كانت ساعة ثنتين الظهر وسعد واصدقائه يلعبون طنب بالدعبال كبال البيت
جان بعده بهدوم المدرسة شمر جنطته على الصبة وركض يلعب
لابس قميصه الابيض اللي نصه جوة بنطلونه الرصاصي
ونصه طالع برة
وكل شويه ينزل ويصعده ويمسح خشمه بكفة ردن القميص
سعد ينطي يشبه ال ميلاد اكثر منةبقية خواته الكبار
بشعره الاسود الداكن وبشرته الحنطية المائلة الى بياض وعيونه الواسعة ورموشه الكثيفة
كان يشعر نفسه هو الشخص الاهم في عائلة بيت كاطع
صاحت عليه امه فخرية يجي عشرين مرة يله وكفلها بباب الكراج وجاوبها
---- شكو شبيج كلبتي الدنيا جاي جاي
ورجع يلعب وهي تصيح عليه يجي يبدل ويتغدى وياخذ صندوق الببسي الفارغ لام صلاح
دخل على السريع وسحل الصندوق من باب المطبخ لباب الكراج وهو يرد على اصدقائه انه هسه راجعلهم
وصاح على امه اجيب مليان غيره ؟
--- لا من يمر ايهاب هو يجيب ثكيل عليك وام صلاح خبصتني على الصندوك هسه اخذه مو تعوفه بصفك وتلعب
اخذ حبل مشمور على القناني بظهر الباب الرئيسية وربطه بيدة الصدندوق الاصفر
وظل يسحله , و بطاله الببسي تتراقص بيه
---خالة ..... خالة ام صلاح
طلعتله بتها جمال وهي تعيط عليه شتريد شبيك خبصتنا
--- ومنو صاحج انت وج البومه كولي لامج هذا الصندوك اللي كرعت راسنا بيه
وجتي عليه ام صلاح ولزمته من اذانه ماتكلي انت عليمن طالع لسانك طويل
- هدي هديني دااكلج
عافته وانهزم رجع للبيت يسب ويغلط عليها
وهو مايعرف انه كريمه ام صلاح حيكون الها دور مهم في حياته يوما ما !!!
وبطريقة كطع شويه ياس منا ومناك ووداه ال امه
اليوم اول احد من شبعان
حضرت فخرية صينية جبيرة تسوي زكريا
وحطت بنصها كلاص مي وبيه الياس
وماعون حلقوم احمر ابو المبروش وماعون صغير حلاوة الكاظم
وماعون جكليت ابو النحله
ووفتحت علبة البسكولاته اللي مايطلع منها شي بس للخطار وهم خلت منها ماعون
وحب وكرزات على شويه شويه ومصقول ابو اسيارات الالوان
وسمسمية وقمر الدين
وسفطت شموع داير مداير الصينية
وخلت الابريك الفخاري مالت سعد ونذرت ابريك جديد لابن رحاب
صامت عهود بذاك اليوم وخلته هم نذر عليها كل زكريا تصوم اذا صارت قسمتهتا لهذا الولد كرايب فاضل وتخلص من نزار
وعلى العصرية حضرت نفسها رحاب وجتي هي وزوجها يحضرون زكريا ويه امها
مثل كل سنة تعودت تساعد امها بنصب الصينية
واخذت وياها كارتونه بقلاوة وجان جاي نوعية جديدة اسمها زنود الست
ضحكوا عليها من شافوها اهلها شنو زنود الست يعني
وراسا بوجهها راحت ودته لابوها كلتله يابه اني اعرف بيك تحب هيجي سوالف شوف شجبتلك
هاي بقلاوة جديدة اسمها زتود الست
باوع عليها وابتسم بس ماكدر يخلي ولا قطعة بحلكه
صحته جانت صاعدة نازلة
باعت علينه جان وجهه اصفر وحتى بياض عيونه صاير اصفر
عدى الصخونة وقلة الاكل وين هذا كاطع الاحمراني اللي خشمه والسما اللي جان بعرض الباب
صار عودتين خلال هالكم شهر
حاله كلش تكسر اخاطر كلمن يشوفه
وحتى اصدقائه من يزوروه يطلعون وعيون تدمع
كلشي تغير بيه الاالعصبية على فخرية
وملحته من يريد الجكارة
يصيح مااكدر بلياها مااكدر
مع انه هي والشرب همه اللي وصلوا ليهجي حالة
فتحتله باب الغرفة حتى يشوفهم وهمه يحتفلون بزكريا
وام كاطع هم جتي وراها وكوة تمشي خلت ماعون تمر زهدي بالصينية
ونذرت توزع تمر كل سنة لكل الجيران بس كون ابنها يصحى من مرضه
لان من يوم اللي وكع بفراشه صحتها هي هم ضارت موزينه ومكابلته وكاعدة
وصارت المغربية وشعلو الشموع وطفوا الاضوية
وجانت العيون تلمع بضواها وكلمن يحمل امنيه بداخله
وجه فخرية الحزين والقلق
من باجر اذا مات زوجها منو حيرحير بيهم منو يصرف عليهم ويلتزمهم !!!
مصير بتها عهود وضغطهم عليها بزواجة هي مريدتها ولاراضية
ورحاب .... اوف رحاب كسرة الظهر
يارب يارب تتهنى ويه زوجها ويريحها وتشيل مني هم الذنب اللي حطيت نفسي بيه
زوجها اللي كان اكثرالفرحانين
يعاين على حبيبته وضحكتها المكبويته بذكريات قديمة ونذورة كومة مااتحققت
كم سنه وسنة بيدها نصبت هاي الصينية وبنفسها وزعت غراضها للجيران وكم خميس وخميس لزمت حلال المشاكل
لكن الخيرة فيما اختاره الله
ردتت ويه نفسها وبادلت زوجها نفس الابتسامه الحنونة
وهي تحس نفسها طفلته المدللة
