في اواخر الشتاء تتلون الايام ببغداد بخيوط الربيع القصيرة
ويحمل الهواء نسمات برد متزاوجة مع حرارة الظهيرة لتترك ذاك الانتعاش الغريب
كعروس في اول ايام عرسها
يسمي العراقيين جو هذه الايام فيما بينهم
جو السفرات
ويرزقهم الله بتلك الخيرات والفواكه الصغيرة اللذيذة من التفاح الابيض والمشمش والتكي وحتى الزعرور والنبك وغيرها
فترة الربيع قصيرة جدا سرعان مايهجم عليها الحر بانيابه الملتهبة فيمحو بسرعة لذة تلك الايام
في ليلة ربيعية باردة التموا اهل فخرية بيناتهم
رغم وجود كل الخلافات
الا ان العائلة تبقى عائلة
ولابد في يوم ترجع لمتهم
دخلت عليهم نورية بعيونها المتعبة وبشرتها الداكتة
تماما مثل الي نوصفها دمها محروك من القهر
قهر اختها وابنها
وحتى قهر جهالها
يمكن مابقى لنورية احد تشيكلة غير كلب فخرية الحنين
الي لما تشوف عيون نورية غوركت راسا تحضنها وتبجي وياها
نورية جانت تبجي على ابن زهوري جعفر
تكول كلما اخابر عماته عليه ماينطن حجاية
جنه ميت ومايحجن لو يخافن من زهير عبالهن اجيب طاريه يمه
بالي عليه يكولن مايعرفن وينه
شلون فخرية مايعرفن وينه لعد منو يعرف
واني من البداية كالولي ببيت جده وبعدين شرد طلع لغير ولايه
وتاليها مايعرفون وينه
فخرية كلبي وكلني عليه ومحد ينطيني حجاية
حتى مايرضون يجيبولي الولد اخوانه حتى اشوفهم
ظلت فخرية تصبرها وانه بخيربس يخافون عليه احتمال طالع لايران ويخافون يحجون وكوة قنعتها بحجاية منا ومناك
ومسحت دموعها ووكعت عبايتها على جتفها وهي صافنة على عبوسي والتوأم وتكول لرحاب عمار هواية يشبهها بس بشار على ابوه
انتقلت وراها رادت تحجي عن موضوع خطوبة
وبس كالت خطوبه كطعت حجايتها فخرية واندارت على ميلاد الي مدت راسها تسمع عمتها شتكول
---ميلاد دكومي ساعدي عهود وسويلنا كهوة رحاب وبدرية يحبنها وسويلنا اني وعمتج قوري لاخ جاي
كامت وهي تمزمز بشمتها وعاقجة شكلها وتضرب رجلها بضوجة على الكاع
راحت ورة عهود ونور الهدى للمطبخ
نور الهدى بنية خجولة كلش
جانت تحس بالغربة بكل مكان تروحله
فاي بيت تطب راسا تروح للمطبخ تكعد تنظف وتغسل شكو مواعين وتحضر الجاي وهاي السوالف
لو تلزم توكل جهال رحاب وتبدللهم يعني قليلا ماتكعد ويه اهل البيت
يمكن خجلا
ويمكن في فكرهاا شي اخر
عهود جانت تنقهر عليها ماتخليها وحدها ودائما تشاقيها وتسولف وياها وهي هم من تجي عمتها نورية تروح للمطبخ
على الرغم من العلاقات رجعت زينة
بس لساها بكلبها هواية اشياء
جتي ميلاد على السريع دسوي الكهوة ونبهتها عهود ماتسوي هواية على كد الفناجين
لانه الكهوة غالية واصلا خالتهم بدرية جايبته الها من تجي هنا تشربها
واثناء ذلك فتحت نورية موضوع خطوبة
الموضوع كان يخص اسما بتها
بدت نورية تحجي لكن بغصة بكلبها
حجت عن عائلة بتهم تشتغل طبيبة بالمستشفى الي تشتغل بيها اسما
متعرفه عليه وحاجية ل اهلها
وجاية امها هم شايفتها بالمحتبر
وخاطبيها لابنهم
همه
اصلهم من كركوك
وما شاء الله كلهم واصلين
حتى هو طبيب طالع بعثة من زمان
وبعد مراجع عايش باالمانيا
----حلو الخبر والله نورية بيها الخير ليش ضايجة
---والله ام سعد شكلج
شو البنية ياهو الي يجيها ترفضه
وهسه هذا هم مكايلتنا عليه الا همه خابرونا على التلفون
شو من دااحجي وياها كامت تبجي
بدرية من يمها طفت جكارتها وافتهمت السالفة بس ماحجت
فكملت نورية كالت
وحتى من ساع حجى وياها ابوها طك بكط كلها باباتي اذا اكو احد في بالج خلي يجي واني موافق
بويه ليش هيجي تسوين بحالج
بس كولينا انت شبيج
ام سعد البنية دومها كئيبة وحزينة
لاتطب ولا تطلع ولاشفنا الابتسامة على وجهها من زمان
شو مادري شلونه البيت
ودمعت عينها وغوركت
من يوم الي راحت زهوري جنا مكبوبوبين على وجوهنا
جانت تجي وتجيب الضحكة وياها
هسه جنا بيت مال موتى
محد يحاجي احد
منا سامي ليل ونهار برة البيت
شكد اتوسل بيه يمه اتزوج اريد اشوف جهالك يملون عليه البيت
التهي بيهم ارتاح شويه
يكلي يمه ماعندي حظ ويه النسوان
ياهي الي اخطبها اله مايرضى عليها
وهاي همين
جنها مضروبه عين منفوسه
دومها حزينة ودمعتها بعينها
مااعرف شسوي
انتو شتكولون
----ام سامي جاوبتها بدرية بعد ماوكعت عينها عليها
وهي تورث جكارتها الثالثة
اسمعي يمه انتوا سالو على الشاب مدامه بره
صعبة تنحزر
وخلوها براحتها
لاتغصبون عليها
---لا والله ام كريم محد غاصبها
حتى هذه المرة الثانية يخابرونه
المرة الاولى جانت من جم شهر ومارضيت كلت هي بس هذه عندي وانوبه ادزها لبرة اني شعرف عنه
واني هنا بوحدي
اريدها من تتزوج تطب عليه
شلون يم ماشا الله طبة رحاب عليكم
تسوى الدنيا ومابيها
---حقج والله ام سامي اي دادة حقج
جاوبتها فخرية وهي تباوع على ميلاد الي جتي ركض حتى تعرف اخر المستجدات
فرجعت نورية كملت كلامها وهي ترشف قهوتها
---محتارة ومااعرف
ساعة اكول فرصة تطلع برة تشوف دنيا
وتعيش حياتها منو مايتمنى يعيش بالخارج
وساعة يحز بقلبي تعوفني بحالي
---اساليها هي شتريد
اذا عاجيها تطلع خليها تروح
وعلى كولتج تشوف مستقبلها وحياتها برة اكيد احسن
وهسه البنات كلهن يتمن واحد بالخارج
---فكرج ماياذيها !!
---هاي بقت عليكم لازم تسالون عليه زين يله تتاكدون وتنطون
---هي حيرة
واندارت على رحاب عمة شلونج ويه رجلج عيالج شلونهم ابنج شلون صار
----الحمد لله ابني احسن بس هم يرادله متابعة
يعني مايلعب ويتعب هواية وهيجي شي
عيالي زينين
يمكن كتلج حماتي رقية اطلكت وهسه ديرجعوها
بعد حجي منا ومناك
رجلها قافل
---هي هوايه تتنوعص اني شفتها
---اي عمة مايرضن باي شي
ورجلي الحمد لله شويه احسن
قبل فترة هاجت عليه القرحة وهو اصلا يشكي من كليته
مااعرف شبيه
---هواية يحرك بدمه عيني هاي من القهر
----اي والله عمة هواية ياكل بنفسه على كلشي يتمرض وياذي نفسه وموتة بيبيته الله يرحمها اذته حيل
حتى الجمعة الي فاتت اخذنا اني ونور لبيتها نظفنا ورجعنا
يريده يبقى مثل ماهو
---الله يرحمها
ماتسوين جاهل لاخ جيبليج بعد فرد اثنين ههههه
----والله عمة شكلج اني وفاضل عركنا من وره هاي الشغلة هو كاتل روحه على بنية واني حس مابيه التوأم طلعوا عيني هههه
علقت فخرية هم على انه هي دتقنعها تخلف بنية وفد جاهل لاخ على الاقل
مدام زوجها بنفسه ليش لا ؟
--- يمه هو شكو وراه قابل يحبل يجيب اشو كله براسنه
والله مابيه
عجزنا
هنا صاحت بدرية من يمها لاعيني انتن احجن عن نفسجن اني بعدني شابه
ههههه
---عاد صدك خالة انت بعدج شابة
---يمه قل اعوذ برب الفلق
----يا !!!!خالة مو هسه انت كلت
---اي اني اكول انت لاتكولين بوجهي هههه
وعادت نورية الحجي وبدت تحجي عن نفسها
والله اني عجزت شو المصايب كلها ورة اللخ موتة كاطع الله يرحمه هم صارت فجاءة صارت وراها امي ماطولت جم شهر ولحكته
وسودة عليه نزار من عمت عيني عليه
راح بعزشبابه
ليل ونهار افكربيه
اكول هم يعذبونه
هم يرجع هيجي شكله مثل ذوله الاسرى
ياترى جوعان شبعان
بردان دفيان
ربي رحمتك ويرجعلي بسلامة
والله فخرية كل مااسمع وجبه جاية اروح بوجههي للمنظمة وزهير يتعارك ويايه يكلي لاتروحين اذا جاي اسمه همه يخابروني
بس والله ماجوز حتى اروح ادك الباب على اسير اسير اسل عليه
شو لحد الان محد عرفه مااعرف ظل بالي عليه وبس اتحلم بيه !!
ومسحت عيونها وحضنوها البنات
بعد انتو تعرفون الضنا شكد عزيز ومسحت دموعها بطرف عبايتها مرة لخ
---الله يرجعه بسلامه ام سامي وتفرح عينج بيه وان شاء الله بفك اسره ويرجعلكم بغمضة عين هسه تشوفين
---الله يسمع منج الله يسمع منج
ورجعت حجت عن سامي
هم مكرود وخطية
مااعرف شبيه
شو جنه قسمته ماتصير
---لاتشيلين همه نورية
هو رجال ماكو عليه شي
وماشا الله مايتعيب
خلي هو يختار
وردت بدرية وهي تكلب فنجانها
اذا على اسما دزيليلها اني احاجيها
وافهم منها وفهما
---يا وج عيوني انت روحلج فدوة ياريت
والله شريد اني غير اريدها ترتاح وتريحيني وياها
غير اريد سعادتهم وراحتهم !!!
---يله منو من عدجن تقرالي فنجان صيحن عهود
هاي تعرف بهالسوالف المعلمات وياها معلميها
---يمعودة كلها كلاوت تقشمرنا
حجت من ميلاد الي جانت كاعدة ورة عمتها
اندارت عليها نورية وسالتها
---شو محلوة انت وكبرانه ماشا الله عليج
شلونج بالكلية عمة؟
---الحمد لله عمة زينه ورفعت خصلت شعرها ورة اذنها وجاوبتها باستحياء وهي لحد هسه تحاول تربط خيوط الكلام ببعضها
وعيون فخرية عليها وخصوصامن تصفن وتضيك عينها اليمنى
يعني ها اني شاكة بشي ود ادقق
صار حجي منا ومناك
اتذكرت وراها نورية انه تعزم بيت فخرية وبناتها واختها على السمج باجرالجمعة
سامي مشترين سمجتين كل وحده هطولها
وكال لازم تجيبين بيت خالي يجون يتغدون عدنا
بالبداية فخرية اعتذرت من نورية ماتكدر تجي مواعدين بيت علاء يزوروهم باجر
لكن الاخيرة اصرت انه يجون وحرامات السمج مايتحمل كطع الكهرباء يخرب ويخيس
فادخلت بدرية وحلت الموضوع انه فخرية تروح باجر للبيت نورية وهي وجهالها يروحون لبيت علاء وعود اختها غير يوم تروح تزور اخوها
وراها بدت رحاب تحضر نفسها ومن دتطلع دخل سامي
هي مشافته لكن هو لمحها من بعيد
بس مااهتم ولا ركز
يمكن اتفاجا كونها تسوق
لانه جانت حالة صح موجودة بس مو كلش بكثرة انه المرة تسوق سيارة بالشوارع
اندكت الباب ودخل سامي وسعد جايين سويه
وظلوا شي نص ساعة سوالف بالباب
وميلاد رايحة جاية ساعة تجيب مي
ساعة كهوة
ساعة جاي محد قبل يتعشى بقت على النمنميات
وجانت تروح وتجي تنطي وتاخذ نظرات خطف اله
وهو جاي ومكشخ على سنكة عشرة
ومستعمل ارقى انواع العطور
و سعد يمه مجلب بيه يريد يشتغل وياه بالمحل
ويعوف شغل الفلافل
وحتى يحسس ميلاد بقيمتها يمه اتعمد سامي انه ماينطي موافقته على شغل سعد يمه الا كدام اهله
وكال لفخرية خالة هي الخاطرج ها
وظلت تتشكر منه مع انه في داخلها مجانت راضية
جانت خايفة عليه
خايفة لانه تعرف دروب سامي وسوالفه
ودعوهم على وعد يلتقون ثاني يوم على الغدا
ثاني يوم كعدت ميلاد من الغبشة وبدت تحف لنفسها وعهود تراقبها
وصفنت عليها شلون تنظف نفسها من فوك ليجوة
---كلتلها خلص ثبت عيد
ضحكت ميلاد ومافتهمت الحجاية
بوجهها راحت عهود وخابرت رحاب وحجتلها
ظلت رحاب مصدومة ماتصدك بالبداية
بس علاقتهم مجان يشوبها اي شي
بالعكس جانت اسرارهم وحده
---ديري بالج تكولين لامي لو تحسسيها
ترة تصير مصيبة جبيرة احنى لازم نحلها لازم نحجي وياها
هاي مخبلة من كل عقلها الا سامي ماكو غيره
--رحاب يمكن ترة امي حاسه بيها
---عزة والله تملخها
---كومة ولد بالكلية الا هذا
---ليش هي نست لو تغشم روحها
المهم اتفقوا الخوات انه يعملون جهدهم يطلعون سامي من حياة ميلاد
سامي الي محد حقيقة يعرف شنو نيته وياها
وقبل مايطلعون
باوعت فخرية على بتها
وكلتلها بنبرة حادة وجدية
نبرة كلش زين تعرفها ميلاد
تروح تغير لبسها
وتلبس الكوستم البنفسجي
وتمسح كل المكياج الي بوجهها
ماتطلع الا بطرك الكحلة
طبت للحمام وهي تغسل وجهها وتبجي
خربت امها كل التخطيط والتفكير مال ليلة ويوم
وطلعت مثل مرادتها امها بالضبط
وبالفعل راحوا متاخرين شويه
وماقبلت سعد يوصلهم مع انه البيت مو بعيد
وكوة قنعت عهود تروح وياهم
وكانت هذه اول مرة عهود تروح من يوم الي تاسر بيه نزار
واستغربت فخرية من طريقة الحفاوة والترحيب الي استقبلهم بيه زهير وابنه
يمكن لانه ماعاد الهم احد
اخوانه صاروا بعيدين عليه
بقت بس اخته الي هي من البداية الوحيده الي تتواصل وياه ومكطعت
وبذاك اليوم حمل زهير خبر نقلة عهود الى مدرستها الجديدة في بالامين الثانية
صح بعيدة بس شويه احسن واسمها متوسطة
ومن فرحت اتشكرت عمها ورادت تبوس ايده مثل قبل بس هو ماقبل
وحتى اسما وعدتها تشوفلها شغل بفد مختبر العصرية بعد ما طلبت منها عهود هذا الشي خصوصا من بطلت خالها الخياط وقل الوارد عليها
والراتب اصلا مايكفي ومصاريفها كله دين من امها
ولانه الضابط فخرية موجودة
من اول الكعدة عينها جانت على سامي وميلاد
والولد راسا افتهم
عينه مشالها وظل مدنك
وبس خلص الغدا
طلع واخذ سعد وياه وماشافته الا من رجع ديوصلهم
ومع ذلك ميلاد جان كلبها يدك وهي كاعدة على نفس السفرة ويه سامي
وراحت تتخيل انه اذا تزوجها حتكون وياه يوميه
تكعد هذه الكعدة
وهذا الاكل الحلو
والزنكنة
واذا اسما اتزوجت وسافرت
وعمتها ورجلها يموتون
هذا كله يصفالها
هذا البيت
لا والبيت الثاني هم
والسيارات ال3 مالتهم
عدا المحلات ال2
شكد غبية رحاب فوتت كل هذا
ويمكن لا
هي المحظوظة الي راح يصير كلها الها
وهي الثوله الي جانت تركض وره واحد مثل لهيب
ضحكت بسرها
وهي تخطف نظرات من جوة ليجوة لسامي الي حس بيها بس ماكدريبادلها
لكن الي لكفها عهود
فخزرتلها بعين قوية
لكن ماهتمت
واول مارجعت للبيت ظلت تخابرة واهله يشيلوه الى ان صار مشغول عرفت ضاجوه وعافوه مفتوح
معناها هو مو بالبيت
شو راسا عهود جابت جيس الحب والجاي وكعدت كبالها
افتهمت ميلاد ذبت التلفون وكامت
ورة شي ساعة
دك التلفون وركضت عليه ميلاد
بس عهود سبقته وشالته
وراسا انطبك بوجهها
ومن سمعت صوت سعد طب للبيت
راحت لغرفتها وسدت الباب
بنفس ذاك اليوم من الصبح بدرية اخذت جهالها وراحت لبيت علاء
كريم وقيم كلش يحبون يروحون هناك
قيم طلعت اعفاء وهذه اول سنة تضوك الاعفاء وروان جان عدها امتحانات بكلوريا صف ثالث
وجانت كاعدة والكتاب بحضنها من فات من يمها كريم وصاحلها شلونج ام خشم
باعت عليه من جوة نظارتها بتك عين وبضوجة
وصاحتله من يمها قيم
ولاتنابزو بالالقاب ياشيخ
----ههههه صدك سمعنا صاير حمامة جامع علقت عليه روان
فجاوبتها قيم وانت الصادكة لكلك الجامع
كريم الفترة الاخيرة التزم كلش
صارت صلاته كله بالجامع والمسجد ومايفوت صلاة جمعة جان يروح ويه خاله اذا جان بالشغل
وظلن هن يضحكن بس هو ماسمعهن ولا خلى اذنه يمهن صعد راسا لسمير لغرفته
سمير جان ديسمع اغاني ويكلب بكتاب يقرا بيه ماسمعهم جاييين
وفز من شاف كريم وهاي جانت كعدتهم للغدا
وانفتح موضوع التنابز بالالقاب بين البنات
سالتها لقيم هم يعيبون البنات عليها بالمدرسة علمود خشمها مثل مديعيبون عليها هي بضعفها
!!
ضحكت روان وكالت عادي خشمي وعيوني وغيرها
كمزت فوك الجرباية قيم
وكلتلها قبل شنو جانوا يعيبون عليج شو مكايلتلي
---امممم
مااعرف ماحب احجي بهذا الموضوع
من شفت مرة ماما امل تبجي من وراه
---شنو احجيلي
---ولج ماكو شي حجاية قديمة من جنت بالابتدائية
جانوا يصيحولي بت اليهودية
---ها من جنتو بذاك البيت مال اهل خالة امل
---اي عفية
وماخلصت من هاي الحجاية الا من شلنا وكعدنا هنا
كاموا يصيحولي روان العورة علمود نظاراتي ههه
---هههه مثل لميعة العورة تتذكريها
اي خطية هاي المخبلة شكد جنت اخاف منها
خطية يكولون جانت ممرضة بالحرب اتخبلت
----اي مثل هاي الممرضة نجاة الله يرحمها يم بيتكم مو هم حركت نفسها كالو اتخبلت من ورة الحرب
---اني من قبل المعلمات شادين ويايه علمود ابويه اعدام
خصوصا المديرة
هسه هم بس يمكن مو كلش مثل قبل
ويمكن اني صرت مااهتم بس اضوج البنات يعيبون عليه هواية ضعيفة
هههههه
لج اني هم شكد كلت لامي اخذ دكسون ماقبلت انوب بوجههي الطويل هذا خشمي طالع عائلة بحد ذاتها
ولااعرف عليمن طالعه شو شوف صور امي تخبل
شكرة وعيون زرك
---حتى خالو علاء هم حلو يخبل
---حتى سمير احلى مني هههههه
--تعرفين اكلج شي
---كولي هو اني اعرف اليوم كله ضايع مراح اقراه
---مرة سمعت امي تحجي لرحاب علمود امج
جنت دائما اسال اكول ليش خالو طلكها
---اي اعرف
شنو تعرفين
----امي رادت تروح ويه اهلها لانه امها وخالها راحوا علمود بيبي الله يرحمها
فامي رادت تجبر ابويه يروح وياهم شككت الجناسي
وماقبلت تبقى وكالتله تعال انت ويانه !!
---اي صح امي هم هيجي كالت عندت وكالت ماابقى اروح ويه اهلي
وخالو مكللها على الطلاك خاف لاتسوي شي من وراه
---امشي خلي ننزل ماريد اتذكر هاي المواضيع
---هم تشتاقين لامج
---الصدك غير انقهر عليها من اسمع صوتها
بس اني مااتذكرها زين
يكول سمير يتذكرها مع انه اني متاكدة هو يتذكر الصور الي عافتها النه
جنا صغار من سافرت
نزلوا جوه والتلفزيون جان مشتغل برنامج عادات الجمعة
اتغدوا واتعشوا يله رجعوا
امتحانات الكليات جانت تبدي يوم اربعة وعشرين من شهر الخامس من كل سنة تتاخر او تتقدم يوم عنها
ميلاد جانت تروح وماتحط اي مكياج تقربا لله انه ينجحها بالامتحان اضف انه محد اله واهس
واذا جاوبت زين بملابس معينة تظل تلبسها وتعتبرها فال زين عليها
وبذيج الفترة صديقتها منى كبلت ويه سنان وجانت تكعد على الدرجات وتسولف خصوصا ورة الامتحانات الكل يروحون للبيت
واغلب الاحيان جان يعوفها الخط وترجع وحدها تكسي
اما ميلاد فجانت تستغل شمس الدين بالايام الي يكون قريب عليها بقاعة الامتحان بالغش
جانت غشاشة ممتازة
ومحد يشك بوجهها البريئ انه هذه تعرف تغش وتسوي براشيم
شمس الدين كان كلش لازك بيها
وهي نوعا ما تتباهى بهذا الشي بس ماتنطيه وجه تحسس الاخرين ها يعني هو يركض ورايه
لكن بالها وتفكيرها ي جان م سامي
فجانت هاي الفترة الي من ترجع لحد ماتجي عهود هي الوقت الوحيد الي تحجي بيه وياه
وصار يرجع علمودها حتى يسولوفون
انتبهت عليه انه سوالفه وياها عائلية
وكانه ماخذ حذر كلش
مع انه نبهها انه امها تحس وتعرف
حست انه نار لهفته بدت تخبت
ومصار يطول وياها
كامت تشك انه صار يعرف غيرها
او يمكن مل منها !!
وبنهاية شهر الثامن جان ينزل الرطب
هو صح ينزل قبلها بس غالي سعره بالاف الى ان يرخص
فخرية جانت تسميه رطب
وعهود جوزي وخلال
قيم تسميه ابيض واسود
وروان جاي وحليب
بكل الاحوال لازم يكون حاضر بالمسواك ويه الركي والبطيخ
ذيج السنة الركي جان كله فاهي وابيض
فاكثر شي جانوا يشترون الرطب وعصرية ويه اللبن يناكل
وعادي هالسنة هم سعد طلع اكمال
وراحت فخرية باعت سوار الذهب الي اشتراه الها رجلها من اجى هو للدنيا
ولزمتله مدرسين خصوصيين
لازم ينجح ولا ياخذوه عسكرية
جانت متندمة حيل انه خلته يشتغل ويه سامي
خبلنه البنات الي هناك
وصار حاله حال ابن عمته
ليل ونهار لازم التلفون ويقصقص وياهن
الى ان شالته فخرية وكطعته فترة الامتحانات
لاحاله عاجبها ولاحال ميلاد
الي جانت تكطع التلفون اول ماخيال امها يفوت
على امتحانات الاكمال
اشتغلت عهود بمختبر بالحارثية
المبلغ جان قليل بس هي جانت فرحانه بيه همزين فلسين تكضي ييهم حاجتها
وجانت فخرية رايحة جاية زيارات ونذروة بس كون الولد ينجح ويخلص من الرابع اعدادي
ووحده من هذه الزيارات شافت صاحبتها القديمة ام فرح
ماشا الله فرح هم جانت داخلة كلية التراث
وناجحة من دور الاول
فرحت فخرية من شافت صديقتها وفكرت لو ابنها شويه راكز جان خطبتله فرح
شحلاتها تخبل
وظلن تاليها يتواصلن بالتلفون
فرح هم جان جاييها ناس يخطوبها من برة
وبنهاية التاسع
اتخربط فاضل
ووكع بالشغل ونقلوه للمستشفى
وحده من كلاته صاير بيها عجز تام
ولازم يسووله عملية يشيلوها بعد ماتفيد
اتعذبت رحاب وياه كلش وعلى الرغم اخته رقيه وامه وابوه جانو موجودين
بس الحمل الجبير عليها
جانت مرتاحة انه الجهال يم نور الهدى الي فجاءة قرر خالها يريدها لابنه
وهنا كانت طامة كبرى
جانت كلش متاذيه ومقهورة
وفي يوم هي تتذكره زين
جان فاضل بعده ممسوي العملية
نايم الظهرية والتوأم نايمين بصفه
ونور ركضت وره عبوسي تريد تطلعه من الغرفه حتى لايكعد اخوانه ويسوون هوسه
رحاب جانت دتصلي والبيت سنطة ماكو بس صوت البنكة وصوت التبريد بغرفتهم
واصابع عبوسي يمشي على الكشي داير مدايرها
دنكت رحاب على سجادتها الي جانت تصلي عليها ودعت من الله يكوملها فاضل بسلامة
ظلت تبجي عليه خايفة
جانت حالته تعبانة حيل وذبل فد نوب
وصارت سنطة وره ماسمعت طبة شي وكع بالكاع
ضاجت رحاب وراحت وراهم دتريد تشوف شكو
شافت نور دتقرا بالرسايل
الرسايل الي جانت حافظتها صارلها عشر سنين بملابس اللعابة
عبوسي موكعها ومملخ شعرها وجار كل الاوراق
ونور شايفتهن ودتقرا بيهن
صح هي موكلش تعرف تقرا وتكتب زين
بس افتهمت الحجي
جرت عبوسي وماحجت
وعافت رحاب
مصدومة وتتبلعم
لمت اللعابة وعدلت شعرها وطلعت الرسايل
وبلحظات رادت تحركهم
بجت
بجت من ضعفها
وماكدرت
ماكدرت ومجان بيدها الامر
ضمتهم بغير مكان
الا رساله وحده نستها ومانتبهت عليه جانت محشورة جوة ردن اللعابة
رحاب جان عدها ثقة بنور هيجي كالت ويه روحها
فحمجت وياها ولافتحت الموضوع
ولاحتى نور الهدى علقت شي على الاطلاق
ثاني يوم دخل فاضل للعملية ومن شاف زوجته تعبانة ومنهارة عليه
كللها شفتي راح اموت ومخلفتيلي بنيه ههه
ضحكت ووعدته بس يصير زين تسويله بنيه
وبالفعل سووله العملية وشاو وحدة من كلياته
وعزلته رحاب بصرامة عن كل الخطار لانه مناعته جانت جدا ضعيفة وهواية زعلوا منها
كونها جانت سامعة بعدد موقليل من الناس ماتت على الرغم من نجاح العملية بسبب هذه السالفة
الخطار والزيارات المتكررة
والكل وكف وياها ذيج الايام
والناس طابه وطالعة لبيتهم
حست رحاب اه انهارت
جانت كلما تشوف امها تنام بحضها وتبجي
وامها تصبرها تكلها اجر ان شاء الله
واكثر وحدة جانت تبات يمها ميلاد
جانت تشوفها فرصة تروح لبيت رحاب حتى تخابر سامي براحتها
لكن اخر مكالمة صارت غير شكل
جان الدوام توه بادي
فماتكدر تجي غير خميس على جمعة وسعدهو اللي يجيبها وهو اللي يرجعها ثاني يوم
جانت كوة تسرق الدقايق حتى تحجي وياه
وهذه للمرة الثالثة يغلط باسمها ويكللها رحاب
اول مرة اعتذر منها وخجل كلش ومشته اله
والثاني كللها عبرها بانه راد يستا عن زوجها شلون صار ورة العملية
الثالثة حبت تزعل حتى تجوزها وتخليه ينتبه
فسدت التلفون بوجهه راسا
ومن رجع دك
شالته خلته مشغول
ورجعت للبيت
من رجعت جانت عهود بعدها مراجعة من المختبر سعد وصلها وطلع وامها نايمة
خابرته وياريتها مخابرتها
رزلها رزالة طيح حظها بيها
---شلون تتجراين وتسدين التلفون بوجهي زعطوط لو طرطور كدامج
واخذها حاصل فاصل مخلاها تنطق بكلمة اخر شي هو هم سد التلفون بوجهها
وكلها انت جاهله وماتعرفين تتصرفين بعد لاتتصلين
المشكلة انه ميلاد
جانت مرات تتصرف تصرفات طفوليه تتخيلها دلع او دلال بينما هي كانت تضايق سامي كلش
ويتحملها لانه يعرفها عديمة خبرة وتجربة
لكنه لسبب ما او لاخر قرر يبتعد عنها
مرت الايام وفاضل صحته بدت تتحسن اكثر وبالفعل حملت رحاب منه بطفل
وبشهر الواحد من سنة 95
عزمتهم نورية على خطوبة اسما وانه كلهم لازم يجون
جانت الحفلة مجرد اهله يجون يلبسوها الحلقات والذهب
خطوبة عائلية اختصرت عل الاهل فقط
الخطوبة تمت بعدفترة طويله من الاخذ والجر
وتدخل بدرية حتى تساعد اسما باختيارها
اسما الي حجت لاول مرة بكلبها
---خالة من جنت صغيرة جنت دائما اشوف نفسي انسانة محظوظة وسعيدة
الله انطاني كلشي واي شي يحلم بيه اي انسان او تحلم بيه اي بنية
انطاني اهل يحبوني ويخافون عليه
جنت طول عمري البنية الوحيدة المدلـله من امي وابويه
احلم وتتنفذ احلامي
وحتى من ردت اكمل دراسه
دخلت الكلية الي احبها واحلم بيها والشكل الجميل الحسن الي يحسدوني عليه
ومع ذلك اخذ مني قلبي
واحساسي بالدنيا
صار كل همي اراقب عبد الكريم
شيسوي وشلون عايش سعيد لو لا
اطلع من المستشفى مرات اروح للمستشفى الي يشتغل بيها
بلكت اصادفه يطلع
لو اروح للصيدلية مالته الي يشتغل بيها
واظل اراقبه من بعيد
وياويلياوووف وكامت تشهك وهي تحجي
من اشوف بته وياه مرات يجيبها اموت من القهر
اي خالة اموت من القهر اكول شلون شلون يكدر ينام ويه مرته
ويبوسها وهو الي جان يحلفلي اغلظ الايمان ماكو احد غيري في باله
---انت مو كلتي كلج اخطبج
ليش مقبلتي
---خالة زوجة ثانية!!
اني اسمهان زوجة ثانية لييييش!!
سكتت بدرية وكلتلها يمه الي يريد شي يعوف اشياء
مدام ماتكدرين تكونين زوجة ثانية انت هم لازم تشوفين حياتج
وتزوجين وتجيبين الجهال الحلوين الي حينسوج ابو عبد الكريم
ومرت فترة طويله يله قررت اسما الموافقة على الخطيب
و قبلت ترتبط بحكمت
الطبيب الي يسكن المانيا من سنسن هواية
وصارت الحفلة
وراحت ميلاد
بالذات بهاي الحفلة طلعت كلش حلوة وتخبل
لبست كوستم قميص كريمي وبيه كركوشه من كدام لونها بنفسجي محمرالمودة الي جتي كل القمصان كركوشه من كدام والايدين همين
الموديل جان توه نازل وبدى يطلع بالاغاني
وخيطتلها بدرية تنورة قديفة
ولبست جاكيته عليه
لانه جانت باردة بذيج الايام
جان صارلهم فترة متزاعلين هي وسامي
ورادت تغوره انه خسر جمالها الرهيب ويرجعلها نادما
لكن الي حصل انه اصلا مكان موجود ولافكر حتى يجي يشوفها !!
ورجعت ميلاد بخفي حنين
ماعرفت ليش هو هيجي فجاءة تغير عليها
ومصار حتى يطيق يشوفها!!
وبالهسنة السنة الثانية من كليتها هي صارت بشعبة ثانية
الشعبة نفسها الي بيها بنية اسمها فرقد كرايب لهيب
وشويه شويه اتقربت منها وصادقتها
فرقد جانت بنية كلش لطيفة وناسكة
ومالها اي اهتمام بلهيب حتى سلام ماتسلم عليه عكس تفكير ميلاد انه حتعرفها عليه
مع ذلك صاروا كلش صديقات
فرقد كانت قليلة الذكاء بالدراسه
ملتهية بشكلها الخارجي اكثر من اي شي
وجانت تعتمد على الواسطات والهدايا بالنجاح
لكن محد ينكر انه كانت انسانة لطيفة ومحبوبة وعدها معجبين هواية
مع ذلك هي جانت على علاقة بشخص واحد فقط
وتحبه من قبل تلاث سنوات ايام مجانت بصف سادس اعدادي
واهلها كانوا من الطبقة الراقية كلش
كل الامور الي جانت تحلم بيها ميلاد جانت تشوفها بصديقتها
فرقد كانوا خمس اخوات وولد واحد
وابوهم حيل مدللهم حتى اختها هي الي جانت توصلها وبذاك الوكت عدها مرسيدس
وكانت محط انظار معظم طلاب الكلية عليها
وعرفت من خلالها تاريخ لهيب السيئ
الي خلاها تنسى موضوع واتحولت شوية شوية ال شمس الدين والبنات شجعوها انه ولد فقيروحباب وهذا هو الي يتزوجها
لانه اهم شي لازم تتزوج قبل ماتتخرج
والا تظل طول عمرها بلازواج!!
هي ساعتها مافكرت بالزواج منه يعني من شمس الدين بالذات
او يمكن جانت خالته احتياط
لكن على الاقل منظر كدام صديقاتها الي كل وحده منهن عدها معجبين وتلاثه
وفي خضم هذه الايام هي لحظة مانست سامي
وكامت تحن اله كلش وترجع تتصل بيه
يشيله ويسده بوجهها
ترجع مقهورة وضايجة ومن تلح هواية يفصل التلفون
ظلت محتارة ماتعرف شتسوي حتى فكرت انه تروحله للمحل تعتذر منه وتتساف
لكن هي انصدمت بموضوع ثاني
موضوع خطوبته من بنية ثانية !!!
اثناء دوام عهود بمدرستها الجديدة
المدرسة جانت اقصى شرق بغداد
والمسافة بعيدة وتركبلها اكثر من فورت يله توصل
وصدفت هناك واتعرفت على سهير مدرسة وياها
هم كانت متعينة جديد
بنية متزوجة ابن خالتها وكاعدة ويه بيت عيالها بنفس منطقة بيت اهل عهود
لذلك اتقاربوا كلش
وصارن صديقات يروحن ويجن سوى
حتى لو وحده بيهن ماعدها حصة من الصبح تطله ويه صاحبتها حتى لاتروح وحدها وهكذا بكلشي سوا
جانن يطلعن سوى ويرجعن سوا تكسي او نفرات
ومنها عرفت سهير قصة عهود عكس الي تحجيه كدام المعلمات والمدرسات
عهود جانت دائما تكول عن نفسها انه هي مكطوعة مهر وزوجها تاسر
وناس تكللها يمعودة اطلكي واتزوجي وناس تكللها شريفة ابقي انتظريه
هي بكل الاحول سواء جانت مطلقة ام لا
ابدا ماتفكر بالارتباط باي شخص
بس مرات جانت تتذكر ابو الاتحاد وتنقهرعلى معاملتها السيشة اله
اتاريه جان يسجلها حضور ومرفعها بالحزب
لذلك من زهير سوالها النقلة شفعلها انه كانت نصير متقدم مع انه عمرها محاضرة اي اجتماع حزبي بس تدفع الاشتراك
وحتى بهذه المدرسة استمرت تدفعه
وهو اصلا جان شي اجباري كل المعلمات والمدرسات يكونون بالحزب
وبدت صديقتها تحجيلها عن اختها مها
مواليد 69
متخرجة من معهد وتشتغل بشركة التامين العراقية
مها جانت اكبر من سهير
وكلش فرحت من سمعت عهود عدها ابن عمتها يريد يتزوج
ظلت تتوسل بيها تسويلها الشغلة
لانه البنية دتكبر ومحد ديتقدملها
ووين اكو زواج اصلا !!
فتحت عهود الموضوع ويه امها
وخابرت رحاب وحجتلها
فكرة منهم انه يخلصون ميلاد من سامي
وبالفعل اتفقوا الثلاثة
يزوجون هذه البنية لسامي
والبنية ماصدكت
كلش كيفت لا اصلا طارت من الفرح
واهلها من اول روحه وافقوا
نورية مجانت مقتنعة كلش
حتى عيبت عليها كالت بس خشم وورك
بس كون زواج اسما صار قريب
مرادت تبقى وحدها
ومن شافها سامي هم ماقبل بيها راسا شويه اتردد
يس لانه جان تعبان وضايج كال لامه الي ظلت تلح عليه
شتوسين سوي
وبالفعل اول خميس ورة ماخلصت الامتحانات
فاجاوا ميلاد انه حضري نفسج اليوم خطوبة سامي!!
كامت تبجي ميلاد وهي تصيح ليييش لييش
ليش اني مااعرف ليش محد كلي
ليش سويتوها من ورايه
ضربتها راشدي فخرية سطرها سطر
كالتها كتمي صوتج
لو سعد يعرف جان شك حلكج
وماقبلت تروح ودكت رجل ومراحت
ظلت بالبيت تبجي وتدعي على عهود بعد ماعرفت انه هي الي رتبت موضوع الخطوبه هذا
وراحن للحفله
مها جانت كصيرة بكصر عهود بس وركها اعرض
جان وجهها مثلث عيونها كبار بيها شبه من انغام بس شفايفها رفاع
مجانت لاعاجبة سامي ولاامه
بس هي ماصدكت من كللها انت فصلي واني البس
كالت خلاص اهم شي ام بيت وادير بالها علينا
الحفلة جانت طبقية كلش
اهل مها جانوا اقل ماديا من اهل سامي
جانوا جايين وجايبين كومة جهال وياهم
هجموا البيت هجم بوكحاتهم
والهوسة والصياح والعياط يفتحون الثلاجة ويلعبون بالغراض
وجيتوا على الكيكة حتى قبل مايتنكص
والامهات يسحلون بيهم وكتل وبجي
شي موحلو ابد
انزعجوا منها الكل وظلت رحاب تلوم عهود على هذا الاختيار
وحست بداخلها لسبب ما مراح تدوم هاي الخطوبة
اصلا سامي عافهم على النص وكام
واسما ماتحركت من مكانها ظلت كاعدة وعاقجة شكلها وبودها تخنك عهود على هاي الدكة
همزين ماجتي ميلاد كالت ويه نفسها عهود
الي ثاني يوم ظلت تعاتب سهير على تصرف اهلها
وظلت الاخيرة تتعذر منها وتكلها والله اهلي موهيجي هذوله بيت عمتي وين مانروح يخزونا !!
بعدها باسبوعين اتزوجت نور
جانت زواجتها المسكينة تطبيق المثل كبعوها واخذوها
مع انه فاضل جان رافض الولد وماقبل ابدا ينطيها
بس للاسف هو ماله حكم عليها
الشخص كان ابن خالها
وخلاص خالها هو الي يحكمها
وفرغ البيت مرة لخ على رحاب
وصار الحمل كله عليها مرة لخ
بجت عليها بجي موطبيعي من اتزوجت مو لانه جانت بس تساعدها
بس البنية جانت فقيرة كلش
ومثل النسمة محد يحس حتى بوجودها والجهال تعلقوا بيها اكثر من اهل رحاب نفسه او حتى اهل فاضل
وحتى نور الهدى هم اتاذت وتوسلت بفاضل انه مايقبل بزواجها
مجانت تريد بيت خالها ابد
ورجعت رحاب وحدها
من اتمرض زوجها مكام يروح للشغل هواية ولاصارت رحاب تجي لاهلها
منا هي حامل وبدت تثكل ومنا الجهال وخصوصا التوأم
التهت بيهم حيل
فكامت فخرية تركض ورة الحصة بعد مجانت معتمدة على بتها توفرلها كلشي
طلعت من الصبح وجانت باردة حيل
جرت عدها عربانه صغيرة هم هي علاكة هم بيها جروخ قديمة ومشكوكه من صفح
تجيب بيها نص الغراض والبقية عود شوف منو يمرعليها يجيبهن
ومن كملت دتحملهن ركضت عليها بنية شابه بعمر عهود تقريبا
لابسة جبة سودة وربطة نيلية قديمة ومحببه
وجواريب سود وشحاطات كلهن طين
اتفاجاءت فخرية وهي تسمع البنية مبتسمة تسالها خاله تريدين اساعدج
مافتهمت فخرية
كلتلها خالة اني بيتنا هنا
اساعدج ادفعلج العربانة وسيطلع منج انعم الله
هنا اطمانت فخرية وكيفت عليها
بس طبعا الفضول مخلاها اكثر من دقيقتين تصبر
كلتلتها وانت شجابرج هيجي تسوين
----خالة العيشة شسوي عندي جهال
---وابوهم وين؟
---يوو قصة طويله خالة اسولفلج
تدفع بالعربانة وتسولف لفخرية ال تموت على هيجي شي
---اني حبيت ابن خالتي من جنت صغيرة بظفاير
ابويه ماقبل ينطيني
كلي فكر ماعدهم ياكلون شلون ازوجج
وهو جان توه لابس عسكري بعده صغير
دكيت رجل وهو هم دك رجل عليه ماخلا
اوووف سوده عليه عليك
---استشهد !!
---لا خالة مفقود ماندري بيه
---وتالي وين عايشة هسه
خلفت منه اثنين جهال ولد وبنية وجنت حامل بشهر السادس اخر ايام الحرب كالو ابنكم مفقود
---يايمة بوكت نزار
ابن اختي هم نفس الوكت بس اسير وصلت منه رسايل
---والله خالة حرام كلشي ماكو اخر شي جابولنا جثة مفحمة كالولي هذا رجلج
رجعت لبيت اهلي اني امي متوفية من زمان واحنى صغار
فرد ابويه واخويه الجبير ومرته
كام اخويه ومرته يتضجورون مني
والله مع انه جنت اشتغله خدامه
بس همه جانوا يعيروني
روحي اخذي البيت والسيارة والراتب من اهله
واني اهله مايريدون جيف اخذني غصبا عنهم
وصارت عركة شكبرها ماينطون خالة مارضوا
هددهم اخوية يشتكي عليهم
واني جنت توني مخلصة العدة مالتي
كالوا خلاص لازم تزوج ابنه الثاني اخوه يعني
---يا عزة وتالي
---وانه ماحبه اموتن منه وهو اصلا يعشك بنيه جانت وياه بالمعهد ورايدها
---وشسويتي
وهنا وصلن لبيت فخرية والبنية كامت تنزل الغراض من العلاكة وتحطهن على الصبة
---شسوي خاله رضيت بيه
وجان يوم اسو شفت الويل خالة مرمطني وشعوطني
والله كتل اني وجهالي يكتلنا ولاتكولين ولد اخو جه يريد ينتقم من عدنا
فلس احمر مايصرف علينا
هاي بطرك الراتب عمتي تقسمه بالنص النا والهم وشيكفي خالة
والله عايشين على الحصة وحتى ماعندي شي ابيعه
وهو ولايمنه
ولايلفي للبيت
رحمة نخلص منه ولو تشوفين ابني الصغير عمره سبع سنين من يشوفه ينهزم ولا صاحه راسا يبول على روحه من الضرب الي ياكله
ظالم الله ينتقم منه
والله خالة والنبي من البارحة مماكلين شي جهالي ماعندي فلوس استلم بيها الحصة اريد بس اشتري طماطية الفها الهم بالخبز كلشي اشتغل حتى بالبيوت اشتغل
بس في سبيل لايكول كعدي الجهال من المدرسة وخلي يشتغلون
كامت تبجي
وفخرية تبجي وراها وتشهك كلبها احترك على جهالها
واتخيلت حالهم بهالبرد لانفط ولاصوبه وانوبه لا اكل !!
شالت وانطتها الف ربع وكلتلها واللي ماعندي غيرهن روحي كولي لابو الجمعية عليه حسابج اني ادفعه باجر وباجر تعاليلي اطلعلج هدوم عندي للجهال اخذيهن
رادت تبوس ايدها البنية من سمعت هالحجي
وصاحتها كلتلها انت شسمج
---اسمي صابرين خاله ام مصطفى
---تعالي
وشالن شكو اكل بالثلاجة بايت خلته بماعون فافون جبير ونطته الها
ماطابخة بعدني سودة عليه كسرتي كلبي
هاج هاي هم بيضتين
هم اكو هيجي عالم وهيجي قسوة !!
ومن يومها صابرين تجي تعاون فخرية الصبح بالبيت
وفخرية تناوشها اكل وفلوس وحتى نفط هماتين
وبنص شهر الثالث من نفس السنة
كعدت رحاب على صياح وعياط فاضل
