بين النجمة والكمر
طلعت امل وهي تركض عليها فتحت الباب واذا بيها نرجس
ركضت شبكتها
جانت صايرة حمرة وعيونها تهل بالدموع
ظلت تحضنها وتبوسها
مع انه امل اكبر منها بالعمر ومع انه نرجس كانت لها الافضلية بالجمال
ومع كل اللي شافته امل بحياتها من صعوبات
لكن يبدوا ان الزمن توقف عليها بالكبر من سنوات
بينت اصغر من نرجس بهواية
كانت لاتزال شابه محافظة على نظارة بشرتها الصافية وعيونها الصغيرة المفعمة بالحنان
دخلت نرجس كالملهوفة المتعطشة
وهي تمسح وجهها ولج عيني ماصدكت وصلت من الفجر طالعة لعبوابينا فلك
محجت امل جانت مندهشة وظلت متسمرة بمكانها مبتسمه بحرج
كانه كانت سارقة شي من احد واجى يرجعها منها
حضنتها نرجس مرة لخ كالتها جهالي وين!!؟
بخير همه!!
متت عليهم والله
انتبهت امل ورحبت بيها ورحبت بالشاب الي واكف بصفها ودخلتهم جوة واول مدخلوا لاكت روان كبالها روان عدلت مناظرها ورفعت شعرها
جيتت عليها امها
انت روان يمه
وظلت تبوس بيها وتحضن بيها والثنتين كاموا يبجون
والولد يروح ويجي يجر بالجنط
كالتلهم هذا صفاء
هذا صفاء روان هذا ابن خالج قاسم الله يرحمه
ابتسم صفاء وكان ولد شاب ملتحي كلش وسيم
اكبر من روان باشهر
جرتها امل وكالتها شوفي هذه حفيدتج
باوعت عليها وصارت عينها بعين امل وغوركت بحسرة
كانه روان مرة ثانية جانت رضيعة من عافتها
كانت النظرة ورجفة الايد هي نفسها من كالولها بعد ماتشوفيها!!
حضنتها حيل وكامت تهدا بينما دخلت نرجس بنوبة بجي بجت حتى صفاء
رادت تشيلها بس جانت نايمة خافت لاتفز
كالتلها جنت اكبر منها بشويه من اخذوج مني
راحت عليها بتها وحطت راسها بحضنها وهي كاعدة بصف المهد
الله يلعن الوكت الي يفرق ام عن جهالها
سمير وينه
امل الله عليج سمير زين
اتزوج لا
صدك هو ذاك اليوم حرب شوكت يتزوج
وشلونه بخير
زين زين راحوا يفترون يجيبون بنزين ومسواك
كل يوم نازل شي جديد بالسوك
اندارت شافت التلفزيون يحجي فارسي
كالت اوي هاي وين مانروح لاحكينا!!
ههههه
ضحكت امل وكالت شنسوي ماكو غير هاي القنوات نفتحها ونتفرج عليها حتى كمنا نفتهم شيحجون
خيلي خودا
ههههه
وراها بساعتين اجى سمير وكريم وعلاء وراهم ديقفل
شافوا احذية غريبة بالباب اهل ايران متعلمين مستحيل احد يطب ولابس تكرمون الاحذية للبيت يعني مثل اهلنا قبل
عرف اكو ناس غربة
من دخل جان سمير مبتسم للشاب كاعد بالصالة وحده
والبنات بالغرفة الثانية
تسالموا
كله شلونك عمو اني صفاء ابن قاسم
جمد علاء بمكانه
هو جان يتوقع لقاء قريب بس مو بهذه السرعة
خصوصا الاوضاع مو مستقرة والكل يتخوف من شي اسمه العراق
لكن نرجس ماتحملت خصوصا من انكطعت الاخبار
صارلها من يوم ماخلصت الحرب لحد الان تكول ارجع للعراق اشوف اهلي
ركضت عليه ضمته وشمته كلمة ماحجت لكن هو انهار اكثر من روان
يمكن لانه جان يتذكرها اكثر من اخته
انهار تماما وكعد بالكاع نام بحضنها ويبجي
جان يشهك ويطلع حشرجات وزفرات ويصيح اخ ماما اخ يمه عمري ماصدكت اشمج مرة ثانية لو تدرين شكد كعدت على صبة البيت اتانيج
شكد جنت اتمنى فد يوم ارجع من المدرسة واشوفج بالبيت انت هي نفسها
امل جانت تباوع عليه وتبجي
اتذكرت سمير شلون جان يستحي منها ومرات مايريدها من جان صغير كلش
لا اراديا راحت شبكته وبوسته هي هم
كالتله بس اني جنت احبك سمير وعمري ماقصرت وياك
ضحك وباسها كالها لو مو انت مجان سمير هذا الي واكف وكاعد كبالج
بس هاي امي
ريحتها تختلف باوع على امه ولزم وجهها
كاللها جنت اتخيلج تبقين انت
صورة شفافة مو واضحة
اتذكر ترايجيج
وتنورتج السمائية وقميصج الابيض
وشعرج جنت اتخيله سله فواكه هههه
رجع حضنها وخلاها هي بحضنه هالمرة
ماحجت اي كلمة نرجس
غاصت ببجيها وعبرتها الى ان كالت والله كل يوم جنت اموت الف مرة
انت تعرف شنو من يمر عليه صبح لو ليل ومااشوف وجهكم
من تمر الايام واحسب عمركم
اخ لو تعرفون
اخخخ لو تعرفون شلون جنت عايشة والله ميتة متت واحتييت
بقت يمهم لحد ثاني يوم اخذها علاء لبيت فخرية
صاحت من ورة الباب لج فخرية ظفيرتج صارت بيضه وشيبتي
صفنت فخرية وهي واكفة على الصوبة دتخوط الجدر وخالة يده الطباخ الكماشة مال جدورة على راسها عود مغطية شعرها
باوعت من بعيد دتركز مني هاي هيجي تصيح عليها
واذا علاء وسمير وراها
صاحت وي يمه هاي انت نرجس
ولج شجابج
وركضن وحده تتلاكف الثانية تحضنها وتبوسها
وراسا دزت على بدرية الي جتيهم مثل الطلقة
جتي تهلهل بصوت مخنوك وكوة يطلع من كثر التدخين
كالتلها ولج صدك عشنا وشفناج
جانت اللحظات من اجملها واسعدها
جانت تكعد تسولف وعينها على سمير شلون كبر بسرعة واتغير شيرجع الوكت حتى تعيشه وياه مره ثانية
شلون يرجع العمر حتى تربيه مرة لخ
شلون تريده
كالتله ياريتني اضمك بقلبي واقفل عليك
هذا بنص الحجي وهمه ديسولفون
راح بوس ايدها وراسها ومسح دمعتها
وبدت تحجيلهم عن حياتها ووضعها هناك
وعن معاناتهم
وشلون عاشوا ايام سودة بالمخيمات وبعدها وشلون فترة الخميني جانت معاملة العراقيين احسن من هسه
لاهمه معتبريهم ايرانيين ولاهمه عراقيين تكول هناك يصيحولنا عراقيين جنه هنا يصحولنه عجم فرس
اكلك خويه علاء ماتكلي احنى منو!!
كلتلها بدرية انتو المكاريد يمه!!
ظلن يسولفن ويتعجبن نرجس تتذكر كل صغيرة وجبيرة عن الايام الي جانت عايشة بيها هنا
فتسالهم عن وحده وحده
يصفنون يكوللولها هاي شذكرج بيها احنى مانعرف اخبارها
جانت خطية تحجي عن امها ال اخر يوم بعمرها جان عدها امل ترجع تعيش هنا وتشم هوا بغداد
تكول لاحفادها هوا بغداد يخلي حنية بالقلب مو مثل الهوا هنا
بقت يمهم اسبوع وكالت ارجع لجهالي جانت جايبة جهاز طفل كامل لروان
ولكل وحده بيهن صوغة
ووصت سمير ورة فترة يجي ويه قاسم الجية الثانية هو يجي لايران
لطهران لانه همه جانوا عايشين هناك
بتلك الايام استلمت ميلاد الراتب وكان مبلغ يضم الراتب مال الاشهر الي مضت
اول ماشترت راحت اخذت تلفزيون وستلايت
كريم جابلها من المحل مال خالها خطية وانطوه اياه بنص السعر
فرحت لانه جانت تضوج صديقاتها يحجن عن ام بي سي ونانسي عجرم والاغاني الجديدة والبرامج المنوعة وهي مثل الاطرش بالزفة مكابلة الايراني وكاعدة
وهي بلا كلشي تموت على التلفزيون
مع ذلك بكل روحة الها للشغل جانت متاملة انه يجي يوم اداوم ويكولولها عمران اجى سال عليج
ظلت بدرية لحد نص العاشر تروح وياها
بعد الدنيا كامت تمشي احسن من قبل
ورجع السوك ينشط
وجانوا الولد يومية جايبين شي جديد للبنات
والبنات يفرحن يكيفن شي موز وشي تفاح وشي انواع الببسيات من اوغاريت بالعنب وبالتفاح وغيرها
اتدفقت المنتوجات السورية والايرانية بكثافة
واتوقفت كل المعامل العراقية
الي اصلا كانت شبه عاجزة وقت الحصار
وبالفعل بشهر العاشر يوم جان ثلاثاء
جانت بدرية مقررة هذا اخر يوم تجي ويه ميلاد
صارت ساعة دعش
واذا بعمران يجي
طبعا جان ازدحام معظم الموظفين رجعوا للدوام خصوصا من شافوا الرواتب اتوزعت
كامت تكمز ميلاد من صديقتها كالتلها ولج اجى عمران ركضت عليه وبنص الطريق اتذكرت خالتها كامت تمشي على البنات غير مجموعة
وهو عرف راسا انه اكو احد موجود من اهله راح وكف ويه عايدة صديقتها
رجعت تسحبت على كيف
ووكفت يمه كانه موظف عادي وهي ترجف من الفرح
جان طالع غير شكل تماما حالق وسمنان
ولابس لبس اخر موديل
بادي يشتغل بتنصيب الستلايتات
مثل هواية شباب بعمره
جانت بس تحمد الله وتشكره انه رجع بسلامات
وهو هم جان كلش فرحان انه شافها بخير كاللها جنت اجي من بعيد اباوع اشوفج ماكو افلت
بس هالمرة لمحت عايدة كلت خلي امد راسي اكثر والله وجان اشوفج
حبيبتي وعمري
وبدى يتغزل بيها كدام عايدة والاخيرة تضحك
تكله هلا هلا
هاي سوالف العوائل خلوها بالبيت ههه
اتفق وياها يجيها كل ثلاثاء مرة بالاسبوع باوع من بعيد شاف بدرية عينها بعينه ورافعة تك حاجب
كللها ابد خالتج معرفت
مبينه لوتيه مفتحة بالتيزاب ههههه
بس يومها من رجعوا ابد ماحجت وياها جانت تباوع عليها من جوة ليجوه
انقهرت عليها شافتها فرحانه وكاعدة بالتكسي تضحك ويه روحها
عمران جان كلش فرحان بحجاب ميلاد وسماه حجاب نص ردن لانه ربع رجلها جانت طالعة
بنهاية شهر العاشر
جانت نور كاعدة تغسل الصبة مال بيت بدرية اوقات من كريم يبات بيت خاله تروح هي تبات هناك
فات زفة عرس
جانت تكول ويه نفسها مايجيني فد واحد حتى لو ابن حرام ويكول هاي المكرودة اخذها
اوووف
مابقى امام مابقى سيد مارحتله ونخيته بقى بس احمد راضي اروح اشيكله
بوكتها جانت اله شعبية كلش جبيرة وبدى يرشح نفسه لمناصب قيادية
والله واجتي بدرية طبت جوة سالت عن قيم كالتلها بالحمام تغسل
باوعت عليها كالتلها بدلي هسه يجي كريم ياخذكم انت ورحاب للنجف
---ياالله خير ان شالله زيارة
---لا يمه حيدر اخو فاضل سوى حادث البارحة وتوفى
---عزة كولي غيرها خالة فدوة لعمرج
والله داكلج شبيج
ورحاب تدري
اي تدري لعد اني منين عرفت
زوج فطم جايها
حيدر جان متعارك ويه امه علمود البيت اللي بالنجف
كايللها بيعيه لو روحي كعدي بيه وانطيني البيت الي بغداد اريد اتزوج
اتاخر زواجه من بعد مرض والده ووفاته وراها هم طلعت السنة مال ابوه وراسا صارت الحرب
جانت امه متخبله من وراه
صار عصبي وكام يكسر بالغراض
فضاربته هي
طالع عصبي من البيت
دنيا ليل وماشايف السواتر القديمة على وحدة من الطرق الفرعية
جانت الناس مبقيتها ومرات شباب يفترون بسلاح بالمنطقة حتى يبعدون السلابة والحرامية
ضارب بريك ومكلوبه السيارة
علما واصل للمستشفى ميت
جانت يومها ماي طلاه بين الحياة والموت هي هم
ورة الفاتحة اخذوها بناتها لعمان حتى هم ترتاح وهم تنسى
من رجعت رحاب من الفاتحة
سمعت بمنطقتهم ناصبين مولدة جديدة كالت خلي اروح اسحب خط
اخذت بشار وراحت
وهي واكفة هناك دتحجي ويه ابو المولد
لمحها صفح شاب ديسوق سيارة ويقترب من ابو المولدة
ومن سمع صوتها اتاكد
نزل كاللها انت مو رحاب
اندارت وقبلها اندار بشار
كانت صدمة الها ماكدرت تنطق غير وسام!!!
جمدت اللحظات والثواني بيناتهم
توقف الزمن
وانحبست الانفس
انحسر الشيب وراحت التجاعيد وازهر عمر الصبا من جديد
كان يتاملها بعيونه المبتسمة
بينما هي تاملته بحزن
نملت اطرافها وجمد الدمع بمقلها
وفكرت لثواني
اي اني رحاب او الي تبقى من رحاب
اني الي عافني الزمن وهجرني الوقت
وصرت في مهب الريح
تتلاقفني امواج الوحدة وعواصف الظروف الصعبة
اني مو رحاب لا مو هي نفسها
اميرتك الفينقية!!
لا اني اني ولا انت انت
ياترى شعمل بيك الووقت
كانه قرا الي بداخلها بطرفة عين كاللها ابد ممتغيرة نفسج انت انت
ابتسمت بخجل ولمعت عيونها
كالته ا بس انت تغيرت
تاملها بشغف جانت لابسة تنورة سودة عدلة وقميص اسود
داخل النورة وحذاء فلات
نفس الضعف يمكن اضعف صارت من صارت عدها القرحة
اقترب منها بشار وكللها يله ماما اتاخرنا
اللقاء كان خجول وعفوي
رجعتلهم كل ذكرياتهم القديمة ساعتها
رجعت لوسام ذيج اللحظات من اتصوب بالحرب
وكيف من فتح عينه وكالوله شسمك
كللهم ابو رحاب!!
وشلون حول نقله من بغداد وبدى يدوام هناك بكركوك ويملي الدفاتر والكتب بالاشعار
كيف مرت الايام والاسابيع كانه دهر
اتغرب حتى عن اهله حتى لايشعر بهضيم فعلته
حس بخذلانه لرحاب ضرب صميم رجولته
بعدها واول نزله اله لبغداد
راح افتر يم بيتهم
جان يروح يوميا حتى بلكت يعرف اخبارها الى ان شاف امها شايله طفل رضيع
عرف راسا هذا ابن رحاب
ومرة ثانية جانت عهود شايلته
هي عهود من وصف رحاب الهاّّ
تزوجت حبيبة عمره
اتمرض فترة طويلة
وراها رجع لكركوك
اتزوج من بت صديق اله هناك تركمانية اجمل بنت بالقرية اسمها باكزة
جانت تشتغل معلمة
وقبل مايتزوجها حجالها قصته ويه رحاب وليش يصيحوله ابو رحاب
بس هي انعجبت بيه وقبلت بعد
شكرة بعيون زرك وشعر مجعد جميل
ووصار عنده اربع اولاد اثنين بنات وثانين ولد اكبر ولد اسمه غسان
اصدقائه القداميى لساهم يصيحوله ابو رحاب
وكلهم يعرفون قصته وياها
وقلة من معارفه تصيحله ابو غسان حتى جهاله يعرفون بموضوعهم
اندار على بشار وكله شلونك عمو
ماشا الله كبران ومحلو
ضحك وكله اشكرك عمو
--اني وسام صديق خالو سعد جنت جيرانكم قبل ايام مجانوا اهل ماما بحي الجامعة!!
---مااتذكرك عمو جنت مجاي للدنيا!!
---هههههه
صفنت رحاب على كلمة كبران كالتله بصوت ناصي
وانت وين تعرفه
كللها هذا مو ابنج الثاني وعندج واحد بعد اصغر منه!!
فجاوبه بشار كله لاعمو احنى توم
--ياا ماتتشبهون ابد
---اي بالفعل هو طالع على ابوه الله يرحمه جاوبت رحاب وهي تمسد بايده على راس بشار
بس بحزن خفي
---الله يرحمه اتوفى بالحرب
---لا لا قبل اربع سنوات اني لابسة اسود على اخوه سوى حادث واتوفى قبل اسبوع
---الى رحمة الله
--- اي والله شاب عريس
اجى عمار متنك
هاي يوم مو اتاخرتي ظل بالنا عليج
ولمحت عباس ديباوعلها من بعيد
انحرجت منه وجرت بشار ووكع منها جزداننها من الارتباك
دنك وسام على السريع
وبلحظة عفوية لمس اطراف اصابيعها
كانه نتلة كهربائية
التقت عيونهم مرة اخرى لكن هالمرة بابتسامة
وسام ماترك رحاب راح اندل بيتها
ومن بعدها بفترة
من بدت المدارس مرة ثانية جاب اخته وراحلهم للبيت
ظلوا يدكون الباب جانت نور خاتلة ماتفتح
ويه كل دكة باب جانت تختفي
فتحت رحاب وشافتهم كبالها
خجلت حيل اتمنت لو بس خالة كحل بعينها
عدلت نفسها ورحب بيهم
ابتسم وكللها جنا جايين نزور ولد صديقنا هنا
خطية ابوه اتوفى قبل كم
يصير جيران بيت اختي هنا
اني ذيج المرة مريت اسحب خط الهم!!
كالتله الله يرحمه وشلون اتوفى!!
جان بالسجن ومن طلع صحته تعبت كلش
---بالسجن !!
كملت اختها خطية هو دعم واحد ومات وحكموه مااعرف جم سنة يمكن خمس سنين لانه مو متعمد مااتذكر والله
من انطت الحكومة العفو عن بعض المساجين قبل الحرب هوهم طلع وياهم بس جان صحته فد نوب تلفانه ماتحمل ومات خطية
--يااا ياعيني الله يرحمه
وشويه شويه انفتح الموضوع انه وسام يريد يتقدملها
ضحكت رحاب وكالت صدك تحجون اني ولدي بطولي
مستحيل افكر بالزواج
واول ماسمعت نورانه اكو زواج كامت تلطم
جتي قدملهم الببسي
فكللها وسام والله ياريت لوجاي
باعت عليه وماحجت
فعلقت رحاب من يمها هههه اي بعينا
وظل وسام هو واخته يشرحون الوضع بالتفصيل وشلون انه زوجته موافقة والمرة الثانية يجيبوها ويجون
لانه اصلا همه شبه منفصلين قبل فترة كثرة مشاكل بيناتهم صارلها سنين ختها تكعد يم بيت اهلها وهو اجر بيت بصفهم حتى تبقى عينها على الجهال الي اصلا مو صغار بعد
بس ماطلكها لانه هي مرادت
ومن زمان جانت تكوله لو اشوف رحاب الا بيدي ازوجها الك
مانطت جواب لكن وعدتهم تفكر
واترخصوا وراحوا
عصبت على نور على سوايتها
وكامت تصيح عليها
رحاب صارلها فترة كلش عصبية
وحتى معاملها كلش موزينه ويه نور بس الاخيرة جانت ماتكدر تحجي
هالمرة كامت تبجي نور وتضرب على روحها
كالتلها ادري والله صرت عالة عليكم بس وين انطي وجهي مو كتلج بقيني يم عمة نزيرة
حتى انت صايرة تكرهيني
كامت تبجي وبدال ماتراضيها رحاب كامت تحجي عليها بالزايد
وترزلها تجوز من سوالف المكاديه هذه!!
زعلت نور واخذت عبايتها وراحت لبيت بدرية مشي
المسافة مجانت قريبة بس كطعتها مشي واول ماوصلت خرطتلها كل المووضوع
بيومها جان صفاء ابن قاسم راجع لبغداد مرة ثانية وراح عدل لبيت علاء
وكله اريد احجي وياك
وهناك انطاه اربع اوراق
مبينه اوراق من ملف امني
كله هاك عمو اقراهن
من قراها علاء
صاح على امل تجيبله حبوب الضغط
واصلا بالجديد شكل عنده سكر وصار بيه سوفان من التعب
روان جانت راجعه لاهلها وسمير ديحضر نفسه هالمرة يروح زيارة لاهل امه بطهران
شال الاوراق وكله لصفاء انتظرني هنا
اخذ تكسي بالكوه
جانت ازمة البنزين خانقة البلد
وكبل بوجهه لبيت زهير
عصرية وكلهم موجودين الا نزار جان ماخذ عهود لبيت اهلها
رحب بيه سامي وركض ديخدمه
كاله ماكو داعي راح لزهير لغرفته
وجان سامي واكف بالباب
زهير صار بيه شلل نصفي يحرك بس ايديه وركبته
وكوة يحجي
علاء انطاه الاوراق وخله ايده على حلكه من عصبيته
كلمة مانطق بس كله هذني صدك
اشر زهيرلوسام ينطيه نظاراته
وبدى يقرا وشفته ترجف
كله علاء انت تعرف اني شكد احبك
اي هذني صدك
--علاء بصوت مخنوك ساله كله ليش
ليش
بشنو ماذيك اياد
---اي جنت اكرهه واضوج من يحجي على الريس
جنت اتخبل
بس والله علاء وداعت ولدي وراس اسما مجان الموضوع
وكامت ايده ترجف مجان الموضوه هشكل ابد
العمر والمرض اكل على زهير هواية جتي نورية دتباوع تشوف شكو
اخذها سامي ورجعها للصالة ورجع يسمع شنو الموضوع
رجع كال انه الامور طلعت من ايديهم واجى امر الاعدام للكل
وهو جان ممتوقع هذا الشي
استهزا علاء بجوابه
كله ونرجس
كله علاء انت تعرف موضوع نرجس
اني من بلغت
بلغت على قاسم اخوها
لانه عرفت هي تبقى
انت عندك عراقية
هاي
شهادة جنسية مايسفروها
زوجها عراقي
شمدريني هي ترفض البقاء وترافق اهلها وتوقع على الافادة!!
انه ادري!!
هي اختارت اني ماردت ااذيك
والدليل من اخذوني للتحقيق
اشهد عليك انت السبب بكتله الضابط سلمان
مانطيت بيك
والله وداعة جهالي مانطيت بيك
كالولي نكتل مرتك وجهالك
كتلهم برئ ماله علاقة
جانو شاكين بيك علاء ويعرفون انت الي كاتله بس ماكو دليل
رادوا اعتراف مني!!
ومانطيت بيك
انصدم علاء على موضوع حادث اغتيال الضابط سلمان
والي اتصور انه محد يكشفه
وكمل زهير بصوت محشرج
اني ميت ميت
شيسوون يعني
ردت بس اشوف اسما واحضنها
كلبي حاركني عليها
اريد بس اشوف بنتي وشيسوون خلي يسوون
اني لو مكانك
شوف اسمع زين
اني لو مكانك
هماتين كتلته لسلمان
جان يستاهل
وهمه ظلوا يراقبوك
اووووو
اي هواية جروني للتحقيق
بس ماكتلك ولاحجيت
وبدى يسيل لعابة وخشمه ينزف دم
دمعت عين علاء
واتذكر اياد واخته وايامه ويه نرجس
جان اقرب الناس الهم سبب كل هاي المواجع
مسح وجهه وكله لسامي اخذ ابوك وسافر اطلع باجر الصبح افتهمت روح لسوريا عمان
اي مكان
---بس ابويه ماعنده جواز شلون
---روح يم اهل ابوك
يم عمامك روح لاي محافظة لاتبقى هنا
وعافهم وطلع
افتهم سامي شنو الموضوع وظل صافن على ابوه
وبالليل بلغ امه تحضر نفسها
وبلغ نزار
طبعا عادي عهود سوت عركة وكالت مااسافر اتي رجعوني لاهلي
وكاللها خلص باجر اوديج لاهلج
وطلعوا من الصبح نزار يدبر سيارة وبنزين وسامي يحول الفلوس العراقية عدهم دولار
جانت ساعة وحده وربع
خلصت عهود طبخ وغسلت البيت وطبت للحمام تغسل
اندكت الباب دكة قوية
عبالها الولد شايلين شي
كامت كوة وهي تصيح عهود وينج ديدكون الباب
كامت ادردم عهود يعني حتى سبح ماتخلون الواحد يسبح
وسمعت صوت صياح عمتها
تكول انتو منو وشتريدون لا
لا يبووو عيفوه هذا رجال مريض
شتريدون منه رجال عجوز
وصوت طلفات مسدس
وراها صياح وعياط نورية على زوجها كامت تصيح وتلطم وصوتها انبح من صياحها طبوا الجيران ورة ماسمعوا صوت الطلقات همين
ظلت عهود بالحمام من خوفتها ماطلعت وشلون تطلع بالخاولي والناس مليانه البيت والجيران تصيح الله اكبر والنسوان كامن يصرخن ويعيطن
كتلوه لزهير ب3 طلقات 2 بالراس ووحده بالقلب
تكول نورية 3 ولد ملثمين دفعوها وكتلوه
وهي مجيه عليه طافر عليها الدم كله
من اجاها سامي عباله هي هم مضروبة!!
بعدها طلعت عهود من اجى نزار
وشافت المنظر شلون عمها واكع من الكرسي وغركان بدمه
انقهرت عليه ووكعت عليه كامت تبجي
رجال عجوز بالستين اكله القهر والمرض
جانت صدمة للكل
بعد الفاتحة الي اختصروها بيومين
علاء بلغهم انه الافضل يطلعون حتى لاينتقمون منهم
ومن صدك حضروا نفسهم
جانوا ديلمون غراضهموعهود عيونه وارمه وتنكة على نزار معاجبها تسافر
اندار عليها نزار
وبكل هدوء كللها عهود انت طالق
وشال دسته دولارات وانطاها
كلها هذا حقج مو جنت تريدين توثيق بالمحكمة تضمنين حقوقج هذا حقج
اخذها لبيت اهله
وهي مصدومة كلما تحجي يكللها هشش
ماريد اسمع ولاكلمة
