منتصف شهر اذار من عام 94
قبل الفجرية بدت تزخ مطر بشكل قوي
حست فخرية على صوت حركة غريبة بالبيت
رادت تكوم وتشوف شكو
كرصتها لسعة برد خفيفة خلتها تغير رايها
رجعت لفت نفسها بالبطانية مرة لخ ودست نفسها بفراشها
فراشها كان دافي ومتغطية زين ماحبت تكوم منه
بس ظلت سادة عين وفاتحة تك عين كوة
وتحاول تسمع الصوت اكثر
التفت على كيف على جهة الشباك
وانتبهت على البردة
وشافت خيال البزونة وهي تقفز هربانه من الخوف
وقطرات المطر من قوتها توصل للبرميل مال النفط
وتحدث صوت نقر خفيف
انتبهت ان هذا ضوة الكهرباء مال جيرانهم ديضرب على السياج والا الدنيا بعدها ليل
رجعت لفت روحها حيل بعد مالمت ظفايرها الطوال بصفها
ظفايرها الي غزاه الشيب وصار بلون خيوط الفجر من تشقق الليل
صفنت على الزاوية الخشب بصف الشباك
زواية غرفة نومها مال ايام العرس
هي نفسها القديمة شكد تكمة
بس يراد تصبغ الحواف من ورة المسح ويوكع المي عليها حوافها متجلغة
سالت نفسها بصوت داخلي
شكد صارعمري بله هسه
ورجعت اتعاين على الزاوية ببردتها البيضة الي تنزل لاخر حافتها وصارت تعلك جواها العبي والجبب والدشادسش الملبوسه بس ماتحتاج غسل
بعد مجانت خاصة بس لزوجها كاطع الله يرحمه
ونصبت فوكاها الراديو القديم مالتها الي جابته من بيت اهلها
اي هو نفسه رفيق الدرب الغالي
الي ياما كضت ساعات وليالي طويله وياه
ملفوف بوجه مخده خام عتيك وعليه ناايلون مضبوب حيل
والمسجل مال كاطع الله يرحمه غطاه التراب
---ينراد يلف هذا الراديوا باجر ان شاء الله الفه
وسمعت الصوت مرة لخ
فكالت هاي اكيد عهود كاعدة من الغبشة تعجن حتى من ترجع راسا تخبز يكون العجين خوش مختمر
بس يايمة هواية كاعدة من وكت ومرة لخ رادت تكوم بس ما هللها تعوف الفراش الدافي
رجعت صاحت عهود عهود هاي انت بصوت خفيف
محد رد
يكون هذا حرامي وداخل بيتنا
شيبوكون بعد
شو صفينا على قنينتين وحدة للتنور واللخ للطباخ واثنينهن طببتهن جوة
والهدوم شلتهن
خو كل خميس جانوا يبوكوهن
بعد شعدنا برة برميل النفط جبير وماينباك
اوي شيكومني
- والله كبرت شو مابيه حيل اتحرك من مكاني
سعبيش هسه
حاولت تعرف الوقت من الساعة المعلقة على الحايط الخضرة المشطبة الي كل بيت عراقي بيها ومن سنين بس تتكوك وخلاص
ظلت وياهم عمر
هم ماركزت زين
تلاثة وثلث لو اربعة وربع
ضاجت من ماكدرت تشوف الوكت اندارت وحطت ايدها جوة راسها وحاولت تغفى
حاولت كوة ترجع تنام
وهي كل شويه تفتح عينها على الشباك الي يطل على ورة البيت
جان المطر يخف ويرجع يزيد
غمضت حيل وراحت ذكرياتها للايام قبل
شكد صار عمرج فخرية 51 سنة !!
حيييل
والله حس نفسي ماعشت شي من حياتي شبالعجل كبرنا وشنو شفنا
اتذكرت طفولتها جنها جانت قبل قرن من الزمن
اتذكرت الدرابين الضيكة
وذيج الريحة الغريبة جنها ريحة عمبة معتقة من تمر بدروبنتهم للبيت
جانت من تمطر وهي صغيرة حيل صغيرة
تنام جوة باط ابوها
واذكرت ريحته
ريحة التعب والحنية
واتذكرت وجه ابوها وشكلها وهو يضمها حيل اله
جان اصلع
وعنده شعر خفيف بالصفاح وهم يزينه صفر
واليشماغ الابيض والاسود ماينزل من راسه الا من ينام
ودشداشته بزيجها العريض الواكعات الدكم منه
اتذكرت وجهه ابوها من جانت تتامله جوة ضوة اللالة مرات وضوة الشمس مرات غيرها
ذاك الوجه المتعب الي حفر تعب السنين اخاديد على وجهه حتى برزت كنتوءات
وتتذكر ملمسهم الخشن والمتعرج لحد الان
جكارته ماتوكع من حلكه الا من يغفه
ومرات بالصيف يغفى جوة هوا البنكة وهو ساند راسه على ايده وبصفه ماعون الركي الي مايكدر ياكل منه الا جم لكمه
ومن ورة ماوكعت سنونه صار اكله خبزة ينكعها بالجاي زين يله ياكلها
نزلت دمعة حارقة على خد فخرية وهي تتذكر ملامح ابوها من يصف العربانه وهي تتلاكاه
تجيت عليه
يكلها بويه انه ظهري مكسور لاتصعدين على ظهري
وهي تصرخ يابه حمال باشي
حمال باشي عفية بويه
سحبت تنهيده على ابوها
وهي ماتدري هو النهار كله جان حمال باشي للكواني
وجايه هي تصير حمل زايد عليه
ومجان يكول لا
هم جان يشيلها ويطببها وهو يسحل بالكلاش مالته
الي من جوة صاير اسود من الطين والوصخ
وجكارته بحلكه تصعد وتنزل من يصيح على جاسم يعجل العربانه ويغطيها
اول مايكعد يجيه استكان الجاي الحار حتى قبل الغدا
الف رحمة على روحك يابه
اشفت انت بحياتك حتى اني اريد اشوف
ومر الطيف على امها وهي تودي الجاي لابوها
وبيدها جيس التمرالهندي تناوشهم اياه حتى يلتهون بيه عن ابوهم شويه
تتقاسمه ويه جسومي
هو عضه وهي عضة
جانت بدرية عمرها اشهرتوها تزحف
وتطلع بره تركض تشوف صديقاتها اصابع العروس الي جابه ابوها لابسة دشداشتها البازة الكصيرة عليها
وجواها البجامة مالت جاسم
لحد ماامها تسويلها وحده جديدة على العيد
وراضي لازم دعابلة بحضنه وكاعد على الصبة وخشمه يخرخر ويمسحه بردنه
ظلت تتكلب فخرية بالفراش وهي تتذكر
وتمسح دموعها
حاولت تفكربغير شي
الذكريات هاي لا ماترجع وصارت تاذي اكثر
كامت تكرر ويه نفسها لازم باجر انطي دين ام صلاح صارله اسبوع دز عليه
واخيرا غفت عيونها
وما حست الا على صياح عهود
يمه الحكينا
لك سعد كوم
يمعودين انباكينا
فزت فخرية وهي تسحب دشداشتها المتلفلفة عليها
وركضت على بتها بين الصاحية والمو واعية
شافت عهود نص مبدلة
وهي تصرخ وسعد يفشر ويغلط
شكو شكو صاحت عليهم
---يمه بايكين التايرات اربعتهن مالت السيارة
ركضت فخرية وصاحت عزة
بس صوتها من الخرعة ماطلع
كلش انقهرت
وراحت ركضت شافت السيارة شلون مكعديها على الطابوك
وسعد فتح الباب يصيح ويفشر على الحرامية وهو يكول اعرفهم هذولة الجلاب من المنطقة
عرفت ساعتها فخرية هذا الصوت الي سمعته بالليل جان صوت الحرامية وهمه يبوكون تايرات السيارة
ومصارله اسبوعين من باكوالمسجل مالتها
---وتالي
منين اجيب اشتريله تايرات والله ماعندي
يارب انت اعالم بحالنا
ولاد الحرام مايبوكون الا من الفقير
انتشرت حوادث سرقة السيارات بشكل غير طبيعي في بغداد وكل العراق
لحد انه الحكومة اضطرت انه تحكم بعقوبة الاعدام لمن يسرق السيارات
ربما للحد من هذه الظاهرة
الناس نفسيتها تعبت كل يوم تكعد تشوف سيارتها مبيوكة
لو غراضها
ومفادت اي وسيله مااستعملوها الاهالي وهم جانوا ينباكون
راحت امه جرت سعد دخلته للبيت حتى يبدل ويروح للمدرسة بعد انباكت ماكو فايدة
وميلاد هم حضرت نفسها وطلعت بلاريوك كالبه خلقتها على الكل
وعهود غسلت كلاص الجاي مالتها ولفة الجبن الي اكلتها
وخلت وحده بالجنطة
وظلت تتنحنح يم امها
تروح وتجي
اخر شي كلتلها
---ماما اني اروح ماتريدين شي وصبت استكانة الجاي لامها وحطت الباقي من جين المصلحة العراقي كدامها وكرصة حمتها على الصاج
ظلت فخرية حاطة ايدها على خدها وهي صافنة على المجاز
مجاوبت بتها خاطت الاستكانه
وبدت تلم الظفاير ليورة
---ماما عندج فد ربع اروح بيه كروة
والله اول ماينطوني الراتب ارجعهن كلهن
--جيبي الجزدان على الثلاجة
انطتها خمسيمة وراحت
هسه وين يكفي دين ام صلاح
لفت الخبزة واكلت لكمة وكامت قفلت الباب ورة بتها
وراحت بوجهها لغرفة النوم طلعت كونية الليفة الي خلصتها
جانت يومية الصبح من تخلص شغل لو قبل ماتبدي تفتح التلفزيون وتصفن عليه وتحوك الى ان يجون الجهال
تضمهن منهم
مايقبلون تحوكها لانه الليل كله تظل تون من جتفها وايدها
طلعت الخلصانات وطلعن تلاث جياسة
وراحت نفرات ركبت تلاث كوسترات يله وصلت للشورجة
ظلت تمشي وعبايتها تجر بالطين
جانوا اهل المحلات يخلون طابوك لو كارتونات للناس حتى تفوت وتعبر على الطين والسيان الطافح
ودرابين محلات الشورجة كلش ضيكة
وعلى طول ازدحام
واصلا اتحولت الى سوق البورصة والاسود
بس كله من جوة ليجوة
مشت وقبل ماتفوت لفرع ابو البهارت
شاف حجي عبود ابو غريب كاعد ومبسط
حيل من الستينات هو هنا يكعد
نفس البسطية من ذاك الوكت هو شايب وعجوز وهسه كضيان الله مارزقه جهال مرته لو هو يمكن عاكر جانت تحوكله وهو يبيع
وجان منافسهم بهاي الشغلة ظلت صافنة عليه بهالبرد لابس دشدشة خفيفة وملفلف راسه باليشماغ وذاب على روحه قمصلة عسكرية قديمة من هاي الثخينة ام الفرو
مال ايام حرب ايران
تلفانه شويه من فوك
مع ذلك شغلات قبل تكمة واصلية تدوم عمر كامل
جان كاعد على كارتونه ومنتجي على الحايط وبصفه هم كارتونة عليها كونية جنفاص مصفط الليف عليها
كوومة خال
---شلونك حجي ابو غايب
هز براسه نوع من رد السلام
--شلونها ام غايب لساها تحوك وتبيعلها
اشرلها بيده انه اثنين بربع وخمسة بخمسية اذا تريد تاخذ
راحت وظل يباوع عليها وعيونه لاحكتها
شو كلبها انمرد عليه
رجعت عليه واخذت اربعة بخمسمية
وهي تلكط الزينات صارت عين ابو غايب على علاليكها
فكالتله مو اني عندي عدد لازم اكمله وعندي نقص اربعه
هم مجاوب ضم ايده وحده على اللخ وجر القمصلة حيل
انطته خمسمية وراحت
كلبها انكمش عليه
اتذكرت لو ابوها جان عايش جان يمكن هسه يشبهه
وجهه مابيه لحماية
كتله عظام كاعدة
راحت طبت ولنهاية الفرع يله قبل ابو محل ياخذهن منها
وظلت تتوسل بيه انه ياخذهن 2 بربع وهومايقبل يكول الا3
مايصرفلي بيش يبيعهن
عاد المحل المقابيله انقهر عليها
كد ماتوسلت
كلها تعالي حجية
لفت عبايتها وكمزت على الطرف الثاني
اني اخذهن مثل ماتريدين ورزقي ورزقج على الله
والله صدك اخذهن وسون الفين وربع شال وانطاها الفين ونص
كيفت بيهن وركضت طارت بيهن
ومن وصلت للحجي انقهرت عليه
راحت عليه كلتله حجي هاي ربع زايد انت مرجعلي
مو مالتي
عافته على الليف وراحت
لانه هو مامد ايده واخذها ظل يباوع عليها مفاهم شتكول
رجعت ومرت على سوك المخضر اتسوكت مال يومين
واخذت هماتين ربع لحم ويه السبيناغ والالة مالته
وبقى منهن على الجم فلس الي عدها يكفي دين ام صلاح وهم تشتري بربع بيض
ورجعت ذبت العلاليك وبدت تطبخ السبيناغ والتمن
وحطتله شويه لوبيا هم حتى تطلع طيبة
--- يمه والله ماطيبه بدون زفرة اللحم
عافته على نار ناصية وراحت لام صلاح
دفعت دينها
وظلت تسولف وياها سالتها عن ابنها وعرفت بيه طالع للخارج
ومطلعه قجقجي ماخذ منهم الاكو والي ماكو
وظلت تشكي من ميلاد وطلباتها الي ماتخلص
وسالتها اذا تحوكلها ليفه تاخذه منها
كالتلها ام سعد والله مايمشي الناس تتعنى للشورجة تاخذ جملة علمود تطلع الفرق
--اي والله صح الحمد لله على كل حال الله يسهلها ويفرجها
جابت البيض وجتي
جتي ميلاد اول وحدة وراها سعد يصيح جووووعان صبولي غدا
---شبيك تجوعر صاحت عليه ميلاد
---انجبي وروحي صبيلي غدا
راحت ميلاد عاقجة شكلها وهي لابسة جواريبها مال بيت
ماتسوى بعد يشغلون الصوبة بس بالليل ساعة يدفى البيت ويطفوها
صبتله تمن ابيض وسبيناغ ريحته ملت البيت
--ماريد تمن ابيض
يمه كتلج اليوم اريد تمن احمر
من البارحة كتلج عاجبني تمن احمر ولبن
جاوبته ميلاد
---يعني ماسوت راح تتعارك على اللكمه ماكو تمن احمر
اكل واحمد ربك
---مجان انت حمدتي ربج النهار كله تتعاركين ويه امي علمود الكلية واللبس تريد تصير طاكة الافنديه
ام الكمل وهي جواريبها مزروفة
---عابت شكد لسانك زفر
-ولي منا روحي سويلي تمن احمر
---مااسوي تعبانه
---كومي لا اطيح حظج
وصاحت فخرية كااافي كااافي النهار كله تتناكرون
طبت عهود وبوجهها للحمام نزعت هدومها كلها ونكعتها بالطشت حت تخلص من الطيانة الطامسة بيها
ورسا طلعت طبخت نص كلاص تمن احمر لسعد
بس حتى يخلصون من لسانه
ورة الغدا
كلمن اخذ جايه وراح لغرفته
وعاادي ميلاد لزمت التلفون وسوالف ويه صديقاتها
وكانت اقربهم الها منى
بنية نحيفة وسمرة لا مو سمرة عاديه سمرة طوخ
وملامح وجهها كله جبيرة عيونها وخشمها وحلكها
مع ذلك جان وجهها نحيف
اتعرفت عليها ميلاد من سجلت بالخط
الخط الي ظلت اسبوع تتعارك ويه امها حتى تسجلها بيه
اخر شي يله قبلت
بيت منى بعد اربع افرع من بيت ميلاد
وتدرس بقسم ثاني مو نفس قسمها
وعايدة سنة هماتين
ميلاد حست منى تشبهها بالطموح والتفكير
وجانت تحب جراتها واندفاعها
الصفتين الي كانت تفتقدهم هي بشخصيتها
ثاني يوم جانت ميلاد كاعدة بالنادي من الصبح
صافنة وتباوع على الرايح والجاي
وفجاءة شافت منى جاية عليها بابتسامتها العريضة وهي تذب الشال ورة ظهرها
---هههه ها ولج توني عفتج شبالعجل جيتي
سالتها ميلاد باتسامه وكعدة برستيج
-----مالي خلك اطب للمحاضرة وانت شعندج هنا كلما اضيعج اشوفج بالنادي هه
---ماعندي محاضرة الا ولى والثانية اليوم
---كومي عزميني على كهوة يله حبي
---امم اي ليش لا اني هم مشتهيتها
كامت ميلاد واشترت الكهوة مكرهه
ومن دترجع
--اكعدي بسرعة
اكعدي كبالي ثولة
----شبيج منى
--لاتندارين ليورة بس باعي لهيب كعد بالسرة الي وراج صار كبالي
---هههههه شبيج جفلتيني
---شربي شربي على كيف وجنه الموضوع مو يمنا
ومن اشرلج واكول تعالي كعدي يمي تجين على كيفج
همستلها بصوت ناصي منى
وميلاد طبقت هذا الشي بالحرف الواحد
وبالفعل كامت وكعدت بصفها
واول مصارت عينها بعين لهيب دنكت
وظلت مدنكة ماتعرف شتسوي
كلبها كام يدك بسرعة وانفاسها تصاعدت اول مرة بحياتها تغازل شاب
ضحكت عليها منى وخلت ايدها على حلكها
--لج ثولة شدتسوين
عمره ماينتبه عليج وانت هيج تتصرفين
---يعني شسوي
----حرني
---شنو
---اي حرني بعينه
--زمال يمج واحرن
----ولج لعد شلون ينتبه عليج ويباوعلج
لعد تشلون تكبلين
--- عزة منى انت مخبله اكبل شنو
طبعا لا
---لعد فكرج لهيب بس يشوفج مدنكه يكول ايبااه شلون مؤدبة هذه اروح اخطبها ركض؟
بابا هذولة هيجي تايب الا توكعه وحده حوك يله يخطب ويتزوج
فكرج تكدرين عليه
-كبل ؟ لا عيني لا والعباس لو تسمعج فخرية الا تحمسني حمس
---ظلي هيجي لعد محد يكلبج بس التعبانين
شوفي منو اجى
باعي عليه واتعلمي
---منو هذا
---سنان مرحلة رابعة
--شو مبهذل
---اي طكوا بضربة الكويت
---مرعبل مايعجبني
ظلت منى تنتطي نظرات وتندار على ميلاد
وميلاد صافنة على جراءة صديقتها الي عمرها ماتعرف تسوي مثلها
لكن بالفعل مرتين تلاثه التقت عيونها بعيون لهيب
وبكل مرة حرارتها جانت ترتفع اكثر
وتحمر خدودها
في حين هو اصلا مكان مهتم
الى ان قطعت منى هذا التواصل بسؤال ميلاد اذا جانت شايله مكياج وياها وبالتحديد عن حمرة كارول رقم 7
الي هي حاطه منها
جاوبتها اي عندي منها
--لج منينلج هذا الرقم انكطع من السوك بس ال12 موجوده
----هههه مو كتلج رحت لسامي ابن عمتي وترسلي علاكه كله على المزاج
---فدوة ماتعرفيني عليه
---لج دولي
---لاصدك شسويتي وياه
شوكت اخر مرة حجيتي وياه
---ماكو ابد محاجية وياه عزة لاعيني اخاف
---شنو تخافين مو ابن عمتج
---اي ابن عمتي بس يعني ممتعلمين احنى هيجي نتخابر وسوالف
مااعرف شو اخاف منه
مو حجيتلج قصته
--- اي اعرف جان يحب اختج وهي تزوووووجت واخر مرة عصر ايدج
وراها ابد مخابرتيه!!
---ابد
---زماله كل هاي المدة
----لا والله بس من يوصل عمتي لبيتنا راسا اركض افتح الباب ويظل صافن عليه يبتسملي بعيونه
وبعدين يسلم ويروح
---لج خابريه شخسرانه جلبي منا ومناك
لعد شلون تتزوجين
صفنت ميلاد انه هي بالفعل مرات هوايه جانت تريد تخابره
بس تخاف
كلش تخاف من امها من عهود اذا عرفت لو سعد يبو يريدها من الله
---اكلج واذا طلعت عمتي شكول
---سدي التلفون بوجهها
وخابري مرتين وتلاثه وسديه هسه هو يفهم وراها يشيله
وخابريه وكت يكون هو بالبيت اكيد تعرفين وكته
وبدت ميلاد تمشي على تعليمات منى وتتبعها
مرات تسوي الي تكللها عليه ومرات لا
--- ظلي باعي على فلان وعلان من ينعجب بيج ويلحك وراج عوفيه
كوومي معجبين بيج
حتى يظلون يحجون بيج
وراها تصيرين امنيه كل واحد
لعد شعبالج
شلون اتشوفيهن ينخطبن ويتزوجن
وياخذن احسن واحد!!!
فكرت ميلاد بالموضوع الى ان بالفعل
جانت ليلية توه اذن العشا
وبدت عهود تحضرالسفرة عهود
اشتروا ميز طعام صغيربالمطبخ ونصبوا على الحايط لزك
مفاصل فخرية وخصوصا كباتها صعبت عليها كعدة الكاع
واثناء ماملتهين همه
اتسحبت ميلاد ودكت على بيت عمتها
وشالته نورية اول مرة
وراسا سدته بوجهها
بعدين اسما هم شالته
وسدته بوجهها
صدك بالثالثه شاله سامي
هم راسا سدته بوجهه
كامت ترجف من سمعت صوته
ماتعرف ترجف خايفة
لو انه اول مرة تسويها وتخابر ولد
ومرتين تلاثه
الى ان اول مشاله كللها
راح تخليني اتعشى لو تشلعين كلبي
سكتت ماحجت
واتعمد ان يبرز صوت انفاسه
ميلاد كلبها دك سريع وظلت حايرة ماتعرف شتحجي
---ضحك ضحكة خفيفة
وكللها صارلي شكد انتظرج تخابرين
راسا رجعت طبكت التلفون بوجهه
صاحت عليها عهود
ركضت اكلت بسرعة
وبالها كله يم التلفون بس لايدك
وكعدت شويه صافنه على الحايط تكلب بالوايرات
وخابرت مرة لخ مشغول
اتخبلت
اكيد جان ينتظر وحده ثانية
وهذا الحجي جان عليها
اني اعلمك
وظلت تدك وتدك يجي بالعشر دقايق
وشاله
صوته جان ناصي ودافي وحنين
خبرة بعد
كللها ها هم ماتحجين
خليني اروح اكمل الجاي على الاقل
واخذ رشفة
ونعم صوته اكثر
والله اشتاقيتلج
هي اتخبلت
ورادت تصيح وتعيط عليه
بس خوفها ورجفتها خلوها بس نفسها ينسمع
رادت تكله منو هاي ياكذاب
الى ان ظل يجرجر بيها
وكالت الو
ضحك ضحكة عاليه
كللها واخيرا رحمتيني
خلي اخذ التلفون للهول
شلونج
خالتي شلونها
عزة صاحت بداخلها هذا جان يعرف اني
لو بكيفه يحجي
اتبلعمت ومجاوبت
ظل يرادد الو الو
كلتله عرفت اني منو
---نور عيني منو يعني
----هههه كذاب ماعرفتني
---وحدج بالبيت
---عزة لا امي وكلهم موجودين
--- وسعد!!!
---هنا حاولت تبلع ريكها ماكدرت
عزة لعزاج ميلاد ولج هذا يعرف انت
---بخجل سالته
شلون عرفت راح اخابرك
---اصلا جنت انتظر هذا التلفون من زمان
هوايه تاخرتي
----وليش تنتظره
اكلك راح اروح
كلبي راح يوكف من الخوف
اخاف احد يسمعني
--لاتخافين
اي احد يسالج
كولي اني خابرت عليكم
داسال على سعد سمعت سيارته انباكت تايراتها
خوووش
حست بشحنة ثقة عاليه وصلتها منه
شلون هيجي يكدر يحجي ويفكر بسرعة
شلون خلاها تطمان اله بمجرد كلمتين!!
وظل يسالها اسئله عادية
عن الدوام
وعن الكلية في حين هو كان يجمع معلومات كافية عنها حتى يروحلها للكلية
وبعد ربع ساعة تقريبا
فزت من جر السعد السماعة
وكللها هاي ويامن تحجين
-----شبيك فززتني
هذا
هذا سامي ديسال عليك
وكتله هسه يجي
---شيريد
---يسال علمود سيارتك
---هااا!!
واخذ ه سعد وكام يحجي وياه
وهي زركت راحت للمطبخ وعيون سعد عليها
يمكن رادت تصير بيها سكته قلبيه
من الفزة مالت سعد
الي رجع وماعلق بس كفخها وكالها كومي احميلي العشا
ركضت حمته وسوتله جاي على السريع
رجعت لغرفتها
ولفت راسها وحاولت تنام
ماكدرت رجعت كعدت بالصالة الي خالين بيه التلفزيون ومدات اسفتج اثنين
حتى لاحد يكعد على القنفات وتتلف الدوشمه
جانت عهود كاعدة ممدة رجلها ومطفية الضوة وكبالها علاكة الحب وكلاص جاي
---ها واني اكول شعجب نامت من وكت
---امي وين
--دتقفل الباب جابت قفل جديد وزنجيل لاخ
---شسمه هذا الفلم
كعدت بصف اختها
ومدت تكرز حب وتكوم الكشر بحضنها لانه النفاضة يم عهود
بس بالها بغير مكان حتى من جانت عهود تعلق على الفلم ماتسمع
عهود اللي بالجديد لبست نظارت طبية هي هم تبعت امها وخالتها
يمكن رحاب هي الي فلتت منها
---شو مارحت يم خالتي اليوم!!
---خابرتها العصر كالت ماعندي خياط هواية
وجنت تعبانة عبالي اغفى طلع عدنا هدوم وضخات ولازم اغسلهن
شنو ماعندج قراية انت
شة ماشوفج لامة كتاب ملزمة
اشرتلها بيدها انوماعدهم شي
وشويه جتي فخرية مدت روحها يمهم على المدة الثانية
وركضت ميلاد حمتلها الجاي
جانت فخرية ماتقبل الا باستكان
وعلى نص الفلم
كامت تشوخر عادي مثل كل ليلة
واكعة نظارتها صفح
مايكعدوها الى ان ينسد التلفزيون وتخلص علاكة الحب
يلمون ويكومون ينامون
بس ميلاد جانت بيها رهبة وخوفه
ظلت صافنة على لوحة معلكتها على الحايط
ابوها جابها من جان عمرها صغير كلش
بزونتين صغار يلعبن بطوبه صوف سمائية فاتحة
وطوبة الصوف لونه مغوشة
ماتعرف بالضبط بشنو تفكر بحجي منى
بلهيب
بسامي
لو شلون تخلص ايام الدوام وباجر شتلبس!!
وراها بالكوة يله نامت
بعدها بكم يوم
خلصت فخرية الغدا من وكت راحت للحديقة رتبتها ولمت الكواني والعلاليك وطبت
فكرت تخابر على امل تسال بيها على سمير
كالت هسه علاء يزعل يكول محد سال عليه هو بس يحب يعتب
وبالفعل ظلت تسولف ويه امل
كالتلها قدم على المنصور لانه متاخر اجلوه على السنة الجاية
خطية راحت عليه سنة كامله
وهو كلش مقهور وداخل بكابة
مطول لحيته ومايحجي ويه احد
حتى امه من تخابر مايقبل يسلم عليها
وهي كلش ظال بالها
ومتكرضمة عليه
وشايلين همه هي علاء
خايفين عليه
لايحجي لايضحك لاياكل
حس مستقبله راح
مع انه ابوه طمنه مستقبل الكلية الي رايحلها ماتقل اهميه عن كليته
وهو مستعد يتكفل بكل مصاريفه
وتسالموا ووعدتها فخرية الجمعة تمر عليهم تزورهم
ظلت وراها تفتر بالبيت ماعدها شي
ولامت نفسها اخر مرة من باعت الليفة والحياكة مجابت وياها خام تغزله
لو حايكتلي فرد قاط جاكيت مال جهال مو احسن هيجي صافنة
لو مسوي كروشات مال طبلات
اوووف من هالدماغ
شالت التلفون مرة لخ وخابرت اختها
دكت عليها مشالته
كامت تمددت كدام التلفزيون
وشويه اندكت باب الحوش
مدت راسها فخرية باعت من شباك الصالة جان شعر بدرية
بس كفشتها مبينه
اول مافتحته
مدت عينها من فوك النظارت وسالتها
---شو قافلة الباب بالزنجيل
---فوتي فوتي
غير من ورة بوكتة التايرات
شيفيد بعد
---يا شوفي شلون عايفيها على الرنكات
طبت وهي محملة علاليكها لاختها
---شكو مكلفة نفسج
---اسكتي خلي احجيلج
---خير
كعدت فخرية على الكرويته وفرغت جيس الخضروات تنظفه
وفرغت اختها المسواك بالسنك تفرقه وتغسل شويه وتضم البقية بالعلاليك
جانت لابسة تنورة سودة عدلة وقميص ردن بهاري
---والله بدرية احسن مني حافظتي على رشاقتج
شو اني فد نوب صرت
---اسمعي خلي احجيلج
قبل كم يوم اجاني كريم كالب خلقته
---اي
---يروح ويجي يحوص اعرفه عنده حجاية بكلبه
كتله احجي شعندك
كلي ماما بطلي خياطة الله يخليج
يعجبج يصيحولي كريم ابن الخياطة
رفعت راسي عليه وكتله ويمه شبيها الخياطة قابل كايليك كريم ابن الرقاصة لوابن الكو.... ة
----هههه نزول عليج
---اي والله دسمعي البطران
يكلي اي لعد شنو اني اضوج ومن هالحجي وراح ابطل اروح مسائي
والصبح اشتغل ويه خالو علاء وبعد كعدي بالبيت سدي بابج وكعدي
كتله ولك كله عمرك مصاير 16 سنة جاي تحاسبني
بس اني تردين الصدك فخرية علمته من البداية هو رجال البيت
وماحب اكسرله حجاية
كتله منين نعيش يكلي عل اساس عايشين على هالجم فلس الي تحصليهم اصلا بركة مابيهن
ويعددلي عندج فرق الايجار وعندج وارد العمارة خير من الله
والله فخرية وارد العمرة كل شهر شكل ومااكدر افتح حلكي واحاسب عفاف عليه
تاكلني وتشربني وتحلف مية يمين
شمدريني اني!!
---اي هم صدك يحجي بدرية
---شنو صدك يحجي فخرية لخاطر ربج وين يكفي
اني هم كتله دوا اختك ومصاريفها وعلاجها
ومصاريفنا واكلنا بس ملزمات هو مشتري كومة هالسنة
شيكفي
يكلي لو الا لازم علاكتين تلاثه لبيت اختج وابنها النهار كله يركض ورة البنات وواكف يم المدرسة مالتهن
كتله انجب اختي هاي هي الي ربتكم
عشر سنين انكل محد يكول خلف الله عليها منين عيشتك انت واختك واني لاشغل ولاعمل
الله يرضى عليها وعلى علاء ستروا علينا ماخلونا محتاجين
---شنو هالحجي بدرية ليش هيجي تكولين مو عيب واذا عاتبج هم حقه
---لا مو حقه فخرية حرام الواحد ينسى تعب الناس وياه
---ياناس بدر احنى خوات شنو هالحجي اكو مساعدى
والله ولامفكرة هشكل
هاج الزمي
هاي الفين ونص
خلي اكملج السالفة
شالت الفلوس وحطتهن جوة الجرجف مال الثلاجة
جانت متعلمة بين فترة وفتيرة بدرية تناوشها مبلغ هالكد او اقل
---كملي
وشصار
طلع كريم يدردم عليه ودخلت وراه فروحة بت ام الغذائية لا لا مو بتها تصير جنتها مو بله
--- اي
هاي الحجي احجيلجياه اول بارحة
مصارلي مجال اخابرج
اسمعي
---جايبتلي قطعتين قماش مال عمتها
خو انت تعرفيها
---لا مااتذكرها منو هي عمتها
---خية صبيحة ام الحصة شبيج
--مو اني اخذ من الجمعية مو من الوكيلة بس اني اعرفها لاكت ماعرف ولاشايفة جنتها
والحاصل
---اي اسمعي جتيني لابسة جبة ومحنكة وحتى حواجبها مامسويتها عود حرام يعني
كالتي خالة هاي عمتي دزت القم ش مال دشاديش الاثنين الي كالتلج عليهن
كتلها اي حبيبة عمتج وصتني واتذكر الموديل
شو هاي دنكت عليه لانه ام سلام هماتين جتي وراها وكاعدة
كالت هي وصتني اشتريلها نص مترة زايد حتى تخيطيهن عريضات
بس اني خرجت الفلوس ومابقى عندي فجبت على كد التفصال
عود كوليلها خلي تجملهن ماكفى القماش مابيه عرض فدوة لعيونج
نزعت النظارات
واني اصلا ماطيقها
هالمتنها وهالعرضها
تفوت صفح من الباب والنهار كله تبجي جوعانين
كتلها سمعي يمه
اخاف تشوفيني مفرعة
والبس دلع وشعري هذا الابيض والمصبوغ هماتين طالع
ومااصلي ولا اصوم الا برمضان
وازيدج علم بين سنة وسنة اصوم
بس تره اني اخاف الله اكثر منج
زين
لايوم بكت ولاغشيت احد
فلس احمر ماقشمرت الناس
مو مثلكم
مسوين التقوى والايمان والحلال والحرام
قاطعتني كلتلي خاله شبيج
كتلها حجاية بكلبي واريد احجيها جا وكتها
ترة كل هاي ماتفيدكم
هالهوسة والقشمريات
ليش مانعرف تشربون الجاي وتجففون البثل وترجعوه ويه جاي الحصه
لو مانعرف تروحون تبدلون الزيت بالدهن !
لو الطحين تشترون نخالة من ابو العربانه تخبطوه
هذا كله حرام
ونار ببطنكم يصير
----يا بدرية هيجي كتيلها عود صدك هيجي يسوون
--- والقران فخرية واكثر
وج عيني حسرة عليه اخذ كيلو منهم اذا مو الميزان خسران
المهم
كامت تصيح فوكاها
تكول واني شكتلج
قابل كتلج روحي بوكي البنك المركزي
هي نص مترة ماتسويها ماباللازم
وظلت ادردم عليه وطلعت
وام سلام
كلما احجي حجياة
تكلي عفية عليج اي والله صح
هههههه
----ههههه عليج سوالف بدرية اخاف تسويلج مشكله هاي
---دخلي اطير
شسويلها
المهم اني هم كلت خلاص بعد بس اسلم هاي الهدوم الوجبه العندي وبعد ماخيط
---يااا صدك تسمعين كلام كريم!!
---خطية ماريد اكسر بكلبه
وصدك فخرية مايجيبن همهن
المهم رحت ثالني يوم للمنصور
ليلتها ماكدرت انام للصبح
شسوي وشلون
والله رحت لام رنا
تذكرينها
شو هاي استقبلتني بوس وحضن
---خوووش والله زين شذكرج بيها
---ماااعرف والله هيجي جتي على بالي
كلتلي تعالي انطيج عندي خياطة ستروجاكيتات
مال ناس واصلة وطاكة
بس بشرط اخيطهن بالبيت
هسه جاية مودة الستر
---زين
--- كتلها ليش لا
ماتصدكين فخرية تخيط السترة من 8 الاف وفوك
---صدك؟
خياط ب8
---اي والله ولو تشوفين القماش من هذا الي يخبل هو والبطانه القماش الاصلي مالت الاول
انطتني قطعتين وكالت هذني اريدهن عكب باجر
التكسي عليج يعني عليه
والخياطة بالنص
يعني الي اربعة كل واحدة
---نعمة من الله
---طبعا
لفيتهن جبيتهن وبوجهي رحت لبيتي
---بيتج ليش
---خايبة مو ناسية خياط هاي الستر مال موديل قبل
رحت جبت البرد جنت ضاممتهن بصندوك بالطابق الثاني ويه شويه غراض هيجي
واول ماشفتهن اتذكرت
واليوم اول ماراحوا الجهال وديتهن والله وانطتني وجبه كل اسبوع اسلمها بس حسب
بيش ماتحسبهن بالنص
-- وعسى ان تكرهوا شيئا وهو خير لكم
----اي والله دادة
ماتدرين شكد فرحت
دخنت جكارتها الثانية وحمت الجاي
اتسوكت وكلت اخذ مسواك لعلاء هماتين اسال على سمير بالي يمه
وظلن الاخوات يسولفن الى ان جتي قيم
وبقية الجهال اتغدوا كلهم
جانوا فرحانين يتقاسمون اللكمة واللمة تجمعهم
ظلت ميلاد كل يوم تخابر سامي شي ربع ساعة وتسده الى ان
في يوم بالليل خابرته ميلاد كالتله باجر حروح ويه منى لجامعة بغداد
علمود احتفالية يوم الجامعة
راسا كاللها لامتروحين
انعقجت وجاوبته
---ليش عفية مو اتفقت ويه صديقتي
--كلت
يعني لا اصلا سعد شلون يخليج تروحين
---وسعد شنو ظلت تتنعوص عليه وضاجت
بس هو جان مصر ويحذرها انه ازدحام وهوسه واحتمال تتعرض للتحرش وهو مايقبل عليها
مثلت عليه دور الضايجة وزعلانة
لكن بالحقيقة هي بداخلها جانت فرحانه تشوفه يغار عليها ويحاسبها وهو هم جان يتقن هذا الدور بامتياز
ثاني يوم اتفاجاءت وهي واكفة ويه منى برة ينتظرون الخط
سيارة سامي مرت من كدامها خطف بس مشافها
جانت الكلية شبه فارغة اغلبهم خلصوا محاضراتهم او عافوها وراحوا لاحتفالية يوم الجامعة وصاحت
--عزة عزة ولج هذا سامي شجابة واندارت على السيارة المنتجية عليها وشخطت الحمرة اطوخ على وجهها وعدلت شعرها
وهالمرة لمحهم سامي ووكف على الجهة الثانية من الشارع وعبر عليهم
سلم على منى الي ظلت صافنة عليه ومانزلت عينها
واقترب من ميلاد وكللها تعالي اوصلج
خجلت وظلت تتعذر منه بحجة حيجيهم الخط بعد شويه ومايصلح تعوف منى
كللها كوليلها رايحين لبيت عمتي
وبالفعل لاف سيارته واجى عليها صعدت ودعت صديقتها
---عبالي رايحة ليوم الجامعة جان عرفت حسابي وياج
انطلق بسيارته وهو يخطف نظرات سريعة وخاطفة عليها صفح
هي من خجلها جانت لو تندار لو تندك
وهو يلمح منها لقطات سريعة
جانت لابسة قميص فيزو وميزو اسود وبيه نقط بيض
وتنورة سودة قصيرة لما كعدت وصلت لركبتها
انتبه على رجليها المتينة والبيضة عكس اختها رحاب جانت سمرة وامه تعيب عليها رجليها لكلك
ظلت هي تباوع عليه وتندار من تحجي كلمة كلمتين
فسالها
---هاي صديقتج منى ؟
---اي هي
--تلعب النفس
---ههههههههه
ضحكت ميلاد ضحكة كلش قوية وحطت اصابعها على حلكها وهي غاصة بالضحك
اندارومبتسم
عليها
--- شبيج!
جان يحاول ان يسيطر على نظراته الها حتى لابيبن صاحب عين وسخة
فجان يباوع على عينها بابتسامة دافية وحنينة
----شبيج ضحكتي والله موحلوة
مااعرف شلونها زركة على خضرة مصفوكة صفك
---يعني انت هيجي تشوفها؟
---اي طبعا ووكحة عينها كويه
واندار ومد راسه من الشباك يجيكك الي وراه بطبيعة هو الفها
وكمل يعني لييش مستغربه ليش تشوفيها حلوة
---لا استغربت لانه
---اي
---هي تشوف نفسها احلى مني
---هااا لا والله وضحك ضحكة استهزائية
تطلعت ميلاد اله وهو يسوق وتاملت وجهه الاملح وملامحه الشابه القويه وشعرايات صغيرة تساقطت على جبينه المتعرق
وساعديه ا لمتينات
ونظراته الغامضة وابتسامته الحنينة
رجل بكل معنى الرجوله الي كانت تحلم بيها
او الي كانت تشوفها
وراسا اندارت حتى لايحس
وباعت على الشوارع المزدحمة وجال سؤال في خاطرها ليش
ليش رفضته رحاب !!
معقوله شافت فاضل احسن منه !!
شلون يعني!!
او ربما حتى يكون هو قسمتها
ونصيبها الها !!!
---شبيج وين صفنتي
---يعني انت تشوفني حلوة؟
---حلوة!!
لا طبعا اصلا بعيني حلوة وتخبلين
ابتسم الها وخلا عيونه حيل بعيونها
وتركه نظراته الواثقة القوية تعانق نظراتها الخائفه والخجلانه
---سامي عفية ذبني براس الشارع اخ
---شنووو
مو عيب بله
شبيج بابا اني ابن عمتج شنو خايفة او مستحية
اطببج للكراج وانزل اسلم على مرة خالي واروح
يجوز اتغدى يمكم شنو طابخين
---سكتت وماحجت بس ابتسمت
حسسها انه تعرفه من زمان
ظل يسولف وهي صافنة
منين جاب هالشخصية الجذابة
سامي الي مجان يعرف يكول السلام عليكم !!
وانتبهت الى اخر جمله كولي شفتج صدفه وعرضت عليج اوصلج
سالته
---سامي صدك انطيت لسعد فلوس التايرات
---اندار عليها وباوع بجدية
لخاطرج والله الاهو ميستاهل بعده مراهق وشو حسه مايعرف يتصرف
صفنت وماحجت الى ان وصلت للبيت
وحمدت الله وشكرته انه مجان اكو احد بالبيت بس فخرية
اللي اكيد ماعبرت عليها هاي السالفة
من يومها خلت ميلاد جوة المجهر
وتحت التدقيق
راسا لعب الفار بعبها
الخميس اللي وراه
استلمت عهود راتبها مال تلاث تشهر
الراتب الاسمي تلاثه الاف وربع
ووياه مخصصات منا ومناك
ومال 3 شهور انطوها دعش الف وكسور !!
من فرحتها اول راتب تستلمه نزلت هالمرة بالسوك
وراحت تسوكت كعك وغراض مال كليجة وشويه فواكه وريوك بيض وشويه كاهي وكيمرريوك لباجر
من رجعت شافت امها فاتحة باب الكراج وواكفة
خطيةظال بالها عليها اتاخرت
ولاول مرة انتبهت على بتها
جانت عهود كصيرة وسمرة ولابسة ربطتها الكريمية وتنورتها الكبس العريضة وجواريبها البيجية والحذاء الاسود المفتوح
انقهرت عليها وهي شايله علاليكلها وتضحك لامها
---ها ولج اتاخرتي
---ماما استلمت راتب وبوجهي رحت للسوك
اليوم لازم نسوي تعلولتج بالحديقة
وذبت علاليكها وراحت خلت هدومها كلها بالطشت مثل كل يوم اذا مو طين فاكيد تراب
وخابرت على خالتها تمر عليهم
وفرشت فخرية الحديقة وركضت ميلاد تساعدها
وحضرن الكعك ابو السمسم والدهين والجاي الحار ونازلة الفواكه الصيفية كله على كيلو كيلو جابت شويه تفاح ابيض شويه مشمش شويه عنب
وشويه جتي بدرية وقيم
وراها بساعة انددفع باب الكراج وفاتت نورية لابسة جبة بيجية جديدة تلمع لمع
ودخل وراها سامي وعينه على الكاع يسلم عليهم وحط العلاليك وراح
حتى مارفع راسه
بينما انتفضت ميلاد من يمها
وفخرية عين على بتها وعين على الباب
جانت نورية هم جايبة فواكه ومسواك لفخرية
الي من فرحتها صاحت خير ماشا الله كله خير
ليش متعبة نفسج
كومي ميلاد
اخذي العللاليك جوة للمطبخ وخابري على رحاب بلكت تجي!
وقبل ماتكمل جملتها
عبوسي ابنها دفر الباب حيل برجله ويصيح اني جيبت بيبي ورحاب تضرب هورن حتى يفتحولها الطلاكتين مالت الباب
جانت نورية اول مرة تشوف رحاب تسوق
وظلت تصل على محمد وتصيح صلوات
ركضوا التواام مالتها بعمر تلاث سنوات وراسا راحوا على صوندة الحديقة جانت فخرية عايفتها تسكي حواف الحديقه
رحاب من يمها هم جايبه عثك موز
بوستهم وتضحك انه صديق عمها جايبلهم صندوك صوغة من عمان جابتلهم جيس
وجيتوا عليه
مجان اكو موز بالسوك واذا اكو فالكيلو باربعة وخمس الاف غالي يعني
ميلاد كامت تضحك كالت يعني مايصير واحد ياكل الكشر وياه هههه
فجاوبتها رحاب وج مو عبوسي اكلها هي والكشر يكلي ماما شو هاي مرة ويابسة مطيبة
هههههه
كلهم ضحكوا عليها
وفتحت نورية موضوع ويه فخرية كالتها جنا اني وسامي اليوم نحجي بموضوع خطوبة
فزت ميلاد وهي تسمع عمتها شتكول!!!
