من رجعت رحاب هي وسامي للبيت عادي يصعدون الامانة لانه اصلا سامي مايملك بجيبه غير كروتها
وجانت القطعة كلش ازدحام فاول ماصعدت رحاب اشرلها سامي ان كعدي هنا وهو دفعلها وكعد بموازتها وواول ما كعدت عينها صارت بعين وسام اللي جان الظاهر واكف وياهم بالقطعة بس هي مامنتبهه عليه نظره وحدة بس باوعلها جانت بيها كل الكلام
نظرة استغراب من وجود سامي وياها وعتب ولوم نظره وحده ورفعة حاجب كسروا فرحة رحاب بذاك اليوم
هو راسا دار وجهه على سامي كانما راد يحفظ ملامحه بس من الهوسة الاخير ماانتبه على هذا الشي
طول الطريق ورحاب تحس نظرات وسام وراها تثقب ظهرها بس ولاكدرت تتحرك وخافت تندار ظلت متسمرة بمكانها
جان مجرد شعور بالالم نغص عليها الوقت لا اليوم كله
ورجعت للبيت كلش حزينة حتى سامي اللي مايحجي سالها بالطريق وهمه يمشون للبيت
رحاب شبيج! شنو تبجين ؟
هزjراسها ونفت انه اكو شي بس بداخلها جانت الدنيا مسودة بعينها
كرزت بس على صوت اقدامها وهي تسحق الالتراب جواها
كله منه السبب ... قصدت على سامي اللي من سرعة خطواتها
لهث حاول يجاريها
يمكن هسه عباله صاحبي لو شنو هو ليش ضاج من شاف سامي معقولة هيجي راح باله بعيد؟
لو شنو زين هو ليش فرض هذا الشي ليش مافرض انه اخوية مثلا !
زين اني من نزلت ليش ماشفته!
شوكت نزل قبلي وين جان بالي! يالله شوست بروحي اني!!!!!
ومن وصلت لبيت خالها اول مادخلت سمعت صوت صياح خالتها دخلت تركض عليها
وشافتها تجر كريم من ايده وتسحله على الدرج وهو يبجي يصيح ويعيط .....
كريم من اتوفى ابوه كلش نحل وضعف ... مكام ياكل مثل قبل ...
ويومه تقريبا يبجي عليه جان كلش ماذي امه بسبب تعلقه الزايد بابوه
من جان يكعد على الدرج يبجي اريد بابا وهو حجيه مكسر
مايعرف بس هالجملة هذه يكولها صحيح
الفترة الاخيره اتحول اشتياقه لاابوه الى نحوسيه ولجه بالبجي
وبذاك اليوم جان باجي من الصبح للظهرية وامه ملت منه وتعبت فوكعت بيه بسط
جرته رحاب منها وحضنته جان يشهك وكوة يتنفس انهارت بدرية يم الدرج وظلت تلطم وتملخ بروحها خرمشت وجهها حيل ومن كامت تسب وتحجي
ركض عليها سامي ولزم حلكها خاله اسكتي الله يخليج لا تحجين شي بعدين ياذوج
بيت علاء هيجي وكت مابيه بس هي والجهال
علاء وامل سوى بالمكتب والجهال اربعتهم عليها فقدت بدرية وانهارت انهيار تام
كامت تتصرف بطريقة جنونية وعبثية كانما تحاول تطلع كل كبت الشهور اللي فاتت
رحاب اخذت الجهال من الممر وهمه يصرخون ويبجون من الخوف
وظل سامي صافن على بدرية مايعرف شيسوي راح جابلها كلاص مي وحاول ينطيها بس هي رفضت
الموقف خلى الكل تدمع عينه
ظلت تصيح بدرية منين اجيب ابوه اخذوا ابوك ودفنوه حتى عزة ماخلونا نسويله منين اجيبه !!! منين !!!!
ومكان بس هو الوحيد.ّّ!!!. !هذه كانت اول رحلة لقطار اليتامى في العراق
نست رحاب وهي تحضن الجهال وتبجي عليهم كل حزنها
سمير ابن علاء جان اكبرهم دائما من يصير موقف مؤلم يحضن اخته ويبجي
هو جان يتكر عنده ام وبالبداية جانت يكعد فترات طويله بالحديقة ينتظرها ترجع
بس هسه مصار مايتذكر ملامحها زين بحيث اي امراءة غريبة تفوت لبيتهم ويرحبون بيها يتصورها امه
لانه كل اللي جان يسمعه من جان يبجي عليها
ماما مريضة ومسافرة يعني هو عنده امل انه هي ترجعله في يوم
اما اخته روان متصورة امل هي امها
يعني امل كانت سادة نوع من الفراغ بالنسبه للطفلين
لكن كريم ابن بدرية
وعلى الرغم من وجود خاله ماكدر يسد فراغ فقدان ابوه
ولو الطفل بهيجي عمريمكن بعد سنة سنة وشوويه يبدي يتعود وينسى
بذيج الايام علاء قرر يسد مكتب المحاماة مالته
ويفتح محل جبير او مثل المعرض يبيع بيه زوالي واجهزة كهربائية
جانت اكو حركة بالسوق بشكل عام
حركة اقتصادية يعني
الحكومة بدت تضخ الرواتب
وكثرت طلبات التوظيف وبدى السوق يستقبل الايدي العاملة بشكل اوسع
وبدت المشاريع اللي جانت مخطط الها منذ سنوات مضت ان تنتهي
مراكزالبيع و التسوق , المجمعات الحديثة, المستشفيات , المدارس , وغيرها
فكان مشروع ناجح بذلك الوقت وهو هم اصلا مل من مضايقات الامن اله
ورفضه لكثير من القضايا المتعلقة بيهم خلى شغل المكتب يقل وبنسبة كبيرة
حتى زوجته امل الي كانت بين فترة وفترة تستلم رسايل من امها واختها
صارت الرسايل كلش تتاخرعليهم
ومثل ماعرفوا بعدين انه يتم عرضها على الاستخبارات اول شي وبعدين توزع للاهالي لدواعي امنيه هذا الشي خلاهم ينسحبون ويحاولون يبتعدون عن ع
ولذلك كان الزوجين منشغلين بتعزيلة المكتب وصارت ساعات بقائهم برة البيت اكثر وهذا الشي ضغط على بدرية
وحتى هي هم تطلع من تحت هذا الضغط بدت تدور على شغل
اللجم فلس اللي جان جوه ايدها خلصوا وحستها صعبة كل شويه تظل تطلب من اخوها الصغيرة والجبيرة
وعلى الرغم كان هناك طلب قوي وتشجيع اقوى على ضخ الايدي العاملة النسائية بسبب استدعاء الرجال للحرب
الا ان الكل رفض تشغيل بدرية بمجرد معرفتهم بقضية اعدام زوجها المرحوم
تجنبا للاشكالا ت ويه الامن والحكومة والسين والجيم اللي ماتخلص ولا حتى هي بدرية نفسها خلصت منها
فقررت تشتري مكينة وترجع تخيط بالبيت ....بس منو حيجي يخط يمها ؟؟؟
بذاك اليوم كانت الشرارة للتغيربدت على البيت كله .... تعبت بدرية كلش وبذاك اليوم انهارت و
ظل سامي كاعد ينتظر مايعرف يعوف رحاب ويرجع للبيت
وامه موصيته يرجعها للبيت
زين لو لو يبقى ينتظر خالها علاء وبعدين يرجع ظل محتار
بينما كان اخر هم رحاب التفكير بسامي
راحت بدرية لغرفتها لفت روحها بالعباية وظلت تبجي وحدي
وكامت رحاب من كيفها تطبخ وخلت الجهال يم سامي
اللي حس بشعور غريب ومفرح
هم يجي يوم يتزوجها ويجيب منها اولاد وهيجي تكله سامي خلي بالك من الجهال اروح اطبخ ?
معقولة سامي ههههه والله خيالك جامح وابوك شتكله؟
ظل يفكر سامي بهذا الكلام بينما
الكل كان يبجي الا هو كاعد ويبتسم ويه روحه الى اجى علاء وشويه اتضايق من شاف بس سامي ورحاب عايفتهم بدرية وحدهم ويه الجهال صح هو ابن عمتها بس مايجوز يعني هيجي صعبت عليه
ورة الغدا علاء ماقبل سامي ياخذ رحاب للبيت كله اني ارجعها باجر علمود حالة بدرية تعبانة فرجع لبيتهم ومناك خابر فخرية وحجالها كلشي...
وراها راسا صعد للبيتونة فوك يم اخوه وطيوره و عمه فرات جان رايج للسوك
كعد بصف اخوه وهو يصوفر للطيور وكش عاع وهنه كلهن بس تلاثة حمر ودجاجتين
صفن ضايج فساله نزار كله شبيك وجه البومه كلما اشوفك تبجي بوجه الله ماتكلي شجرالك بس لا تكلي هم رحاب
فدوة سامي ماتكلي شجلبت بيها
هنه بنات خالي خشمهن يابس وماينطاقن مااعرف انت شلون يعجبك تروح يمهن انوب تحب وحده منهن عوذه
اندار عليه سامي وكله نزار اني لازم اشتغل خوما اضل كلما اطلع مكان اخذ كروة من امي لو ابويه
-اي خويه اشتغب علواه اني وياك ياريت احنى هم مو صغار اني اشوف اسهل شغلة ومايرادلها راس مال العمالة شتكول !!
صاحبنا ضياء هو وابوه يشتغلون بيها وفلوس كومه يكول
-ولك العمالة تكسر الظهر مو فترة وداني ابويه العام ماتتذكر
--اي وشنو يعني نتعلم لعد اكو ابالك غير شي
- هز راسه سامي وماحجى ... بس هو فكر بداخله اخاف رحاب تستنكف منه يشتغل عماله وبعد ماتقبل بيه , بس هو خوما للتالي يظل يشتغل عمالة اكيد حيخلص مدرسة ويدخل احسن كليه لعد شلون !!
اول يوم برمضان مو الكل صام كاطع اصلا مايصوم هاي صارله كم سنة وعلاء جان كلش يتعب مايتحمل وبدرية ماقبلت تصوم جانت تشعر بالغضب ماتعرف من منو وعلى منو وكانه تمرد وعدم انصياع
فخرية وبناتها الكبار صااموا وعمتها يوم اي ويوم لا حسب صحتها
جانو متعلمين كل خميس رمضان يجتمعون الينات بيت اخوهم ويفطرون الصايم والي مو صايم زهير ابد مايحضر هذه النناسبات وكاطع شايل خشمه الا انه شي على شي الهوسة واللمه جانت حلوة لوما ولد زهوري بكل مرة يكلبوها عركة واحد بيهم يجيت بنص السفرة ويتحول الفطور الى صياح وعياط
مر الاسبوع الاول يله رجعت رحاب من بيت خالها وجانت كلش ضعفاتة هم صيام وهم متاكل ماتشتهي ومالها خلك ومن تكعد ماتحجي جانت مقهورة من شغلة وسام وعلمود خالتها
وقبل موعد طبيبها قررت تروح لبيت خالها مرة لخ بس هالمرة ماكالت لامها شوكت موعدها حتى لادز سامي وياها
هي حتشوف شلون ولو هي مطالعه وحدها قبل بس بلكت تدبر
بدرية بذاك اليوم استلمت اول خياطة الها جانت مرة جبيرة بالعمر تريد دشداشتين على العيد والمنطقة ماتعرف غير امل وقليل مايشوفون بدرية تطلع فجتي على حجاية امل الها وشويه جانت نفسيتها احسن من بدت تستلم الخياطة
اتشجعت رحاب من شافت خالتها فرحانه
بس شلون تكللهم باجر عندي موعد طبيب وهنوبة اروح وحدي
باليل كعدت وحجت لخالتها انه موعد طبيب اسنان يسويلها اسنانها السفلية جانت تحجي وتمتمت وهي تجيب طاري وسام راسا تحمر عرفت بدرية ولكفتها
مدت رجليها بدت تشرب جايها وبطرف عينها تعاين على رحاب جانت تكللهاطلعي قميصي الوردي المشجر خلي اصغره الج مو معقوله كل مرة ترحين بنفس الهدوم شيكول عليج !
- ها جاوبت رحاب وعينها انفتحت باوسع مايمكن
- عليه رحوبه ... لج واني اشوفج الفقيرونه
- خالة شبيج شنو يعني والله مااعرف
-باعي رحاب اني خالتج وحسبيني صديقتج مو كل ولد يتقرب منج معناها يحبج ويريد يتزوجج مو كل الناس ملايكة مثلج لاتخليه ياخذ كلبج ويشقمرج صيري ذكية ولاتخلين اي احد يلعب عليج
على كل اني جان جيت وياج حتى اشوفه بس امل باجر عدها شغل مااكدر
روحي بس هاي اخر مره تروحين وحدج وهسه تحجيلي بالتفصيل
- خالة شنو احجي انت وين راح بالج
-فسالتها خالتها لج مبين عليه حلو ومرتب لانه تخافين تطلعين مبهذلة كدامة مو بله هههه
وشويه شويه جرت بدرية كل الحجي من رحاب اللي بدتها بجمل صغيرة واتمتمت بيها الى ضحكة وابتسامة من وصلت الى جملة اكيد اكيد اجي برمضان
- خالة صدكيني هو حتى لاحكني للبيت ويعرف كلشي عني اتصدكين اني شفته مره بالسوك عزة ياكاع انشكي وبلعيني جنا رايحين لسوك الجملة واني اتعاجزت ابدل جريت عباتي ورحت ويه امي لاغاسلة وجهي لا مشطه واجر بشحاطتي جر
من الحر وصايرة زركة من الشمس ههههه
- ههههه اكيد انهزم بعد ما شافج على حقيقتج
-لا والله خالة مااعرف هو ماكلي شفتج بالسوك واني استحيت اساله
والا من شاف سامي ويايه كلب خلقته ورفع تك حاجبه عليه ردت اوكع دخيله واحلفله العباس هذا مثل اخويه
- ههههه عزة لعزاج رحاب والله لو تدري بيج فخرية الله ولا كاطع جان يشرج على الحبل والله
- لا عيني اسم الله.. ليش خاله ليش هو اني دااسوي شي غلطّّ!!!
-طبعا غلط رحاب امي لاتامانين لاحد ولاتنطين مجال لاي احد صيري ثكيلة خلي الزلم تركض وراج ويحفون يحصلون رضاتج
بس هذا مدامه ضاج من سامي معناها غيران عليج يجوز والله اعلم يطلع خوش ولد
ويكون من صدك يحبج ليش لا
ليش هو اكو احلى من الحب يولي!!!!
ضحكت رحاب وماعلقت رجعت سرحت بعالمها
رهمتلها خالتها قميص وتنورة من عدها رحاب جانت شويه اطول من بدرية واضعف منهافركت شعرها من فوك وشويه جعدته وخلتلها شريط مثل الطاك والقميص جان كاشف عن ركبتها الطويله كانت عيونها كبار وملامحها البقية ناعمة وفكها بارز كانه منحوت نحت وحطتلها كحل جوة وفوك عيونها خفيف كلش واخذت من قلم حمرتها شويه ومسحته على خدودها وشويه على شفايفها حتى لاتبين باهته ماقبلت تخلي مبيض بشرة مجان يلوكلها ابد بشرتها هي حلوة وصافية وسمرة نقية وطارت رحاب والضحكة على وجهها والعالم كله جان ملون كدامها
واول مطلعت شافت الطير الصغيروني نفسه كدامها راسا ضحكت بداخلها هذا شمدريه اليوم اني رايحة اشوف وسام لايكون يعرف بمشاعرنا هههه
وركبت الامانه من الصبح جانت ساعة تسعة ونص و شويه الهوا بعده مو كلش رطب من جانت تمشي تحس نفسها اميرة وملكه والناس كلها تباوع عليها فظلت مدنكة ماتحجي وظلت الطريق كله تحفظ الحجي الي راح تكوله اهم شي واول شي سامي اخويه مو اللي في بالك
اول مادخلت للقاعة شافت وسام واكف كبال الشباك اللي تطب على الحديقة الخلفية وومتجي راسه عليه وحاط رجله على الثانية وصافن رايح بغير عالم
القاعة مجان بيها غير بس دكتورين ودكتورة وحده كاعدين يسولوفون واحد بيهم يشتغل على طفل امه جايبته الاماية من شافت رحاب ظلت تباوع عليهامن فوك ليجوه مدقفة النظر كلش
وعلى الرغم من حرارة الجو سرت صعقة بروده بجسمها خلت جسمها كله يقشعر ...
مشت بخطوات ثقيلة ...
وما ان اقتربت اكثر حتى
انتبه عليها وسام واتقدم عليها بدون اي تعابير على وجهها ...
مشت رحاب بخجل وهي حاضنه جنطتها السودة الطويله وكعدت بالمكان اللي اشرلها عليه وسام ...
_صباح الخير دكتور
-صباح النور
اليوم نشتغل على اسنانج السفليه ...عندج سؤال قبل لا ابدي...
سالها وهو يحضر الادوات وشعل الضوة وهي بعدها كاعده ...
فاوما براسها انه اتمددي على السديه اتمددت بس هالمرة بخيبة امل
ولا كانه وسام
شكله كئيب وعصبي وضايج ...
شلون يالله حتبدي تحجي وياه ...
اتمددت وغمضت عينها واول ماكلها ممكن تفتحين حلكج ...
هي فتحت عينها والتقت عيونهم ...
رفع تك حاجبه ونظرلها نظرة بعصبية
هي راسا غمضت وماحجت شي ...
بس حست بانفاسه تصعد وتنزل بقوة ... فتحت عينها مرة لخ شافتها ديعرك ومصفر
انتبه عليها اتحرك جهاز التنظيف بغير مكانه واذاها بطريقة غير متعمده
صرخت هي اااه
فز وابتعد عنها وصار يعتذر الدكتورة اللي بصفه انتبهت عيله متوتر واشرتله انه شبيك
هز براسه ماكو شي
اندار عن رحاب حاول يهدي نفسه رجع مره لخ وجانت عيون رحاب خايفة وحزينة من اقترب منها
همست والله هذا اخويه
هو هنا اشتعل غضبه ذب الاجهزة من على المسند مال التنظيف
وحجى وياها بحزم
اعذريني ست رحاب الظاهر مدااكدر اركز وياج اكثر
وهنا اندار عليها ونظره كانها توعدله بعيونه
رفع حاجبه وكللها نكمل ورة رمضان تكدرين تجين ورة العيد بيومين الظاهر الصيام ماثر عليه... اعتذر
حزنت رحاب وماحجت ومن دتنزل من السددية اقترب منها كلش وهمس باذنها وهو صاك على سنونه امج كلتلي ماعندكم غير اخ طفل صغير سعودي
واندار نزل السديه مو صحيح ست
العبرة خنكت رحاب وظلت متسمرة بمكانها وعيون ام الطفل مانزلت عنها لحظه
ظلت تفكر يعني هسه امي لازك كلشي تحجي !!
وبصوت متحشرج ومخنوك جاوبت هذا سامي ابن خالتي واحنى متربيين سوى مثل اخويه و.... سكتت ماحجت من حست انه مااهتم الها
عدلت تنورتها وطلعت بالمرر ظلت تمشي سر يع وعيونها
تنزل دمعة ورة دمعة تحاول تمسحها على السريع حتى محد يحس
وقبل ماتوصل للباب
صوت ناصي اقترب منها صاحها رحاب
هي راسا اندارت لا اراديا
ومن شافت وسام بسرعة مسحت اخر دمعة
-نعم دكتور
- اتفاجا من شافها تبجي
اقترب اكثر منها ومر يمهم مراجع بدشداشته وعكاله وعينه عليهم باوع عليه وسام ورجع عليها
انت د تبجين ؟
لا ليش ؟ كولي شبيج
غمض عينه ثواني ورجع يحجي وياها
اني اسف
والله اسف وهي من ديسالها طفرت الدموع اربع اربع
-اذيتج مو ؟
والله اسف
-لا دكتور مصار شي
عادي متاذيت
_ سامحيني الله عليج رحوبه هههه والله مو قصدي مااعرف ليش هيجي صار الموقف
هو من كال رحوبه هي حست نفسها غاصت بالكاع
--اسمعي اني مااعرف ليش هيجي سويت
كررها مرة ثانبة
ومر مراجع ثاني هو ومرته واثنين جهاله بخطوات سريعة وهم ظلوا يباوعون عليهم
فسالها متفاجا انت جاية وحدج؟
اومات براسها وجاوبت بنعم صغيرة وخجولة
_ باعي روحي انت هسه وانتظرني بالقطعة حتى اوصلج مااخليج ترجعين وحدج
اني هم راجع للبيت
عافها وراح يركض
مشت رحاب مثل المضروبة على راسها تترنح
هاي صدك اني وهذا صدك ديصير اليه
بله لو احد شافني وعرف شيكول
يعني شيكول دكتور الاسنان مالتي واجى يعتذر لانه جرحني اي عيني لعد قابل شعندي وياه
ظلت واكفة بالقطعة مجان بيها غيرها ومريتين وجهالهم
ارتاحت شويه ولو هي جانت تحس العالم كلها تباوع عليها
واجتي الامانه وبدوا يصعدون وهو بعده مابين
باوعت منا ومناك ماكو
خلت النسوان يصعدن اول شي
وشاب لاخ هم اجى يركض صعد قبلها
من صعدت سمعت صوت من وراها لا دفعين اني حدفع صعدي فوك
هي احمرت خجل شلون تصعد فوك والجوة فارغ !
ومتعرف شلون اتجرات وصعدت كعدت ثالث سرة علة اليمين وهو على راسا صعد وراها وسايق الامانة ظل يباوع عليه
اول ماصعد ابتسم اله وكعد بموازاتها بالسرة اللي بصفها !
