فسيفساء ايامنا
هي كذلك ايامنا
نرتبها كقطع الفيسفساء ونختار الاجمل منها والاكثراشراقا
نختار تلك الالوان البراقه حتى نرتب لوحات حياتنا ونظهرها للعالم
نعم هي كالفسيفساء متفرقة ومقطعة لايعلم احد كم امضينا من الوقت ونحن نقوم بجمعها
وصقلها وترتيبها
حتى يرى الاخرون كم نحن سعداء
كم نحن مترفين
ومبتسمين
نصور تلك اللوحات باجمل مايكون
نقتطف تلك اللحظات الثمينة
نسرقها من الزمن ونضعها في اطار للناظرين
فياتي الاخرون حاسدين
كم هي رائعة حياتكم !
اتصدقون !!
نعم هي كذلك كما نريدكم ان ترون
وفي لحظة غضب
نحطم تلك اللوحة
وماامضيناه عليها من وقت ونحن نستجمع كل تلك الذكريات
حاولت ان احذف الكثير منها ..
او اقلب بعض قطعها المربعة الصغيرة لعل ايامي تتغير...
لم ينجح الامر طويلا فكل طريق ذهبت فيه تهت بين ثناياه
دهاليز متقاطعة
كاحجية لم استطع فك رموزها يوما ...تلك هي حياتي...
رحاب
بخطف البصر مرت لحظات سريعة وفاضل يقلب بصره بالرسالة
انتبهت عليه نور وانقضت عليه مثل قطة بسرعة خطفت الرسالة حطتها بصدرها وانهزمت ...
ظل فاضل مشدوه وصامت الحركة...
ركضت على رحاب للمطبخ وهي تلهث شكشكت الرسالة ونكعتها بالمي حيل وذبتها وخبطتها بالزبل مال سنك ..
اجى فاضل وعيونه معصبة نار...
كامت ترجف نور من الخوف وهي تلف دشداتها على روحها حيل بلا متحس على روحها...
والحسين
--- فاضل هاي شغلة قديمة ...
ماحجى بس جان يقترب منها
ورحاب اتبلعمت تكله شكو شصاير ...كانه ماتعرف
___ احجي هاي شنو
والله العظيم قديمة
___ احجي
ايام ايام وروح امي
ايام الكاظمية
قبل قبل زواجي ولد
اب
اي !! لججج احجيييي
ابمنطقتنا مرة انطالياها هاي الرسالة
وضميتها نسيتها
___ اتجذبين عليه نور
لج اني الي مربيج تسوين علاقة يا ادبسز علاقة ويه ولد يقشمر عليج ويضحك عليج وعليه
----والله توبت فاضل والقران قديمة
والنبي لاتزعل مني
والله التوبه
التوبه بعد
صيح وصرخ وزأر حتى الجهال فزوا وركضوا على امهم من خوفتهم
فاضل الانسان الهادئ الوديع ...
الي حتى من يعصب يعوف البيت ويطلع
لو يركض بكرسيه المتحرك يروح يتوضى
شمر المزهرية الي على ميز الطعام بالكاع وصيح على نور تريدين تنزلين راااااااسي
لج مو اني مربيج بيديه هاي تاليتها
احترك البيت ساعتها ...
احترك بمعنى الكلمة صراخ فاضل الي وصل للجيران وتكسيرة الغراض ورحاب تحاول تهديه وهي ترجف ركض لزم الماسحة وراد يضربها انهزمت وصعدت للسطح
كام يغلط على نفسه انه معوق ومايكدر يصعدلها
وانه الله منعه حتى يعيش حياته
حياة عادية مثل كل البشر
اتمنى الموت ولا في يوم يعيش هذه اللحظة ويحس بهذا العجز
ولا في يوم احد يتهمه او يذبله حجاية بشرفه
هبطت رحاب ومن خوفتها كامت تتقيا وانخطف لونها
وهي تحاول تهدي بالزايد يعصب
ونور تلطم و تبجي
مو خوفا منه جانت خايفة عليه من شافته يضرب على راسه
هو جان مقهورانه معوق وعاجز حتى عن تربية اخته
نزلت ركض ووكعت جوة رجليه بصف العربانة وهي تبجي املخه نفسها وكلتله اذبحني بيدك بس لايصير بيك شي من وراية
فدوة اروحلك لاتعصب
اخاف عليك اني
باوع عليها ودمارات عيونه كلها طفرت وين جنت تتواعدين وييين
من ورة بيبتي ؟
وين تتواعدين وياه احجي
وين بس كولي وين
و من شوكت انت تعرفين هيجي تكتبين!!! من شوكت نوره
صارلج جم سنة ليش مااجى واخذج
حلفلتله انه هذه الشغلة كلها جانت قبل الزواج والله العظيم وروح ابويه
لا تحلفين كااافي
عافهم وركع باب الصالة بيده
بقى شويه خابر على احد اجى عليه ورة شي ربع ساعة
وطلع حتى مايعرفون وين راح
الربع ساعة جانت رحاب تهدي الجهال وعبوسي مخروع يباوع على نور بخزرة
جان عمره 9 سنوات بس الي يشوف تصرفاته يحسه اكبر من عمره
لمت الجهال رحاب ولمت نور واخذتها بوجهها لبيت ام فاضل عمتها تبات ليلة هناك لحد ماتشوف شلون تصير
بالطريق جانت نور تمسح بعيونها
وتتخيل وجه فاضل
ورحاب تشاركها البجي اندارت عليها
--ليش كلتي مالتج اراساله ليش كلتي هاي الج
باوعت نور من الشباك من الجهة الثانية
الشوارع تمر خطف تماما مثل ايام حياتها
كالت وبعبرة مخنوكة
هي حياتي خربانه خربانه اشفت اني
ليش انت تتاذين!!
وشيريد يسولي فاضل
يطردني هه على اساس اني عندي بيت ورجال ساتر عليه اخاف من الفضيحة
يمعوده شيصير خلي يصير
---لا مااعتقد فاضل يسوي شي
تره كلبه طيب وحنين
-- زين انت ليش بقيتي هذه الرساله باللعابة مو كلتي شلتهن
---والله شلتهم مااعرف هاي جانت محشورة يمكن
سوالف عمار اني اعرفه
---نور اندارت على عمار وكلتله ها عمار ابو دم الحار هاي كله من وراك
كام يضحك مايعرف شنو السالفه
باوعت نور على رحاب وهي تسوق وصافنه وتايهه نظراتها
----انت ليش محتفظة بيهن لحد الان
معقولة بعدج تحبيه؟
سكتت رحاب شويه وويه لوفه الستيرن راحت عينها بعيد الى ابعد نقطة بالشارع
هي مو مسالة حب نور
هي ذكرى
مااعرف احس ذيج الايام مجانت حقيقة مثل ايامنا هذه
جانت مو ايام لا مثل لحظات خطفتها من قصة خيالية عشتها
واحب احتفظ بذكرياتها
يعني
اندارت وهي مبتسمة
مثل ما محتفظة بدفتر مذكراتي مال متوسطة جنطتي مال اعدادية كتبي القديمة
ذكرى مجرد ذكرى
---اي اني مااعرف هاي الاشياء
ماعندي غير ذكرياتي ويه بيبيتي الله يرحمه جانت البيت الي لامني والحضن الي من دفيني من ماتت صدك حسيت باليتم
بيبي الف رحمة ونور عليج
صيحت نور
وهي تحاول وتجاهد ان توقف سيل الدموع
جانت تكول لرحاب تدرين من جنت صغيرة
واسمع فطومة ورقية يتحاجون بيناتهن
ويحجن عن الحب والهدايا والزواج
جنت احس نفسي الخدامة بين الاميرات
وفي يوم حتحول لسندريلا
كون اني هم يتيمة ماعندي احد
وتاليها مانلت غير الجريدي الي يدفع بعربانة سندريلا حتى من يتحول يصير ادمي يصير سايس اعمى
ههه والله يالله
فكر هههه
ابتسمت رحاب وضلت وحده ورةه اللخ تزيد الضحكة لحد ماكاموا يضحكون وكالتلها رحاب عمرها ماتنسى وكفتها هذه
وانه هي انقذت زواجها وفاضل هم خطية جان كلش اتاذى اذا عرف هذه الرسايل الها
بس فكرج صدك الرسالة مالتج
---شمعرفني مااعرف والله شيصير خلي يصير
من وصلوا لبيت ام فاضل
مجان اكو احد بالبيت رايحين ويه رقية للولادة جانت تطلك
فعافتها هناك ووعدتها تجيها من الصبح تاخذها علمود ماتبقى ويه حيدر وحدها
ومن رجعت للبيت شافت فاضل راجع ولاف روحه ونايم بالصالة
جانت بعدها حارة جابت البنكة العمودية ام البروانات البيجية والقاعدة العريضة كوة تنشال وحطتها كباله
عرفت من الحلاوة بالمطبخ رايح للكاظم وشوف منو مشتريها اله
ثاني يوم من الصبح كعدت على صوته
جانت ساعة ستة هيجي شي
بوسته وحصنته
جان بعده مصفر
اندكت الباب وطلع هادي جايين يروحون لكربلاء اليوم جمعة
حضنها وراضاها
بس ماحجى هواية
كلتله اروح لبيت اهلي تجي عليه من ترجع
هز راسه بالايجاب وراح
كالتله انت غضبان عليه
جاوبها بصوت مبحوح اعوذ بالله بابا موزين هالحجي
وانت مالج دخل بالموضوع
وهنا اندار
وكلها مو رحاب!!
اهتزت هزة عنيفة من فوك ليجوة
واخرست كلمة مانطقت
عزة هذا شنو يقصد
بس لا عرف هذه مالتي
هزت راسها وهو اصلا مشافها عافها وراح
راسا خلت الجهال وهمه نايمين بالسيارة
ووعمار يدردم عليها
يومية رايحين جايين نريد انام احنى
طلعت راحت اخذت نور وعدل لبيت اهلها
جانت الكهرباء مكطوعة بيت اهلها
صعدن عباس وكمز طب بالبيت حتى يفتح باب الكراج
كللهم مقفولة الباب بالقفل والزنجيل
وكام يصيح
بيبي فخرية
ميلاد عهوده
وينكم
محد جاوب بس قيم مدت راسها من السطح فاتحة تك عين ومغمضة عين
دخل شاف عهود ممدة على الكاشي بين المطبخ والصالة
خاله ايدها جوه المخدة ولاطشة بالكاع
كلها خالة كومي جنج شهيد وممطول بالساحة
فزت هي وكفشتها
صاح صلوات شنو هالجمال
باعت عليه تك عين مغمضة واللخ كوه فتحتها والعرك منكع الدشداشة داير مداير ركبتها
كامت تلم بشعرها وادور على قراصة بلكت بصفها
كلتله تف عليك من الصبح
ادري شعدكم جاين من الغبشة تعداد عسكري
---كولي لاختج لاحكتها الذيابة
ولج كومي فتحي الباب امي ونور برة يتانوج
نزلت ميلاد جارة مخدتها والجرجف وهي تكمز درجة وتسحل درجة
وهم كوة مفتحه عينها هي بلا كلشي من تكعد من النوم عيونها وارمات
---عهود كومي قيم تكول رحاب بالباب
هاي شعدها جاية من الصبح
شمرت المخدة وانجطلت بصف القنفة بالصالة
كامت عهود ادردم ويه روحها
فكعدت قيم نص ظهرها واصل للكاع ماتكدر تصلب نفسها
شعندج نازله نايمة جوة سالتها لعهود
---طلعت عهود المفتاح وهي تجاوب قيم
الشمس صارت بنص عيني والذبان اكلني اكل
اسمع امج تفشر عليهم هههه
رحاب من شافت خيال عهود تفتر ادور المفتاح
كامت تصيح
يله عاد فتحولي الباب شطلعت هاي
ركضت عهود حافية
وهي تكول شمدريني امج وين حاطه المفاتيح كوة لكيتهن
وفتحته وبوسوها وبوستهم
وهي يمكن تلاث اربع مرات تكول خير خوما اكو شي
من مجاوبوها وطلعوا ليكدام
كام يغرد بشار هو وكرشة يدعبل كدامها
علمود ابويه راد يكتل نور كتل
لزمته عهود ورادت تشيله ماكدرت ثكيل نزلته وظلت تبوس بخدوده
كلتله اي وبعد
--كللها نور يا ادبسزز
--يااا هيجي
عافها وركض
اتمطت عهود وهي تعوج حلكها واني اكول شغلتجن مو خالية من الغبشة هيجي تجن
سمعتها رحاب وغمزتلها ماتحجي
-امي وين؟
امي وبدرية وسعد نايمين بالسطح
انكطعت الكهرباء بالستة وصعدنا
حارة تكتل
شويه السطح بارد واني جنت راشته علمود العجاجة مال البارحة
بس اني نزلت ماتحملت الذبان والشمس
فعلقت قيم صدك نومة السطح تخبل بس لو ما الذبان
----والله اني احسن روحي مصلخة من انام ههه حتى لو اغطي احس العالم كلها تباوع عليه
---لا والله ابد مافد يوم شفنا جوارينا يباوعون علينا
فسالتها عهود كلتلهم تتريكون لو تنتظرون امي ؟
علقت رحاب وهي تغير ملابسها بس ريكي الجهال واحنى ننتظرهم يكعدون
كاموا الجهال يسوون ددوراتهم التفتيشية من يجون لبيت بيبيهم
وشافوا ماعون حلال المشاكل اكلوا الحلويات الي بيه وعافوا الزبيب والحمص
وركض عباس للصالة شاف بلي كام يصيح على ميلاد تكعد كللها سعد وكريم هنا
دفعته برجلها انه عوفني واطلع خليني انام وحطت المخدة فوك راسها واشرتله بيدها اطلع وسد الباب
على الظهرية راحت فخرية وذبحت ديجين كبار وجتي
طلعت نتيجة سعد والحمد لله نجح من الدور الثاني مالت السادس
بعد ماباعت كل الذهب الي عدها وفلوس سلفتين
حتى يطلعن 75 الف للمدرسين الخصوصين وحتى اكثر همين
جان المدرس مال فيزيا بذاك الوكت ياخذ 36 الف
والاحياء 28 الف
وهكذ ا
بس انكليزي جانت رحاب وميلاد يدرسوه
وهو مراح ادبي مايعرف يدرخ
بوكتها رحاب كامت تدرس جهال المنطقة كلهم الي بصف خامس وسادس ابتدائي
بصف ابنها عباس
طبعا ببلاش مو بفلوس
وحتى كاموا ياخون عليها سره
فاضل جان يشجعها من باب الاجر والثواب
في حين المنطقة كلش قدرت هذا الشي وصارت معروفة ست رحاب ام عباس
الي تدرس الجهال ببلاش
ويركضون عليها طلابها من يشوفوها بالشارع
لانه جانت لطيفة وبسيطة وخلكها طويل
يمكن اخر عركة جانت والوحيدة قبل شهرين من شافت
الجهال حاصرين الجلب الي سحكته من جان بعده جرو وكسرت رجله
فشعرت بالذنب من شافته ينوح ويتالم
طردت الجهال وكامت تصيح عليهم واكو واحد بيهم مجاز ظل يشمر عليه حجارة والجلب يان منها
جرته حيل من اذته وكلتله حرام عليك مو هذا نفس وهاي اكثر من مرة انبهك
وراها جتي امه تعاتبها لرحاب على جرة الاذن ومن عرفت السالفة ظلت تتعذر منهم
كامت يوميه بالليل تخلي شكو اكل زايد بطاسة مكسورة ليغاد من باب الكرج يجوين البزازين لو هو نفسه الكلب الي سحكته ياكل ويروح
جتي صابرين ويه فخرية حتى تنظف الديوجة وتطبخهن وياهم
وجابت جهالها شهيد والبنية بس ابنها الجبير جان طالع يشتغل صانع يم ابو الكراج مال تصليح السيارات بالمنطقة الي مقابليهم
ميلاد جانت تتشاقى ويه شهيد تصيحله المرحوم
هو مايحجي بس يبتسم بس عهود جانت تضوج تكللها موزين مو خوش فال عليه خطية
لوما انت متعقدة من اسمج!!
--اسكتي انت اني دااتشاقه وياه
ظلت فخرية ادردم على سعد انه مابقت امام وسيد مزارته حتى
للهاشميات بالحلة رحت وسيد حمد الله وسيد ادريس
والحمزة ابو حزامين وسيد محمد مابقيت والعباس كلهن رحتهن حتى لجامع براثا شلون يرد الروح
وماكو نذر ماسويته شوفي شوفي جانت تاشر لصابرين هذاك الماعون مال حلال المشاكل مبقيته بس هذا بقى البارحة كلهه وزعته
جانت بت صابرين الجبيرة كاعدة بصفه من تشوف محد يباوع والكل ملتهي تاخذ شويه منه على السريع وتحط بحلكها
وتلوكه على كيف
بس امها حست عليها وخزرتلها مرتين تلاثه
جانت عهود تكيف عليهم من يجون تدز شهيد لام صلاح لو للجمعية يجيبلهم شوف شنو محتاجين على السريع
ويرجع يلعب ويه جهال رحاب بالحديقة
ضحكت بدرية وكلتلها بس ابن خير الله مازرتيه ههههه
---الله يرحمه خطيه حتى هذا ماخلص علقت امل عليها
---يمعودات سترن علينا واشرت بعيونها على صابرين
الي هي حست وكالت من يمها
غير هو الجبير مالتنه كتله
وكلها تعرف
الله يرحمه
ضاجت بدرية وكعدت على عتبة الباب بين المطبخ والكراج وشعلت جكارة
--- الف رحمة على روحج يوم والله العظيم كالتلي يمه هسه هم يجي يوم الناس تترحم لعبد الاله ونوري السعيد
طلع حجيها صدك
تتذكرين فخرية بايام الفيضان
اني اتذكر جان عمري خمس سنين
وفخرية انت جبيرة مو؟
----اي اي جان عمري دعش لو طنعش سنة هيجي شي الفيضان جان سنة 54 اتذكر سودة عليه
ابويه شالني على جتفه وامي شالتج قلشان وعبروا بينا الجسروجاسم وراضي شايلين جوالاتنا هههه وعلاء مجلب بابويه
--- تتذكرين امي من جانت تحجي تكول القرية مالت اهلها غركت والناس ماتت من الجوع والامراض
امها جانت ضامة تلاث تمرات لافتهم بقماش وخالتهن بصدرها
اي الناس ماتتذكر شكد ماتوا من الجوع والامراض والفكر
تتذكر بس خطية شلون انكتل الملك
----بس هو جان صغير ماله ذنب علقت هنا امل وهي كملت الزلاطة وبدت تفسمها على اللفات
فبدرية حجت من يمها وهي تباوع على الجهال يرشون مي بالحديقة واحد على اللخ ونور تتراكض وراهم تبدل لهذا وتركض ورة ذاك
هاي اليتيمية الي ظلت معلقه لاهي لايحة سما ولا كاع انسانه من بيتن كومة مثلها هسه انجرخوا بعربة هالدنيا
الله يرحمه اياد كلي مرة خاله يعني اخو امه
خاله هذا جان من الكبار يعني على كولة المصريين كبارات البلد رايحين مثل الوفد وحاجين ويه الملك الله يرحمه يشتكون سوء الاحوال فكايللهم ياخال انا مكتف وكالها حزين وعيونه تتداور من الخجل
هيجي بهالطريقة
انه مايكدر يسوي شي مدام نوري وعبد الاله الفاسد موجودين
---الله يرحمهم ويرحمنا
ويكفينا شر التايهات
التاريخ يكتبه الملوك والمنتصرون علقت رحاب اخر شي
والكل ايدها بذلك انه محد يتذكر الشعوب المقهورة والمظلومة التي تقبع تحت سدرة الحكم
يتذكرون فقط من كان عايش بنعيم وحرم منها
انقبل سعد معهد ادارة بباب المعظم
وبوكتها من دخل للسادس جان تارك الشغل يم سامي
امه ماقبلت بعد يلتهي بالشغل
ويركز على دراسته جانت خايفة لاياخذوه عسكرية
وعمرها مراح من بالها من طلع قرار قطع صيوان الاذن عام 94
وشلون جيرانهم بيت بيت ابو سيف كطعوا اذان ابنهم لانه متخلف عن العسكرية تلاث مرات وشلون واحد من جيرانهم دكتور عدموا لانه ماقبل ينفذ الاوامر
ومن رجع كاموا الجهال يركضون وراه افرار افرار
منظره يكسر الخاطر
واخرها هم راح داوم وكمل عسكريه
تتذكر شلون جهاله خاتلين وره البابيباعون عليه ويبجون هو غير من ضيم العيشه صار افرار!
يايمه الله لايرجعها ايام جانت للصبح ترجف متنام
سعد عمره توه 18 سنة
تتذكر شلون من بدت الحرب وكالت معقولة سعد يكبر والحرب باقية
جان صغير عمره اربع سنين!!
اتاريه كبر وماخلص من العسكرية ولاحكتهم لاحكتهم
وزعت فخرية اللفات ثواب وجيس كامل لصابرين
وميلاد كلت وياه عروك بس خضروات يعني بتيتة وشجر وبصل وطماطة يبرشوها زين ووياه شويه ليه وطحين
ووياه هماتين طماطة بالدهن واصابع بتيتة
حتى يكفي الكل
لحد ذيج اللحظة جانت رحاب محاجية شي لاحد ومعارفة شتسوي
ورة الظهرساعة اربعة ونص
صار البيت سنطة الجهال كلهم اتمددوا على جرباية فخرية
والبنات بالصالة على تلفزيون الشباب
بعد ماطردوا عبوسي منها
جان سعد ماجر بلي ستيشن
كلما جان يطلع خطاب جمهوري يروح ياجر لو سيغا لو بلي واذا ماحصلهن خلصانات جان ياجر افلام مال عادل امام لو مسرحياته القديمات ويباوعون بالفديو الي اشترته عهود من عائلة مسيحية من هاجروا قبل سنتين
قبل جان ااكو برنامج اسمه عادات الجمعة لازم الكل اتابعه جانت المذيعة سهاد حين تقدمة بس من انفتح تلفزيون الشباب كام كل جمعة ساعة ثنتين يعرض فلم اجنبي معاد ماخذ جوائز
الكل تحب اباوعه الا فخرية اول ماحطت راسها تشوخر
من خلص الفلم جرت رحاب عهود لغرفتهم
جانت بيها قيم وروان
طلعتهم وراحن للصالة
وكامت تبجي رحاب
من حجت لعهود وماتعرف شتسوي
---اني متاكدة شك بيه عهود شسوي كولي شسوي
---غلطتج رحاب شعندج ضامتهن ليهسة اني لو بمكانه احركج بمكانج
زين من عدها نور كالت مالاتي وعفية عليه مسوالكم شي
هو حليم الله يستر عليه
----اي هم خطية مااعرف اني محتارة شسوي كوليلي علميني اكول لامي ؟
---لا لا امي عدها ضغط وهي بلاكلشي توهوس هسه النهار كله تفكر شراح يسوي فاضل
كولي لخالة بدرية احسن
---كتلها كالت اطلع من الحمام واجيكم
غطت راسها بين حضنها وكامت تبجي
اني مااريد ااذيه والله العظيم احبه اكثر من روحي وعمري مافكرت حيجرحه الموضوع هشكل
عهود والله ماريد يصير شي بيه غير امووت والله امووت
---والله مدام ماسوى شي لنور اعتقد عرف هاي مالاتج
بس مراد يكبرها للشغلة هو عقله جبير
هنا دخلت بدرية وصاحت على روان تحميلها الجاي
لافة الخاولي الجبير على راسها
ولابسه دشداشتها الكودري الصفرة والكصيرة
جانت عكسهن كلهن ماتعرف تمشي بدشداشه طويله الا كصيرة كلوشه
---ولكم ماكتولي ميشت شعري مو حلو طالع
---اي خالة والله يخبل جاوبتها عهود وهي تعدل الفراش مال الجرباية حتى تكعد خالتها
شبيج مثل البومة بس الدموع بعينج
وجرتها وحطت راس رحاب بحضنها
وظلت تفليها شبيج يمه كملت بدرية
ظلت رحاب تبوس بيدها جانت كلش تحب خالتها
هنه مثل صديقات واكثر بعد
اتربعت عهود كبالها وحطت ايدها جوه خدها ورحاب تحجي لخالتها المقتل من جدة وجديد
وبدرية ادخن وتك عين مغمضة والتك اللخ تباوع على عهود كبالها مبتسمة
كلتلها خلصتي ووخرتها من حضنها
مسحت دموعها رحاب
شماتكبرين تبقين طفولية بتفكيرج
اول شي الرسايل كلها حركيهن وذبيهن مالهن داعي
ثانيا الرجال عقله جبير مساولجن شي
خلاص انت هم هسه سوي نفسج مو يمج الموضوع
مدام البنية كالت اني ليش تجيبين الحجاية لنفسج خلف الله عليها سترت الموضوع
ومااعتقد حيسويلها شي
كومي غسلي ولايظل بالج
اجى عليهم فاضل ومن الباب سلم عليهم مانزل جان هادي وياه
رجعت رحاب للبيت وفاضل ظل زعلان عليهم كم يوم
وماتصالحوه الا لما اخذته يسوي غسيل لكليته
وحتى وراها صار الحجي ثكيل بيناتهم مو مثل الاول
رحاب نجحت بتلاث دروس ووكعت بدرس فعادت السنة من وراها
بعدها يله صارلها مجال تروح تزور حماتها اخذت ميلاد وراحت
رحاب وين مجانت اكو كعدة بيها كرايب فاضل جانت تاخذ ميلاد وياها هالمرة راحت تبارك لرقية على ولادتها من زوجها الدكتور وجانت جايبة ولد سمته فياض
جده لابوه سماه على اسم اخوه
وسبحان من خلق فياض من حسن
جانت المشاكل كابه بين طليقها واهل رقية
وفاضل همين مرة لخ
زوجها الاول مجاز من عدها ويوميه عركة يوم يريد الجهال ويوم يشمرهم عليها
ويوم يتعارك ويه ابوها ويم ويه اخوها
مع انه رحاب بنفسها اخر مرة حجت وياه وتوسلت بيه مايدخل فاضل لانه مريض ومايتحمل حركة اعصاب
وخواته كلش عزيزات عليه
جانت رحاب مشتريه شباحية من ذهب للصغير
من دخلوا بيتها استعجبوا
البيت مو جان بس راقي
لا انيق بذوقه
يختلف تماما عن بيت عمتها الي اكثر اثاثه الذهبيات
ولا بيتها الاول واحد الي جان على طول مخربط
هذا البيت كانه ماخذيه من برده
كلشي بيه تنسيق
حتى التقديم بالمواعين والاكواب جان راقي وحلو يستعملون كله اللون الابيض
حسوا نفسهم داخلين فندق درجة اولى الزوالي الغالية العراقية القديمة
باللون النيلي والاحمر ومطعم بالبيض
بيها شبه من الي عدهم بالبيت لكن هذه جانت تختلف بوجود الالوان الفيروزية
والبردات رصاصي وفيروزي وشويه جوزي
وخياطتهن بسيطة بس انيقة
جانت رصاصية وبيها خط رفيع ذهبي وفيروزي يمكن جايبتهم من دبي هيجي كالت ويه روحها رحاب
طلعت رقية تسلم عليهم وعمتها جتي وراهم بشي نص ساعة وجابت جهالها صعدوا فوك يلعبون
من رجعت بدت هي هم باللفلوس الي عدها كامت تغير اثاث البيت
وترتيبه
ترتيب القنفات والكعدة غير التقليدية
ترتيب غرفة النوم
والبردات
صح كلها يرادلها فلوس بس عمتها مجانت تقصر وياها
هاي الامور شويه غيرت من نفسية فاضل وياها ورجع شويه شويه تتحسن امورهم
فرح باهتمام رحاب بامور البيت وهو من النوع الي يدور هيجي شغلات
بدى الدوام
وروان اختصرت الموضوع وقدمت على كلية الادارة والاقتصاد
جانت الكلية الوحيدة الي ماتريد شهادة الجنسية مال الام
طبعا قبل ماتقدم فرت كليات بغداد كلها
جانت مصرة تكمل حكومي مرادت تهلك ابوها باقساط كلية اهلية ثانية
مع انه شكد لح عليها ماقبلت
ولانه معدلها عالي من راحت لقسم التسجيلات
الي يشتغل هناك كللها بكيفج اي قسم تختارين يقبلوج وهمه الممنونين
وبالفعل راحت قدمت قسم محاسبة ابوها وصاها على هذا الشي
جانت كلش حزينة معدلها كان ممكن ياهلها كلية علوم ويمكن حتى هندسة
مع ذلك
الاختيار مجان سهل ان تطون مجبرة تدفع ثمن خطا هي مالها دخل بيه
في حين من جانت بالمدرسة اربع سنوات اعفاء من الاول للسادس
وبالاخير بنت فلان وعلان تحصل على 12 درجة اضافية على المعدل
خمسه صديق وخمسه شهيد واثنين رفيق غيرها وغيرها
يعني سقط حقها بالمفاضلة
راحت امل فرحانة وجهزت بتها من كلشي
الجنطة والحذاء والملابس على المودة جان نازل اللون النيلي
وعلى كد ماجانت فرحانه ببتها بداية الدوام
جانت ميلاد شايله هم هذه السنة
قل عليهم الوارد كلش
وصاروا تقريبا يعتمدون على عهود وبدرية بكلشي
بس الحياة برة مورخيصة
وبدى هم ميلاد شراح تلبس من تروح للكلية وشلون ادبر مصروفها ومصاريف الخط
طبعا امها ماقبلت تشتريلها غير جنطة وحذاء ابو الست الالف
اثنينهن ب12 الف يعني راتب عهود كله هو والحوافز
وهنا كبت العركة
اتخبلت عهود من شافت اختها مشتريتهن وفوكاها ميلاد مجانت راضية بيهن
لانه الجنطة الي اخذتها جانت قديفة سودا صغيرة وهي موديل مال العام موديل هالسنة الجنط الطويله والعريضة راحت مودة البوكس
كامت عهود تدعي عليها وفخرية تاكل بشفتها وماتحجي
ذيج تكول الشهر كله اني اتعب واجد واستحيف اروح تكسي تسطرني الشمس سطر واني انتظرالفورتات اكول هالخمسمية تفيدني
تجين يايمة على الحاضر تشترين بيها غراض ال هذه
---يمه اختج لعد شلون تروح للكلية هي هاي اخر سنة الها خلي تخلص والله كلبي خلص منكم
---اي عيني موكله لازم على الموديل صاحت عهود وهي تجلف بالمواعين على السنك
مايصير تلبس مالت العام شلون يعيبون عليها بت كاطع
كامت تبجي ميلاد وكلتلها اخذيهين تعيري بيهن شحالهن على اساس
اني ردت الفلوريتان اتوسلت بامي ماشترتلياه
---فلوريتان ليش يمه
انت تعرفين هذا بسته وتلاثين الف منين نجيب بله لو اروح ابيع روحي محد يشمر عليه خمسة الاف
---عادي لانه انت تفسه
----لج انيييي هاي فوكاااها شفتي ماما
---ولكم كااافي كاافي حرام عليكم يوميه تحركون دمي
وعادي مثل كل مرة عهود تحجي وميلاد ترد باعلى منها وتكب العركة ماتخلص الا من تلحكهم فخرية بالجفجير لو تخابر بدرية تجي ترزلهم قاط رزالة
يسموها غسل ولبس
وجان هم الدوام اكبر على ميلاد
باول يومين جانت مصدومة بحالها شايله هم وقهر كلشي
تشوف بعض البنات يروحن ويجن اكاشخات واللبس اغلى شي هاي عدى الذهب والوان الشعر
جانت الكل تصبغ شعرها برغندي
ودم الغزال
هي جانت تحط الحنة وكصت شعرها امل كصة مدرج
وطبعا تنانيرها كله جوة الركبة بشويه
صافنة على بعض البنات و تكول هذولة منين يجيبون يصرفون؟
وكتها كاعدة وحاطة ايدها على خدها وحدة بالكافتيريا
الي جان مشغل كاسيت اغاني طلعت قبل فترة
من غنوا المطربين الجدد كل الاغاني القديمة
والاغنية بالذات جانت ياكهوة العزاوي
ووكعت عينها على شمس الدين يشتري لفة
واتحولت الاغنية حجيك مطر صيف وصارت عينها بعينه
شكد احتقرته
وجانت تتمنى لو عدها مسدس وتضربه طلقة بذيج الساعة وراح بالها تكتله بباب الجامعة ويشوفون جثته وتصير هوسه عليه
بينما هو اندار بحزن واكل لفته على كتر ووياها استكانه الجاي
كامت اشترت جيس جبس بمية وخمسين وبطل سفن بمية وخمسين
جان عدها بعده مصرف من الي حشته بجيبها رحاب اخر مرة
راحت فرت نفسها وجانت خاله حمرة ماروني طوخ
الكل جان يباوع عليها ايام الي كلهم نايمين جانت تلبس الضيك وتزرك تطلع
والا اذا صادتها امها لو سعد
لازم تطلع باجية لانه مو بس تبدل هدومها لا
تترزل وياها
كعدت مرة لخ وجانت صافنة على حسن
هو هم مسكين مثلها
حسن جان طالب عربي
الطلاب العرب كثروا بالكليات من وره الحصار
صارت الحكومة في بغداد تقبل الطلاب الفلسطيينين الي ينتموت لحركة التحرير
ورغم الحصار جانت الحكومة تدفع كامل مصاريفهم اكلهم وشربهم وايجارهم واشياء اخرى
لانه معظمهم شباب والفلوس تندفع الهم بالدولار
قيمة المية دولار الوحده جانت تلاثمية الف دينار عراقي
وواضح جدا الترف الي جانوا عايشيه
اضافة الى طلاب يمنيين وسودانيين لكن هذوله كانوا قلة قليلة لاتعد على الاصابع
ميلاد مكانت تحب كل الطلاب العرب مثل عكاب مثلا الي اكثر من مرة شافته بنهاية الدوام من جانت تدور على منى
خاتل وره القاعات هو وجماعته يتلادلون الممنوعات
بينما حسن
كان شخص طيب وشخص اخر
حسن كان بنفس الكروب ويه ميلاد
لكنه كان معجب جدا بفرقد
لا لا مومعجب بل يعشقها
وحتى اهله يدرون
ومع انه جان يشوفها تكعد ويه صديقها مرات لكنه جان عنده امل انه تعوفه وتبقاله
اي هي مسالة حظ
هي جانت تقبل منه كل الهدايا
الدبب والكارتات
وحتى اسوار الذهب
واحيانا كانت ميلاد تنال من هذا الحب جانب
حسن بذاك اليوم كان يدخن بشراهة
فرقد على بداية السنة انخطبت
---شوف شكد اني وياها جنا صديقات
من انخطبت حتى تلفون مشالت عليه وكلتلي
يمكن تخاف احسدها
حقها من فرحتها حتى دور ثاني ما امتحنت وعادت السنة
ومن شافت ميلاد بباب الكافتريا سلمت عليها كانه مو صديقتها مجرد زميلة
---اكيد ليش لا كالت ميلاد ويه روحها
وهي تراقب صديقاتها الجديدات من نفس الطبقة الاجتماعية الشعر الي يهفف باللون الاحمر الغامق
وكله ليش اخر موديل
ولا منى
اوووف ياحظي
صدك لو كالوا رضينا بالهم والهم مارضى بينا
حبيت هذا الفكر تاليها يكولي تلوصين
ومنى هاي الرعنة الكلية كلها تعرف علاقتها بسنان
وراسا تجي هي هم مخطوبة من ابن خالتها بعمان ؟
زين مااجى يسال عليها على سمعتها حتى المصور يعرف بيهم والصور الي يوميه ياخذلهم سوى لو كعداتهم بالختله والبوسات وغيرها
مااجى وسال
هسه بالعافية زين واني
ليش محد بيه خير اجاني
وشلون يجيني
من كعب حذائي الي حفظه الركاع
يوميه واكع واروح ادكة
لو من جنطتي المزرفة واني الثولة مليت الزروف بالكحلة ولغمطت قميصي
دمعت عينها وطلعت من الكافتريا وطلعت بره بلكت يجي الخط
عيونها جان دامعة
وخلقتها مكلوبة
حتى سامي كلما تروح لبيت متها يتهرب منها
هه
عود مايريد مرته وخلفتله بنية
بله لو ماخذه جعفر مو احسنلي
قابل اني احسن من فرح ؟!
على الرغم من شهر العاشر لكن شمس الصيف لازالت متواجده وبقوة
حاارة كلش والمكياج يسيح والعرك
والبشرة التي تتجولح وتزرك
حفلة خطوبة فرح وجعفر جانت بنص الشهر
فرح الي وافقت عليه مسلوبة الارادة لا هي راضية ولا امها
لكن كثرة الاحداث الي صارت الهم خلتهم مرغمين
اي واحد جان يجي يخطلها ماتصير
والناس جانوا حاسديها البنية
كئيبة وحزينة
ماتعرف ليش دمها متكسرة وشايل هم على قلبها
اختفت الضحكة من على وجه هذه البنية المرحة اللطيفة
الي كانت بيها شبه من الهام شاهين الى حد كبير
جانت فرح مميزة
والكل جان يتوقعلها حياة مرفهة لكن الحقيقة عكس ذلك
كانت البنية تسقط من خيبة امل الى اخرى
غير موفقة ابدا
حتى انه هي تعبت وجانت تريد تهج وتسافر
اهل امها وابوها عايروها شلون تقبل بواحد ممخلص كليه
وهمه كلهم واصلين واصحاب شهادات
لكن المثل يكول من تجي القسمة تنسد الحلوك
حضروا نفسهم بنات فخرية للحفلة
ونورية شالت خالت كومة فلوس بيد ميلاد كلتلها اجري احلاها بدلة
حتسوي الخطوبه بالقاعة
جانت كلش فرحانه بهاي الخطوبه طبعا جعفر مااجى
وانما الخطوبة بس للنسوان
راحن البنات كلهن من بدرية الى قييم للصالون
وكل وحدىة بيهن سوت شعرها ونورية دزت مها وياهن
والجهال بقوا عليهم
الكل اجرت بدلات بس رحاب لبست برنسيسة بيضه وسمائي عمتها جابتلها اياه من عمان اخر مرة من رجعت
وطبعا اهم شي الكعب العالي
عهود سوت شعرها فلات
وميلاد لفته لورات اما البقية فسووا شعرهم الموده الي نازلة جانت مثل نجوى كرم ولطيفه الكذلة المرفوعة بيفوك والشعر المجعد
الوحيدة الي مالبست فستان ماقبلت هي روان لبست كيلود وبدي عليه
وعاقفت شعرها مفتوح
واول مادخلت المزيقة
دكت كلوبهم وياها
مانعرف لش هذه المزيقى مالت الاعراس وخصوصا ضربات الطبل
تخفق كل الكلوب
ومن شافت الدخلة فرح كامت تبجي
جانوا اهل ابو كعفر طالب كلهن جايات هن وعبيهن يفرن بيها
رادن يرفعن راس ابن اخوهن الي ماشالف عرسه
وكامت نورية تشهك وتضرب على صدرها
وتصيح زهوري
اني زوجت ابنج اني
لاتخافين اني هنا بمكانج
لايظل بالج عليه احطه بعيوني
من عمت عيني عليج ماشفتي يوم زفة بجرج
من عمت عين الكاع الي خذتج مني وحرمتني منج
زهوري هذا عرس جعفر دتشوفينه
هاي خطيبته حليوه اني اختاريتها
شفتيها
ولج خييتي كسرتي ظهري بروحتج
اتاريها شايله صورتها رافعتها فوك ودتحاجيها دتفربايديها
كانه دتشوفها العحفلة بث مباشر!
بجت كل الكاعدين وياها على الطبلة من كامت تبجي وتدبج
كامت فخرية حضنتها وتمسح دموعها
وبدرية تهلهل وتبجي
كانه شريط ذكرياتهم وياها كله مر من كدامهم ويه الهوسة النسوان بعبيهم السودة والدبج
مايعرفون ينعون اخوهم
الي اندفن لو يفرحون بزفة النه الي ماشاف عرسه
مرت زهوري بيناتهم
كانه بعدها بضحكتها الحلوة وتراجيها الكبار تفتر على طبلة طبلة تبوس بيهم
مجانت تعوف احد ولاتزعله
بكصه شعرها الكاريه وعيونها اللماعة
مر طيفها يهلهل بعرس ابنها
ومر طيف جهالها الصغار يركضون وراها
وتالي كعدت نورية وطلعت بجيها كله بحضن فخرية
شوفي دارت الدنيا ودارت ومابقتلها غير فخرية
من حضنتها شافتها شكد ضعفانة وصايرة عظمتين
ضربتها على ظهرها كلتلها انت تضعفين وتذبين السمن كله عليه
ابتسمت وكالتله اي وج شو انت بالزايد عرضانه
---والله مابيه حيل حتى مفاضلي من هسه انهيجن عليه
شبيج هيجي رايحة فد نوب
---شحجييلج ام سعد انوب قهر اسما موتني
من يوم سافرت عبالك شمعة البيت انطفت
لا اني ولا ابوها لاناكل ولانشرب
ساعة السودة الي زوجتها هذا
---شبيه مو كلتوا عليه دكتور ومن عائلة جبيرة شبيه هنوب
---شنو الفايدة فخرية
شنو الفايدة
تكول متزوجة صنم
النهار كله تبجي
صايره هالكدودته
شربت من كلاص العصير ومسحت دموعها حيل
وهي تباوع على جنتها وحفيدتها نايمة بحضنها
شكوكي مايخليها منا لهناك تطلع
تكولي ماما محبوسة حالي حال العصفور الي عدنا
مايقبل اطلع منا لهنا
واذا طلعت تصير عركة وصياحه وعياطه
انوبه ذاك اليوم جاية قائمة التلفون
كالب الدنيا عليها
يكلها شدعواج هلكد تخابرين امج
مرة وحدة بالاسبوع كافي
شفتي بله حتى بخيل طلع
اكلها يمه اطلكي
وتعالي رجعيلنا حتى ابوعا يكلها اطلكي وانعل والد والديه
ماترضى تخاف
من شنو ماادري
تكول بلكت احبل ويتغير
---بلكت يارب الله يريحها وسفرحها خطية ماتستاهل
--اي والله فخرية انت تعرفيها اسما
جنها جمدة
ضوة معلك بالسما
يايمة ربي يفرجها عليها وعلى اخوها
--- امين يارب
---حلوة هاي الكوستمات نورية الي دتلبسهن العروسه
خصوصا هذا الاحمر يجنن
--اي والله هاي خيطتهن يم الباخرة الي بالمنصور ماقبلت امها ادفع حقهن بس اني اشتريتلها الذهبي هسه تلبسه وره هذا
ماشا الله خوش نيشان ماخذه
هاي اني وعماته الجعفر لمينه وحطينالها واهلها هم انطولها
هماتين متمكين
خوش عائلة فخرية عاشت ايدج
--- اي بعد عيوني هاي صاحبتي كرم من السبعينات اعرفها
والله لساني اتذكر شفتها بقطعة الامانة شوفي شلون دنيا صغيرة والايام تركض ركض
هي وينها خلي اروح اسلم عليها
من رجعوا من الحفلة
لحت فخرية على نورية تبقى وياهم تبات ليلتها
لية خميس وباجر عطلة
ومها وسامي متعاركين كالتلها خلي ياخذون راحتهم وانت هم نفهي عن نفسج شويه طول الوكت وحدج
والله اصلا مافكرت راسا قبلت
جانت مستوحشة على بتها حيل
ودكت عليها انه تخابرها على رقم بيت خالها
وكعدت الليل كله تحجيلها بالتفصيل كل مفاصل الحفلة
بعدها بكم يوم جانت فخرية بالسوك وشافت صابرين تركض مملخة وجهه كله دم لزمتها وكلتلها شبيج صاحت
لحكيلي ام سعد
رجلي الشهيد طلع عدل واسير ومخابرين عمتي راجع ويه الاسرى
عافتها وراحت
عزة هاي شلون؟
هواية حالات صارت هشكل
والي مخلفة من اخو زوجها الشهيد اطفال هماتين
بعض الجثث المتفحة هي كانت اصلا لايرانين
ياخذون قلادة الاسرى او الشهداء ويلبسوها
في سبيل حتى بس من يستشهدون يندفنون بارض النجف او كربلاء
همه كل ظنهم ان العراق كله كاظم ونجف وكربلاء وقافلين على هذه الشغلة حتى من وقفت الحرب
احد حرس الحدود الايراني قفز للحدود العراقية ومن لزموه يكللهم بس خلوني ازور كرباء وارجع
يعني عباله بعد كم كيلو متر عن ايران!!
قبلها بليلة
رجع زهير من الصبح للبيت
جانت نورية دتطبخ والجاهلة يمها بالكريكوت
وجنتها بالدوام
اتفاجاءت خطية نورية برجعته
حتى اخترعت عبالها بيه شي
بس هو جانت عيونه جاحظة ومخروع
ظلت ترجف عبالها صاير شي
وهو يهديها يكللها اكعدي
اريد اكلج شغلة
---احجي مو قطرة دم مابقت بجسمي
اسمعي زين واضبطي اعصابج
---احجي يمعود دااسمعك وهو اكو احد غيرك ديحجي
--خابروني للفرقة
ابنج نزار راجع ويه وجبة الاسرة هذه
باجر يطلعوه
موجود
صارله فترة بالعراق
بس صايره خربطة باسمه الثلاثي
---يعني شنو زهير
فهمني
---يعني ابنج حي يرزق ويه الاسرى
-وكعت وكعدت بالكاع يم رجليه
لاتجذب عليه زهير
اني مااتحمل هيجي صدمات
--والله مو جذب هاي شتحجي وياها بله
---كامت تصيح وتعيط
اكلها ابنج راجع من الاسر تكلي جذاب!!
---رحمتك ربييي
وكامت تبوس بايدينات رجلها ورجليه
شيصبرني اني لباجر
يمه نزااار ترجع وليدي واشوفك يمي
يايمة
وظلت تفتر مثل الطير المذبوح بالبيت
تروح وتجي
تصيح من الشباك
كعدها زهير وظل يحجي وياها
انه الولدحيرجع حاله حال بقية الاسرى شكله متغير وتعبان
يمكن حتى اعصابه تعبانه لاتسمعيه حجاية تقريه بالزايد
لاتكوليله شحالك وشغادي
لاتحسسسيه
شكلج لاتحسسيه جاي من الاسر
شلون مااعرف !!!
ومن الباب حتى ليلتها باتت على عتبة الباب بين المطبخ والكراج كل شويه تعاين على السما
ربي هم يرجعلي ابني
وترجع تنام
من ساعة خمسة الصبح كعدت سامي وراحوا هي وزهير
مااخذوا بس ترمز الجاي ولفتين للريوك
وكعدوا يم المنظمة بساحة النسور
ووماطلعوه الا ساعة وحدة الظهر
جانت الشمس والحر شي ماينحمل
حتى حلكها نشف
سامي مرتين راح يجيبلهم بارد واكل ويجي
وهي ماترضى تخلي شي بحلكها
الى ان صاحو اسمها
صاحت نورية ووراها يركض زهير
هذا ابني هذا ابني
طلع نزار
ودموع نورية تجري بدون توقف تمسح بيهن وماتالحك وجسمها كله ينتفض فض
ونبضها يصعد وينزل كان الي واكف بصفها يسمع صوت نفسها
مدت ايديها وجيتت عليه ال ماطلع
مشافته هو لا بس صاحوا اسمه
طلع ولد صغير
اي ولد صغير ضعيف نحيف لابس بدلة وشايل علاكة نفسها نفس كل الاسرى
عيون تعبانة
وشعر كثيف
وعظم وجهه بارز
وينه نزار
صاحت امه بقلبها
وين الطول والقلافة
وين هذه الهيبة والوجه العريض
راسا ضمته الها
ووكع هو على ايديها ورجليها يمه
وكام يبجي مثل الاطفال وجره ابوه وحضنه
وسامي حاول يطلع امه من الهوسة داير مدايرهم
الكل تتطلع الى هذا الاسير
وكلها تحاول تساله
لكن سامي حاول يسحبهم ويطلعهم من الهوسه وويوكفهم وين مجانت زوجته واكفه وشايله بتها
ظل نزار يضحك ويبجي
وكل شويه يبوس بيد امه
وامه ماتكدر ماتكدر تحجي انخرست تماما
تريد تكول للكل هذا ابني
هذا الي انحرمت منه عشر سنين
حلكها جان لونه ابيض ناشف
والناس تلحكهم عفية ماتعرف فلان حاملين صورته
واقترب رجل معوق شايل صورة لشاب صغير بالعمر
كان يمكن بعمر 19 سنة ربما
كله ابوس ايدك تعرفه هذا الولد
وكعت عين نزار عليه عليه
وهز راسه بعنف كله لا لا مااعرفه
لكن بالحقيقة هو كان يعرفه
وجريح وياه
محظوظ هو انه نجى لكن الطفل المسكين توفى نتيجة النزف الحاد
رجع نزار للبيت وامه جانت محضره كلشي
وهو صافن على الطفلة ويلاعبها
بس يضحك ويكول شلونج يمه
شلونه بويه
سامي والله انت كبران هههه
سامي جان على كد مامصدوم بشكل اخوه مديكدر يستوعب هذا نزار معقوله !!
اول ماوصلت للبيت نورية كامت تهلهل بصوت نحيف هزيل
لايكاد يكون هلهوله
وصاحت مها انه تهلهل مكانه
كامت مها تهلهل وخانكتها العبرة
زهير جان متفق ويه واحد يشتغل بالجوبه يجيبله اربع خرفان ساعة بالعشرة الصبح
وهذا واكف من العشرة للثنيتين كبال البيت
عاد زهير انطاه فلوس خمس خرفان
وراسا كام وذبحهن جوة رجلين ابنه
نزار من شاف الدم
كشت روحه وطب جوة
وكعد بالهول وامه كعدت كباله تمسح براسه وبجتفه وتبوس بيه
محد جان يعرف
مكانوا متاكدين صدك يرجع
عاد زهير خابر اهله انه ابنه رجع ومها خابرت بيت فخرية
فخرية جانت راجعه من السوك وهواية داكة على بيت نورية وكتها بعد طلع التلفون الكاشف
رايده تكول لنورية على خبر رجل صابرين
والله ومن سمعت ماصدكت
كامت تهلهل الها بالتلفون
وظلت تنتظر عهود على نار حتى تاخذها وتروح
اول ماطبت عهود جانت تلعن الحر
والتراب
بوجهها راحت للحمام كعادتها
صاحتها امها ولج عهود
ولج عهود رجع نزار
وسمعت دكة قويه على الباب
عهود ظلت صافنة ماتعرف
شنو اجى نزار
معقولة اجى لهنا
لفت روحها بالخاولي وفتحت الباب بالنص وهي مخروعة
وشافت بدرية تفتر تدور وتسال صدك اجى نزار؟
اي صدك اجى هسه اخذ الجهال خلي يجون نتغدى ونروح
بله تصدكين خطية والله جنت خايفة بس لايطلع شهيد ومايدرون بيه !!!
كعدت عهود على التختة مالت الحمام
وهي صافنة على الحايط
ماعرفت تفرح
لو تحزن لو شنو؟
شبيج عهود ليش متفاجئة !!
