشهك بحضنها حسيتها دافية كامت تبجي بصوت عالي
جانت تكول الله يرحمه هذا يومها بعد
هزيت براسي كانه ماريد اصدك
مااريد
جرتني هي ومنة وكالت يمه انت موزينة فد نوب تروحين انت هم يصير بيج شي
شيصير بامج امشي ويايه
اخذتني واني عيني على امي من بعيد جانت تضرب راسها بالسدية
ماسمعتها شتكول بس تبجي
تبجي وتتلطم وسعد هم
جان يضرب على راسه وابو طيف يسكته
وصلت لبيت ام منة ومنة حضرتلي الفراش وساعتها زادت رجفتي والله جنت انخض خض
راسا غطوني وكوموا علي البطاطين
وشويه حسيتهم رفعوا البطانية ووحدة تسال اللخ تعرفين شلون يضربون الانسولين
باوعت عليهم وجانت الصورة موواضحة والصوت بيه صدى كانه يحجون عبر المي
ابتسمت اليه وجانت عيونها مبلله من البجي
وكالت كريم جاب الانوسلين
مااعرف اضربج تكدرين تضربين نفسج
اني مارديت لانه جنت كوة افهم
غمضت عيني جنت اريد اكللهم عوفوني
عوفوني خلي اموت وارتاح
حس جبل من الهم عليه
كالت لبتها واشرتلها
واجى رجال جبير بالعمر
اتذكرته هذا زوجها الثاني
جنت اغمض وافتح كوة كوة
كالتلي عمو راح يضربج هو يعرف
احنى مانعرف
لاتستحين مثل ابوج
وغطتني بس طلعت جزء من بطني وضربني الرجال
ونمت
كعدة على صوت كريم ديشلني هو وعباس
ماحسيت بس جنت مترنحة
واخذوني بالسيارة لبيتنا
مجنت اريد اشوف امي
جنت اتمنى مااشوفها هسه
مااعرف جنت احس سياف وحاد سيفه على ركبتي
رحت لغرفتي ونمت البيت جان سنطة وشفت نسوان حركتهم خفيفة مانتبهت منو هذولة
بس لمحت رحاب مثل الصنم كاعدة وبحضنها بسام
وتصيح يمه لاتخاذين عمار فدوة اروحلج
ماترمش
وروان كاعدة بصفها حاضنتها حيل
طبيت ونمت ورجعتلي الرجفة مرة ثانية
جنت اريد بس اي احد يغطيني
جنت اريد اصرخ اصيح بس مااكدر
ياناس ياعالم حموت من البرد
ياناس روحي تريد تطلع ومجلبه بيه
وظليت على هالحال الا ان حسيت بحركة بالغرفة جانت نور دتنوح وتنعي
وادور بالهدوم مااعرف يمكن جانت جنطة بسام دطلعله هدوم
كمت اون واعلي بالونه حتى تسمعني
جتي عليه وكاستني
---يمه قيم هاي شنو صايرة كتله نار
خلي اروح اجيبلج خافض حرارة شي
وظلت ادردم عليه هسه وكتها بله احنى بمنو نحير بيج برحاب بالعزة
حسيت وراها اكو احد يمي بس بعد انتهيت مجنت اعرف افرزن منو
يمكن روان
للصبح شويه صرت احسن بس الباردة تروح وتجيني
عرفت وسمعت انه همه بالنجف والمغرب يجون
هاي صدك صارت قيم
هاي صدك خالتي ماتت
معقولة زين شلون
يعني شلون اجاها ملك الموت واني بصفها شلوووون
ياربي ليش يروحون الاعزاز هيجي برمشه عين
جتي خالة كرم ام فرح وسمعت صوتها سالت عليه
وعرفت من سوالفهم انه فاتحة الرياجيل كريم وعمار واصدقاس سعد وعباس
لانه الولد راحوا يدفنون خالتي
وسام وسعد وعمو ابو حميد
وخالي بفراشه مكادر يكوم اصلا انهد حيله
وشويه شويه صارت هوسة
وحسيت البيت تايه
جهال ونسوان يبجون
جانت نور شايله العزة ويجون على رحاب
رحاب من الصدمة عقلها صار بيه شي
مثل الي صار بيوم وفاة ام محمود ورجلها عمو فاضل الله يرحمه
مكامت تستوعب
واحنى دائما نخاف عليها لانه امي تكول هذه مثل بيبتي ام جاسم الله يرحمها عقلها يطير بسرعة
ظليت صافنة على السكف وابجي
اتمنيت افقد الذاكرة ومااسترجع لحظات غياب خالتي
اتمنيت انه اموت بهذه اللحظة
اضعف لحظة مريت بيها
حتى نسيت ادعي او اطلب الرحمة من الله
جنت احس مااستحقها
بقيت مشمورة على الفراش ودمعوي تحفر حفر بخدي حتى صارت يحركني
مثل التيزاب جنت احسها عليه
وماحسيت الا على صوت نعي ودك ولطم
دخل للبيت عرفت من صوتها هذه نرجس
يايابه شسوت بيه
لطمت لطم ونعت نعي
ذكرت اختها جوري من ماتت ومحد راح بفاتحتها
ظلت بالبداية تنعي اختها شلون ماتت وحدها بالغربة
انوله على امها سهيلة جانت صاحبة خالتي فخرية
جانت تكوللها يمه استلميها منه امانه ديري بالج عليها
هاي عزيزة اهلها
ويه كل حجاية جانت تحجيها جنت انمرد مرد
ليش ..
ليش هيجي يسوون ليش يعذبونا بالزايد
ليش يلجمون القلب المحروك اكثر
يمكن همه يرتاحون من يفرغون القهره بس اني شسوي
جنت اتمنى اروح اني هم املخ روحي بنصهم
جنت اريد اطلع من نفسي من جسمي واهج منها
من الوضعية ومن حجيهم عرفت انه البنات ملخات روحهن الا يرحن للدفنة
وعلى المغريبة صارت هوسة كلش قوية جنت توني اكلت شوربة جابتها روان اليه وجتي ام فرح ضربتني الابرة
درت ظهري وكمت ابجي عرفت اجوي
الصياح والعياط انترس البيت
وامي
جنت اسمع صوتها مبحوح
ياريتني متت يمه ولا اشوفج هيجي ولا اسمعج
جانت ماتكدر تصيح
بس حسيت النسوان يكلولها كافي ام كريم عندج جهالج
مجنت اعرف شترادد لكن شويه وسمعتها تصيح
ولجن بنات فخية تكعدن ولجن لاتكعدن
هم الجن قلب تكعدن
كومن كومن ولجن الطمن
كومن لطمن
كومن لطمن حيل على امجن الليلة بالكبر نامت
هاي العزيزة اني كتلتها اني
بيدي ذبحتها انكصت ايدي وولا ساعتها كصيت ظفايريج يا بعد روحي
يمه وين عفتينا ورحتي
هاي تاليتها اني ذبحتج بيدي فخررريييية
من سودة بوجهي عليج يمه شلون اجاج قلبج وعفتيني
كومن ولجن كومن لطمن راحت العزيزة
راحت دفنتها بيديه
راحت امي
اخ يمه مسحت دمعتج كتيلي بدر ليش كصيتي شعر
قهرتج اني يمه قهرتج
انشلت كون انشلت ساعتها
جانت تتخيل امي انه كصة ظفايرها جابتلها فال موزين على خالتي وكصت عمرها
ظلت لحد هاللحظة تشعر بذنبها
بس محد اذاني ساعتها غير صوت ميلاد
جانت مملخة وجهها بحيث الدم طالع منه امل تصيح عليها تكللها كافي دمرتي وجههج
تجاوبها تكللها عافتني وراحت
ابد مافكرت بيه
المن عافتني
كولولي المن عافتني
يمه المن عفتيني
من يومج ماجنت تفكرين بيه لييييش
ليش ماكلتي هاي المن تبقى
ماكلتي هاي بنية وحدها وين اعوفها ليش يووم ليش هيجي رحت
شلون عندج قلب تعوفيني وتروحين
وانت يمه ام القلب الحنين
المن ارجع ابعد
وبحضن منو انام واشم بريحتها تريحني
منو يمسح دمعتي يمه
عفتيني لييييش
ماجنت اعرف شنو الي صار وة الانفجار مال السيارة ولا ابد سالت
كانه جرح خفنا نطخه حتى لاينزف من جديد
من ذاك اليوم ماحجينا بيناتنه ابد عن الموضوع
يمكن خالي وحده اتكفل وعرف كل التفاصيل وتناقشها ويه الشرطة
ميلاد شوكت جتي ورايه وشلون عرفت ماادري
بس جانت اكثر من اتاذى
كامت تكمز وتبجي جنت احس بدبجتها تهز الكاع هز
ومحد كدر يلزمها ويسيطر عليها
كلنا فقدنا
واني من يومها فقدت صحتي
جنت اغمض اتوسل ان تنتهي حياتي
مجنت اريد افتح
خيال خالتي بالساعات الاخيرة عذبني بطريقة وحشية ومؤلمة
بالليل جتي امي واقتربت مني
دفعت البطانية وحطت ايدها على كصتي
خفت افتح عيني
صاحت على نور تجيبلي ابرة الانسولين وقبلها مقياس مال السكر
من جكتني كعدت
هي جانت تعرف اني كاعدة
باوعت عليها ومكدرت احجي
حضنتها وبجيت وكمت اشهك بكل قوتي
هي حضنتني وماحجت شي ولانطقت بكلمة بس دموعها حجت كل الكلام الي ممكن ان تكوله
ماكدرت اعتذر منها او اتاسف او ابين انه قصرت
مااعرف ساعتها جانت تلومني ام لا
بس حضنتها جانت باردة حيل
يمكن حركة كلبها بعدتها عني
ضربت الابرة وانتجيت على الحايط
جان وجهي مفزع لدرجة ياهو الي يطب للغرفة يكللها بدرية ليش ماتخذيها للدكتور حتموت البنية
لكن اكيد مجان بقدر وجه عهود وميلاد
ميلاد الي جان لحم خدها واكع وعيونها مزركة
بينما عهود جانت ممصدكة تكول قبل يوم شفتها واتغدينا سوى
شلون راحت ومودعتها
صار عندي ضعف عام وشديد وكمت انخض انخض بثالث يوم الفاتحة
وكمت اهلوس ووون
بس الهوسة منو يسمعني بيهاجانت الملاية دتقرا وسادين الباب عليه وقافليها
شكووحدة شايله جنطة ضمتها هنا وقفلن الغرفة وماسمعت غير بس صوت اسما
ضربتني ابره ومن فتحت عيون امي عليه كالت شبيج يمه شبيج
ليش هيجي تسوين بيه ناقصني قهر اني
هاي الحجاية ريحتني
ونظرة اسما الدافية بوجهها الصبوح خلتني اتشبت بايدها
كتلها جسمي كله يوجعني
شدتلي كانوله مي مغذي جانت جايبته وياها
هي جانت جاية من الصبح سعد بيوم الدفنة جان مخابر سامي وكايله ونازلين كلهم حتى عمة نورية
بس مها زوجة سامي باقيه هناك علمود مدارس الجهال
وجان وجودهم مخفف علينا الحالة على الاقل رياجيل وياهم
وراها بشويه اجاني خالي شاحب وكوة يمشي كعد على الجرباية بصفي وجانت امي واكفه تحجي ويه اسما
الظاهر جان الوقت كلش متاخر بالليل لانه اغلب النسوان نايمات ومجطولات بالكاع على الزولية حتى بلافرش
كلي خالو ومد ايدة نمت بحضنه كتله والله خالوا حاولت وماكدرت
--- لا خالو لا انت شعليج باباتي
من جان يكلي باباتي جنت ارتاح
واحس نفسي بحضن ابويه من صدك ريحته وحنيته جانت شكد تريحني
---مالج اي ذنب خالو لاتسوين هيجي بروحج
---انت شعليج امي ليش هيجي تسوين بروحج
قابل انت فجرتي السيارة
الله ينتقم منهم علقت امي وره كلامه
اشرلها خالي ان تسكت وابتسم اليه
كالي كلمن يومه خالو وكلنا حنموت لاتسوين هيجي بروحج
كومي اكلي يله
سوولها شروبه وينها امل نوروينكم
كالت اسما اني حسويلها اقتربت عمة نورية مني وبوستني
خطية شكد متغيرة عبالك بالسبعين عمرها
ايبباااه هالسنتين اكلت عمرنا اكل
اسما غيرتلي الضماد الي برجلي ودارتني حيل
حالتي النفسية اتحسنت وكمت اكدر اكعد وياهم بالهول
جنت قليل اشوف عهود وميلاد
خصوصا ميلاد مااعرف وين جانت تروح
يمكن جانت ماتتحمل احد يجي ويعزيها
وبقوا امل ونرجس وعمة نورية همه من يقوم بشغل البيت عرفنا انه وسام شال الفاتحة وذبح الذبايح هو وعمو ابو حميد وخالي كعد بالفاتحة ثالث يوم واستقبل المعزين
جان الشيب غزا لحيته والقهر كسر ظهرة
بعدها بيومين وسام طلع جواز لبسام وجان طالب فيزا
ماشفتها رحاب وين جانت بس جان واكف بالباب يحجي ويه امي كاللها مرتي مااكدر اعوفها هشكل اخاف لايصير بيها شي
يمكم تتاذه بالزايد لازم اخذها لعمان اعالجها كلش خايف عليها
وبالفعل الله ينطيها لحنان زوجها سرع الفيزا لانه الارادنه كلش صعبوها علينا العراقيين بدخول الاردن وحتى الامارات كامت الفيز تصير محودوه واغلبها تنرفض
مر اسبوع على وفاة خالتي
والحياة جانت رتيبة ومفزعة
جنا بعدنا ممصدكين
كل لحظة والثانية نكول يمكن تندك الباب وتطلع خالتي
على الاقل اني جنت ممستوعبة الفكرة
تكول ربما كابوس وهسه اصحى منه
بالشغل ويايه عرفوا واتصلوا بيه وجوي عزوني واخذت اجازة اسبوعين
وجنت يوميه افكر ابطل وبعدين اغير رايي
وليلة الخميس وزعنا صواني بقلاوة بالمنطقة ثواب على روحها الغالية
وامي طبخت جدريتين كبار دولمة
سودة عليه جانت تحب دولمة امي من تطبخها هي وعمة زهورة الله يرحمها
ذكرناها بذيج الليلة
جانت امي تلف بيها وتبجي
كلنا كعدنا وياها لفينا
كلامها جان ياذينا بالزايد
حسيت امي ضاعت مني بذيج الفترة
حسيتها انجرحت حيل وقلبها احترك
بس جان وجود خالة امل وروان واسما وعمة نورية شويه هون علينا
ظلت اسما تحجيلنا حياتها شلونها بالمانيا
رادت تغير الموضوع حتى ننسى شويه
جنا دائما فضوليين نعرف عن حياتها
وهي هم حست هذا الشي وبدت تحجيلنا بالتفصيل
وانه قبل اسبوعين هي بس من نزلت لسوريا حتى يعقد عليها عمر وهوهم موجود هنا وياها نزل ويه الولد سامي ونزار
الي جانوا معارضين زواجها لفترة طويله
ومع ذلك معافها عمر اتمسك بيها وظل يحاول
الى ان طلع سفرهم كالتلهم حتروحون كندا وتعوفوني هنا وحدي اني ماروح وياكم اريده لعمر وحتزوجه ليش بدون رضاكم خليها كدامكم احسن
تكول هيجي خليتهم كدام الامر الواقع شسوي لعد الى متى ابقى وحدي ومنو بعد احسن منه حيجيني
وبعدها حجت شلون شافت عبد الكريم بسوق الحميدية ديمشي ويه جهاله هو ومرته جايين سياحة
تكول كد مافرحت انه عمر ويايه كد ماقلبي انحصر من شفته
حسيت هذاالشخص جان ملكي وغيري اخذه
---تعرفون الحب قسمة ونصيب والزواج اختيار
يمكن الله سبحانه وتعالى يختار افضل الاشخاص النا لذلك نتعلق بيهم
بس اختيارنا اما نعيش سعيدين وياهم او تعيسين بدونهم
هذه الجملة ظلت في بالي سنين طويله
جنت احسها شكد متالمة من تحجي عن عبد الكريم وشلون اتمنت يتجرا ويسلم عليها
على الاقل همه عرف عائلي
بس لاهو اقترب منها ولاهي راحت عليه
اثنينا غوركت عيونا شال ابنه وختل وراه عيونه تباوعلها بحسرة والم
وابتسامة قهر ارتمست على محياه
شكد صعب اللقاء بعد الفراق حينها تدرك انه الحب الحقيقي لايمكن ان يموت ربما يخمد لكنه في اي لحظة يعود وينفجر
اما فرح فهذه البنية قصتها قصة
يعني اذا اكو احد ينظلم بهذا العالم والي يظلمه هم اكثر الناس الي يحبوه فهي هذه المخلوقة
جانت امها تحجي والعبرة خانكتها
دتحجي عن عذابات بنية تستنجد باهلها حتى ينقذوها
وهي بكل الم تتكلم عنها تكول شسوي لازم تصبر
صفنت عليها كتلها خالة شتصبر؟
انت تكولين عنه بخيل ومية وجه عنده
ويوميه شخصية انوبه حتى حارمها من ابسط مقومات الحياة وذالها بحجة ماخذها لامريكا على اساس مسوي انجاز
--دنكت كالت يمه الرياجيل كلهم هيجي منو بيهم زين ابوها هم نفس الشي يوم زين وعشرة لا اذا جان هاليوم هشكل باجر يجينا غير شكل
قابل تتطلك تتزوج غير واحد كلهم نفس الشي عدها جهال اثنين وين تروح ماعدنا بنية مطلقة عيب الناس شتكول علينا ماعرفنا تختارلها ماعرفنا نربيها مو بت اصول
---خالة هاي الحجاية مالت بت اصول طلعها الفاشلين بالحياة الي يريدون يعلقون اخطائهم على اضعف خلق الله اما تتحمل او تطلع مو بت اصول
لا تطلق عادي وتبقى بت اصول هي لو عيب لو حرام مجان رب العالمين حللها ووكومة سور وايات نزل على الموضوع
---باعت عليه وهي تمسح دموعها جنت اعرف كلامي مايعجبها وجنت اعرف كسرة البنية من وره اهلها
شنو رجال في كل سفرة الها يهددها اذا مرجعتي اطلكج
اذا اشتغلتي اطلكج
صارلها سنين هناك حتى لغة ماعدها بنية مثل الورد حابسها بحجج تافهه واهية مالها اي صحة
وفوكاها تكول يدلل عليها كلما تتعارك وياه يتخربط ويروح للمستشفى يصيح جلطتني بتكم مو خوش بنية حتموتني!!
موتتهم والله هيجي كتلها وامي خزرتلي
هي فرح جانت حاجزة تنزل لبغداد
وحلفتها لامها انه يجون يزورونا وماحجت غير ان شاء الله والله هي هم تسال عليكم
بعدها باسبوع بدينا نحضر غراضنا نروح نكعد ويه بيت خالي احنى وولد رحاب
خالي ماقبل بعد نبقى بيتنا علما تهدى الاوضاع
سعد طلع لسوريا ويه بيت عمة نورية جان منهار وصار عودتين
كام يحجي ويه نفسه ليل نهار اني الي كتلت امي
وحتى بيت ام صلاح من يومها بعد مارجعوا للمنطقة ولاشفناهم
مع لك خال دزه جان خايف عليه
ميلاد راحت كعدت يم عهود جان زوجها ماجرلها بيت بحي المهندسين بشارع فلسطين
بس خطية ماارتاحت
جانت تشكي لامي تكلها خالة ضعت اني وتهت منو الي بعد امي
منو الي بهاي الدنيا منو يلفيني
خوفي لا اصير مثل نور!!
ظلت تتنقل بين بيت خالي وبين بيت عهود
جانت تحس نفسها ثقيلة هناك
ذكرها عمو ابو حميد يكول جنت دااشتغل بمعاملة خالة فخرية اقدملها على الحج هي جانت طالبة منه وعلى اساس ورة العملية من تصير زينه تروح عمرة
نور جانت دتقفل وحتسافرلعمان اتفقت ويه رامي انه يسحبها مناك
وطلت نروح نودعها قبل متسافر
من وفاة خالتي كلنا اتشتتنا
ابد مارجعت لمتنا مثل قبل
كلمن راح بدربه وطريقة
كل واحد بينا راح لصفحة
صدك لو كالوا الي يفقد امه يفقد كل العالم
تابعوا التكملة
