الفصل الخامس
المقطع الثالث
من انتم؟
كنا مستعدين لزواج عهود
كان يوم اربعاء طلعنا اني وميلاد ساعة 11 الصبح رحنا للاعظمية
طبعا اصرت ميلاد تروح تشتري هدوم من الاعظمية وصلنا كريم بس اني وياها بسيارة سعد
لانه سعد جان طالع بالكيا الي اشترتها عهود اله
وظليت امشي ورة ميلاد الي جنت اشوفها كئيبة وحزينة
اصابها الياس اكثر من قبل بهواية صارت متخبطة ماتعرف شتريد
حزينة معظم الوكت وحدها بالغرفة
ضايجة وتعبانة
راحت ذيج الضحكة والبسمة الي جانت على وجهها
الله لايسامح اي احد يكسر قلب بنية
كسر الخواطر قاسي وجروحة تظل تنزف حتى لو بعد سنين
جانت تمشي سريع بحذائها الفلات واني اركض وراها المح بطرف عيني المسواك يمنى ويسرة
وهي كلما تسمن تكصر وتدعبل
اتحجبت بس ظلت تلبس تنورة كصيرة نص رجلها طالعة
جانت تحبني لانه مجنت اعيب ولا اقلد ولا اعلق لاعلى لبسها ولا تصرفاتها
واحنى نتلكى التعليقات والحرشة ونتجاهلها مرة ونضحك عليها مرة ثانية
واني كل ما اشوف شغلة حلوة احفظ المكان حتى من نرجع بنفس الطريق نمر عليها
طبعا مسالتها احنى وين رايحين لانه جنت اعرف مدامها لحت على كريم للاعظمية معناها حتروح تشوف عراق
سوق الاعظمية وكتها جان كلش حلو وتخبل وشغلاته
الى ان وصلنا محل ملابس
ولد شاب جان توه مفتح المحل اسمراني حيييل وضعيف عودة لابس ينطلون جينز وتي شرت ضيق وديدخن
وجهه طولاني وخشمه ماخذ كل ملامحه
سلمت عليه ميلاد بخجل ودخلت
ظلت تكلب بالهدوم وهو واكف بره بالباب ديكمل جكارته ويعني عينه علينه
بس نهائيا ماعرفنا ولاحسينا منه شي
بس ميلاد جانت مترددة
اقتربت منها وهمست بصوت ناصي
---لاتكولين هذا عراق
دغتني وعوجت حلكها اتشكرت منه وطلعنه
ماتدري تبجي لو تضحك
بس اني ظليت مبتسمة
خطية انصدمت
فعلقت وهي تركض كبالي صح هو كلي اني مو حلو بس نعله على حظي الاكشر مو متوقعته هيجي
ظلت ميلاد بعقدة عمران وكانه صار المقياس النوذجي للشاب الي تريد ترتبط بيه
فكلما جان يتقدملها واحد تردد كلش وبعدين ترفض بكل هدوء
حتى اني ماعرفت هي شتريد بالضبط
خفت الركضة مالتها وظلينا نفتر شويه شويه جانت المحلات توها بدت تفتح
وماكو ازدحام
هذه المنطقة من المناطق الاولى الي تاثرت بالانفجارات والاعتقالات وغيرها
لذلك جانت الحركة بيها والانتعاش متفاوت يوم هوسة وعشرة لا
مشنا وعلى يسارنا دخلنا محل
اشترت هي منه قميص كصير وضيق لونه وردي وصخ وكصته بيها عواج وتون اصفر ليموني
واني اخذت شال سمائي علمود الكوستم مالتي
جانت مودة الالوان الزاهية الاحمر والاصفر
بس منو يلبسها والقلوب كلها موجوعة
من رجنا للبيت حسيتها جانت مخنوكة ببجية فكتلها يله عاي شتوقعتي قابل يشبه عمران
باوع علينا ابو التكسي من المراية فنصيت صوتي
هي كالت هو منو يجيني لعد
لا وفوكاها كل هاي ويكولي ممفكر بالزواج
وهو يمكن عمره نهاية الثلاثينات
شينتظرومنو هاي الي تاخذه
يعني ادري اكو شباب ماتشوف روحها بالمراية!!
يكول الرجال مايعيبه الا جيبه
ويكعد يحلم ويتخيل ياخذ اليسا هههه
بس هو حظي الي يخلي مثل عراق يتعيقل عليه لو يجيني ايهاب يركض وراية
فاني اندهشت كتلها يا ايهاب هذا صديق سعد
---اي هو
ضحكت وظليت اجرخ بضحكتي خخخخ
كالت وثول شبيج
كتلها ولج هذا حتى اليه هم خاطبني
--- هههه داخل علينا مقاولة
---هو مو متزوج؟
---اي وعنده اربع ولد فوكاها
--شوفي هذا كال هاي العائلة خلفتهم كلها بنات خلي اخذ وحدة بلكت تخلفلي بنية هو هم حظي هههههههههه
رجعنا لبيت خالتي وجتي عهود ورانا
ذبت العلاليك وعادتها بوجهها تطب للحمام من طلعت جانت دتنشف وجهها بدشاشتها كالت
---ماتصدكون المن شفت
امي طفت جكارتها وجانت تلكط الخضروات جنا جايبيه ويانا
سالتها كالت المن
---والله خالة شفت شهيد تذكريه ابن صابرين!!
بس شلون اتفاجات واتعجبت
لما عيونه والله ولا اعرفه
شصاير بيه شكد متغير طولان وضعفان ومهتلف لابس تراكسوت كافه للركب تك وتك
ورجليناته مطلعها ونعالات يشحط بيها وفانيلة وصخة جربة وحاط عودة جبيرة على جتفه
يباوعلي من فوك ليجوة
بالاول كلت هذا منو هيجي يباوعلي
لما ركزت على وصاخته يا هذا شهيد ابن صابرين
ليش هيجي صاير بيه
شكله من هذوله العراكة الهتليه
صاحت خالتي وهي تجي علينا عهود عزمتي نور ؟
---اي يمه وصيت رحاب تكللها شو هي فد نوب مختفية
وكملت خالتي
ليش لعد مو كتلج بدرية اتزوجت صابرين ورة الحرب
---اي اتذكرت كلتي واحد بالعلوة مو
---اي شفتها قبل فترة تكول ام سعد لعب بيه طوبه كعد هو ومرته بالبيت هي الي تحكم وتامر وحاصرني اني والبنية بغرفة
هي عدها بنية شابة ماشا الله شلون جانت شاطرة
---وتالي
---ماكو تكول حتى الجنبر البسطية مالتها خطية هاي الي جانت تكعد عليها تبيع خضرة
ماخذها واحد من ولده
وتبجي تكول تكول ساعة السودة من اخذته
عبالي يلمني اني والجهال اتاري حتى المصرف بالكطارة ينطينياه
ومااكدر احجي ايده والحزام
----عزة لعزاها صخمت وجهها بهالزواجة
دردمت عهود يمعودات لاتخوفوني ترة اكلب ها
جاوبتها امي انه تلحك تتزوج واحد تعيش وياه ايامه الي هيجي ضيعتهم حرامات على ابن نورية
على الاقل تلحك تخلفلها جاهل يداريها من تكبر
---اني اخلف مخلفت من الشاب اخلف من الشايب!! وبهالعمر!!
---ياعمر يمه شبيها رحاب مو اكبر منج وخلفت اول زواجها
---رحاب بسرعة يصير عدها حمل اني تعرفون بيه بعد
ؤكضت ميلاد انطتني لفة الفلافل الي جبناها اني كلش احب الفلافل
وجانت جايبة كص للبقية
اللفه بالف عود من هاي الغالية ههه
كالت لعهود انه هي دائما تشوف شهيد ويه جماعة صلاح ابن كريمه عود صايرين عصابة وجماعة وهالسوالف
---والله هذا صلاح يخوف محد يعرف وين يشتغل كله سيارات بيكب اخر موديل
تحمل بنزيات ويعبون بهالبراميل
جايب جماعة مودي جماعة والله يخوفون
الله يبعدنا عنهم لايكون ابنج فخرية يتورط وياهم
---يا موجتيني البارحة تهددني انه لازم سعد يسوي الزفة ورة عرس جمال
---شفتي الحظ عود جمال بيهن الي اتزوجت وخطية هذني السبعة مدري ثمانية محد مكلبهن
فعلقت اني انه كلهن زينات بس احلاهن نورة
والجبيرة هم حلوة مرتبة بس شويه قرج
---عليمن مايطلعتن قرج يمه انت شايفة كريمة من تعد وتصف بالمحل!!
وشراح تسوين فخرية
---شسوي ؟ ماادري والله كلت اروح اشتريله غرفة نوم
حتى لو مستعملة بس اسد حلكها ليما الله يهديه هذا الولد ويتزوجها ويفضنا
--والله يمه ابنج هذا ناويله نية كشرة
اول تالي شلون ياخذ البنية هيجي ويكول ماريدها مو عيب مو حرام شصار بهالدنيا
هو منو غيرك طلع عينها
خالتي غمزت لعهود عود مايصير تحجي هشكل وادوس زايد كدامنا
ثاني يوم صارت الزفة مسووا حنة ولاشي
بس هو كطعلها مهر محكمة وسد والزفة هم جانت بس موسيقى وهلاهل وباجر نطلع كلنا نروح للشمال
من الصبح جتينا رحاب هي وبشار والولد باقين ويه وسام جانوا فرحانين مشترين التكسي الجديدة
بيبيتهم ماي طلاه دزتلهم فلوس شدة يمكن كالت رحاب اشترت بيها تكسي والبقية ضمتها الهم مصرف للولد يعني
جانت السيارت موكلش غاليه خصوصا رقم اسود منافيست
ووحيشتغل عليها عباس تكسي
وعمار السكن مالته ههه
لكن الي فاجائنا هو نور
ولا عرفتها متغيرة حيل هذه مو نور
كتلها انت منو
شبكتها وحضنتها
صارلنا تقريبا اشهر مشايفيها
عبالك كبرت عشر سنين
وضعفانه صايرة بالنص
رحاب ضحكت عليها كتكلكم قهر الرجال شيسوي هاي نور مثال حي
هي هم ضحكت كالت جات الحزينة تفرح مالقيتش مطرح
صح الضعف جان كلش حلو عليها عبالك لعابة صايرة وبينت تقاسيمها ومعالمها صارت نازكة حيل
بس وجهها جان كلش تعبان
كانت تتكلم عن حاله بالم ولوعة
عيونها محتارة ماتعرف حتى طعم الابتسامة
رامي تعين مسؤول مهم في احدة قنصلياتنا خارج العراق
وصار يتردد كل مرة انه يسحب نور
وصلت بيها المرحلة انه تطلب الطلاق منه وحتى هذا الشي مدينفذه الها
ولانه ماعدها احد من اهلها ماتعرف المن تتوسط بس ربنا مايكطع متصل بيه واحد من الموظفين باحدى الوزارات المهمة ومبلغ رامي انه ضروري يريد يلتقي بنور عنده امانه يريد يسلمها اله
نور تكول رحت للوزارة واني خايفة هذا منين يعرفني وشجابة عليه
وجه معروف والناس كلها تحسبه الف حساب تاليها هو يتصل بيه ويكلي تعالي
رحتله وهناك السكرتيرمالته راسا دخله عليه سلم بترحيب ووصى واحد من الحميات ياخذني لبيت الحجي
بس هشكل اني جنت كلش خايفة كتله شلون اروح لبيت شخص مااعرفه
ضحك وكلي لاتخافي بنتي
ابوج الله يرحمه قبل لاينعدم ترك اناة يم اخوية
وهو موصيني ادور عليج والله بالصدفة قريت اسمج زوجة موظفنا بالقنصلية
سالت استاذ رامي كلي هي بعينها هههه
رحت لبيت الحجي وقلبي يدك وارجف من الخوف اتصلت برحاب ماترد طبعا مافي يوم ولامرة دكيت عليها وجاوبت لازم تشلع قلبي
باوعت شو هذا رايح للكاظمية
نزل الحماية وهو كلش مؤدب كلي اتفضلي اختي السيارة بعد ماتفوت هنا
مشيت بدرابين البيوت العتيكة الا ان شفت رجال شايب وقور مجتف ايده ليوره واكف ويه اثنين شباب لابسين قوط
من اجيت سلم عليه بشكل مااعرف هو حزن وهو فرح
كول همزين رحت لابسة عباية
والله وجان يكلي شايفة هذا بيت ابوج
وهذا المفتاح
اني ابتسمت واتعذرت كتله لاعمو هذا مو بيت اهلي بيت اهلي اخذوه
ورامي زوجي ديمشي بالمعاملة حتى يرجعه
كلي ادري باباتي
هذا البيت هسه تشوفينه صغير كلش هذا البيت هم الكم
افتحه سجاد
فتحه سجاد ودخل العجوز ودخلت وراه
عبارة عن غرفتين غرفة جبيرة وغرفة صغيرة
مليان ترب للركب
جنه بيت اليهود الي عافوهن
كال هذه جان مسجل باسم واحد ثاني ابوج انطاني مفتاحه
الكبة الجبيرة مابيها غير بس كروتية ماتبين ملامحها اصلا
بس ضوة الشمس كوه ظهر خيالها
خليت ايدي على وجهب لا اختنك
وجانت اكو غرفة صغيرة
مقفولة بس سوى هيي للقفل وكع
وطش وياه كومة تراب
من فتحنا الغرفة جانت مليانه كتب
وصناديق حديد مزنجرة كوة تبين
كلي شايفة هذه الكتب وهذه الصناديق
هي كلها مالت ابوج وجدج الله يرحمهم
وحتى الوالدة الله يرحمها اذكر كلي مؤلفاتها يمكن بوحدة من الصناديق
كتله زين عمي شعجب الحكومة معارفة بهذا البيت
جاوبني وهو يهز راسه ماكان لله لايضيع ابدا
وانطاني المفتاح وطلع
انداريت وباوعت
لاول مرة اشوف صورة لابويه معلكة على حايط هو وصغير وجدي واكف وراه
المن الفت والمن انعدمت ومن عرف بيكم!!
وظليت اني جاهلة ومتهجولة من بيت لبيت!!
حتى ماكو احد قبل يلفيني
هييي
مسحت دمعتها نور وكالت من يومها شويه اتغير رامي ويايه
الظاهر الحجي هذا اله مقامه وجان يحب ابويه كلش
صفنت وسالتها كتلها زين ليش ابوج شكد عمره من عدموا
---نهاية االاربعينات
امي زوجته الثانية الاولى مجانت تخلف وماتت مريضة تزوج امي واني جيت للدنيا وراها بعد عدموه الله يرحمهم
امي همجانت تدرس فقه والله مااتذكر هذا الحجي بيبي تالله يرحمها كالتلي واخر شي عمة نزيرة هم حجتلي
كالتلي روحي على اهل ابوج رجعيلهم
بس والله اني ماريدهم
---عجب امج هيجي وخالج هيجي طلع ابن سوق
----هههه جدي جان متزوج 3 نسوان وحدة منهن جانت ارملة وهذا خالي من الام
---مافتهمت ههه
---شغلة ادوخ
---هذا خالي اخو امي من الارملة امي الصغيرة بين اخوانها اتربت بحضن جدي ومو ويه امها
يعني اخوها من الام مو من الاب
يعني ام امي جانت متزوجة واحد اتوفى ومخلفة منه خالي بعدها اتزوجت جدي وخلفت امي
خالي تربى ويه اهل امه وامي اتربت بيت جدي
---اي وصت وصلت خخخ
جانت نور تنتظر بعد نهاية الشهر تسافر لزوجها بس هم جانت خايفة ومترددة انه يرجع يغير رايه ويلعب عليها يوم اي ويوم لا
صارت الزفة على السريع واول مرة شفنا ولد عمو ابو حميد اجوي ركصوا بعرس ابوهم هههه
جانوا كلش مؤدبين وحبابين والصغير بيهم ممتزوج
كتلها لميلاد ليش ماتخذيه
دفعتني ليكدام وظلت تصفك وربطتها تتمزلك وترجعها
مااعرف يمكن وكتها معجبها حجيي
اني هم بوجههي رحت كعدت على القنفة بصف خالتي جانت تبجي وتمسح دمعتها بالفوطة
شبكتها وكتلها يله خالة خليها تروح وتفرح
كالت يمه مو تعودت عليها جانت ونس اليه بالبيت
يله الحمد لله تشوف خير ان شاء الله
جتي تتنحنح يمها عهود وهي تمسح دموعها شو هذه فجاءة كامت تبجي وحضنت خالتي كالتلها يمه كوليل بطلي وهسه اني اعوف كلشي وابطل ظلت تبجي
يله كولي اني ماريد اعوفج
خالتي ظلت تشهك جتي عليها ميلاد كلتلها بلا هاي الدراما رحمة لابوج
ضحكتي الناس عود اول مرة تتزوج
الرجال دينتظرج بره يله امشي
وبالفعل اتزوجت عهود وراحت لبيت رجلها
الله شاهد عمو ابو حميد واللي جان اسم ابوه سكران
جنه نصيحله عمو سكران
كلش حباب ومن يوم ماخطب عهود وهو مغرك اهلها بخيره
جان كلش يحب خالتي وينقهر عليها
حتى بيوم عرسة وصى ولده صواني بقلاوة وزلابية وصناديق ببسي جتي للبيت عدى بقية المسواك
من طلعنا شفت كريمة وبتها نورة واكفين يم الباب نورة جان شكلها مثل الي مضروبة ومكتوله والدمعة بطرف عينها جاية مبهذلة حتى حمرة مخالة
وام صلاح واكفه ورافعه تك حاجب وخالة ايد على ايد وزامة شفايفها
فتت من يمها وكلت سلام قولا من رب رحيم
فهزت ايدها وخزرتلي
افترينا بالسيارة المناطق القريبة مطولنا هواية
جانت بدايتها من سمعنا يضربون الزفات مال اعراس الي تدك موسيقى صارت يمكن مرة او مرتين
فجنا متخوفين وصلناهم للفندق ورجعنا
جانت احلى لمة ليلتها
كلنا التمينا مثل قبل بيت خالتي
وظلينا نسولف للصبح
اتوسطت امي وبصفها اختها واخوها
وتحجيلنا عن اعراسهم قبل
وشلون خالتي اتزوجت وهي جانت صغيرة
تركض وراها وتبجي وعرس خالو علاء
وضحكنا على رحاب عكس عهود
من اتزوجت عمو وسام راحت ويه النسوان وعافت عمو بالهول يسولف يسلم على الجماعة فصاح عليها كلها شنو ممصكة عفتيني ورحتي!!
هههه
جانت رحاب ناويه تزوج عباس بي يصير عشرين
وخالة عينها على بت هادي صديق فاضل الله يرحمه
كام يضحك هو من سمع وخجل دنك
راسا عرفنا هو عينه منها
واتاري هو رايدها من زمان
عمار من يمه صاح واني شوكت خوما ناويه تخليني اخر واحد
صاح عمو وسام لاتخاف زواجك عليه بس كون تعقل
وهو كله ممكل ال15 سنة ههه
فكالت حتاخذها اختها لعمار
جانت ناويه على بنات هادي
اما امي فجانت ناويه تشتري سيارة لكريم من زمان جان بودها تشتريله سيارة خصوصا ورة مالكى شغلة ويه شركة عراقنا يداوم بيها ليلي
بعدها بيومين رحنا للشمال اول مارحنا رحنا لاربيل ومناك رحنا لسليمانية
جان الجو حلو بس هم حارة
بس بالليل صعدنا على جبل ازمير جان الجو كلش حلو
والاسواق حلوة تخبل وهمه هم كانوا يرحبون بينا
كسياح
رحنا افترينا باربيل بسوق القلعة
صاير مثل النفق جبير واسع
والمحلات منتشرة على الجوانب
طبعا هو يعتبر مثل سوق الشورجة عدنا
كلشي تتخيلون بيه
ورخيص همين
السوق مسقف وكل محل يعرض شكل
من ملابس نسائية وجواريب وبصفها ابو الليف ووكرزات ومن السما الله شكد طيب صدك من السما اخذنا منه كومة على شكل علب خشبية صغيرة وبيها طححين مدري نشه هههه
ومشينا والجهال يلحكونا نشتري منهم فانيلا بالكردي
كلشي ماافتهم
همه يضحكون علينا واحنى نضحك عليهم
اما ريححة البهارات فجانت شي ثاني
حملنا جياسة جياسة خصوصا امي
تموت على البهارات
واخذنا جوز هم ويانه كومة لانه هذا اني احبه
اما خالة امل فحملت لروان شغلات وملابس مال نونو لانه هم بيها بنية ثانية خطية جانت تريد ولد وحملتلها طرشي اصفر لا الطرشي هناك طعم اخر
اتونسنا كلش هاليومين مابقينا مكان مرحناله ولامطعم يعتب علينا
لكن يافرحة ماتمت
اول مرجعنا للبيت اتلكنا ام صلاح بعركة شكبرها بالباب
لانه سعد مااجى وياناه
اتاريه قبل بيوم كايللهم انه بعد مايريدها لنورة
واتعركت ويانه ذيج العركة وخالي يكللها ميخالف ونحل الموضوع وومايصيرخاطركم الا طيب
لكن سعد طبك السيارة وكام يصيح ويعيط
مالفي موزينات وطبعا هو يفشر
وامشوا طلعوا بره
اني بتكم ماتشرفني ومن هالحجي
ظلوا هو يعد عليها وهي تصف عليه هذا الحجي كله بالكراج
جيتت عليه تريده تخرمشه وتضربه وظلت تدعي عليه وتتوعدله
ظلت المناوشات منا ومناك
الى نهاية شهر 11 صارت سكتة عند سعد مياخذها وهمه هم سكتوا فترة بعد ماههدونا فصل وعشتير
خالي سحب نفسه من الموضوع لانه اتعارك ويه سعد وضربه راشدي من اتجاوز عليه
وخالتي فد نوب تعبت
والله وصارله الموضوع تقريب اسبوع هدوء ماكو شي
هدوء ماقبل العاصفة
بهذه الفترة الصبح من جان ماعندي شغل امي جانت ادزني يمهم حتى لاتبقى خالتي وحدها وهي صحتها تعبانة جانت ظهرية ساعة 12 وبس اني وياها بالبيت
وصار صوت انفجار انرجت الشبابيك
وجمدت بنكاني كلت هاهي جرونا
ركضت على خالتي شفتها عيونها مفتوحة ومخروعة
ظليت افرك بيها كتلها مو يمنا مو يمنا
بس جذب هي جانت بالباب ركضوا الجوارين
جانت عبوة صوتية
طبعا هذا جان تحذير النا
اتخربطت خالتي بين ايدي امي جتينا تركض
واني ظليت ابجي واصيح لحكولي خالتي اتخربطت
والله وشالوها ويانه الجوارين وركضنا بيها
خطية من الفرة والخرعة صارت بيها ذبحة الصوت جان كلش قوي
وهي كل ظنها سعد صايرله شي
سعد من عرف خالتي اتخربطت والدكتور كالنا لازم نحددلها موعد نسويلها قسطرة
جان الجو توه بردان
ورجعت اني للبيت ادفيه قبل لايطلعوها بالمستشفى
جتي رحاب تلطم شايلة بسام وجاية كالت امشي عوفي البيت هسه يجون يرمونا
ركبت وياها ورحنا لبيتهم اتاريه سعد مااعرف منين ماخذ سلاح ورايح خارط الحايط مالتهم بالطلقات
وصارت هوسة شكبره ادخلوه بيها الزلم والرياجيل وحتى احنى كلنا كمنا نبات بيت رحاب لمدة اسبوع
ومنكول لخالتي لصحتها تروح
وصارت عركة جبيرة بين سعد وخالي ووسام
كوم وسام اضرب سعد راشدي واتلازم هو ووياه يكله انت الظاهر ماعندك جبير وماتعرف تتصرف تريد تودي العائلة بالتهلكة
سوايتك ميسويها بس ابن شوارع
اتخبل سعد كام يغلط عليه
وولد رحاب وكفوا ويه وسام ضد سعد
شو هذا المخبل طلع مسدس وكام يهددنا يضرب بالهوا
لكن كلها بجفة
وبيت ام صلاح الي مجازوا من عدنا بجفة
كعدوا خالي وولدنا ووسام ويه اهل نورة
واتفقوا انه خلاص يتزوجها وماتصير مشاكل وينسد الموضوع وانطوا حجاية
لكن سعد رايح ثاني يوم متعارك ويه امها بالمحل ومصيح ومعيط عليها ومهددها الا يفضحهم
العصرية من ذاك اليوم احنى هاي كله ماندي بعدين بدينا نعرف
شمدرينا رجعنا للبيت انه كلشي ماكو وخالي كال انفضت السالفة بقيت يم خالتي وجانت مغربية خالي كال اروح اجيب عشا واجي
كمنا نزجل الباب اندكت حيل طلعت افتح امي جانت رايحة للبيت تجيب هدومي وغراضي وميلاد بالحمام
فتحت الباب جان سعد صاف السيارة ديطلع غراضة واني داطب سمعت صيارة شحطت وكفت ونزلوا منها شباب مديت راسي وشاوف بس سعد ديصيح مكتوم ركضت وصيحت يبووووو
جانوا ديجتفون سعد ويحطوه بالصندوك
رحتلهم وطلع واحد من جوارينه ديلحك بيها جان اشوف واحد ملثم ضرب طلقات بالهوا وعلى بابنا اني من خوفتي دنكت ونمت بالكاع وعيني على سعد وعلى الملثن جانوا 3 والسايق
واني متاكدة الملثم جان شهيد ابن صابرين
والله واسمع صوت مسدس انرمى عليهم
خالي راسا من بعيد نازل وديضربهم
خطية مايطدر يمشي بالشتا كباته تون عليه حيل ويكوم يعرج
فجان يسحل برجله ويرمي عليهم
رموا عليه وصوبوه
من صار رمي البيوت داير مدايرينه
الي ضام سلاح من التفتيش كاموا يرنون
وسعد يصيح خالي الحكلي
من صارت هوسه عافوه جان نص بالصندوق ونص بره
شحطت السيارة ادعبل ووكع
وخالي جتي طلقتين بخاصرته
وظل ينزف
كلها بجفه ورجعت اركض على ميلاد تصيح على خالتي امي ماتت
جان الوغف ابيض تارس حلكها وامي جتي تركض جايبة توثيه وجاية حافية خطية عرفت صوت الهوسة يمنا
وكريم جاي وراها من كايليه الولد جايب سجينة مال مطبخ
والنس كلها التمت
ماعرف شصار برة
بس الي اعرفه
انه لو ما خالي وجوارينه جانوا هسه اخذوه لسعد وماعرفنا عنه شي بعد
لحكنا على خالتي وركضنا بيها المستشفيات
اي مستشفى نروحله صاير انفجار واسعاف
لحكوا بس ينطوها الاوليات واخذناها لمستشفى اهليه
وكالو لازم هاليومين نسويلها العملية
احنى هم رجعنا بيها وراجعنا طبيبها وححدلها موعد العملية بنهاية الاسبوع
وخالي الحمد لله الطلقة جتي وحده بخاصرته ووحده اعلى جتفه
جانوا متقصدين انه مايكتلوه
والا جان كدامهم
وهوهم كال من رميت مارميت عليهم ردت اخوفهم
حسيت شكولهم وهيئتهم مو غريبة
الله نجى خالي من هاي المحنة بقى بالفراش شهرين يله بتعافى
مااعرف صحته تعبت يمكن لانه نزف هواية
ورة مطلعت خالتي كمنا نتراوس على البياته وياها
طبعا سعد اخذه خالي يمه وكله ماتوصل لبيتكم
بقينا وقبل يومين من العملية بالليل اندكت الباب ركضت امي واني وراها جان كريم طالع يجيبلنا بنزين ونفط مخلصين
اتاريها ام صلاح
جتي وجانت مخرمشة وجهها والظاهر متعاركة ومكتوله
ظلت تدعي علينا وكالت البنية حتروح كله من وراكم واتعاركت هي وامي وكامت تغلط
امي جانت هادئة وانقهرت عليها
بقت ساكتى ماتحجي
بس تكللها ان شاء الله تنحل وماكو شي
بس هي حجت حجاية كالتها بصوت ناصي الا ارجعلكم اياه وصل وصل
وسوت ايدها مثل حركة الي ديثؤم لحم
ميلاد جان واكفة بالباب كامت تصيح
خالة خابري سعد كوليله لايرجع هذوله يكتلوه
هذوله حيثرموه ثرم
امي صارت عصبية عليها كالتلها لاتصيحين امج تسمع
وصدك اتاريها خالتي جانت تسمع وبالذات سمعت هاي الحجاية من عدنا من جنا نسولف شلون ام صلاح كالت الا يرجعوه وصل وصل
ثاني يوم الظهرية ميلاد جانت مراجعة اجيت اني قبلها
وامي كالت حروح للسوك وارجع احضر غراض فخرية لباجر تسوي العملية بخير وسلامة
اندكت الباب وسعد صاح اجى ديسلم على خالتي جايب الكيا وصفها بباب الكراج
وظل يبوس بيدها وانه حيجيها باجر من الصبح ياخذها
بقى شويه وهي بس تكله يمه من عمري على عمرك
يمه دير بالك لاياذوك
يمه اخذها البنية حرام عليك هيجي تسوي عندك خوات
ومن الحجي
سلم علينا وطلع
بقت الكيا بالباب
واخذ سيارته وراح
سمعنا صوت يم الباب
جانت خالتي كاعدة على الكرويته بصف الصوبة وتباوع تلفزيون قريب على غرفتها خليتها بعيد عن باب المطبخ كلت لايجيها هوا بار مناك
كالت يمه شوفي هاي سعد اخاف رجعت
ومانشوف الا انفجار طيار الكيا للسما وصار حريق وعصف انقلعت باب المطبخ طارت ليفوك وكعت بالكاع
وصار حريق اشتعلت السيارة
والبيت راسا لكف النار
ماشفت غير وجه خالتي مخروع صاحت راح الولد
