جانت ظهرية جمعة والجو حلو وطيب ...بس ورة الثنتين تصير الشمس اقوى ...
حضرة العباس عليه السلام كانت اصغر من هسه ...
وكبال الساحة كله تراب وية كل هبه هوا العجاجة تكب على الزوار...
ساعتها الناس تصلي على النبي وتروح ليغاد ...
فرشن الجودليات النسوان وطلعن الاكل من الجدورة ...فخرية جانت مسوية كبة وكباب عروك ..والعلاكة ريحتها تعط قبل ماتفتح الجدورة...
وعبد الكريم ابن ام غازي ركض حاب بطاله مشن واجى...
ام غازي جانت جايبة دجاجة مكطعتها ومكليتها بس اللحم يم العظم احمر مامستوي ...فعرفت فخرية المرة مالها واهس حتى الغدة گوة مسويته
وام كاطع تلف الخبزة تحط بيها كومة خضورات ونص كباية ...
ياكلون ويعيطون على ميلاد وعهود لايروحن بعيد ...
ادنت فخرية من ام غازي وسالتها شبيها هلكد تبجي وعيونها حمر ؟!
شهكت المرة ونزلت دموعها وكوة كامت تحجي ...ابو غاذي يعاين عليها من بعيد لايكون تحجيلها حجاية وتفضحهم بس هي مااهتمت ...خرطت الاكو والماكو...
_ام سعد شحجيلج الله وحده العالم بحالي يكون ابا الفضل عباس يفك ضيجي ...
_والله گلبي تكطع على بجبيج حجية احجي شبيج
_دادة غازي هالمرة بالتوقيف صارله اسبوعين حتى زيارة ماخلو ابوه يروح
وانه كلش قلقانه عليه هو مريض وصحته مو شي بس لايرجعونه اليه ميت!!
_اسم الله عيني لاتكولين هيجي
لا لايظل بالج هسه يطلعوهم احنا هم ونصت صوتها فخرية حتى كاطع مايسمع ولمت عبايتها عليها اكثر
احنا هم نسيبنا هذاك اليوم جانوا حابسينا واخوية علاء طلعه همه شويه شادين على الوادم مااعرف شبيهم ...
_يمه وهم تتكحل عيني بشوفته ويطب عليه ...اوف شحجي وشكول تدرين من جان بالكلية هو شالع گلبي ...يومية حجز وتوقيف يوم منشورات ويوم تحريف ويوم ماادري منين يطلعهن هالسوالف
_قصدج تحريض خالة جاوبتها رحاب على كيف وراسها يمهم ..
يمه شمدريني تحريف تحريض اني ادري بالهسوالف كلشي ماريد كون بس ابني يبات بالبيت ...
_الله يسلمه هو شكد عمره؟!
_سبعة وعشرين اي خية اتذكر حنان كالتلي
حنان يمه اخوج مو سبعة وعشرين ؟!
اي يمه اي
_زين ليش ممزوجته لحد الان مو جبير وانتو ماشا الله خير من الله !
_ام سعد اتوسلت بيه وهياته ابوه يشهد عليه ابوس ايده ورجله يمه اتزوج خلي جهالك بحضني مايرضى شسوي حتى جبر جبرته عافني وهج ...
يمه انه اريدن ابني يرجعلي عيوني غدن دم عليه
خلصت الزيارة والمرة عيونها مانشفت ...
ليما رجعوا للبيت وفخرية تفكر يكون سعودي من يكبر هم هيجي يسوي !! هههه يله خل هو يكبر ازوجه وعمره خمسطعش سنة اي لعد شلون هذا المدلل على تلاث بنات هههه...
ماكو شهرين جوري بت سهيلة الجبيرة ولدت ...هواية اذاها الحمل وزوجها بعد اكثر جان كلش نحس وعشرته صعبة وهي هم مطيقه ...جانت يوم ا بيت رجلها واسبوع يم خالها وامها ...
بدلت فخرية من الصبح ولبست سعودي وميلاد احلى هدومهم وعافت رحاب يم عمتها
ووعهود اتوسلت بيها تاخذها ماقبلت هاي تفتن وماتبقى بحلكها حجاية كالت لعمتها رايحة تودي نذر لسيد محمد وترجع على السريع ...قبل ما يرجع كاطع ...
وصدك ركضت لبيت سهيلة اول شي اخذت امانة للكراج ومن الكراج راحتلهم تكسي
جانت جوري باقية يم امها اداريها
اول ماطبت هنت وسلمت بس سهيلة وجهها ثكيل وبالكوة ردت السلام نرجس هم جانت موجودة شالت زوج تراجي ناعمات لبت جوري سموها روان وزوج ثاني لنرجس ...يعني تصالحها بيه ...
وبقت شي ساعة ورجعت ...
وبالرجعة الطريق كله تبجي ...ماقدروها وجان وجههم ثكيل عليها ...
اني شعلية ! قابل انه دفعت علاء يتزوج عليها شو كلها تدري الا انه...
رجعت على السريع وتكول بالجذب ماانطو مصقولة بيد ميلاد ...يالله هم حقهم گلبهم محروك
المهم انه سويت الواجب ..
وبرمضان ذيج السنة صادف نص شهر اب اللهاب ...
فخرية جانت يوم تصوم ومن تصير حارة كلش يموع گلبها وتفطر...
ومن البنات جانت بس رحاب تصوم وهم ماتكدر من تتعب بالشغل تفطر
...بعاشر يوم منه او يوم زايد عليه
يومية متعلمين برمضان وكت المغربية قبل الاذانوبربع ساعة تفتر عهود تاخذ ماعون وتجيب ماعون ...
علاقتهم بالجيران جانت كلش طيبة
بس كاطع طبعه نحس
يكوم ويكعد ينبه على فخرية ماتطب على جوارينهم نايحب هذا الطبع حتى من تجيهن وحدة تزورهن يظل كاعد گالب خلقته حتى تفشل وماتكررها تجي مرة ثانية لو عود يسويها عركة ....
بذيج النهارية ...رجع كاطع ساعة وحدة غادي شرار طبعا هو مايصوم مايكدر مايتحمل جوع هذا عذرة ...
بس صياحة وعياطه بالبيت مجان طبيعي سعودي توه عمره خمس شهور واسهال ومتنحس ومن الصبح يبجي وميلاد هم تصارخ تخاف من صياح ابوها
البيت انگلب على فخرية عافتهم على رحاب وعمتها وركضت برجلها للمستشفى طلع بيه مصران اعور...
هي هم ركضت لمدينة الطب جانت توها مبنية مصارلها سبع سنين وجديدة وقسم الجراحة نظيف وجديد راسا سوله العملية
حالته جانت مستعجلة كو مال انتظار بساعتها صارت العملية
...االي ماطولت هواية ... كعدت فخرية تتراكض منا ومنا تخلص المعاملة مال دخولية وتجيب الدوا ولما رجعت للغرفة شافت رحاب تروح وتجي تسكت سعودي وسامي كاعد على الكراسي صافن عليها
المرة انصدمت ...شجابج ولج ...
والله ماما سعودي مايقبل كلشي يحط بحلكه وفحط من البجي ..بيبي كالت وديه لامج ترضعه بابمستشفى ...
اخذته وسلمت على سامي ...وسالته وشجابك انت هنا ...
فكللها امي دزتني ابويه كللها خالي بالمستشفى
فاول شي رحت لبيتكم وبيبي دزت رحاب ويايه ...
بذاك الوكت سامي عمره تلاطعش سنة ورحاب خمسطعش ...هو اصغر منها بس جان طويل وضعيف ...اطول من رحاب ومبين اكبر من عمره ...
فقير وهادئ ...
وهمه كاعدين اجى ابو غازي وابنه يدورون يشوفون كاطع ...
سلموا وكعدوا بصف كاطع
...فخرية نطت سعودي لرحاب وكالتلها اخذي سامي ورجعي هسه للبيت باجي جيبي رجل عمتج تعالي انطلع ابوج
...وهي تعاين من جوة ليجوة ورة العباية على غازي ...تريد تشوفه زين ..
كعدوا وبدووا يسولفون شوية وشوية ...فخرية محابته لغازي ...
ظلت تفكر بحجي امه من راحتلهم اخر مرة علمود طلعته من الحبس وشلون ذبتلها حجي على رحاب...
غازي جان شاب طويل ونحيف كلش ...ووجهه عريض وعيونه كبار بس غايرات ليجوة هالة زركه داير مدايرها مثقف ويحجي باسلوب وحتى كعدته مرتبه ...
والكعدة كلها يحجي عن الاوضاع ابغداد وكاطع يسب ويلعن بيهم ماتهمه هالمواضيع وكل حجاية يكله عساهم نارهم تاكل حطبهم شخاج بجيبي اني...
فقاطعه غازي كله عمي انت تعرف هاي المستشفى بناها عبد الكريم قاسم سنة ١٩٦١؟!
ابوه سكته كله ابني هسه لو جدك بانيها هم هيجي ماتذكره بابا جوز واكعد راحة مانريد مشاكل ...مو هيجي ابو رحاب ههههه
فقاطعه كاطع كله ابو غاذي هاي كم مىة اكول ابو سعد اني ابو سعد ههههه....
ثم تعال خابصنا بعبد الكريم قاسم ...هو حتى الشيوعين مثلك طيح حظهم شبيك هيجي كاتل روحك عليه !
اتزوج وشوف حياتك لحد الان لاتعيين ولاشغلة بيها خير....
يمعودين طلعوني اريد ادخن ...راسي حيطك...بعد مااتحمل!
ماكو ثاني يوم رجع كاطع للبيت ...وهالاسبوعين اللي كعدهم بالبيت حوله الى ثكنة عسكرية..
لاحد يحجي لاحد يلعب لاحد يعلي التلفزيون لحد يفتح الشباك لاحد يطلع للحديقة ...طلعت روح فخرية وجهالها ليما خلص رمضان وجاها العيد ...بس شلون خلصت هالايام طلعة منا لهناك مجانت تكدر تطلع ...
جتي نورية قبل يوم من العيد واخذت الجهال جوكة وحدة وجددتهم هدوم العيد من فوك ليجوة وحتى سعودي اللي الوحيد انطى كاطع فلوسه على حده لنورية تشتريله ...كلهم عرفوا بدى كاطع يفرق بينه وبين البنات ...
اول يوم العيد محد اجى زارهم غير ابو غازي وصديقه الثاني ...همه متعودين ثاني يوم العيد يلتمن البنات ابيت اخوهن يعايدن امهن
اول يوم لاهل الزوج جان ...
وجتي نورية وجهالها وزوجها وزهوري وولدها وزوجها واتوزعت العيديات والببسيات والكليجة والفرحة جانت بداخل كل بيت
فترة السبعينات كانت الفترة الذهبية والعهد الذهبي للعراق ...اللي صار اقوى قوة اقتصادية في الشرق الاوسط كله ...
جانت احوال معظم الناس متحسنة وجانت الايام جنها تضحك الهم ...
بدى سامي يخذ الصور للعوائل...
اول صورة لكاطع وامه وفخرية رحاب كعدت على القنفة وحطت رجل على رجل واصبعها جوة حنجها وتضحك ...عهود مخنزرة على ميلاد اللي كعدت بمكانها بحضن بيبيتها وسعودي ديبجي بحضن امه اللي جانت هاده شعرها الطويل ولابسه ثوب ابو الخرط ...
والصورة الثانية جانت لعائلة نورية وزوجها زهير وجهالها
ابنها سامي كعد بصف ابوه طويل وضعيف وماشا الله كبران بطول ابوه ..
ونزار عمرة دعش سنة لزم نفنوف امه الشيفون وكمبص يم رجلها امه جانت كاصة شعرها مدرج ولابسة تراجي ذهب كبار ...
.وفرات حماها كاعد بالنص وابتسامة عريضة على وجهه وشعره رايح صفح .....واسمهان اللي جان عمرها سبع سنين لازمة ايد امها وابوها بالنص ...لابسة بدلة كصيرة وحزامها ابيض ...
