اين ياترى تذهب الزهور عندما تذبل وتموت
اين يختفي عطرها وماحملته من ذكرياتنا معها
من اين اتي بالرثاء كي اكتب عن من اختفوا ...
بوحشية وسط هذا العالم المخيف!!
كانت السماء تمطر سوادا
حتى انها غطت الكثير من الابنية والعمارات
وتلونت بلون اسود قاتم ملوث
هذا كان نتيجة حرق ابار النفط الكويت فدخانها وصل الى بغداد رغم وجود مسافة 651 كم بينهم
بذاك الصباح جانت نورية وبتها وصلوا من الغبشة
ممصدكة عيونها تتكحل بشوفة سامي
وظلت نايمة يم رجليه
كل شويه تكوم تباوع عليه وترجع تنام
وعيونها ماتعرف تبجي شكر لله رجعلها ابنها سالم
لو تبجي على حاله المسكين
جنه راجع من الموت
هو جان بعده ممدد على الكاع مقبل ينام على جربايته
و بتراكسوده البيجي ,داير وجهه على الحايط وحاضن نفسه حيل مايعرف هو نفسه ليش هيجي خايف
حتى من جان يكعد يظل ساعات صافن على الحايط ماايندار
بجسمه الي مليان جروح
وبرجليه الوارمه اللي حتى مايكدر يدخلها تكرمون بنعال
جان يعيد ويتذكر الاحداث الي مرت عليه
ويسال نفسه شلون اني عايش لحد الان ؟
هذا اللي صار حلم علم واق لوكابوس ؟
جانت تقريبا ساعة تسعة ونص الصبح
نزلت اسما من يمهم دتسوي ريوك ونورية ظلت تفرك برجلين ابنها وتحمد الله وتندعيه انه يحفظه
اندكت الباب وكعادته زهير سحل رجليه كوة واتمشى يروح يفتحه ملفلف ركبته باليشماغ وجكارته بحلكه وهو يصيح منو منو
والطارق يجاوب اني اني
ضاج زهير وكام يدردم اي اعرف انت انت لعد قابل خيالك غير تكول منو انت شمعرفني هاي الاني مال منو؟
فتح الباب وجان المطر كلش قوي
من سلم عليه ووكف بالباب ركضت اسما تريد تعرف ضاحب هذا الصوت الغريب منو
مدت نورية راسها من شباك غرفة سامي وشافت سيارة بيضا واكفة و كاعد بيها واحد
ساعتها كام سامي وحضن امه مرة لخ وظل يبوس ايدها ويطمنها ويهديها
زهير من سمع كلام الضيف اللي رفض انه يدخل جوة ويتضايف
ظلت عيونه تتداور مايعرف شيحجي
بس اسما انهارت وركضت ورة ابوها اول ماسد الباب
---بابا هذا صدك ديحجي اخاف جذاب هذا ,بابا صدك ؟
زهير لزم بنته وهداها انه نورية تعبانة وملازم تعرف انه هذا الرجال جاي من طرف اهل طالب رجل زهوري
ديبلغهم بخبر وصلهم من النجف انه العائلة ماهي صارلها اسبوع
وعلى الاكثر ماتوا
كامت تبجي اسما وتلطم على خدودها بحركة وبسكوت
كعد زهير على القنفة وهو صافن وحاير شلون حيكول لنورية
وشراح يصير بيها
وشويه هي نزلت على السريع تستعجل اسما تسوي الريوك لاخوها خطية جوعان
ومانتبهت على عيون بتها الغوركة بالدمع بس جانت فرحانة ابنها رجعلها بسلامة
ركضت على التلفون وهي تحجي ويه رجلها
---دخابر زهوري بلكت رجعت الخطوط اطمنها على سامي هسه سودة عليه كاتلها القلق عليه
ماتدري شكد خابرتني قبل مانطلع ويه بيت ابو غازي ...
وظلت تحاول تحصل خط ماكو
سدته وراحت على رجلها الي جانت خلقته مكلوبة وصافن عليها
---متكولي شبيك هيجي ضايج وخلقتك مكلوبة هاي ابدال ماتفرح ابنك رجع النا الف الحمد لله والشكر
حضر نفسك وشوف اذا عندك بنزين لا ؟
لازم اروح اشوف اختي
مااعرف شخبارها
لا هي اللي خابرت ولا اني اعرف اخبارها من هاي صارلي فوك العشر ايام
بس كالت ام طالب مريضة
شبيك يارجال مو دااحجي وياك
---مابيه شي وورث جكارة لخ
--ماعرف اخبار فخرية وجهالها شلونهم والله هم كلبي اكلني عليهم
---فخرية بقت بالعامرية يم رحاب وجهالها والبقية بعدهم بيت صديق علاء هاليومين يرجعون ابو غازي كلي
---اي كالوا النسوان من جنا بالمزرعة
كالولي رحاب صارلها توأم ولد واحد بيهم صحته مو شي
يمكن ناعم لو نموه مكملان
جان المفروض يبقوا بالخدج ومايطلونه ....
شوف المطر شلون اسود سبحان الله غركنا بيه
الله يساعد الاودام اللي بالخيم
زهيرلو ندري شكد عالم جانت نايمة بالشوارع لو تدري
ظلت تسولف ويه رجلها وهي تحضر ميز الطعام
ورجلها مايعرف شيجاوب بين الاي والصدك
وصعدت ركض اسما ودت الريوك لاخوها
وهناك حجتله كلشي
من صعدتلهم امهم مرة لخ
انتبهت على سامي حزين كلش مدنك راسه ويمسح بلحيته الي اول مرة يطولها هشكل
ومبين على اسما جانت غركانة بدموعها
من سالتها امها شبيك شصاير؟
مجاوبت
طلعت من الغرفة ونورية مندهشه لتصرفاتهم هاي شبيكم ؟
سامي لزم ايد امه وكعدها
وهي لونها مخطوف عرفت صاير شي
وانه سامي حيحجيلها شغلة تبجي
واول ماعرفت كامت تصيح وتعيط تركض على الدرج وتصيح على زهير
نورية الي جانت تنزل باية باية شبختهن شبخ لما وصلت لزهير وهي تشك هدومها
وتصيح على رجلها
---ولك زهيير هاي صدك يحجون جهالك
ولك زهير ليش ماكلتلي
ليش زهوري الا زهوري ليش؟
ومنو كال صدك
هسه هسه نروح للنجف
همه مو راحوا للنجف ومارجعوا هسه نروح
يجوز اهل طالب مايعرفون
يجوز ماحد دور وراهم
وجهالها وين ؟
جهالها زهير وينهم؟
سامي جان يسمع فوك ويشهك هم على خالته وهم على صراخ امه
شلون محنة هذه
وشلون ايام !!
حاول زهير يهدا نورية لكن ماكو فايدة
هو اصلا مايعرف شيسوي
ولايعرف شيكول
وشلون يقنعها وهو نفسه مايعرف شلون صارت الامور هشكل ومنين جتيهم هاي الطامة
ماكو قبل الظهرية حرك سيارته وراحوا هو ونورية لبيت اخو طالب بالعطيفية القريبين على بيت زهوري
وهناك افتهموا السالفة انه من رايحين لكربلاء وشايفين الحالة الماساويه مباقين
بوجههم طالعين للنجف بس مجرد عايفين خبر انه رايحين هناك
كون النجف هدات على اساس قبل كربلاء وماكو شي
الاشاعات والاقاويل طمنتهم انه يروحون هناك ويبقون يم كرابتهم الى ان يرجعون لبغداد
ومحد يعرف شصاير وياهم هناك
بس اخر مرة واحد من كرابتهم شافهم يروحون ويه اللي راحوا لفندق دار السلام
ورة كم يوم بدوا اهل طالب زوجها يدورون على ولدهم طالب واخوه وجهالهم
اختفوا ويه الي راحوا ومارجعوا ؟
ومع ذلك لساهم يدورون
بس اخت طالب الجبيرة جتي لبغداد وباقية يمهم وهي من دزت خبر بيد ولدها لبيت نورية
شبت النار بالزايد بقلب نورية
عللى الي حجوا
وعلى سمعته
مع ذلك بقى عدها امل انه زهوريوزوجها خاتلين يجوز ببستان يم جماعة لو قرية لة بيت ناس عرف
مثل مسامي جان خاتل
وحاولوا يفهموها انه ماكو هيجي شي
بس مفاد
وبدت تلح على زهير يروح ويسال
وزهير متردد مايعرف لابيه يكول ماروح
ولابيه يطاوعها
وظل يجر وياها انه مو اليوم وباجر الى ان يشوفله حل
بنفس الاسبوع رجعت بعد كل الناس لبيوتها ببغداد
ومن ضمنهم بيت علاء الي بوجههم راحوا لبيت فاضل
علما يرتب وضعية البيت ويكعد اهله بيه
جانت ظهرية ساعة ثنعش وشويه
اندكت الباب وانتبهت فخرية وهي كاعدة تخبز هاي السيارة لاندكروزمالة اخوها
يمه صاحت يمه بويه الحمد لله هاي انتو علاء
وعاطت يمه مااصدك توني جنت ابجي واندعي ربي يرجعكم بسلامة
كل هالصياح
وهي لحد الان الباب مامفتوحة
اول مافتح الباب علاء جيتت عليه فخرية وغركته بدموعها تبوس بيه وتشمشمه
يمه يابعد ريحة امي وابويه
يمه رحت فدوة لطولك
وركضت عليها ميلاد
وعهود ...
وهنه يبجن عهود جانت خايفة انه تموت بعيدة عن امها
لو يصير عليهم شي
وبدوا يدخلون واحد واحد وميلاد مجلبة بدشداشة امها الكلها عجين وطحين
يمه والله اشتاقيت اشم ريحتج
عفية لاتعوفينا بعد
وفخرية هي الي ركضت على سعودي اللي جان ينزل الغراض من السيارة
وصاحتله ولك تعال ماتريد امك
ماشتاقيتلها؟
راح عليها خجلان وظلت هي تبوس بيه وتبجي ممصدكة عيونها اتكحلت بشوفتهم
استقبلتهم بيبة فاضل وامه احسن ما يكون وانصب الغدا والتموا كلهم
شويه ردت روحها لرحاب وكامت تضحك وتتشاقة وياهم وعيون امها عليها
الي يشوفها جان يخترع من شكلها المصفر وذبولها
جانت الليل كله تبجي تخاف بيتهم ينقصف ويموتون جهالها كدامها
جانت تعيش شكو حالة درامية شافتها لو قاريه عنها
راحت تمشي على كيفها والجهال يجيتون عليها ويركضون يشوفون التوأم
اول مرة تصير بعائلتهم يولد الهم توأم
بشار مبين اكبر من عمار بشي شهرين رحاب
واني زعلانة عليج مو دزيتلج خبر لاتسميه بشار حتى لايضحكون عليه مثل حالي
جانت ميلاد تحاجي اختها وهي لازكة بالجهال وعبوسي بحضن عهود
قريب المغربية
مر عليهم ابو غازي وكلش فرح برجعة علاء
وهناك بلغه بخبر زهوري
فخرية جانت دتسنط عليهم من شافت شكل علاء شلون اتجهم
وهي تسمع بين مصدكة وبين مامصدكة
معقولة يارربي هاي زهوري زهورتنا هيجي تروح من ايدينا!!
تبجي عليها وتكول منو الي يروح يركض يسال وراها شو لا ام لا اب لا اخ
همزين ماتت عمتي ومشافت هذا الضيم
على الاقل الله يرحمه كاطع من مات عرفناه ميت ودفناه بايدينا
الا هاي المكرودة صخام بوجهي شمعرفنا وين هي
كون عايشة وخاتلة
لو سودة عليه بالحجز
لو مثل مايكولون اسم الله عليها
راحت
ظلت فخرية تنظف بالمطبخ وتنعي على زهوره بس بصوت ناصي والدمع يجري
بدرية هداتها وقرروا انه يظل الموضوع بين النسوان الكبار بس
خافوا على رحاب لايصير بيها شي من تسمع بعمتها
بس ثاني يوم الصبح الكل عرفوا عداها رحاب
واجى ابو فاضل جايب عائلته لبغداد ورجع زوجته وياه
خطية ماقصرت وياهم ومن طلعت عافت شدة فلوس بيد ابنها وراحت
هي هم عدها بيتها
بس البنية الصغيرة ربيبة بيبيته فطومة بقت يمها بيت فاضل
وبدت تتعرف على البنات هي جانت بكبر قيم
وعلى الظهرية اندكت الباب على عجل
الدكة جانت مال واحد مفجوع
صاحت امل سترك ربي هاي منو
ركض علاء وفاضل يشوفون شصاير
فاضل جان خايف انه اهله صايرلهم شي بالطريق فخطية جان هو اول من ركض بعربانته ويصيح منو
واذا هي نورية تصارخ
فخرية لحكيلي زهورة راحت من ايدينا
راحت اختي مني فخررررية
وكعت على علاء
اني اريدها منكم اخوية انت
اني بشاربك علاء ماعندي احد بس الله وانتوا
واندارت على فاضل اروح فدوة لشبابك
اريد اختي محد يندلها
انتوا مو عدكم اهل بالنجف
اخذوا زهير وروحوا سالوا على اختي
اريدها منكم
اروح فدوة الكم
كعدت بنص الطرمة كامت تبجي وتلطم على وجهها التموا عليها البنات
وفخرية واكفة بصفها وعينها على شباك الصالة وين نايمة رحاب
وترادد لا لا خافت بتها تسمع
حضنتها عهود ووبدرية وحاولن يهدوها ويطببنها جوة ماقبلت اندارت على عهود تريد تبوس ايدها
اني اذيتكم يمه اني اذيتكم سامحوني
بس رجعولي اختي
لاتعوفوها هاي عمتكم الصغيرة وعمرها مااذت احد منكم
فخرية اذيتكم اني مو؟
مسحيها بيه خيتي اروح فدوة لجهالج سامحوني ودزي علاء يدور عليها
هاي مو هي زهوري عمتكم
عمتكم من عمت عيني عليها
الي عمرها ماذت احد ولا سمعت احد حجاية
من سودة بوجهي عليج زهورة
الله اللي يعلم وانتوا تعرفون مالي غيرها بهالدنيا
فدوة اروحلكم لاتخلوها بحالها هناك
كامن البنات يبجن على بجيها ومسحت بدرية وجهها بشويه مي حتى تهدى وهي تتوسل انه يروحون يدورون على اختها
---لا تكولين هيجي ام سامي شلون ماعدكم احد احنى وين رحنا
من راس باجر نروح اني وفاضل نجيبها ونجي ظل يردد هالحجاية علاء عليها وهي مجلبة ببنطلونه
---اروح فدوة الكم جيبولي اختي
بعد مابيه راح اموت عليها
فخرية الجهال امني ومحمود يكولون ووياها
---لطمت فخرية على صدرية يايمه سودة بوجهي
ليش ماخذتهم وياها ماحد كالنا يبوووو
كعدت فخرية بدال ماتصبرها كابلتها وكامت تلطم
وحتى ام منة دخلت عليهم مفزوعة من الصياح والعياط
عرفت صاير شي
ام منة سريعة الدمعة ظلت تحضن فخرية وتحاو تسكتها واذا هي هم تبجي وياهم
جرتها بدرية وطببتها جوة كوة وامل وعهود شالن نورية وديطبووها جوة وكابلن رحاب شايله عمار على جتفها
من شافتها فخرية مسحت وجهها على السريع
وحضنت بتها وطبتتها جوة
-- كلشي ماكو يمه لايظل بالج
-شبيها عمتي زهوري يمه
---مابيه شي امي انت
هي خاتلة ببستان ومايعرفون طريقها لساهم
انت ترضعين امي
موزين عليج القهر يله امي طبي جوة
وبالفعل اتفقوا الرياجيل تلاثتهم يروحون بوجههم من الغبشة للنجف ويسالون هناك
مع انه علاء راد فاضل يبقى يم النسوان بس الاخير ماقبل وصقت يعوفون الولد سمير وسعد كريم على اعتبارهم رياجيل البيت هسه بعد
وبالفعل انطلقوا ساعة ستة الصبح ولما وصلوا
كان المنظر مخيف
فقط النساء ملتحفات بالعباءة السودة يمشون وعيونهم تراقب بحذر وخوف ورعب من يروح ويجي
كانت خطواتهم سريعة تريد فقط ان توصل للمكان المنشود
كانه خلفهم من يطاردهم
والى ان وصلوا لمرقد الامام علي
بعد كمية الخراب الي شافوها بالشوارع
كان هناك بعض الزوار متواجدين داير مداير الحرم وفي داخل المرقد
هناك كان
الهدوء غريب
وحركة بطيئة
قلقة ومرتبكة وخايفة
والكل يراقب الكل خوفا منه
محد صار يعرف العدو من الصديق
وبدا فاضل يسال ويروح على واحد واحد من اقاربه
بعضهم بل هواية منهم حالهم حال بيت طالب
راحوا ومارجعوا
وبعضهم لايزال بالحجز
وبعضهم دفنوا مواتاهم بالقرب من المقابر الي تم قصفها بالطائرات
