اتصل جعفر بخالته وهو مابين فرحان يحجي وياها ومابين يحلفها ماتكول اي شي لرجلها
النقطة الاخيرة ضايقت نورية كلش
وكلتله هو شوكت رجلي ماذيكم لو مسويلكم طلابه
شو هو بنفسه جان يطلع يدورعليكم
وماخلته يكمل
واول سؤال سالته
امك وين جعفر ؟
شصارلها ليش محد يحجيلي ؟
عدلو لو ميته
امك وين جعفر وين راحت بالحبس لو ماتت؟
وانت شوداك لامريكا وشللون وصلت وعماتك يدرن بيك ؟
ليش مايكولن ويحجن لي شي
شصاير بيكم
ليش مااعرف شي عنك
انت مرتاح هناك؟
وليش هالفترة كلها ماتصلت بيه
مجاوب جعفر على كل هذه الاسئلة وخلاها معلقة
واختصر المكالمة انه تعبان من الوحدة ويريد يتزوج
وودعها وراح
صفنت نورية ويه نفسها كون هذا يريد اسما ؟!
مايعرف هي اتزوجت لو شنو ؟
مافهمت من تلفونه شي
وفكرت تخابر عماته تعاتبهن
لكن فرحتها بصوته وانه اطمانت عليه بعده عايش
اتراجعت عن الموضوع
وراسا بلغت فخرية بهذا الامر
وظلت تشكيلها من جنتها الجديدة مها
وعلاقتها الخربانة بسامي
كانت نورية توصف مها بانه الحافية الي جايه تدلل !!
ترجع من الدوام تتغدى تعوف مواعينها بالسنك وتصعد تنام ماتكعد الا على جية رجلها الي هو هم يتغدى وحده يشرب الجاي لو ينام ويطلع للشغل لو بوجهه يروح
وعود هي تنزل العصرية شويه وترجع تصعد
رادوها تحط مكان اسما وتملا عليهم البيت
لكن لاهي كدرت تستوعبهم ولاهمه عرفوا يحتووها
يمكن هي كانت حزينة بسبب اهمال زوجها وخياناته المستمرة
من يلزم التلفون الليل كله بالمكتب ويسولف ويه صاحابته
وياويلها اذا فتحت حلكها وياه
حتى بعد ماعرف بخبر حملها ماتغير وياها
بعدها اتكررت اتصالات جعفر ويه خالته
في المكالمة الثانية
اول ماسالت عنه هو اختها
رادت تعرف وينها
سكت جعفر ماعرف شيجاوب
وظلت تلح عليه
كللها
---خالة والله مااعرف واني احساسي بالذنب موتني
همه راحوا من ورايه كله من صوجي
سكتت نورية والدموع خانكنتها ماتعرف شتجاوبه جانت تريد دليل وهمي كاذب تعيش على امله بلكت مهزومة وياه
لكن الي اكده الها جعفر انه مراد راد يروح يسلم نفسه بفندق دار السلام واهله لحوا عليه يروح حتى لاياخوه منهم كونه كان افرار
وطلع من البيت وهو متعارك وياهم
جانت بنيته صدك يروح يسلم نفسه لكن بالطريق شاف واحد من كرايبه شاب متصوب بايده جره وانهزموا بين البساتين
وظلوا يصعدون سيارة ورة سيارة ولفى ويه الي دينهزمون للحدود
واخرشي صفا بيه بمخيم رفحا
عوائل كلش هواية شاف
عوائل ظلت سنين هناك
وحتى زواج جانوا يتزوجون
جانت المخميمات مفصولة الشباب بوحد والعوائل بوحد
بقى هناك الى ان طلع لامركا المنظمة طلعتهم واعتبرتهم لاجئين حرب
وصل وعايش بتكساس صارله سنين وتعب من الغربة حيل
ورجعت سالته نورية مرة لخ
انه اهله اخذوهم ويه جماعة الفندق !!
كللها لاخالة ماخذيهم بطريقهم من رايحين يسالون عليه شايليهم وحاطيهم بكوستر
بس كل الي طلعوا بذذاك اليوم مارجعوا
وجماعة من المخيم شايفيهم ويحلف يكول دفنوهم همه والسيارات بالشفل
انهارت نورية اكثر
كانما الايام كلها التمت عليها وعصرتها عصر
من جهة زوجها الي بدى التعب يبين عليه
وتطلع مشاكل القلب عنده
ومن جهة سامي ومشاكله اليومية ويه مرته
وحتى اسما بتها هم ممرتاحة
زوجها شكوكي ومو اجتماعي
النهار كله تشكي انه كاعدة وحدها ماتطلع من البيت
وحتى من يرجع من شغله قليل مايسولف وياها
نصحتها امها تسوي طفل وتلتهي بيه
لكن هي هيجي من الله ماديصير عدها
وانتظارها لخبر عن نزار وماكو
جانت تبجي وتكول كلهم رجعوا اله هو
حتى كامت تشك خافت انه لاصاير من التوابين
بس لو صاير جان كالوا وعرفوا لانه التوالبين عدههم قليل ومعروفين
وين صار!!
ظلت مكالمات جعفر الها بين يوم ويوم لو مرتين بالاسبوع
وفي كل مرة جانت تفهم منه نورية انه يريد منها تشوفله بنية يتزوجها
وجان يلمح على ميلاد بت فخرية الي هو اكبر منها باربع سنوات
وفرحت نورية بهذا الشي
وبربيع عام 1997
قررت نورية تفتح الموضوع ويه فخرية ورة الامتحانات
جانت امتحانات نهاية السنة
وميلاد صف ثالث
ميلاد الي انجرت وره كلام شمس الدين المعسول
وحبه وهيامه
ميلاد الي انشغلت بالشاب الوسيم والرومانسي الي ماترك طريقه يعبر بيها عن حبه الا وساقها الها مساق الرياح البارجة في حر الصيف
ومكامت تشوف غيره
جان مالي عليها كل حياتها مع ان صديقتها فرقد نبهتها انه هذا ماعنده امكانية يتزوج
فجاوبتها ميلاد بسذاجة وشنو شفتيني اني ادور فلوس
اني ادور على رجال شريف يحبني ويقدرني واصبر عليه لحد مايصير عنده ويخطبني
ميلاد كان شعور الغيرة من فرقد هو سبب اخر دفعها انه تتمسك بشمس الدين
بينما كان الفرق واذح جدا بين البنتين
فرقد البنت المدلله
الي صديقها حتى فلوس كان يدزلها بيد اخته
وكانت تتباهى بكمية ال250 الي طلعها يوميه وتعزم صديقاتها بالكافتريا
الي كانت تستلم انواع الدببة الكبيرة والصغيرة بكل مناسبة
ال كانت تتباهى بالسيارات الي تجي تمر وتوصلها
عدا خطها الي كان سوبر حمرة لطالب وياهم
الي كانت تكعد ويه حبيبها كدام الكل وماتهتم للحجي ولا للسمعة
لانه كانت ماليه ايدها منها
اما ميلاد
فحاولت تبين نفسها مو اقل من صاحبتها والي الكل جان يكللها
انه هي تفوق فرقد جمال وحسن
لكن الحظ هي تشوف حظها اقل من نظيرتها
طيرتها الاوهام بعيدا حلقت في سماء وردية
فكانت تقضي ساعات وساعات تحجي وياه بالتلفون تتخلف عن الخروج عن البيت
اواوقات نوم امها العصريه
كل هذا كانت ميلاد واثقة من شكس الدين
اصلا مكان يرفضلها طلب لكن على كد امكانيته
وعلى نهاية الامتحانات حجت نوريه ويه امها
الي طارت من الفرح
وين لاكيتها وحده من بناتها تطلع بره لامريكا وتخلص من ضيم هالدنيا وضيك العيش
وهي اصلا امنية ميلاد رادت تعيش بالخارج
فخرية راسا وافقت
وتهلل وجه نورية بالخبر وراسا خابرت عماته يحضرن نفسهن
واتبرعت من نفسها المهر كله عليها
لكن الي صار
ميلاد من عرفت كلبت الدنيا
ماتريد جعفر!!!
---ماتريديه شنو!!!
--- اي ماريده ؟
اريد اكمل دراستي
---منو كلج الزفة باجر
غير يسويلج معاملة زواج وعمتج نورية تكول تطول سنة سنتين
انت مو جنت كاتله روحج على الخارج
وتشهكين من تسمعين اي وحده اتزوجت وسافرت
مو كتلت روحج من سافرت اسما
اتبلعمت ميلاد ظلت تتحجج منا ومناك ماتعرف شتكول كامت تطلع عيوب بجعفر
---يعني
---ماريده ماما ماريده
ولحت ميلاد انه ماتريده
ضاجت فخرية وظلت ادردم عليها
الخميس الي وره الامتحانات
اجوي خطبوها عمات جعفر وعمتها نورية
وهي مستبشرة خير
طبعا فخرية مانطتهم حجاية لا اي ولا لا جانت منحرجة منهم
وصارت عركة كلش جبيرة ورة مراحوا بين عهود وميلاد
الاولى تهمت اختها عدها علاقة بطالب وياها
من هاي ماتريده لجعفر
وهي بذلك مسكت الوتر الحساس
فخرية من سمعت كبت عدها شالت الجفجير وتركض ورة بتها
وطبيعة فخرية من تعصب وتحرك دمها تصير حمرة مثل الطماطة
وساعتها كامت تصيح وتعيط وكعدت على الجرباية مالتها
خطف لونها راسا
وكام يثكل حلكها
وماتكدر تحجي
ضفيرتها جانت ملفوفه مثل الكعكعة على راسا وكعت ونزلت
كامت تلطم عهود على امها وركضت ميلاد جابت مي غسلت وجهها مايفيد
جانت فخرية تبجي بعيون جاحظة
وعلى السريع شالوها واخذوها للعيادة الشعبية
ميلاد خابرت على سامي حتى يدزلهم سعد قبل لايطلعون
العيادة الشعبية جانت ازدحام بذاك اليوم من العيادة ودوها للمضمد فحص ضغطها
طلع كلش صاعد
انطاها حبوب مال ضغط وثاني يوم اخذوها للدكتور حتى تبدي رحلتها ويه مرض الضغط الي معظم اذا مو غالبية الشعب العراقي يعاني منه
من رجعوا التموا عليها اهلها بدرية وعلاء وجهالهم
وباتوا يمهم لثاني يوم
جانت الامتحانات توها خلصانة
فكلهم كاعدين بالبيت وصارلهم فترة ممتزاورين بسببها
راحت عهود من الصبح جابت ريوك واجتي
بدرية جانت كاعدة على الكرسي ما لمطبخ تلم شعرها
وميلاد دتسوي جاي والبنات كاعدات يحجن وجده ويه اللخ بالكوة بعده النعس بوجهم
سميربقى هو كريم ببيت بدرية
بعده بكليته المنصور وحيروح مرحلة ثالثة
وكريم وروان جانوا بعدهم ديحضرون امتحانت الصف السادس السنة الجاية
وقيم راحت للرابع اعدادي
ظلت بدرية تسال امل على واحد واحد
وامل جانت هي نفسها
نفس الشعر الاسود السرح المرفوع بقراصه
والبشرة البيضه الباهتة
يمكن ماتغير بيها شي غير شويه تجاعيد حول العيون
جانت هم مقهورة على اختها
وحدها ورة وفاة زوجها
وتخابرها تبجي عليها
تتوسل تسحبها يمها
بس امل جانت متعلقة بالجهال
ماتكدر تعوفهم
علاء بدى يحجي عن نرجس ويضحك يكول تريد ايجار البيت مالتها
---لو مو انت ملحك مرجعة باسمك جان هم اخذوا مثل بيت قاسم الله يرحمه
حسبوه بيت تبعية وكعدوا بيه
وكاموا يبيعون ويشترون بيه
علقت بدرية وهي تضم الجكارة من اخوها
رغم كبرهم جان اكو ذاك النوع من المستحى
لاهي في يوم اتجرات تدخن كدامه
ولا حتى سامي على عمره وكبره مافي يوم دخن كدام خاله او ابوه
جاوبها علاء وهو يشرب استكانة الجاي
والشيب الى غزا شعره وحوله من شاب الى رجل يكبر عمره بسنوات
---لا بدرية مااعتقد عدها جهال وابوهم عراقي لكن اني سويت هذا الشي تحسبا
وحتى البيع وكتها كله اني وقعته
---بعدها تخابركم ؟
---اي لساها يومية لو بين يوم ويوم جاوب علاء
انتقلوا الموضوع لميلاد الي جان سبب وكعة فخرية
ووانقطع ب صياح بشار من الباب
---ولكم فتحولي الباب جوعااان
ضحكوا عليه وركضت عليه روان شالته وشبكته
جان عمره ست سنين وهاي اول سنة يدخل مدرسة
ولحكه عمار مطنكر كوه كاعد من النوم
راسا راح كعد على الكرسي قافل وجهه مايقبل يحجي ويه احد ولا احد يبوسه
علقت عليه امل صاير نسخة منج رحاب
الي جرت جنطتهامال هدوم وقبل السلام صاحت شلونها امي؟!!
----مابيها شي الحمد لله طلع عدها ضغط هو منو مابيه ضغط
تعالي كعدي اتريكي
جاوبت بدرية وهي تاخذ الغراض من عبوسي وتبوس بيه
--كومي ميلاد سوي ريوك للجهال
ركضت ميلاد طكت بيض وخلته بالصمون الحجري الحار وسوته بالنص وانطته للتوأم وعبوسي من يمه سواله لفه كيمر ومربى ركض على التلفزيون يلحك على الكارتون
جانت قيم تباوع على ميلاد وهي تسوي اللفه
هي تموت على البيض بالصمون
بس ماتكدر تاكله تخاف يصعد سكرها
اشرتلها امها انه سويلج لفة واكلي لايبقى بنفسج
واضربي وراها الابرة
هزت راسها بالنفي انه ماتريد ولحكت عبوسي على الاستقبال علمود التلفزيون وعهود تصيح لاتكعدون على القنفات
لاتذبون على الزولية اكل
عباس المربى مالتك منكطته على الكاع
وظلت تمشي وتمسح وراهم وادردم
رحاب هي نفسها جانت هلكانه
وبدت تشتكي
انه نور مو مثل قبل وكل مرة صايرة تجي يمها تتعارك وتزعل وتروح
صايرة نحسة وحساسة
غيرتها البهذلة من بيت لبيت وغيرت هواية من طبعها الحلو والناعم
صارت قاسية وماتتحمل حجاية وترد الكلمة باثنين
وهسه هم دازه عليها تجي يمها حتى يشيلون الزوالي
هالسنة كلهم اتاخروا بشيلتها علمود الامتحانات
ورة الريوك طلع علاء وسعد سوا وبقن النسوان
ميلاد جانت عيونها وارمة شعرت بالذنب على الي صار لامها
جرتها عهود ورحاب للغرفة
تعالي احجي شكو
ماقبلت ميلاد تحجي كدام عهود تعرفها عيارة
تعيرها باقل شغلة
فانسحبت وماحجت والا لرحاب
بدت تحجيلها على شمس الدين
وشلون يحبها وهي متعلقه بيه
وبدت توصفلها شخصيته ينتظرها ورة نهاية كل محاضرة
ومن يعوفها الخط يصعد وياها يوصللها لببيت واذا عنده فلوس ياخذلها تكسي ويدزها
يشتريها لفات ممرات ومرات ببسي
تعرف كلشي عنه وعن اهله وشغله وشلون جادود الصبح بالدوام والظهر يروح يشتغل بمحل يبيع جكاير
وغيرها وغيرها
من الغيرة والحب والخوف والقلق عليها
واول سؤال سالته الها كالتلها هو وعدج بزواج
جاوبتها ميلاد انه محاجين بالموضوع
----يعني شنو محاجين
---يعني محجينا بالموضوع لاهو فتحه ولا اني
استحي كلش شيكول عليه ذابه روحي عليه!!
---معقولة ميلاد انت مخبلة تسوين علاقة والناس والدنيا كلها تعرف وانتوا محاجين بالزواج
شنو معناها ؟
شو مداافهمج
كامت تعيط رحاب على ميلاد الي ظلت تترجف منها انه محد يعرف
---اليوم احجي وياه والله اليوم اخابره واحجي وياه
---وتخابريه همين؟!!
---اشو انت فد نوب ماخذه راحتج ؟
وامي ماتعرف بيج
هنا عدلت كعدتها ميلاد ومسحت نظرات الخوف من عدها
وكالت بكل وقاحه
ليش انت مو هم جنت ماخذه راحتج ويه وسام
شو انت وعهود كلشي سويتوا ومن تجي يمي اصير اني الفلتانه
تسارعت انفاس رحاب من ذكرت ميلاد وسام وماحجت شي
وكلتلها وهي تطلع شتسوين سوي يطبج مرض انت مو مال واحد يحجي وياج
اتصلت ميلاد اكثر من مرة على شمس الدين مجاوب على تلفونه
الى ان اتجراءت وكت الظهرية من نامو الكل
حجت ويه اخته وسالتها وينه شمس الدين
فالاخيرة ردتها بعصبية انه --- صكعتينا بالتلفونات الله ينتقم منج واحنى منتظرين تلفون مهم بعد لاتخابرين دايحة
وسدته بوجهها
احمرت ميلاد وخجلت ويه نفسها حييل
ظلت فخرية زعلانه على ميلاد وماتحجي وياها والاخيرة تحاول تراضيها بكل وسيله ماكو
وشالت هم شلون تطلع من مازق الزواجة هذه الى ان اقترحت عليها رحاب فرح بت صديقتها كرم
فسالتها بدرية عنها
--اي رجعت من زمان لبيتها بحي الجامعة يم بيتنا القديم من خلفت الولد
---وهي ترضى تنطي بتها لواحد بالخارج
---والله شكلج هي مرة كلتلي رايديها بالخارج بعد مااعرف حروح واحجي وياها شوف شلون تصير
بس والله مارجع جعفر وايده خاليه
هذا ابن العزيزة زهوري
وطلعت النتائج
وراحت ميلاد معصبة على شمس الدين اصلا محد يشيب التلفون من يعرفون وكتها تخابر
لا هو ولا حتى اهله
لو يسبووها ويسدوه
وهناك شافت صديقه
كللها جان بالسجن لازميه الانظباطية مال الجيش مضيع هوياته
ووعدها انه يخليها تحجي وياه
وصدك من خابرته العصريه شاله وجان صوته ضايج ومقهور
وعاتبته عتاب خفيف حست بيه تعبان كلش
بس موهواية هالمده كلها بس انضباطية علمود العسكرية
ماحجى وجرجرته بالحجي وحجت وياه على الخطوبه والزواج
كللها انت شدتلوصين !!
يلخطوبه يتزواج
اني وعدتج بشي !!
انصدمت ميلاد وغصت بعبرتها
وفوكاها كمل جملته ليش كل واحد يكبل لازم يتزوج الكبل مالته
---بس شمس الدين اني غير كل البنات
---يعني شلون غيرهم بت منو مثلا حتى ابوج اسمه كاطع
اي نعم هشكل جاوبها
الحقيقة هو مجان بس علمود هويتها وانما لزموا الامن لانه يتاجر بالجكاير الممنوعة
جان اكو تبليغ عليه
لكن حظه مجان اكو شي بالمحل
مع ذلك اخذله جم يوم حلوين هناك
وكعت ميلاد بالفراش
ومحد جان يعرف شنو بيها
وظلت تاكل مثل المفجوع بالجوع وعهود تنببها انه وزنه زايد وصايرة ثورة
لكن هذه كانت طريقة ميلاد بالهروب من حالة الصدمة والفراغ العاطفي المؤلم الي عاشته
ماصدكت انه شمس الدين الشاب الرومانسي يعيرها بهذه الطريقة
بت لواء!!
ليش هي بت اللواء حتباوع عليك ؟!!
ليش ليش سكتت ومجاوبته من هاني بهذه الطريقة !!
ظلت يوميه تفر القرص مال التلفون محضره كومة حجي واخر شي من تسمع صوته تخنكها العبرة وتسده وتروح
ماتحجي ولاكلمة !
اما رحاب فطلعت باربع دروس
وهي اصلا ماهتمت لهذا الشي صحة فاضل جانت عدها اهم
معظم المحاضرات فاتتها هالسنة
وظلت تركض بيه من مستشفى لمستشفى اخر شي قررت امه تاخذه وتروح لعمان يسووله غسيل كلية هناك
ويبقى فترة يرتاح
الصدمة جانت هو رفض هذا الشي تماما
وجاوبهم بالحرف الواحد اموت بالعراق وماطلع لغير مكان
ودوني للنجف اموت هناك يم امير المؤمنين
اني بعد مابيه تعبت من البهذلة
فاضل جان غركان بالديون والمشاكل ويه اخوه حيدر
الي اتغير عليهم
وصار الكل يعاديه بسبب موقفه السلبي من اخوه
جان ينقهر على رحاب من يشوفها تركض وراه ودائما يكللها انت عشتي ويايه ممرضة اكثر من زوجة
بس هي مجانت تحس بهذا الشي
جانت مشاعرها اله صافية ونقية
ماقصر عليها في يوم لا بمشاعر معنويه ولا حتى مادية
رفض كل المحاولات انه يسفروه بره
ومن تعبت حالته
جتي نور يمه تركض وتبجي
خافت لايموت ويموت سندها وياه
صح هي تتنقل من بيت لبيت بس يبقى مرجعها الاول والاخير بيت اخوها
وفي اخر مرة بقت يمهم
جانت نهاية شهر التاسع
والجهال فرحانين ديجلدون كتبهم ونور وياهم
وكعوا اللعابة وبدى بشار يملخ بيها ووكعت منها الرسالة بيد فاضل
