جانت مغربية والكهرباء مكطوعة
ورحاب دتكلي بيتنجان وبتيتة للعشى
وعبوسي ديلعب بسيارته الحمرا البلاستيمك وتايراتها ضايعة
وبشار يزحف يروح ويجي على امه
وعمار بالحجلة مجلب بدشداشتها
وشويه وجتي الكهرباء
كعد بشار وبايده البيضا الصغيرة كام يصفك وسنين صغار برزوا من حلكه الصغير
وشويه اندكت الباب وجانت ام منة جايبة ماعون زردة للجهال ولرحاب لانه تحبها
وهي هم راسا انطتها قوطية معجون مالت طماطة محصرتها من تشوف منة تلعب ادزها بيدها لامها
كالت هاي زايدة عندي
ابو عباس جابلنا البارحة مص كارتونه وقسمتهن بيني وبين اهلي
واتذكرتكم احسن مما يومية صينية المعجون بالطرمة وطامسة بيها البرزونة
ههههه
----اي والله هاي عمتي خطية صينيتين تذب هههه ومصرة مالت البيت اطيب وهي مليانه وصخ
---سلميلي عليها عود ام منة
وهي دتطلع لفت الروب عليها وكالت شوفيها هيجي وكت خطية تصعد للسطح تندعي
---اي ادري لساها نفس عادتها
الله يرجعلكم خليل بالف سلامة ويفرح بته بشوفته
وقبل ماتسد الباب اجى فاضل على السريع
ويصيح عشى رحاب عشى على السريع ميت من الجوع
---خيرك شو جاي مستعجل
---اللعبة بدت اللعبة
وراح لغرفة مكتبه القريبة من الصالة وظهرها يصير على حديقة البيت اللي ورة
جان مخلي تلفزيون صغير اسود وابيض قديم السحب مالته قوي
يسحب بيه القنوات الايرانية
من ايام حرب ايران جان يخلي خاولي على البردة لو بطانية صغيرة
ويقفل الباب حتى رحاب لاتشوف وتسمع
يعرفها ماتقبل واكيد تسويله مشاكل
ويبدي يدور على قناة سحرالمعارضة
حتى الاريل مالته جان ماده من يم الشباك مالت الغرفة ومايبين لانه اشجار الحديقة مغطيته
بس هالايام وخصوصا ورة الحرب
صارت هواية نااس تدور قنوات فارسية ايرانية تنقل اللعبة مالت الطوبة بث مباشر (زنده )
ويودي بالاريل ويجيبه
حتى بس يشوف اللعبة وتطلع كوة مغوشة
ونفس الشي بيت فخرية
عهود جانت تكلي بيتنجان ووياه جيس معكرونة حتى يكفي الكل
رجع سعد مخبوص ويه هوسة طلعة بدرية ونورية يرجعون لبيتهم
وواكفين
اجى زهيرديوصلهم
---هم يلى علقت بدرية وهي تلم نفسها وغراضهم
وعلقت انه صارلهم يومين غايبين الجهال عن المدرسة بعد لازم يداومون باجر
--- الجمعة بلكت اني وعلاء نجيج فخرية وبوستها وطلعت كعدت ليورة هي والجهال واسما
ونورية ورة ماظلت تسلم عليهم وتبوس بالجهال وزهير يكول يله عااد
وصعدت بالصدر تودعهم عهود بالباب
وراسا
سعد صعد ميلاد فوك السطح علمود تفرله الاريل
حتى هو هم يكدر يشوف اللعبة
وعهود تحجي عليه تكله لك نزلها من السكح ولك خطية باردة
سعد جان بعمر سطعش سنة بذاك الوكت
وجان يحب الرياضة ويموت ويتخبل على برنامج الرياضة في اسبوع ومؤيد البدري
والجرايد الرياضية الي يطلع من الغبشة يحصلها
وميلاد جانت اكبر منه بسنة
هم تحب الرياضة وتموت على الطوبة جانت تشجع الفريق الايطالي
ويكعدون يسهرون من اكوكهرباء على اللعبات مالت الكوبة واي شي يطلع بالتلفزيون
وبعد الحرب بفترة
بطريقة غير مباشرة
انفتحت الاتصالات الهاتفية بين العراق وايران
لكن الناس جانت تخاف تتصل باهلها
لانه همه متاكدين وعارفين انه اكيد الخطوط مراقبة
لكن في عصرية اليوم الثاني
جان علاء توة راجع من بيت اهل امل وجايب الايجار مال الشهر الي فات وهالشهر صاحبه ماعنده يدفع ومتوسل بيه يصبر عليه
مدد رجليه وكعد يكلب بالجرايد
ويخوط باستكانه الجاي
ومامتعلم على النظارة من يقرا ينزلها ليجوة !!
اول مجان يروح على الصفحة الاخيرة والصفحات الي قبلها
هي الي تحوي اخبار متنوعة يمكن الواحد يقراها
وهنا دك التلفون
راحت امل رفعته
نفس الخط الي عدهم من زمان
بس من ورة الحرب صار يشكل ويه خطوط الجيران
وكلما تشيله تكدر تسمع مكالمات جيرانكم بالاكمل
من رفعته وكالت الو
جان صوت شاب بالكوة يحجي عربي ومكسر وكمل جملته بكلماات ممفهومة
سكتت امل وصاحت على علاء واشرتله انه مفاهمه هذا شيريد
شاله علاء وشكله مستغرب
-الو الو منو ؟
-تكلم الشاب بكلمتين وصوته بعيد مافتهم منه علاء وصار فراغ وراها سمع اسمه
---علاء علاء انت علاء
جان صوت نسائي بعييد
تصيح وتبجي
-- اي اني علاء منوو
