الفصل الخامس
من انتم!؟
المقطع الثاني
كان حلم خالة امل مثل حلم كل ام تزف ابنها وتشوف احفادها بين ايديها
الي صار كان غير شكل تماما
بسرعة اهل زوجته سفروهم لمصر اخذوا ريم وراح سمير وياهم
حاولت امل وخالي علاء ياخذون الفيزا ويروحون وياهم لكن مارهمت لاطلعت الفيزا ولاكدروا يسوون شي
ثاني يوم من سفرهم وصلت نرجس
جانت حاسة اكو شي
البيت مو طبيعي والاستقبال بارد
وماكو اي اثر من اثار التحضير للعرس
واتفاجاءت بسفر ابنها المفاجئ الي حتى ماتصل بيها يودعها او يبلغها
سمير كان في حالة صدمة وذهول حتى من سافر وودعناه
سلمت عليه باوعت بعيونه حسيته جاي من عالم اخر
مايعرف حتى يحجي
مجرد خطوات وكلمات يرددها على الكل
كان تايه وخايف ومتفاجئ ومذعور!!
كانه تماما مثل ماهو الان شخص رجع من الموت
انبعث من عالم اخرة فجاءة
كان مكبس ايده وكتفه وحركته ثقيلة
صرنا كلش متخوفين عليه شلون حيدبرها وحده هناك
صح اهل زوجته كلش يحبوه
وين يلكون مثل سمير!! لكن مع ذلك
جنا قلقانين عليه
الحمد لله الي وكتها كان اكو كادر طبي سافر وياهم
لانه مكانوا الحالة الوحيدة بل اكثر من عشر حالات اتكفلوا الاهالي بدفع مصاريفهم
من ذاك اليوم مارجع سمير للعراق ابد
اتغيرت حياتنا
امي تعاركت ويه كريم وجبرته يبطل من شغل الترجمه خصوصا بعد الحادثة الاخيرة
واندارت عليه لكن اني كدرت افلت من الامر لانه دوامي مكان يومي وشغلي بالذات جان بمناطق مختلفة
والراتب اول مرة استلمته كان 450 دولار!!
طبعا انبهرت باللرقم والاحلى انه كان كل فترة يزيد ويزيد
اول يوم داومته الدوام كان كلشي غريب عليه
وكواقع بحت نعيشه كلنا في مرحلة ما من مراحل حياتنا عندما ندخل لمجتمع جديد
لازم ولابد اصحاب هذا المجمتمع يبرزون عضلاتهم على المستجدين
انهم اكثر خبرة ودراية وكانه القادم ليس فقط لايعرف محيطه وهذه هي الحقيقة انما يخيل الهم
انه كان سايس خيل وفجاءة قبلوه يتيعين بهذا المكان
الكل حاول جاهدا يستقبلني بابتسامة مرحبه بفرض انهم يتعاملون مع الاجانب فيجب ان يكون خلقهم طيب ولطيف
لكن سرعان ماتزول هذه الابتسامة ويبدي التجاهل والعمل بالامر
وبين قوسين تطفر هذه الكلمة نهاية اي جملة تقال الي
ا(انت بعدك جديدة كلشي ماتعرفين)
وكانهم من جوي كانوا كلشي يعرفون
جنت اعوج حلكي وامشي
الوحيدة الي قابلتني بابتسامة وبقت عليها هي هيفاء
هيفاء كانت مديرة قسم ثاني ورحت يمها ادربني
بنت امراءة مااعرف هي ثلاثينية العمر لكن شكلها يوحي باصغر بكثير
قصيرة كلش حسيت نفسي يمها عمود
ومدعبلة شعرها كاريه اسودو تلبس نظارات شفافة ولها ضحكة واسعة وحلوة كانها عسل
رغم ملامحها الناعمة كانت تتميز بشفاه غليطة وابتسامة عريضة
محبوبة كلش
سريعة المشي وخصوصا هي من النوع الي كله جينز وتي شرت صغير عليه وبوتين
ترانشوز يعني
عكسي الي جان يشوفني يكول رايحة زيارة
بقيت يم هيفاء جانت تعلمني على شغلة وتروح تختفي ساعات
اظل اتصفن بيها
اول شي تعلمته هو الورد والاكسل وبرنامج داتا ادخل بيه المعلومات
طيعا كلش مهم واحد يعرف هاي الاشياء للشغل
اثناء ذلك كان يمر شاب ينظرلي نظرة وحده ويروح
ششاب كلش حلو هههه يعني هيجي شفته
فمن كام يمر جنت اندار بس عيون ظهري تراقبه
مجان عندي ثقة بنفسي انه ممكن ينعجب بيه شاب مرتب وحلو
حتى من جنت بالكلية من جانوا يجون يصارحوني او حتى يخطبوني جنت ارفض
اولها منو يقبل ياخذ وحده بيها سكر!!
وثانيها الوضع العائلي المخربط بزمن الحكم السابق يمكن هسه صارت شويه اهون
واتحولوا المعدومين الى ابطال بنظر الشارع العراقي
الولد عرفت اسمه عادل
طويل صاحب بشرة حنطية ملحوته الشمس بما فيه الكفاية حتى تحول الى لون الخبز المحمص
جان مزين شعره كلش خفيف
ومبين عليه عصبي نار
متوتر يتحرك بسرعة
صاحب عيون عسلية منطيته قوة وجاذبيه
او يمكن اني انجذبت اله
3 مرات شفته بس بعدها عرفت مسوي مشاكل وناقليه لغير موقع
عاادي
اني اعرف حظي هههه
عادل ساعدني باخر مرة انه عرفني على كل الستاف
كانت ابتسامته متفارقه
جنت احسها ابتسامة متصنعة
ولاني اهتم بكل التفاصيل
حفظت بيه كل صغيرة وكبيرة
اله خشم عراقي جيني بامتياز
وعرفت من لقبه انه من الغربية
لكن كان يحجي بلغة اهل الجنوب بطلاقة
ودائما مكان يمزح بيها جا شلون
جا ليش تاخرتي
موش مضبوطة بمواعيدج
هههه من هذا الحجي يعني
من انقل بعد ماشفته
جانت ذيج الفترة تمر سريعة
ومرهقه
غريب كلشي بيها
مالحكنا نضوك طعم الحرية
تسارعت الاحداث
بدت اولها بمشاكل بيت خالي
امل وخالي دوم يتعاركون
اتذكر من جتي خالتي نرجس
ظلت تعاتبه ليش خلى سميريسافر قبل ماتجي وهو يعرف انه سافر قبل بيوم من وصولها جانت بالطريق
ولحت بالسؤال وجانت امل زامة شفايفيها وكاعدة على نار
تريد بس اطلع بركان الغضب الي كاعدة عليه واتفجره بوجه خالي
يمكن لانه كانت متصورة انه ماسعى بشكل جدي بروحتها ويه سمير
ويمكن هو شاف انه حتثقل على اهل ريم مراد يدوخون بيها
مااعرف شنو السبب لكن مخلاها تروح لمصر وراهم
نرجس ظلت تلح بالسؤال وادور علوم
باي بيت تروحله تسال وتريد تفتهم ليش سمير عافها وسافر
وشلون يروح ويه خطيبته هيجي بدون زفه ولاحس ولاخبر
صح همه متزوجين محكمة وسيد
بس مع ذلك مو زفه وكدام العالم
الى ان خابرها ثالث يوم وسلم عليها
جانوا وصلين للقاهرة ومستقرين بعد يم بيت عم ريم
لكن خالة نرجس وبالزايد اشتعلت عدها شكوكها من حست صوته تعبان
وماحصلت من عدنا شي
ظلينا كلنا على حجاية وحده بس جنا متخوفين من خالة امل لا تحجي وتكول الي صار
بذيج جيتها حصلت من خالة نرجس هواية هدوم
واهم شي حصلنا على الساهون
الي جنت محرومة منه
بس اضوك قطعة منه علمود سكري
جنت اشوف فد طيب وفد حلاوة غريبة بحلكي خصوصا من يكون بالفستق
مع انه امي مجانت تحبه ولاحتى خالتي فخرية فكل الي تجيبه
جان يصير حصة عهود وميلاد وسعد
حتى كريم مجان يرغبله
كريم الي بقى اغلب الوكت يروح ويه خالي يطكطك بالشغل وياه
ومن يرجع للبيت اني جنت انهزم اروح لرحاب لو بيت خالتي
مجنت اتحمل دوخة الراس بعركهم هو وامي ليل ونهار
والجو منا خنكة وحارة وذبان وبك وماكو كهرباء وماكو بنزين
جنا نشغل بس المولدة علمود الثلاجة
كل هاي اضافة الى حضر التجول
بعدها اسبوع ورة اسبوع
كمنا نشوف تحسن بصحة سمير وصار يحجي ويانه على السكايبي
وارتاحينا شويه
وحاول خالي يهدئ من امل لكن مفاد بقت زعلانة يمنا شي شهر وخطية هو وكريم وحدهم بالبيت جانت امي تطبخ ويجي ياخذه الهم
الى ان صارت الزيارة مال مشاية موسى بن جعفر عليه السلام يوم الوفاة يعني
تاريخ لايمكن احد ينساه
كنا تونا خلصنا من الحرب الماساويه في الغربية خصوصا الفلوجة وماعانته من حصار وويلات
اذكر الارقام الرهيبة والمفزعة الي جانت مسجلة عندنا عن عدد الوفيات والشهداء من الاطفال والنساء الحوامل بذيج الفترة والي انتهت بعقد صلح مع ولد العشاير ومايسمى ...............
حتى نجي لحرب داخلية غريبة لبغداد ومحيطها الى جعلت بغداد تنزف سنوات عديدة ابرياء
بنهاية شهر الثامن وتحديدا 31 من الشهر
خالتي امل اصرت تروح مشاية لموسى بن جعفر
وهذه اول مرة بحياتها تروح
واني هم
اتشجعت اروح وياها وجلبت بينا ميلاد
لكن المشكلة جانت بيت رحاب
حرب من نوع اخر
رحاب الي اكلها القهر من ورة مشاكل ولدها ويه عمو وسام
ماقبل يروحون كللهم خطرة
بس منو يسمعله
عباس عند ولحكه عمار
طبعا بشار جان ويه وسام كامو يضوجون منه اخوانه ويصحوله ذيل البزون
وهاي الحجاية جانت تعصب رحاب كلش
اتوكلنا ورحنا وماجنا نعرف انه حنشهد حادثه سجلت بالتاريخ انها حادثة جسر الائمة
احنا طلعنا بنص الليل
وعادي الشوارع جانت مليانة ناس روج روج
تكولون عز الظهرية
واكثرهم الي يطلعون بالليل جانوا منفردين
مع انه شكد حثوا على التجمع حتى لانيغدر بيهم
جنت امشي ويه خالتي امل وكريم وميلاد وولد رحاب كدامنا
وصلنا الفجرية طبعا محد اخرهم غيري
جانت حتى امل احسن مني
بس هي الله يسامحها شكت قلبي
ظلت تبجي بحسرة ونوح
مجنت اعرف على شنو
بس ساعتها سحيت الضنا شكد عزيز
ويمكن هي مانست صورة ابنها من جانت روحه تهف كدامها غركان بدمه
الطريق من رحنا بالليل جانت المواكب شبه فارغة لكن ويه الفجر بدت تفتح
وبدت القرايات تصدح وتنطي فد اريج شاعريويه نسائم الفرج
تحس نفسك متجه لللقاء حبيب
متجر من ذنوبك امام الله
حالة روحانية غالفتني
حتى حسيت دموعي تنزل لا اراديا واني اصلي على النبي
واستغفر
حسيت المي الي يرشوه على الزوار بالشوارع
مي الورد المعطر غشل كل ذنوبي
لكني بديت اتعب و روائح الاكل الطيبة تدخل الخشم بلا استاذان
تريكنا مرة كباب وشويه اني اكلت من مخلمة بيض وطماطة ماتحملت الريحة موتتني
معطر شويه يخفف من شدة الحر
واول ماطلعت الشمس جنا بعد واصلين للحضرة
كلنا جنا نبجي خصوصا من جانوا يصيحون طريق الامام منا
جنت احس مسوية مهمهة عظيمة
جنت ابجي من ورة رجليه هماتين
جنت اريد بس اوصل عبالك امشي على شوك
ورمن حيل وطيبت خيمة صغيرة يم التفتيش بنية مثل الكمر ظلت تفرك بيهن
وانطتني باندج وحبايتين فولتارين
بس حرام مفادن
كعدنا شويه ومن الازدحام طلعنا
من طبينا باب النساء تيهنا ولد رحاب لكن كريم بقى شايل فوطة امي بعودة الماسحة جان جايبها حتى نشوفها مانتيه والله نفعت الفكرة ولكفناه
ضحكت ميلاد كالت همزين الفوطة مو غير شي
ميلاد صارت حمرة طماطة انطيتها شمسيتي لانه امي لحت عليه اخذها حتى لااخرب من الشمس وشلون شمس هي
بعد شهر اب وشلون اب لهاب معت اني قبل البسمار بالباب
رجعنا احنى بعد وصلنا لنهاية الشوارع الي جانت كلها مكطعة والشرطة والجيش مالين المكان
والله وشالتنا بيكب مالت النجدة لحد شاحنات كبار ومثل الخرفان شمرنا روحنا وصعدنا بالبدي
صح جان اكو باصات تنقل الناس بس شتلحك كتل وازدحامات موطبيعية
انوب الشاحنات تنقلنا بس مشافة ليما نوصلللكراج
ووحدة بينا مجلبة باللخ لانه كريم عافنا وصعد بالثانية واتفقنا نلتقي بالكراج
والله ورجعنا للبيت مكمرمين جانت ميلاد تبجي من الالم برجليها
واول ماوصلنا نزلنا كريم لبييت خالتي فخرية لانه امي هم يمها
بعدنا طبينا شفت رحاب لازمه بسام وتركض ورانه تصيح قيم ميلاد ولدي
وين
جان مخروعة كانه صار شي
احنى سمعنا هاونات بس كالو من يمنا بعيد
فكريم كللها ماكو شي يجون ورانا
لكن هي جانت شامعة الاخبار وشايفتها
ظلت تصيح مثل المخبلة ولكم ولدي وين
مفجرين نفسهم على الزوار كريييييم
امل اخذت بسام منها وصعدنا اني كريم وياها
ميلاد جانت فد نوب متكرمة مكدرت تتحرك
ورجعنا رجوع
لكن وين نوصل الشوارع كلها مكطوعة
الله لايشوف احد الحالة
جنت امشي على نار والله وكريم يركض ورحاب تركض وراه والنس صياح وعياط
هسه من رجعنا كلشي ماكو
جانت الزوار منقسمين ناس تمشي على كيف وتصيح صلوا على النبي لاتخافون ماكو شي
وناس الي جانت بقلب الحدث تركض بلا وعي
وظلينا نلزم واحد واحد
وين صار الحادث كالو على جسر الائمة
اتخبلت رحاب وكامت تركض لهناك
وكريم يركض وراها اني مامدرت بعد وكفت على بعد مسافة
كعدت ابجي والطم خصوصا من جتي وجبة المكتولين
وسارات الاسعاف الي خبصت الدنيا والشرطة والندة الي شايله الجثث
هاي شوكت هيجي صار وبسرعة ماادري!!
ثواني وكانه صارت يوم القيامة
منظر مؤلم وشكد ماحجي عنه مايعبر عن بشاعته
جثث اطفال ونسوى كامت تجي بعربانات الصغار مال النقل والي ينقبون بيها الزوار الكبار بالعمر
سيارت شايلة كومة ناس كلها ممدة وفاتحة ايديها وعيونها
والنس تركض حافية والنسوان شايله بقايا جهالها
ويصيحن ويعيطن صارت هوسة غريبة عجيبة
عجت الدنيا وجنت اسمح عويل ونحيب وصياح الله اكبر
وكل من شايل جنازه وياه
خصوصا الاطفال
ياربي كمت الطم على راسي واني اشهم ممطولين بعلى العرباين والظفاير الي اتشابكت وحدة ويه اللخ
وكطع قلبي الرجال شايل ابنه صغير يصيح ابني مابيه نفس ياناس يعالم داسوا عليه
حتى رحاب وولدها نسيتهم
وروج تروح من النس وفوج من الشرطة والاسعاف يدخل
ردت بس واحد يكلي شصار ماكو
والله وجنت اشوف سيارة شرطة بس تختلف مو مالت نجدة كاعد بيها شاب طويل ابيضاني اعرفه
وكف على صفحة ويه جماعته ينادي بالجهاز
لابس مال شرطة نيلي
باوعت زين
هذا اخو عماد الموظف الي ويانه شفته اكثر من مرة يجي عليه
وجنت انتبه عليه لانه يظل يباوعلي
ركضت عليه وكوه وصلتله واني ممتاكدة هو لو لا
بس من اقتربت صاح عليه زميله اختي ديري بالج روحي منا
انقهرت عليه
كانه يحذرني انهم معرضين في اي لحظة لانفجار او اغتيال
فطلب مني اكثر من مرة ابتعد
وكفت وماتحركت استحيت بعد خصوصا من اتاكدت انه هو اخو عماد
اجى عليه وحسيتنه مخنوك بعبرته كلي ست قيم شعندج هنا شجابج هنا
ارجعي مدتشوفين الوضع شلونه
كتله انت مو اخو عماد
---ااي اي وقبل مايكمل كلامه الي نصه مافتهمته من صياح الجهاز الي يمه ومن الهوسة داير مدايرنا كتله ولد اختي ضايعين ومانعرفوينهم ونخاف لايكونون راحوا بالتفجير
---لا ست قيم ماكو تفجير هاي اشاعة هججوا بيها الناس
انضرب هاون قبلها وانقتلوابيها عشرة
وراها ولد حرام صاحوا على الجسر حزام ناسف ومفخخة
والناس انخبصت وصارت مدافع هوسة
تعالي شوفي شكد ناس راحت غركانه بالمي
وشكد جهال انداسوا بالرجلين
وراها انشغل بنداء عاجل وكلي الله يخليج ابقي بعيد لاتنداسين بالرجلين
وراح وراها بشويه جنت واكفه اباوع على هاي العوئل كلها جاية عافية
نسوان وريجايل كبار مفشوخين ومتكسرين خو الجاهل الواكع بالكاع هذا ممرود وصاعدة روحه
المنظر مؤلم جنه فعلا يوم كربلا
ظليت اباوع على الناس وهي تنقل بالناس ومرات اركض اساعد عجوز ا وجاهل احمله على جتف امه وهناك شفت عمار وعبوسي شايلين جهال اثنين يركضون وره سيارة اسعاف توها مرت
وصحت وعيطت عبوسي عبوسي
ماسمعني الا ان وكفت سيارة الاسعاف همه هم وكغوا جانوا حفاي وعبوسي متملخ من فوك ليجوة
عبالك عبوة طاكة عليه امسح بوجهي من الدموع والزمه كتله حاجيني انت وين جنت وشبيك خوما متاذي هو يصيح عليه شو وحدج وينه كريم وميلاد
كتله لاتخاف اني جاية ويه امكم ددور عليكم
كام يسب ويغلط جرني عمار وكلي هسه همه وين كتله مااعرف
بس كالو ابقي هنا انتظري لاتتحركين بلكت تشوفيهم والحمد لله شفتكم
بقينا شي نص ساعة بدى الازدحام يخف والناس كلها رجعت فرغ الجسر من الصوبين
اجى كريم ووراه رحاب كتلهم لكيت عباس وعمار هسه يجون شالو مرة عجوز
رحاب جانت هلكد لاطمة مملخة وجهها كله دم
بس تصيح الله اكبر عليهم
الله اكبر عليهم
شحصلوا شحصلوا من كتلوا هالعالم
واخذت ولدها ومن تعبها كعدت بالكاع
علما وصلنا للبيت خطية جانت ممصدكة نفسها جهالها بين ايديها مرة لخ
وسام جان واكف بالباب مخطوف لونه
خطية اخذهم بالحضن وعيونه تدمع همه جانوا سامعين بالاخبار اللي صار وهو راجع وراها وعارف من امي
بعدها عرفنا ان اعداد الشهداء تجاوزت الالف شخص ومئات قضوا غرقا في النهر
في يومها تخلد اسم شاب صغير بالعمر من اهل الاعظمية اسمه عثمان
هذه الحادثة كانت طعنة فس جسد الدين المزيف الي حاولوا تسويقه النا مذهبيا
لانه عشرات من شبان الاعظمية قفزوا ورة الناس الي سقطت
وانقذوا حياتهم
ومنهم عثمان الله يرحمه اللي طلع عدة نساء سقطت في النهر الا ان انهك وتعب فغرق هو ايضا وهو الشاب الفتي
الكثير منهم فتح بيته للاغاثة والاسعاف
وكبرت الجوامع والمساجد لانقاذ ارواح الناس البريئة!
شاء الله ان يذكر الله الناس بانسانيتهم بيدا عن التعصب الاعمى متجسدا بجسد عثمان الطاهر!
بقيت عدة ايام مصابة بالكابة
وحتى برة البيت ماطلعت الا ان اخذتنا امي لبيت خالي لانه وسام ذبح خروف نذر على سلامة الولد
يومها كلش كبر وسام بعيني ومن شفته شلون حضن الولد وشبكهم من كل قلبه
حسيته صدك يحبهم
رحنا لبيت خالتي وجانت احلى لمة
لمة استفقدناها من زمان
يمكن اكثر الفرحانين بيها جانت خالتي فخرية
كعدت كعدتها القديمة بالحديقة وكلنا ملمومين داير مدايرها
والولد يشيون ويشوون
ووسام جان يعرف يسوي عجينة كباب تخبل يكول وهو يضحك يغمز على رحاب انه اتعلمها من مرته الاولى
بيومها جانت عهود دتسولف على بيت عمة نورية
جانت مريضة حيل وتعبانة على شوفة الجهال فداز على مرته سامي تكول بس كايللها تعالي دازيها اهلها هي وغراضها ثاني يوم والجهال
الظاهر وحسب مكالت اخت مها انه مرته العربية عايفته
ومشاكلهم هوونزار بالزايد كثرانه ورة مراجعه اسما لالمانيا لانه رافضين عمر من جايها لسوريا يخطبها
وهي زعلانة عليهم عايفتهم وراجعه
وراها عمتي بعد كلش منتهية كتها جانت عهود من تحجي
حسيتها ايست من نزار
لانه صح جان يتوسل بيها ترجعله
بس هي نفسها اتغيرت
فحجت ويه امي وخالتي انه مدام مقدم على سفر بعد ماتريده
وحتقبل على ابو حميد الرجال الي ظل يلح عليها يريدها
خالتي فخرية جانت مقابله كالتلها رجعي لنزار
لكن عهود محد يكدر عليها
وحتى خالي جان وياها
كاللها عوفيه لنزار خلي يسافر ويروح خلعي نفسج منهم
بتنا ليلتنا هناك
ووظليت ويه ميلاد جانت ضايجة انه عهود بقت بغرفتها لانه رحاب ووسام ظلوا هم هناك اتفقنا نتريك كلنا سوى
خصوصا من شافوا خالتي وردت بملتنا
بذاك اليوم من خالي سال سعد كله ها ولك شو ماتزوجت خبصتنا واكلت راسنا
شو هسه لا حس ولانفس
جان جواب سعد غريب كله خالي السالفة غير شكل
وكتها اخذناها ضحك وشقى مافتهمنا
الاسبوع الي وراه اجى ابو حميد وخطب عهود وكطعوا مهر
جانت زوجته جبيرة كلش بالعمر يمكن اكبر منه ورايحة منتهية
وهي الي جانت جاية تزوجه
وعزمنا كلنا على سفرة لاربيل ورة زواجه كونه عنده شركة سفروسياحة هي صح دينية يعني مالت زيارات وعمرة وحج
بس كال نسوي نسفرة نروح للشمال وبعدين ياخذ عهود ويروح لايران
بيومها لبست عهود كوستم سمائي فاتح كلش
جانت تضحك بس بحزن
مااعرف ليش جنت اتصورها حتفرح حتزوج مرة ثانية
بس مجانت كلش فرحانه
يمكن جانت تحن لنزار او يمكن العشرة صعبت عليها!
بعدها بكم يوم رحنا اني وياها وامي الصبح مجان عندي دوام رنا تسوكنا شغلات للعرس واني هم اشتريت جم حاجة ضميتها لجهازي
من رجعنا وصلنا امي لبيتنا لانه جانت خالتي فخرية بيتنا
وكالت امشي نذب الغراض بالبيت ونرجع حتى لاتتخربط ويه غراضكم لانه اني وامي اشترينا هواية شغلات وحتى اجهزة كهربائية اخذنا من البالة جانت نازله جديدة
والله وفتحنا باب المطبخ سمعنا صوت
عجيب يمكن سعد بالبيت بس اشو هذا صوت بنيه
فعهود صاحت سعد هاي انت
انكتم الصوت وصارت حركة غريبة اقتربنا اكثر شو هاي ننورة فتحت الباب
لبست جبتها وركضت انهزمت
بس سلام على السريع
صاحت عهود واتخبلت
عزة لعزاك سعد هاي شنو؟
شعدها هاي هنا
اني راسا طخت عندي انه جان بين يوم ويم العصرية يذب خالتي ي وميلاد منا ويطلع بحجة لايبقون وحدهم
اتاريه جان يجيب نورة الغبية للبيت
صارت عركة بين عهود وسعد
هي ماتسكت كامت تحجي صلي
وهي بس يكللها انجبي معليج سكتي لادوخيني
وطب للحمام
كالتلي امشي روحي صيحي امي وامج وتعالوا
ركضت اني هم لبيت خالتي
جانت الدنيا ظهرية وحارة ورجلية اتشابكت وحدة ويه اللخ
اريد بس اوصل
من كتلهم امي كامت تلطم
كالت بس لا ماسوي مصيبة هذا الاثول
وظلن يتعاركن وياه
وهو لايصد ولايرد بدل وطلع وره مااتعارك ويه عهود وراد يبسطها
بس عجيبة شلون ام صلاح امها يعني تخليها تطلع هيجي وكت
حتى لو جان رجلها او خطيبها
واني بعدني ممكلة الجملة جتي امها العصرية
واتخبلت من عرفت عهود عقدت ومعزمناهم
لانه الكعدة اصلا جانت بس بيناتنه
حتى مبدلنا ولاكشخنا ذيج الكشخة مااعرف جان حال عهود مايشجع مع انه طلعت كلش حلوة من سرحو شعرها وخلولها مكياج بيجي ناعم
جان بعد موديل العيون الكحيلة والحمرة البيجية الي جانت كلش لايكة عليها
ظلت تلح على امي لازم يتوجون قبل محرم
شو جمال بتها انخطبت وعقدت وراها وحتزوج بعد اسبوع وهذه بعدها
امي كالت اي ليش لا ميخالف وحقها ورة عرس عهود نروح نشتريل غرفة نوم وانعرسله
لكن من اجى سعد وحجيناله انه ام صلاح جانت هنا
كالله يمه ماريده هاي البنية ماتعجبني مو راحة
خالتي شهكت وصعد ضغطها امي كامت تتعارك وياه كالتله انت مخبل شنو هي لعبة ماتريد
كاللها خلاص لاضوجوني كتلكم ماريدها
وكبت عركة جديدة
امي كالتله اكسر ركبتك اذا تكول هاي الحجاية وخالتي اتوعدت وهدت وظلت ادردم عليه شنو بنات العالم هيته هم الله ميرضاها صارلك اشهر طاب طالع وياها
من شبعت منها ماتريده غصبا عليك تاخذها
من خالتي كالت غصبا عليك
شو هذا كام يضرب البيبان
محد يكول غضبا عليه افتهمتوا لو لا
هاي البنية مو شريفة انطتني نفسها حتى قبل مااكطع عليها مهر شلون اثق بيها تصير مرتي بعدين
الحجاية جانت صدمة
لكن اني فعلا جنت متوقعة هذا الشي
وحتى وكتها حجيت لامي وكالت احنى شعلينا ومامعقولة ام صلاح تعرف وتسكت
عهود كامت تلطم وكالت هذا ناويلنا على شر مايعرف شلون يريد يطيح حظنا الا بهذه السالفة
وامتدت العركة لايام
حتى ام صلاح جان تصرفها غريب
ظلت يومية تخابر على خالتي وتلح
قبل عرس عهود اجى خالي وكعد وياه وحاول يفتهم السالفة لكن سعد دك رجل وطلع قبل لايجي خالي ويومين بات بيت صديقه
عجيب جان كاتل روحه عليها
شو هسه يكول تلعب نفسي منها
بله اذا مسويله مصيبة اهلها شلون حيسكتون!
