في احد صباحات شهر كانون الثاني من سنة واحد وثمانين وبالتحديد في بيت علاء ...
كانت العائلة الصغيرة كعادتها تتريك وسط المطبخ اللي جان متدفي بصوبة علاء الدين بالنص وبصفه زولية صغيرة يكعدون عليها وصينية الريوك الفافون وصوت استكاين الجاي ...
جانوا الكاعدين علاء وامل
ورحاب على الكرويتة بحضنها روان ونص نايمة ...
اندكت الباب ...وهمه اتعودوا من يوم ماكعدت بدرية وياهم تندك الباب باوقات مزعجة ومختلفة ...
الامن ماتركوهم بحالهم
بس هالمرة جان زهير هو من دك الباب ...
وسرعان ماتلاشت مفاجاءة علاء لهذه الزيارة ...
زهيرافتربت من علاء وهمسله بصوت حزين ...
بلغوني نروح ناخذ جثة ...اياد ...
علاء من سمع الجملة الاخيرة ...
غمض عينه ووكع على كرسي مكتبه ...
واخذ لحظات صمت كانه يحاول يستوعب اللي سمعه
بعدها همهم
يالله شحكول لبدرية ...شلون اكدر اباوع بعيونها ...
زهير انت متاكد ...
زهير مجاوب بس حرك راسه بالايجاب
صمت للحظة وطلع من الغرفة نورية جانت كاعدة هي وسامي بالصالة وعيونها مغوركة بالدموع
اخذهم وراح لبيت فخرية اختها ...
جانت الساعة قربت من العشرة الصبح هيجي وكت كاطع بعد طالع للشغل...
ماصدكت فخرية من شافت اخوها واكف بالباب ...ركضت عليه وحضنته وبوسته من ركبته هي يادوبك طولها يوصل لركبته ...
فسالته خوية شبيك شو جنك ضايج حزنان خوما صاير شي سمعت اخبار عن نرجس ...
فعلاء نصى صوته كلها فخرية بعد لاتجيبين طاري نرجس استري علينا يرحم اهلج من اكو خبر اني ابلغج بيه
اني جاي على غير سالفه
اخذ اخته وطب لغرفة البنات اللي جانت فارغة وباردة ...
علاء وكعت گلبي شصاير احجي
فخرية اريدج تلمين نفسج وترحين لبيتنا امل تنتظرج هناك ...
باعي
اريدج تلزمين بدرية ماتفقد اعصابها وتكوم تحجي وتسب مانريد مشاكل ويه الحكومة..
رجلها عدموه وهسه رايح على رجل اخته عفاف اخذه ونروح نستلم الجثة ...
فخرية مالحكت تسمع الجملة الاخيرة صاحت يبووووو عزة لعزانه وكامت تلطم
جرها علاء حيل وكلها
انت مخبله بابا اسكتي ممنوع لا عزة ولالطام اعقلي وعقلي اختج مانريد مشاكل افتهمتوا
فخرية اريدج ويايه مو عليه اللي بيه مكفيني
يعني شنو علاء عادمين الولد ومانلطم عليه!
اي ممنوع لا نسوي عزة ولا فاتحة ولاحتى تلطمن عليه هي هيجي التعليمات ...
يمه سودة عليه بدرية سودة بوجهي عليج يايمه شلون اصبرج واني نفسي مدااصبر ...
هي عرفت لو لا ؟
لا جانت نايمة من اجوي كالولي
نورية لزمت فخرية وظلت تحضن بيها وتواسيها وتشجعها توكف ويه اختها
عاد كالتها
لمي الجهال خلي ناخذ ميلاد وسعودي ويانه
بس علاء ماقبل ...جان مرجع وياه رحاب حتبقى يم الجهال وتروح نورية وفخرية وحدهن وسامي يوصلهن ...
طلع علاء وگلبه ناار ...
والف فكرة وفكرة براسه
زهير جان يسوق وشكد حاول يفتح موضوع يحجي وياه ماكدر ...
بالطرف الاخر اول ماوصلت فخرية لبيت اخوها دموعها لا اراديا نزلت دكت الباب ونورية وراها ...
جانت امل بالبيت وبدرية بعدها نايمة ...
كعدت توها على صوت الهمس شالت كريم جان مجلب بيها وبعين بعدها ممفتوحة زين شافت فخرية ...
ابتسمت بخرعة فخرية شجابج هيجي من الصبح ...وبس عينها صارت بعين اختها وكعت كريم من حضنها
شبيج فخرية جيتج هاي مو خاليه
وطلت عيونها تفتر على الكاعدات
وكانه تحاول نقرا منهن المكتوب
شبيجن شو جنكم باجبات !! فخرية احجي
شبيه اياد ؟!
حكموا ؟!
احجي فخرية جيتكم هنا مو خالية وكلن باجيات شو حتى امل دتبجي ...
ماتحملن النسوان كامن يبجن بس بكتمه نفس ...
شبيجن فخرية النسوان مخنوكات ووحده تعاين على اللخ بلكت تكون اقوى منها وتطلع الحجاية !!
