مرت على بالي ذكرى
طيف الذكريات جزء منا !
اي نعم جزء منا
ولايمكن ان نعيش بدون لحظات الذكريات ثانية
ويمكن اقل
لكن هي نفسنا الي نعيش خلاله ايامنا الباقية
الذكريات الحلوة من تمر تترك ابتسامة دافية
شوق عميق لما مضى نتمسك بيه باقوى مانستطيع
نخاف ان تهرب منا
ونخاف نعم جد نخاف ان نموت وتموت معنا كل اطياف الذكريات
فخرية وذكرياتها عن تلك الايام ذات الرائحة العبقة
وابتسامة امها وهي تعطي استكانه الشاي لابوها
فرحتها وهي تتامل وجه ابنتها رحاب تخطوا خطواتها الاولى
ووجوه الاخرين عندما ولدت سعد
ببدرية بلقاءها الاول ويه اياد بعد عودته من مصر
وامل... والنظرة الاولى والقبلة الاولى ويه علاء والحب الحقيقي الذي قاوم الكثير!!
بنورية وهي تستلم تلك الورود من خلف الباب
بغياب زهوري
التي كانت تتسلىى بلفات العنبة في الطابق الثاني من الامانة وهي تراقب شوارع بغداد البهيجة بالعيد!!
برحاب واول رسالة حب سط الخوف
وعهود واول لمسة ايد من فرات الله يرحمه
بميلاد ورجفة الخوف باول مكالمة هاتفية مع سامي
ورووان وهي تسمع صوت امها للمرة الاولى!!
لحظات مرت لكنها حفرت و حفرت عميقا بداخلنا وصارت جزء
جزء قريب من احشاءنا
نموت اذا فكرنا باقتلاعها !!
في ذاك الصباح
كانت رحاب تتامل السقف ولسبب ما عادت ذكرياتها
ذكريات كثيره
شغف القراءة والدراسة
وفرحتها بعرض زوجها فاضل التقديم للدراسه المسائية
وقررت على السنة الجاية تدخل تدرس لو اداب لو لغات
لكن ا لي قطع هذه الابتسامة صوت صراخ فاضل
فزت رحاب وكانت الساعة ستة ونص الصبح
والدنيا دتمطر حيل وضرب قوي
وصلت رحاب للحمام وشافت فاضل يضرب براسه وايديه حيل على الباب ويصرخ من شدة الالم
الصراخ كعد الجهال وكاموا يتراكضوون
ماتعرف رحاب تحاول ترفع زوجها اللي ديلوب لو تسكت الجهال اللي جلبوا بيها
شالت فاضل وهو يرفس من الالم وحست من شالته بالم في بطنها ووخزة كلش قويه قطعت نفسها لكنها هملته
وكعدته على الكرسي المتحرك مالته
وركضت على السرريع بدلت وهي تشل جاهل وتسكت الثاني
يمكن عبوسي جان الوحيد الي بدت عليه علامات الخوف على ابوه صار يركض وراه وفاتح حلكه بقلق من منظر ابوه وهو يتالم قلقان وخايف ويريد يسوي شي مايعرف شنو راح جاب الحذاء والشحاطات ويتراكض يلزم واحد من اخوته
وراحت رحاب مفزوعة وتبجي دكت الباب على بيت ام منة جوارينهم محد فتح
كامت تصيح ام منة بيبي عفية لحكولي
واندارت لا اراديا ركضت على بيت ام محمود الله يرحمها واتذكرت البيت خاليه من اصحابها رجعت حطت الجهال بالسيارة ليورة وهمه بعدهم مفزوعين يمكن بس عباس الي ساكت
ودفعت زوجها وهو مصفر من الالم ويعض بالخاولي حتى لايطلع صوته
وهي دتصعد جتي ام منه بالروب مخروعة حتى طالعة بلا حجابها
فاتحة ايديها وتركض
---شبيج رحاب شصاير
---مااعرف وكامت تشهك وهي دتصعد فاضل مااعرف فاضل شبيه
ركضت ام منة من شافت فاضل يتلوى جوة ايد مرته فتحت الباب واخذت الجهال يمها تسكتهم لحكتها منة شالت بشار وطببتهم جوة
رحاب كعدت فاضل على الكرسي كوه لكن ماكعدته عدل
من نزلت من دجة الكراج وكع على وجها على الدشبول مالت السيارة
ونزلت عليه مرة لخ
لزم ايدها حيل وباوع عليها بنظرة عمرها مانستها جان المه كلش قوي
فقد السيطرة على نفسه ووكع عليها مكدر يلزم روحه
انكطع هي نفسها مرة ثانيه
بس هالمرة الالم جان اقوى
وكوة شالته وصعدته مرة لخ
وطارت بيه على اقرب مستشفى
ونزلت يم الطوارئ وهي تصيح عفية لحكولي
طبعا محد طلعلها
بس الشباب الي واكفين من شافوها حامل وهو معوق
انمرد كلبهم
شالوه شيل بلا عربانه ودخلوه جوة
هو ورة عمليته الاخيرة فقد هواية من وزنه
وبقى على الكراسي ممدد ويتلوى ورحاب تترتكض تتوسل بدكتور يجي يفحصه
دكاترة الخفر مطفين ونعسانين يردون بس يتغير الشفت مالتهم
الى ان الله دزلها طبيب شاب ركض وياها وصاح السسترات وياه
هي بعد هلكت كعدت ووره شويه دخلوها لغرفته
وحضروها واخذوله ديسووله اشعة الطبيب شك بالكلى الثانية
اعراضه اعراض حصوة بالكلى
بس غريبة يعني هاي اول مرة هيجي يصير
---لا دكتور صارت قبل بس مو هيجي الم
جان ياخذ مسكنات ويهدا
رحاب جانت حامل بشهرها الخامس
وبالانتظار
حست بشي غريب
الجاهل مايتحرك صارله ساعة وشويه
قلقت شويه ومااهتمت
من كامت شافت بقع دم بتنورتها
بقع صغيرة
كالت هاي يمكن الجارة اتحركت
وانتبهت على نفسها لابسة القميص بالمكلوبي
راحت للحمام وغسلت تنورتها وعدلت قميصها وهي تبجي
وبالفعل مثل مكال الطبيب من اول مرة
فاضل كانت عنده حصوة بالكلية الثانية ودتنزل للحالب الاصح كانت حصوتين احداهما كانت نازله والاخرى الاكبر كانت لازالت بالكلى
ولازم يسوي عملية يشيلون الثانية لان الاولى ممكن ان تنزل بالادويه
وهنا كانت الطامة الكبرى
عملية مرة لخ!!
اخذ فاضل المسكنات ومارجعت للبيت الا ساعة اربعة ونص العصر
منتظريها الجهال بالباب
مع انه ام منة علمودها مرايحة للدوام بذاك اليوم
وراسا برجعتها خابرت على اهلها
اجتيها امها بنفس الوقت هي وسعد بااتت يمها ورجع سعد للبيت
وثاني يوم سووا العملية لفاضل وطلعوه بعد ليلة
وهاي كله ركض بركض
وراها بكم يومكعدت الصبح رحاب مورمة وبدت اطرافها تزرك
حست انه الجنين مديتحرك
واول مراحت للدكتورة كالتها نبض ماكو مكطوع الحبل السري
متعرضة لضربة قوية مسببه فطر الجارة وبالتالي انقطاع الحبل السري
ولازم هسه تسوي كرتاج كلش موزين على صحتها يبقى الطفل ميت في بطنها
صفنت عليها رحاب متالمة
شلون حيكون شكل فاضل لو يعرف بالخبر
فسالتها بحالة حزين وهي تمسح بعيونها مبين نوع الجنين!!
جاوبتها الدكتورة حسب مااشفت على الاكثر بنية
ياربي
هاي كان يتمناها فاضل طلعت من المستشفى وهي كوة تسوق ماتعرف شلون وصلت للبيت
اتلكتها امها وهي مصدومة شبيها رحاب شو تروح وتجي ومحد يفهم سالفتها شنو
لمت هدومها وغراضها وتبجي دم على حالها وحال زوجها
وجان خبر حزين ويقهر للكل من عرفن الجنين ميت بطنها
وراحت وياها امها وبدرية وهنه مخبوصات مايعرفن شيسون
وبقت ام فاضل ورقيه حماتها يم زوجها وجهالها
وحضرت نفسها تسوي الكرتاج
كل تفكيرها كان يم الجنين
الطفلة الي توفت ياترى شلون شكلها لو عاشت
شلون كانت تصير مدللة على تلاث ولد
شكد جان فرح بيها فاضل
وجانت حتسميها ورود
شلون هيجي ملاك بريء يموت قبل لايشوف الحياة
والهدوم الي اشترتها والتحضيرات !!
كلها الالام وافكار تمر على رحاب وهي تمشي كانه مسيرة غائبة عن الوعي ورفيقها الوحيد هي دموعها الصامتة
دخلت العملية وطبيب البنج جان يحاول يحجي وياها حتى تخدر لكن هي صارت عينها بعينه والدموع تجري
كسرت كلب الطبيب الي لزم ايدها حيل وكللها الله يعوضج بنيتي كولي الحمد لله
بعدج شابه و
راحت جوة التخدير
سوت الكرتاج
واول ماطلعت من العملية
اتقيات على خالتها بدرية وهي تحاول توعيها اتاخرت لما وعت وظل بالهم
جانت دايخة والدنيا تفتر بيها نفسها لعبت من المخدر
بالبدايه محست بشي غير الدوخة والم حاد بالصدر
ام فاضل جانت دازة ابن اختها وراهم وهو الي وصلها
ابن اختها نفس عمر فاضل اسمه هادي
وهو الي وصلهم ومن دينزلون من السيارة كبال البيت وكعت رحاب مرة لخ ومكدرت فخرية واختها عليها فساعدهم هادي وشال راسها اتقيات مرة لخ فمد راسها على الكاع حتى تستفرغ احسن
وهدومه هم كلها ادمرت
واتخبلت ام فاضل من شافت جنتها على هذا الحال
معقوله ابنها ومرته بنفس الاسبوع يسوون عملية !!
الا عين
مايقت شي ماسوته
ذبحت البايح ووزعت الصدقات والقران ليل ونهار والبخور والحرمل كل مغربية
من كعد فاضل بالليل وصارت عينها بعينه
راسا نزلت دمعة على خدها الايمن
تاملها فاضل وابتسم
جانت امه هم كاعدة بصفهم
كامت بحجة تجيبله الشوربة
فسالها كم مرة سالت عليج يكلولي طالعة
وابتسم كوة وهو يكللها وين جنتي اتخمين
لزمت ايده الي جانت شابكه ايدها وبوستها وكعدت المخدة عدل وراه
وهي تحاول تخفي دموعها
بس حس حركتها ثقيلة
سالها اكثر من مرة شبيج رحاب
هو جان حاسس وسامع
بس محد يحجي مباشرة اله
ركض عبوسي وجيا على ابوه وظل يلعب وياه ولحكوه التوم
ماتحملت رحاب طلعت تمشي كوة مسحت دموعها وكامت تغسل
ظلت صافنة على وجهها بمراية الحمام شراح تكله
من رجعتله جانت امه بعد حاجيتله كلشي
بس اكيد محد كله انت السبب
مرت على رحاب ايام صعبة حيل
ايام من الخيال مكانت متصورة في يوم تتعرضلها
واللي خفف عليها يمكن شويه وجود الاهل حواليها
والناس الي رايحة جاية
ووجود جيرانها ام منة الي جانت يوميه ساعة تلاثة ترجع من الشغل تمر عليهم وتاخذ الجهال حتى الكبار ينامون ويرتاحون
جانت رحاب تتباهى بجيرانها والناس تحسدها عليهم
كلهم يحبوها وكلهم يركضولها على ابسط شي
وبعد اسبوعين يله فرغ بيت فاضل من خطاره جانت فخرية رايحة جاية عليها هي واختها وبناتها
مخلوها بوحدها يعني
من عرف فاضل كلش انقهر بس مراد يقهر زوجته اكثر
كام يضحك ويتشاقه ويكللها باجر نسوي توأم لاخ !!
ومرت الايام الي وراها وواحد يحاول يواسي الثاني
وكانه اتقربوا من بعض اكثر
بعده بكم يوم جانت ليلة ثنين وفخرية صايمة نذر على سلامة بتها
وتوها فطرت دك التلفون
ركض عبوسي يشيله
وكام يصيح على امه ماما هاي نوره
تعالي بسرعة تريدج
اتفاجاءت رحاب لاتصال نوره الي شبه انقطعت عنهم بسبب سوء اطباع بيت خالها
نور الهدى جانت تبجي
واتوسلت برحاب تجي تاخذها
عيالها باسطيها وطارديها من البيت
ويكومها ويعكدوها يعيروها باهلها
ولاجنها بت اختهم
ظلت صافنة رحاب ماتعرف شتكول وعود هي الي جانت ناويه تعاتبها ماجت سالت عليهم ولازارتهم بالشدة الي مروا بيها
بله هي بيا حال هسه ومال تروح لنور ! مع ذلك
لبست على السريع وامها لزمتها حاولت تمنعتها
---ماما الله يخليج البنية ماعدها احد غيرنا وين تروح بهاي الليالي واكفة بنص الشارع يم الكشك مطرديها بطرك عبايتها
---يمه وعمليتج موزين ورجلج اذا كعد من النوم مايكول هاي وينها
----خلي نايم هسه اروح وارجع على السريع
فرت السويج وانطلقت
صح جانت متحسنة هواية بس حست حالتها مو مال تسوق
وصلت للشارع الي واكفه بيه نور الهدى وهو مو بعيد عن بيت بيبية فاضل فتندله رحاب لانه اكثر من مرة جاية هنا
صعدت نور على السريع وهي لافة عبايتها وبيدها جنطة جنفاص صغيرة !
---شبيج خيرج سالتها رحاب ؟
كامت تبجي نور وتمسح بعيونها وخشمها بطرف العباية وجانت عيونها مورمة هم من البسط هم من البجي
---والله رحاب شفت الضيم وخلاص ماارجعلهم اني بالكوة انهزمت
---مادوروا عليج ماكالوا وين رايحة
---حسبالهم رحت لبيت نعيمة
كل مرة ازعل اروح لبيت جوارينه نعيمة
بس هالمرة لا بعد مايفيد
اني اريد فاضل يطلكني منهم
هو مو اخوية؟
--اي طبعا اخوج كالتها رحاب وهي صافنة على الشارع
يله هدي نفسج
---زين ليش ليش رحاب ابد مسال عليه هاي صارله فترة مايكول هالبنية عايشة ميتة شجرالها
--نور انت ماتعرفين لانه مخابرناج
فاضل سوى عملية قبل فترة وجانت صحته كلش تعبانة
وحتى اني هم وكع الجاهل مني وهم سويت كرتاج
---يايمة اسم الله صدك
شو محد خابرني وكلي
شو محد انطاني خبر
والله العظيم رحوبه ماادري عدلت حجابها وعبايتها وكعدت
هنا لمحت رحاب اثار الضرب على وجهها
---همه ليش ضاربيج هذوله ؟
---سكتي رحاب شحجي وشكول ياربي اليك المشتكى حسبي الله عليهم يردوني خدامة وابلاش
والله جنت قابلة اكوم واكعد يعيروني بالخلفة
يعني شسوي الله مرايد ينطيني
شو همه النها كله قال الله وقال الرسول يجون يمي يصيرون كفار قريش
تعيارة اكوم وبتعيارة اكعد
ماادري والله من القهر دخت دااشيل ابن حماية صغير وكع من ايدي
يايمه كلبت الدنيا عليه
وامه ماخلت حجاية مكالتها
انه هم رديتها وكبت عركة
مرة خالي وكفت ويه جنتها الغريبة
وبعد صارت العركة اكبر انوبه حتى رجلي وكف وياهم و طردني
يكلي انت بت شوارع مامترباية!
----لا بعد ماترجعيلهم خلي يولون هاي فوكاها
---اي فدوة رحاب الله يخليج اروح فدوة لجهالج خليني خدامة يمج ولادزوني يمهم
---خدامة شنو ولج مو عيب هالحجي
اني احجي ويه فاضل
---سودة عليه وشلونه هسه
---الحمد لله زين احسن من قبل
بس ماديروح للشغل هواية
رجعت رحاب ونور وفاضل جان كاعد ينتظرهن معصب
من شاف نوروالضرب على وجهها نسى الموضوع ودخل بمعمة موضوعها
وحلف اغلظ الايمان بعد ماترجعلهم من ورة ماسمع القصص والماساة الي عاشت بيها الفترة الي فاتت
ثاني يوم الصبح رجعت فخرية بعد لبيتها
وفاضل وراها طلع راح لابوه
جان منايم الليل كله
حتى رحاب نفسها استغربت على اهتمام فاضل يمكن مجانت تعرف شكد يعز هاي المخلوقة المسكينة ويعتبرها امانة بيبيته
وورة الغدا اندكت الباب واجى خالها
اجى خالها وزوجها بس بناء على طلب فاضل لانه من جتي راسا مخابر عليه وكايله جاي ماخذها من الشارع البارحة حتى لايحجون عليها
خالها جان جاي منتك وضايج
ويدخن جكارة ورة اللخ
لابسة دشداشة من خضرة فاتحة صايرة رمادية من العتك
وابنه هم جاي ومسوي روحه هو الزعلان
جانوا جايين بحساب يردونها لبيتها بس فاضل مقبل
ذبلهم ميتين وخمسين الف على الطبلة انه يطلكوها !!
الصدمة مجانت لخال نور كد مجانت لرحاب
مجان عدها اي خبر او فكرة عن الموضوع
صفن الخال وظل يلعب بلحيته البيضه مايعرف شيرد
بس فاضل جان مصر انه نور ماترجع
العائلة جانت حالتها حيل تعبانة وهذا العرض شي مغري الهم ومبلغ يحلمون يحصلون منه
الولد زوجها ظل يباوع على ابوه وشاوره انه شوكت مايريد يرجعها منو ياخذها غيره
بس هاي الفلوس اذا راحت ماترجع
ورحاب كلش انزعجت من الموضوع يعني فوك هو ماعنده شغل وعايشين على مصرف ابوه يكوم ينطي هذا المبلغ!!
الخال ماحجى عاف الكعدة وكام يسحل برجليه وشحاطته وطفى جكارته وذب عقبها بباب البيت سلم على فاضل وكله هاي بعد بيد الولد
زوجها وافق راسا وهو اصلا مجان رايدها كثر المشاكل ويه اهله
واتفقوا ثاني يوم يروحون للمحكمة ويطلكها
فاضل جان كلش هادئ بس من كتمة عصبيته مصفر
وهو بلا كلشي صحته موزينه
طلعت عليه رحاب من راحوا
معصبة وادردم
ماجوبها باي كلمة عافها وطلع
مارجع الا نص الليل
وهذا الشي خلى النار تكب بالزايد بيها
على الرغم من انه الي صار بيهم الفترة الاخيرة
قوت علاقتهم بشكل عميق وخلت فد نوع جديد من المشاعر تظهر بيناتهم
مشاعر جانت موجودة بس ممنتبهيلها
من طبعها رحاب من جانت تشوف فاضل مايجاوبها راسا تسكت
تعرفه ورة سكووته ثورة غضب ممحمودة عواقبها
وكعت نور على ايد رحاب تتوسل بيها انه ماترجعها لبيت خاله وغسلت دموعها خدودها
رحاب مجانت رايدتلها ترجع بس كلتلها نور المبلغ كلش جبير
واحنى هسه محتاجيه اكثر من قبل
واني متاكدة هو ماعنده وراح اداينه من عمي
( يعني ابوه)
ومفادت محاولات رحاب انه تقلل المبلغ وسط دعوات نور من خلف الجدران والابواب انه مايرجع بقراره
نام فاضل وكلبه مخنوك من القهر
وقبل صلاة الصبح شاف نفس الحلم الي يراوده من فترة طويله
من يوم تعوقه لحد الان
نفس اللقطة من توكع عليهم القذيفة ويطير راس صديقه وتتمزق اشلاء اللي وياه
ويختفي سمعه لثواني
وتحيطه لحظة جمود ووشه غريبة
ويحس نفسه يصعد للسما ويرجع
يشوف روحه بمكان ورجليه بمكان ثاني وخوذته ملطخة بالدم وبقايا من جثث الشهداء
فز وهو يصيح ويعيط رجليه
لكم انقصفنا كومو!!
من فز والعرك يكت منه وعيونه الملونة جحظت ليبرة
عرفت رحاب انه زوجها كبت في نفسه قهره قويه هدت حيله
خافت عليه لايصير بيه شي ... هداته
ووظلت حاضنته حتى ترجعه لوعيه
وثاني يوم الصبح
كعدت لبست احلى لبس
وسوت احسنها ريوك
وهي تضحك وتتشاقه
مع انه نور جانت خايفة وترجف لانه اتفقوا اليوم موعد طلاقها
ومن شافتها رحاب ظلت تضحك وياها وتشاقيها انه اليوم حتخلص منهم وترجع تعيش وياهم
فهمت رحاب السالفة رجلها مراح يرجع عن قراره
والفلوس تروح وتجي ليش ماتوكف وياه؟
من شافها فاضل طار من الفرح
وظل يضحك وياها ويتغزل بيها
حسته طفل صغير
ورضته بقراره الاخير
خلاص هي مخسرانه شي ليش تخسر حبه الها !!
طلع وجان عكس مابات ليلته
كلش فرحان انه يحتوي عائلته واتخذ قرار ربما يكون مصيري
وعلى الغدا من رجعوا هو ونور جان جايب وياه كباب توصاة لحم هو مشتري كونه مياكل من بره
واتفاجا انه رحاب مسويه ذاك الغدا المعتبر ومخابره امه ورقية وحيدر حتى يجون يتغدون يمهم ويفرحون لرجعة نور الهم
وصارت لمة حلوة عكست ارق الايام الي فاتت والي تعبت زوجها حيل
لمة مانغصتها غير الخبر الي سمعته من امها وراها بفترة
امتحانات الكلية جانت بادية
وسمعت ميلاد انه اسما حتتزوج ورة الامتحانات
وانه سامي فسخ خطوبته من مها قبل جم يوم
جانت ناويه تروح لا جانت مصره تروح للحفلة
وظلت اذا مو يوميه تخابره فبين يوم ويوم
صار مثل الهوس بيها
مع انه هي التهت بغيره
تعمقت علاقتها ويه شمس الدين زميلها بالشعبة
لكن بحدود الزماله
صارت تختلط بالطلاب اكثر وخصوصا المجموعة الي بيها شمس الدين
الي مابقى مناسة ماذكرها انه شكد يحبها ومعجب بيها
وتوسل لاكثر من مرة انه ياخذ رقمها ويتصل بيها
لكنها رفضت
رفض قاطع
مو لانه تستحي ومايصير لا جان موكلش عاجبها وظلت ادور الاحسن منه
وثاني درس دتمتحن بيه ميلاد
شمس الدين جان كاعد بموازاتها
وهي هم كيفت تاخذ منه غش
الا ان انطاها برشومة
دتنقل منها خلصت دترجعها اله لزمها الاستاذ
وهنا شمس الدين راسا اعترف انه هي مالته وهو رادها منه
المهم حاولوا الاثنين يكذبون وينكرون مفاد وحاول شمس الدين يلبسها وحده هم مفاد الاستاذ جان قافل عليهم خلاص
ومفادت كل توسلات ودموع ميلاد علمود يمشيها الها
وراسا بوجهمم للعمادة
ركضت ميلاد حاولت تستنجد بالاتحاد هم مفاد
وبنهاية الدوام صدرقرار فصلها
ماتت من البجي كبال غرفة العمادة
وفشلت محاولات الاستخطاء وطلب العفو
وحتى شمس الدين انفصل وياها
ومن قهره ماكدريسويلها شي عافها وراح
وحتى صديقاتها عاوفها اتاخر الوقت وبعد ماحد يكدر يسويلها شي
قرار فصل بالغش وبالدليل !!
تقريبا فرغت الكلية من الطلاب مابقوا بس الكبلات
والخط عافها
جانت ماتعرف شتسوي ووين تروح
اتمشت وطلعت بره وكفت يم محل الاستنساخ
جان بعد عليه طلاب كاعدين يستنسخون نقص محاضرات
شالت التلفون وهي خجلانه والكل يباوع عليها
لانه هي تخابر ودموعها تجري
ودكت تلفون على سامي...
سامي جان توه راجع من الشغل ذب المفاتيح على سند المراية الذهبية وبوجهها راح شال التلفون
كعد واتنهد وهو يكول الو
--الو هلو سامي
--هلو منو ميلاد ؟ شبيج شبيه صوتج دتبجين؟!!
سمعت نورية اسم ميلاد وجتي عليه ركض
كل ظنها صاير شي
---شبيها ميلاد؟
---مااعرف يوم ماادري مداافهم منها هوسه يمها
واشر لامه انه تخليه يكمل
حجتله ميلاد على اللي صار فكللها ابقي بمكانج هسه جاي
بعد ماكوة افتهم منها
---خير يمه وين رايح
--رايح عليها مااعرف شبيها دتبجي وعايفها الخط
صفنت نورية هاي شبيها ميلاد مخابره على سامي وشذكرها بيه
هو طلع منا هي راسا دكت على فخرية لحكي مااعرف شبيها بنتج مخابره على سامي وتبجي
لزمت خدودها فخرية وملختها بلا ماتدري وهي تلطم على خدها ادري شبيها هاي البرب....ك تخابر على الولد ليش
هاي البنية ليش ماتجوز منه
وسدت التلفون وتعد وتفشر عليها
ومنها راسا خابرت رحاب وحجتلها
نغصت عليها يومها كله
ظلت تفترفخرية بالبيت مثل المصرع ماتعرف شنو صاير وشنو الي يصير يجبرها تخابر سامي
ليش مخابرت على امها لو اختها؟
وعلى رغم الازدحامات متاخر عليها سامي
واتفق يوكفلها وين اخر مرة من شافها بره الجامعة
واول ماصعدت كامت تبجي
انطاها كلينس وباوعلها وكلبه مكسور عليها جانت حارة وفاتحين الجامات والهوا الحار يحرك بالزايد
لانه تبريد سيارته مايشتغل
حاول يهدئها ماكو فايدة
الى ان قبل مايوصلون افتهم منها
هون عليها وكللها عادي كلنا عدناالسنة وشنو يعني
اكو احلى من ايام الكبية اصلا اني اتخرجت ويه العميد ههههه
---مو فصل سامي مو فصل
---لما هيجي تعرفين شكو تغشين
---مااعرف زمالة غير والله زماله
مع انه اني جنت دارسه زين ليش هيجي سويت بروحي
ورجعت تبجي مرة لخ
من وصلوا للفرع
شاف راس فخرية مرتين يطب ويطلع
خالة خاولي المطبخ الوردي على راسها
وتفتر بين المطبخ والكراج وتمد راسها بره بلكت تكون جتي
جانت خايفة لايجي سعد ويه جيتهم وهنا الطامة الكبرى
لو مخابرته وطالعين سوى لو ولو
كومه افكار جتي براس فخرية ذيج الساعة
ليش تخابره وهيجي تفضحهم كدام نورية ؟ يعني ليش
واخر شي لمحت سيارة نزار
وراسا غيرت الموضوع سوت نفسها قلقانه على بتها لاصايرلها شي حادث
او احد ماذيها ؟
جانت ميلاد تبجي وتمشي ورة سامي وامها عيونها تجدح شرار
سلم سامي عليها بباب الكراج وكلها خالة اطمني ماكو شي عايفها الخط وخابرتني ارجعها عافتهم وزركت لغرفتها ميلاد
---يمه وليش تخابرك مداافهم ليش هاي اول مرة يعوفها الخط خو تاخذ تكسي وتكسر ركبتها وترجع
كام يمشي سامي ويتشاقى ويه مرة خاله ويطببها للمطبخ ويهديها وهو يسال عن احوالهم
وفخرية لساها مصرة ماتفهم ليش مخابرة بيت نورية تبجي
اخر شي مل سامي
وهي اصلا حتى ماكلتله اكعد
فشاقها كلها خالة فد كلاص مي بارد على الاقل
هم مكطوعة الكهرباء هم حارة تشوي برة
جابتله مي بارد بكلاص ستيل
واكو واحد مايحب يشرب بيه مي!
باعت فخرية على سامي وهو واكف والعطرالغالي يعط منه
لابس بنطلون نيلي
وقميص حرير حبري بيه نقش صفح
وحذائه الاسود ابو الجعب الي يطلع صوت من يضرب على الارضية مال المطبخ
راحت فخرية لغرفة ميلاد
ولزمتها من شعرها وجرتها حيل جانت توها مخلصة تبديل
ومكياجها ممسوح من البجي والدموع وعيونها ورامة
صاحت عليها فخرية شصاير؟
شصاير هيجي تبجين مثل الارملة الي ميت رجلها كدامها ومخابرة الولد جارته وجاية
تتوسل بيها ميلاد انه تعوف شعرها وفخرية تضبه بالزايد وسامي يباوع من بعيد انكسر كلبه عليها ادخل وحل شعرها من ايد امها
وكللها خالة مصاير شي عوفيها خطية لخاطري
كل مافي الامر انه فصلوها من الكلية لزموها تغش
هو هيجي كال
صاحت وعاطت فخرية
عزة لعزاج ياميلاد بعد هالسنة كلها تحلبين بيه مابقيتي على حالي فلس ولاشي
سودة بوجهج ان شاء الله كل هالدلال والتعيقل تاليها يفصلوج
النهار كله قافلة باب غرفتج بحجة اقرا بعد هذا وتغشين ليييييش ؟
ليش
وظلت تندعي عليه وتبجي وياها وسامي صار يمنعها من ضرب بتها وميلاد خاتلة وراه
وهو يتوسل بيها تعوفها لخاطره
جانت فخرية خايفة لايجي سعد باي لحظة
من سمعت ضرب الباب
راحت على السريع
كعدت ميلاد تبجي على الجرباية وهو يباوع عليها من صدك انقهر عليها واستخطاها
مجان يعرف شلون يسكتها
لحظتها راديحضنها ويسكتها
هي عيونها مبطنة وبيضة صارت حمرة طماطة وعيونها الصغار اختفن
سكتها وراح وره امها للمطبخ شافها تحجي ويه الجوارين ولساها خالة الخاولي مال مطبخ على راسها بحجة شعرها لايطلع وهي كصيبتها من ورة كلها طالعة
جتي الكهرباء وصاح على ميلاد تكوم تصبله غدا ويه دخلة فخرية
كلها خالة غداية عليكم اليوم عازم روحي يمكم
الله وكيلج محاط لكمة بحلكي من الصبح
جانت فخرية طابخة تبسي وتمن
باعت صفح وهي ابد ممرتاحه لهاي المجاملات
كلها الله اموت على التبسي
بس هي مااكلت خافت هي محروك دمهاو البيتنجان يصعد حساسيتها
وركضت ميلاد سوت لبن بارد
فسالته مرة خاله كلتله وسعد وقبل ماتكمل كللها هسه هو فاتح المحل لايظل بالج
مايرجع الا اني ادزه
وراها سوو جاي وشربوا وجتي عهود متفاجاءة بوجود سامي ببيتهم
وراحت بوجهاا للحمام تغسل ومن طلعت غسلت المواعين واكلت لكمة وحضرت نفسها على السريع تروح للمختبر
وراحت وراها فخرية تحجيلها علاى الموضوع كله
وسامي واكف يريد يطلع وبطريقه يوصل عهود
صفنت عليه ميلاد وظلت تلف وادور بالكلام
فهو ضحك كلها شبيج؟
---انت ليش عفتني وخطبت مها ؟
---ههههه هاي شجابها ابالج
اني مجنت ماشي وياج حتى اعوفج ها !! ههه
---صدك يعني انت محبيتني ؟!!
----غمض عينه سامي واندار على باب المطبخ
ومرت عليه ذكريات من جان يحب رحاب وشلون احترك كلبه من عافته
---عمري مافكرت ااذي احد او اجرح وحده بالطريقة الي اني انجرحت بيها
لذلك ياميلاد اندار عليها وباوع زين رافع تك حاجب
مصار بيناتنه لاحب ولاعلاقة
انت بعدج طفلة والحياة كدامج
---اني موطفلة لا تكول طفلة كلكم تشوفوني زعطوكة
---اي زعطوطة كفختها عهود وهي تاخذ جنطتها وتطلع
-- النا حساب ثاني وياج
للجزء تكلمة
وقبل ماتطلع عهود ناوشت امها الفلوس الي استلمتهم من المختبر مال الشهر الي فات
وحاولت تتملص من سامي مايوصلها بس هو اصر
وبالفعل وصلها
وقبل مايطلع ظلت توصيه على ابنها سعد انه عينه عليه متغير كلش ودايخ بسوالف البنات
ضحك سامي وكللها كلنا هيجي لايظل بالج عليه
ومن صعدوا ظلوا فترة مايحجون الا ان قطع سامي هذا الصمت بان سالها عنها وعن احوالها فراسا هي بعد مجاوبته
سالته بلغة استغراب انه ليش فسخ خطوبته بمها !!
ابتسم وصفن شويه---- والله شكلج عهود ما احبيتها مرعبلة ومخربطة
كالها واندار عليها
مجاوبت عهود ظلت تفكر شلون ديشوفها هي وهذا لبسها
---وهوايه تحجي يعني مااعرف كلما اسوي شي لو اجيب شي
بابا سوالي بابا اشترالي بابا طلعني مطاعم واني متاكدة فالح ابو العمبة ماتندله وينه
---ههههههه ضحكت عهود على حجايته الاخيرة
----ههه اي والله شبيج ولاعدها ذرة انوثه ورومانسية!!
---امم والله بعد بكيفك
وره ما ماهمه طلعوا لبست عبايتها فخرية واخذت الفلوس وبوجهها راحت لام صلاح كلمة بعد ماحجت وية ميلاد الي راسا ختلت بغرفتها وقفلت الباب
وفكرت فخرية بطريقها تمر على بدرية اختها صارلها يومين ماتبين
وبالفعل راحت يم صاحبتها
جانت حارة وام صلاح كاعدة بالمحل فارشة نفسها والعرك ملزك الفوطة على ربطتها ونص شعرها طالع وتهفي بالمهفة الخوص
طبعا من يسولفن لا ساعة ولااثنين
جرت الكرسي العتيك وكابلتها فخرية وكعدت
يمر جم جاهل يشتريله حاجة حاجتين ام الربع ويروح
فسالتها ام صلاح على عهود مارجع رجلها
---ام صلاح هاي جم مرة تساليني واني اكلج هي مطلقة
طليقها مو رجلها عمتها كالت طلكها قبل لايتاسر غير هي هيجي كالت بعد شمدرينا
---يا واني شنو
شمدريني شو كلما اسالها ماتتزوجين تكول اتاني رجلي يرجع
صفنت فخرية على هاي الحجاية هاي اكثر من مرة تسمعها من اكثر من وحظة
فرادت تطلع من المازق كالت هي ماترغب للزواج بعد
ومن هاي هيجي تكول
الا عندج واحد دزي علينه
---والله ام سعد اني ردتها لاخويه
---يااخو بيها لاتكولين عبووود؟
---يايمة وشبيه عبود شو تكوليها وجنه موعاجبج
---لا داده مابيه شي ابدا
ام صلاح شنو شبيه كل العبر بيه شو اصلع وجبير بالعمر وكرشه واكع ليكدام ومايخلف مو هو ال طلكته مرته ؟
---الي يسمع يكول دكينا الباب على بت بنوت مو هسه بلسانج كلتي مطلقة ؟
---وشبيها المطلقة ام صلاح مو عندج بنات ماتخافين !!
---فال الله ولافالج شطالبتنا يمه !!
---يعني اذا مطلقة هيجي اشمرها مو من حقها يصيرلها جاهل بحضنها تربيه ؟
--- اي من حقها واخويه هم رجال والرجال مايتعيب
---يااا؟
خلي اروح ام صلاح لام كريم هسه اتاني مامارتلهاصارلي يومين
---سلميني عليها عيوني كالته ام صلاح وهي ضايجة من حجاية فخرية
كامت فخرية وهي تعض شفايفها ماتدري شبيهم بناتها وحده ماتريد تتزوج واللخ ذابحة روحها على الزواج لو هيجي لو هيجي !!
من وصلت لهناك لبيت اختها يعني وحجتلها كلشي
كلتلها انه هي اكثر شي جانت خايفة من ردة فعل سعد عليها هو بلا كلشي معاجبه تصرفات اخته ويتعارك وياها يوميه على اللبس والمكياج ويتجادلون وحتى يتضاربون بيناتهم
فوصتها بدرية ماتحجي لسعد الى ان توصل اخر سنة عود تكول عدتها علمود الماجستير وخلاص
وصدك رجعت فخرية خابرت رحاب ووصتها على هذا الشي تجنبا للمشاكل ومنها هم وصت عهود ومن سمعتها ميلاد ضاجت
كالتلها لعد هو عادي كل سنة يعيدها وكومة فلوس ذبيتي عليه حتى بس ينجح
لطمتها امها على حلكها وكلتلها جوزي من هالسان الطويل والمعاندة الحجاية الي اكولها خلاص
وصدك سكتت ماحجت بعد
وصارت ميلاد يومية الصبح تكعد تبدل مال دوام ومن يروح سعد تنزعهم وترجع تنام
بس بذيج العطلة مشت مثل الساعة
حسها ماطلع
وشالت البيت كله على راسها حتى العجن والخبز
ومن تخلص تكابل التلفزيون وتكعد لاطبة ولاطلعة رادت بس يرضون عليها ويمشولها هاي الغلطة
جانت فخرية حاطة التلفون بغرفتها بعد مو مثل الاول
عود مرات سعد يجره من يصادق بنية يبقى يومين تلاثه ويبطل
ومنها في يوم فتحت فخرية موضوع الزواج ويه عهود
لكن الاخيرة ماقبلت راسا سدته
---غير افهم يمه انت ليش كايله للناس والعالم هشكل
---ماما الناس ماترحم وحجيهم ياكلني اكل
-يمه يعني صدك انت تنانينة
--شتاني يمه شتاني
وشريد منهم بعد
اني شلت فكرة ارجعله وشلت فكرة الزواج هماتين
---ليش يمه بعدج صغيره حتى سبعة وعشرين سنة ممكلة يعني انت و مها تقريبا نفس العمر
البنات توهن بعمرج يزوجن
---يزواج ماما صدك تحجين ؟
ولا الي نفس بالرجال
اتمددت على الاسفنجة كبال التلفزيون
مالي نفس بيهم ابد يوم فدوة لعينج اصلا
اتخبل من احس واحد بيهم يباوعلي لو خال عينه عليه
---ليش يمه ليش هيجي معقدة نفسج شناقصج شعايزج ماتفرحين جاهل بحضنج و...
---كافي ماما الله يخليج
مابيه تعبانة وتعالي اكلج هذا يزواج تحجين بيه ووين تلكين ابن الاوادم الي يصون ومايعيرج اخذتج مطلقة واذا اتاخرت بالخلفة هاي مابيها خير وعاكر يوووو ومنو الي عنده امكانية يكعد بيت بوحده
هم تعالي عاشري عيال ومشاكلهم وطلباتهم الي ماتخلص
لايمه خليني راسي بااارد فدوة اروحلج
وتعاي اكلج وانت والبيت منو يصرف عليه اعوفج لسعد؟ لو لميلاد يداروج
والله الا تموتين من الجوع
---سكتت فخرية وماحجت حجايتها الاخيرة دكت بكلبها حيل رادت تكوم تسوي جاي
كامت عهود بدل عنها
وحطت ايدها بجيب دشداشتها الكودري
وغوركت عينها
ماتدري على حظها لو حالها لو قسمتها هيجي....
ماتدري من الظيم الي شافته ويه ابوها ورجلها هيجي عقدوها من شي اسمه رجال
وقبل حفلة زواج اسما بيومين
جانت فخرية توة راجعه من بيت اختها جابت الكوستم الي خيطته لعهود وتنورة لميلاد
قماش تنورة ميلاد جانت اصلا تنورة قديمة مالت بدرية نفسها غيرت موديلها وطلعت كلش حلوة
ومن دترجع شافت عهود دتلملم الهول على السريع وطشت مي على الكاشي وميلاد تجره بالماسحة
---همزين جيتي توني ردت اخابرج اكلج لتتاخرين
---خير شكو منو حيجينا
---خابرتني سهير جايات هي واختها الصغيرة
---منيه مها
---لا ماما مها اختهم الجبيرة
عفية روحي جيبلينا فد شي ويه الجاي
---عدنا كليجة طلعيها
راحت مدت الهدوم على الجرباية وبدلت دشداتها مال بيت يوحدة كشمير صدرها مطرز
وفوطتها البيضة الجديدة
وشويه والله واندكت الباب طلعتلهم عهود بتنورة سودة وقميص وميلاد هم نفس الشي
وانتبهت فخرية على شحاطة عهود صايرة قديمة حتى بالبيت ماتنلبس
صفنت بكلبها كالت شكد ينرادلهن مصاريف على شنو الحك شامبو وصابون لو هدوم لو الاكل لو المعطر لو ولو
جتي البنية خجلانة وابتسامة حزينة ومكسورة على وجهها
تتوسل بفخرية تكون محضر خير وصلح ترجع اختها لسامي
اتفاجاءت فخرية بهذا المطلب الغريب
وراسا رفضت تتدخل
كونها اصلا ماتحب يكون الها ايد بهاي الزواجه بعد الحجي الي سمعته
لكن دموع البنية وتوسلاتها
وملحتها انه اختها انكسرت قسمتها وبعد محد يفكر ياخذها والناس كلها كامت تحجي ليش فسخ الخطوبه شصاير لو شنو شايف عليها
وهمه بيت اشراف ماتطلع منهم العيبة والبنية متندمة اذا بدرت منها تصرفات خطا
اصرت فخرية مرة لخ انه ماتدخل بحجة انه كان بامكانهم يتواصلون ويه نورية مباشرة
هنا ذكاء البنت الي بدت تمدح بفخرية وترفع من شانها وهي شيخة العائلة
والكل تسمع حجيها ومحد يردلها كلمة
والناس تدري شكد علاقتها قوية بنورية وشلون تاثر عليها
صدكت فخرية كل هذا الاطراء وعجبها الموضوع وخصوصا من لزمت نقطة ضعفها ببناتها
يكون الله يبعد عنهم هيجي موقف ويستر عليهن
صفنت فخرية وهي مزهوة بنفسها بالكلام الي سمعته فحجت الي جان حاجيه سامي لعهود
كلتلها ---بس الولد يشكي منها مخربطة وماتعتني بنفسها ؟
اتبلعمت البنية وبدت تنطي الاعذار انه اختها فطيرة وعلى نياتها وهي اول تجربة الها وتتعلم وهي ماتعرف تتصرف اكيد حتتعلم منها
وذبتلها حجاية زايدة منها كالتلها وهواية تتطلب اختج على الولد هو مهما كان مثل ابن اختي وانقهر عليه يعني هالفلسين يطلعهم مو كله يصرف عليها
انصدمت البنية وظلت تفر براسها تتطلع بالعيون داير مدايرها
شطالبه هاي اختها المكموعة وهي ماتدري
رجعت تحلف وتتحلف انه بعد ماتريد منه شي بس يكون يرجعها وحتى اهلها غضبانين عليها
وهنا ميلاد ذبتلها حجاية
عصبت فخرية عليها وكالتلها كومي جيبي الجاي والكليجة
ورجعت تتعزز وتسحب نفسها
وكالت الاولى انه همه يروحون يصلحون الموضوع بنفسهم وعلى معرفتهم
----والله خاله حاولنا نحجي وياه
بالبدياة اتصورناها زعلة يوم ويومين ويرجعون
شو هذا طول وكلما نحاول نرجع المي لمجاريها يكلب علينه ويغير رايه دزينا خالتي على امه مفاد تكول قافل
احنى مانريد تطول الشغلة وتصير صدك
وين نلكى ناس طيبين مثل وجهوكم
ولاهو يلكى بنية بت بيت اداريه واداري اهله مثل اختي والله هي فقيرة وحبابة وكلنا ماكو غيرا م سعد هي الوحيدة الي كدها مستحيل احد يكسرلها حجاية
عاد هنا دكت صدر فخرية وكالت ميخالف لخاطر دموعج يله كافي لاتبجين بس عهود جان معاجبها جانت مرتاحة انه فسخت الخطوبه حتى محد يلومها ويحجي عليها
والله وبالفعل ثاني يوم ورة الغدا خابرت نورية كلتلها جيتنا عدكم
استغربت نورية لهذه الزيارة الي راحت الها وياها بس عهود
وظلن يحجن ويسولفن
ونورية مجان عدها مانع
بالعكس جانت قابلة باي وحدة تجي بس تخدمها وتشيل البيت
بس هوالي مرايدها
اما اسما فبالبداية جانت رافضة بعدين امها حجت عليها كالتها انت حتعوفيني وتروحين
ليش اظل بوحدي ولحالي !!
سكتت ماحجت
والله واجى سامي وظلت فخرية تحاجية وهو مدنك
ساعتها انعصر كلب عهود عليه
نظرته للكاع وصفنته الطويله ذكرتها بنزار من جان يعجز يحل المشكلة بينها وبين اهلها
ويكعد يحمس بروحه وياكل بكلبه
حست بالم سامي
من رفع راسه وابتسامة حزينة على وجهه
واختصر الموضوع كله كلها خالة والله اني اعرف ماعندي حظ ويه النسوان ههههه
وهو شكلي حرجعها
على الاقل لخاطرج ولخاطر امي حتى لتبقى وحدها
عافهم وطب الغرفته
كانه جبل وقع من السما على راسه
وهو ينزع ملابسه ويعلكها بالزاوية
اتذكركل قصص الحب الي مرت عليه
من رحاب وشهد
وزميلته المسيحية عايدة الي محد عرف عن هذا الحب الا بعد سنين طويله
اتمدد وحط ايده على كصته
ساعتها حس نفسه يغرك بدوامه
وهو الي جان متصور خلص منها !!
ثاني يوم جانت حفلة اسما
طبعا الزواج كان شي صوري
لانه زوجها كان توه مقدملها طلب فيزا
لكن هو الي اصرعلى اهله يسووله حفلة عرس
بعد المشاكل الي كثرت بينه وبين اسما
مع انه اتصالهم كان فقط من خلال التلفون
لكن اسما كانت تشكي من بروده العاطفي وشكه المستمر
معظم التصالات كانت مجرد تحقيق عن الي سوته خلال هذه الفترة
لذلك جانت كلش حزينه وكاعدة
اميرة بقصر من الدموع
كل خطارهم المعزومين بالحفلة اشادوا بيها متعجبين من جمال اسما ونزاكتها وهدوئها مايعرفون انه الحزن هو الي كان مسكتها ومكانت هي الحزينة الوحيدة
ميلاد ايضا
ميلاد الي استغلت فرصة انشغال الكل باتحضير للحفلة وباسما وشافت سامي كاعد بغرفة المكتبة وحده ديحجي بالتلفون
اتسحب ودخلت عليه للغرفة
وراسا رفع راسه واقترب منها جرها من ايدها كلها طلعي ماريد احد يشوفج هنا يمي تصيرلج مشكلة
وكافي عاد
وسد الباب
وماكو دقايق عاف البيت وطلع
هو ايضا كان على علاقة بامراءة اخرى الي جانت ميلاد تتمنى انه تكون مكانها
قدمت نورية احلى سفرة لبنتها
واحسن عشى
وجانت الحفلة كلش حلوة بدلت بيها اسما ب3 بدلات الاولى للحنة لونها ذهبي
والثانية كانت حمرة وذهبي والثالثة كانت بدلة العرس
وصوروا الحفلة فيديو حتى يدزوه لزوجها حكمت
وكذلك هواية هواية صور
بعدها بكم يوم بدت تجري المباحثات حول رجعة مها لسامي
بتلك الاثناء كانت رحاب تحضر نفسها تقدم تدرس مسائي
