وللنفس ماتريد اما ان تحصل عليها...او تتنازل عنها بارادتك قبل ان تجبر على ذلك قسرا ...
فيصبح الالم حينئذ لايطاق
يا نفس لاتتوقي لما لاترين ...
امتدت المشكلة هذه المرة لابعد من حدودها ...
داست عهود على الوتر الحساس
على الرغم من مرض نورية اللي مشفع الها تتجنب ردة فعل زهير وتتلقى الرد العنيف منه ...
جن جنون زهير عمن سمع تهديد عهود اله بفضح اشياء هي ماتعرفها اصلا لكن خمنتها ولمحت بيها ...
حاول سامي يدخل يفاكك ابوه عن امه وشاف امه شلون اتكومت جوة ايده ...وهو يكيل الها الكم الهائل من الضربات
فقد اعصابه ودفع ابوه وصار يتعارك وياه وهنا اتسعت دائرة العركة ونمدت الى انه حتى اسمهان انضربت...
ونزار كان يتعارك ويه عهود عافها وصار يبعد سامي عن ابوه ...
انهزمت عهود وطلعت بطرك دشداشتها
جان شتا ولابسة جواريب تك منها وكع
وانكفش شعرها بالزايد حتى الدم اللي جان طالع من حلكها وعيونها المتزوركة
صح هي موكلش طويله وماتوصل لنزار...لكنت كانت قوية وردة فعلها سريعة ماتسكت عن اي ضربه ...
هي هم تركت اثارها على نزار...
انهزمت عهود بتك جواريب وتك نعالات
وعافت البيت يشتعل واحد يضرب باللاخ
منا سامي وابوه يتعاركون ومنا نزار يتعارك ويه سامي
جانت مغربية والدنيا ظلمت
ظلت تركض الى راس الشارع وشافها واحد جيرانهم ...هو ماعرفها بس عرف حالتها صعبة وعرض يوصلها لبيتهم
الرجل كان جبير بالعمر يمكن شويه اكبر من ابوها
من شافت شيباته شوية اطمانت وصعدت ليورة
ظلت تبجي والحجي يسكت بيها ...
دلته على بيتهم وشرحتله انه عيالها كتلوها مايريدوها ...
وهو يحاول يهديها عين على الشارع وعين على المراية
وعهود منهارة من البجي
واول ماوصلت للبيت ...
جان سعد راجع من ام صلاح جايب علاكة بيها جم شغلة لامه ...
ومن شاف اخته هيجي ركض للبيت وصاح عليها لحكي يمه عهود كاتليها...
فخرية ركضت على الصبة تريد تشوف شنو الصاير والحجي واكف ينتظر ...
صاحت عهود لحكيني يمه بسطوني وكتلوني لحكيني ...
فخرية خرمشت خدودها بلا متدري وهي تركض على بتها
ولج بمه هاي شنو شجرالج ...عزة لعزانا شبيج !!
وكعت عهود بحضن امها ...وظلت تبجي وتشهك
يمه عمي زهير وولده ملخوني دوسوا ابطني وهي...
باعت فخرية على الرجال العجوز واكف ينتظر يريد يعرف شصاير
راحت فخرية واتشكرت من عنده حتى يروح ...
وبعدها توها طبكت باب المطبخ
اندفرت باب الكراج
وجان نزار...
نزار بس مو هو بغير شكل تماما
المجروح الي انذبح من الوريد للوريد...
لفى يصيح عليها
لج عهووووووود اليوم دمج على ايدي
انت ولج انت هيجي تسوين بيه
هسه ترجعين ويايه للبيت لو موتج على ايدي
ركضت فخرية عليه تلزمه وتهديه
دفعها حيل ووكعها على الصبة ...
جتي ميلاد تشيل امها كالتلها روحي خابري خالج علاء وكوليله على كلشي
وكوليله هسه يجينا وخابري رحاب هم
خطية سعد هو الوحيد اللي وكف بوجه نزار الهايج ...يضرب بيه ويصيح
___لك انت تضرب امي وتوكعها وخر اطلع من بيتنا
دفعه نزار وضربه جلاق وهو يدور على عهود اللي ركضت
ختلت بالحمام وقفلت الباب ...
ركض وراها نزار وفخرية مجلبة بيه تتوسل بيه يعوفها
بس هو اصلا مجان شايف احد كدامه
يصيح ويعيط افتحي الباب لا اكسرة وظل يدفر بيه ...
وفخرية وسعد مجلبين بيه ويحاولون يلزمون ايديه ورجليه
وهو يردهم و يدفع بيهم و ويضربهم...
سعد كام يصيح ويبجي
عوف اختي
لك حقير كلب ابن الكلب عوف اختي معليك بيها
اندار عليه نزار و
شاله وركعه بالكاع ...
واخر دفرة من عنده انكسر القفل ...
وجيت على عهود وهي خاتله بالزاويه اصيح وتعيط
وجرها من شعره وبده يسحل بيها
وامها ماتعرف ساعة تجر بتها من ايدها ودشداشتها وساعة تجره اله وتريد تدفعه
وطبعا عهود جانت تقاومه وماخلته يطلعها بره ...
واخر شي من سعد جيت عليه من ورة ضربه بحجارة ..انفشخ نزار
من شاف دمه ساح
راح عليه ولوه ايده حيل خلاه يصيح ويعيط ويبجي
وجتفه من ورة وظل يضربه جلاليق وذبه بالكاع ورجع على عهود
راسا ركضت دارت نفط الجولة على روحها وكلتله بس تلزمني احرك روحي
واموت وماارجع وياك افتهمت
فخرية اتذكرت نفسها ...
من شي خمسه وعشرين سنة هم هيجي سوت هددت عمتها ونورية
من خمسة وعشرين سنة نفس الشي سوت بيها نورية !
كعدت وظلت تلطم والناس الجيران التموا
ليلت الدنيا واظلمت حيل
والجو بارد ثلج
والتموا الجيران عليههم وخصوصا الولاد الصغار يم البيت
والكبار من بعيد لبعيد يباوعون
جان ضوة الشمعة الخارجية يضوي الكراج لنهاية حد الحديقة
والسيارة اللادة التكسي الواكفه بالباب حجبت المنظر من جوة
بس يسمعون صياح وعياط
باوع عليها نزار كام ينفر بخشمه
وبسرعة ركض عليها وجرها سحللها
لانه اصلا ماعدها لاجداحة ولا شخاطة
وجرها وهو يعيط عليها
اليوم ترجعين ويايه يعني ترجعين
اريد اعرف حجاية منو تمشي عليج
ورجعوا جيتوا عليه اهلها
وفخرية تتوسل يحلها ويجوز منهم وظلت تصرخ عاد هنا ادخلوا شباب اثنين وحاولو يهدوا ---خويه انه مايصير هيجي ومهما كان هاي مرة لاتخلي عقلك وياها
وهمه دفعوا
وهو يكللهم معليكم وخروا منا هاي مرتي
--واذا مرتك اخويه مايصير هيجي تسوي تره عيب والله
وكفت سيارة لخ ورة التكسي مالتهم
نزل علاء وجان ها شويه يعرج
اول مالمح نزار وانتبه على الوضعية كام يصيح عليه
فخرية كاعدة هدومها مشكشة هي وعهود والولد لازمين نزار يحجون وياه وهو مدمى وهدومة متكطعه
ركضن بدرية وامل والجهال وراهم
لموا فخرية وجهالها وطبووهم للمطبخ
راح علاء على نزار
و لزمه من ايد ودفعه وهفة بوكس خفيف
ارتد بيها ليوره
وظل يغلط عليه انه جاي يتسبع على نسوان
--- لك ماتستحي فاضح نفسك وعرضك كدام العالم
لك عار سز تتسبع على النسوان
--- جاي عليه خالوو عود اسالها الطايح حظها شسوت اليوم
صاحت من يمها عهود
انت ماتفهم مااريدك طلكني مااريدك
--- طلاك ماطلك والله الا اعلكج واطيح حظج
--- امشي روح منا يله ولي يله
امشي روح جره علاء وصعده سيارته
جروه الشباب وكعدوه بسيارته وطلعوه
راح وهو مايعرف ليش هيجي سوى وشلون وصلت الامور الهشكل
كامت تبجي عهود وهاي كاعدة بنص الصالة
مااريدهم مااريده ماريد ارجعله
والله اذا ترجعوني ارحرك روحي واخلص منكم ومنهم
محد حجى وياها شي بس هدوها
بدرية وامها
انقهرت فخرية على بتها
بعدها صغيرة شنو شافت من غمرها هيجي يصير بيها
هم تالي تصير فخرية ثانية
اخذتها خالتها وسبحتها من النفط وهي تعيط مثل المتهسترة مااريدهم مااريدهم
وامها تبجي تواسيها امل
هم على حالهم وهم سمعتهم
واول تالي صارلهم سنين بالمنطقة محد سامعلهم حس
هاي اخرتها هيجي ينفضحون بالمنطقة ويطلع حسهم
الليله جانت كلش صعبه على الكل
وحتى لاتزيد المشاكل وحتى تهدى الامور ولاتتعب فخرية
علاء شافها اصفرت وشفتها ابيضت وعيونها مثل اللي جحظت بره
خاف عليها وعلى صحتها
فطلب منهم محد يحجي بالموضوع
كامت امل سوت عشى للجهال كلهم وعلاء اخذ سعد للمضمد اخاف ايده تورم لو شي
وفخرية كل ما تكوم وتكعد تدعي عليه وعلى نورية
وبقت عهود وحدها بالغرفة تبجي
دخلت عليها بدرية وبدلت هدومها وسوتلها جاي تعرف بيها يريحها الجاي مثلها
واختلن بالغرفة وحدهن
اول ماكعدت
ابتسمت وياها حاولت تلطف الجو وياها كالت
--- والله يمكن حجي اكعد وياكم على اقلها مااضطر ادخن بالحمام هههه
هنوبه علاء فد نوب مسويها
كافي امي كافي دموع
وورثت جدارتها ومددت رجليها كعدت بصفها بس على الكاع
ركضت قيم كعدت بحضنه
دفعتها امها وكلتله هو اني طافرة روحي وين مااكعد تلزكين بيه شو دروحي شبعراتج صرتي ضاجت قيم طلعت وعافت باب الغرفة مفتوحة
بدرية وامل جانوا لابسين اسود حالهم حال اهل البيت كله
جانت عهود مغطية نفسها بالبطانية وتبجي
وخالتها تحاول تهديها
وجان الوقت بعد نص الليل
جرتها خالتها وكعدتها بالكاع حتى تاكل لكمه لو تشرب جاي حتى بلكت تفك نفسها من البجي
جانت فخرية ويه امل بالغرفة مالتهم
وعلاء نايم بالصالة
ظلت فخرية تتسنط على بدرية وعهود بلكت تحجي شصاير وياها
بس مصار اي حجي مهم بيناتهم
الا ثاني يوم على الريوك
حاولت بدرية تشاقي اختها
بيومها الصبح
فخرية قررت مادز سعد للمدرسة اخاف ماله خلك شي
فظلت تضحك عليه بدرية تكله هابسطوك البارحة اني واني خبصتنا ههههه
وهو يباوعلها بطرف عينه ومدلغم لازك بالصوبه ومن جوة لجوة يخزرلها وهي تضحك عليه
وامه لفت لفة الجبن لميلاد وراحت
وعيونها مورمة من البجي
ولساها الدمعة بطرف عينها
كلتلها تذكرين فخر من جنا نروح للمدرسة واحنى صغار ينطونا على الريوك حليب مكثف
وصمونة وشنو بعد يمكن برتقالة
--- اي برتقالة
شذكرج بيها بدرية
اوووف يمه الله يرحمج
شذكرج بهالسوالف بدر
--من الضيم اللي احنى بيه نتذكر ايامنا الحلوة
---اي والله
كعدت فخخرية بصف الصوبة اتربعت وخلت ايديها بحضنها
شكد جنت احب الحليب المكثف مالتهم امل انت لحكت عليه!!
--- اي والله طعمه يخبل لساه بحلكي شلون ملحكت عليه
امل هي سوتلهم الريوك وجهالهم اليوم كلهم بقوا بالبيت مراحوا للمدرسة بس ميلاد
فصبت الجاي للبنات ووزعت الصمون
وصاحت على علاء يجي يتريك اذا كاعد
علاء صح جان مفتح عينه ويسمعلهم بس ماتحرك من مكانه
كانما كان مكسر هو اللاخ وماله واهس بشي
--- تدرين اني جنت مااغيب حتى لاتروح عليه الوجبه هيجي جنا كالت فخريه وهي تفرغ جايها بالماعون
واركض فرحانه بجنطتي الكونيه
--- لاعيني اني جانت جنطتي حلوة انت كونيه كالت بدرية وهي تشاقي اختها
اخر ايام كاموا يوزعولنا جنط
جاوبتها فخرية
--- بس انتوا ماكو قبل هاي صارت جم مرة مو !!
من جنت اروح للمدرسة بس اركض واذا شفت ربل يمشي بالشارع اجلب اركض وراه
واغني واصفك وهو يمكن جان يغلط عليه هههه
حيل وين جانت
والله ايامنا حلوة لاحرب ولا دمار ولا اسير ولاشهيد
طبت بدرية على عهود حتى تجيبها وتجي تتريك وياهم
جانت الكعدة حلوة
باردة والدنيا تمطر برة صوت المطر القوي ويه صوت الكتلي يفور المي بيه مثل النغمات الي تطرب الاذن
وهنا
ظلت بدرية تلح عل عهود حتى تحجي وادخلت فخرية بالموضوع يريدون يفهمون منها هي ليش هيجي تكرهم
ليش كل ما احد يجيب طاريهم تكول اركرهم ومااريدهم مع انه زوجها جان يكول احبها واريدها
جانت تبجي وهي كاعدة على الصينية ولافة راسها بالفوطة
باعت عليها امها
حست عهود كانما كبرت شي عشر سنين
مو هي نفسها
عهود ال كلها حيويه وضحك وشقى ولسان
كالت ---
يمه من اول يوم مارادوني كرهوني
--- ليش يمه مو هاي عمتج شلون تكرهج
---عمتي هه
بعدني عروسه وسوت العملية وكلت ميخالف خطية ماتتحمل وجع
شو من اول يوم العملية البيت كله براسي وماحجيت كلت ميخالف الشغل ميموت احد وتعرفيني ماضوج منه
بس شو اول مابدى عمي زهير
يشمر عليه الغراض من يريدني اسوي شي
يتنك عليه بالحجي عبالك وحدة خدامه
والله هم كلت ميخالف يجوز طبعه هيجي اتعلمت على طبع ابويه
بس لا والله شو ويه اسمهان
تعالي باباتي
وروحي باباتي
ادري شنو اني صخرة !
-- معقولة زهير يسوي هشكل سالتها بدرية
--- اي والله خالة ودموعها كامت تنزل
جنت اكول لنزار ابوك هيجي وهيجي يكول ميخالف مثل ابوج اتحملي
نزار ابوك من يتغدون وانت مو هنا مايقبل عمتي تصيحني اكل وياهم
يكلي لا انت متوهمه
وهو يعرف ابوه ومع هذا شكد جنت اشتكي مايسوي شي
من صارت عمتي زينه ونكعد سوى ناكل طبعا تنكلب الدنيا اذا صبيت وحدي واكلت
يلزمني بجريدة
احنى عائلة وحدة ومتعلمين على الاصول
محد ياكل وحده
مو عيب ماتنتظرينا
خجلت وماحجيت كتله عمو اني شفت اسمهان صبت واكلت ونزار مو هنا وصار بالاربعة ومااتغديتو شمدريني
وتوبت من ذاك اليوم اصب وحدي كلت ليش اجيب لنفسي حجاية علمود الاكل نمونه
انوبه شيسوي من نكعد سوى ناكل
يقسم الدجاج لو السمج ويحط كدام الكل الا اني
واسكت مااحجي اباوع على رجلي ملتهي بماعونه
ولاعبالك مرته كاعده
يوزعلهم ويطكلهم ببسي كل واحد بطل الا اني
وكلها تسوي نفسها ماتشوف ولايمها
طبعا لانه كلشي بيده
هو يسوي كلشي مايقبل احد يمد ايده على شي الا هو
لذلك مايحبون سامي
لانه يتصرف بكيفه
هم جنت اكول يله عهود اتحملي ماتسوى نمونه
بس بالحقيقة جنت انقهر جان بكل طريقة يكسر نفسي
اي شي اسوي يخجلني
تكولين هو عمتي مو نورية
اي شي اسوي يعيب عليه اذا هو واذا هي
اذا طبخت
يكلي لا لا هذا مايسموه اكل باعي على عمتج واتعلمي منها شوفيها شلونها
اتعلمي منها الطبخ والتظيف
والله والناس كلها تعرف اكل عمتي نورية ماصخ ويلعب النفس حتى سامي يكللها
وهي تتخبل من هالحجي
وهاي كل يوم شغلة
هاي شنو الهدوم مو نظيفة فريها بالغسالة قاط لاخ
هاي شنو القمصان ممكويه سويها قاط لاخ
مااكدر اوكف على صبة لو اكعد بحديقة اذا هو واذا مرته طبي جوة عيب سياجنا ناصي
شيكولون علينا
ها واي شي يصير يكلي ليش انتوا هيجي تسوون بيت اهلج؟
تكولين عبالك احنا تربينا بالترعة وهمه متربين بالقصور
والله جنت احس بيه يتخبل مني
وجنت متاكده زوجوني وهو مراضي
بس يخاف من مرته مايحجي
--- ونزار مايحجي وياهم مايكول شي سالتها خالتها
--- شكد جنت احجي وياه يكلي يله ميخالف واهلي هسه يتعلمون عليج وتتعلمين عليهم
بس والله ابد مسوالي شي
--- لعد يمه شلون اجى هنا واتوسل واحبه واريدها
--- اي يمه يحبني بس من يريد حاجته يكضيها يدير ظهره ويخليني عادي
ولا عبالك اني بشر الي احتياجات لخ
واذا يريد يسويلي شغله يسويها بالختلة
واذا عرفوا بعد شدوا روسكم يالكرعان ها تلاص شهور شوفوني الويل
طكت روحي
اكله نزار لك انت ملازم جبير وين شخصيتك وين الهيبة
يزعل ويفشر عليه
يكلي تريدين اتكابح ويه اهلي
تريد تسوين مشاكل بيناتنه ؟
يابه لاتكابحهم بس اوكف ويايه
ولايمه الموضوع
--- سودة عليه يمه وليش ماكلتي
--- يمه اسكتي يمه كم مرة خابرتج وحجيتلج جنت تكولين ميخالف اتحملي اني هم هيجي جنت
كسبيها لعمتج
لحد ماطيحوا حظي
يريدون كلشي بكيفهم
سكتت بدرية وماحجت وتعاين على فخرية وكانه تلوم بيها
علاء جان يسمع من بعيد وساكت مايحجي بس الحجي كله جان يتسجل يمه
فحتى تطلع فخرية من اللوم والعتب عليها
حولت الملامة على بتها سالتها كلتلها
--وانت ليش جنت تاخذين حبوب منع حمل ومنيلج منين دبرتيها
--- يعني شنو ليش يمه
يعني اني اول سنه كليه
ومااعرف ادرس مادري انظف وعمتي تركض ورايه بالحمل حتى ابطل بحجة اربي الجاهل وتروح من عندي الكلية
ورجلي توه اتخرج وامورنا مو تمام اورط نفس بجاهل ليش
--- عفية عليج جاوبتها بدرية والله تفتهمين سباعية انت
خلي يولون
--- والله خالة الله شاهد عليه
حاولت اصيربتهم مفاد حتى اسما شكد ردت اصادقها جانت بالزايد تبتعد عني
وتعاملني على اساس اشتغل يمهم
والله العظيم وصلت بيها تحاسبني انت ليش البارحة مغاسلة قميصي وصدريتي
وياويلي اذا راددتها تنكلب الدنيا عليه وخصوصا اذا نزار مو هنا
يمه يمه
ياكلوني ويشربوني
كلهم حقراء
يجي سامي من برة يصيح عليه نزلي صبيلي غدا
واني توني راجعة من الدوام
اكله عمتي جوى يكلي ظهرها يوجعها
واسما مو يمك
يكلي اسما
سادة الباب دتقرا
وهم اسكت مااحجي اكول اكسر الشر مايسوى الموضوع
وتالي يمه تالي تعبوني وعاملوني كلش موزين
وعلى اقل شغلة الغلط وانوبه البسط
ليش اتحمل عوود ليش !!
حتى لو ما عندي اب هيجي يسوون
شفتي شلون ضرب سعد
والله هيجي يضربوني
اني هم مااسكتلهم
ومااريدهم
ولو ترجعيني اله الا احرك روحي اني كتلج
يمه وصلت بيهم الدرجة كامت عمتي وكدام رجلي يمه
اللي هي عمتي تحرك رجلي عليه تكله عدها صاحب بالكلية
وهو كام يشك ويجيني على غقلة
عود هاي كلها حتى بس يبطلني
بعد شتحمل الله يخليج
عافتهم وطبت للغرفة ماطلعت الا تالي اليل
ظلت مشاكل عهود ويه اهل زوجها فترة طويله
وصارت اكثر من عركة بين نوريه وفخرية والكل جان يوكف ويه عهود حتى زهوري عمتها الثانية
نزار ماقبل يطلك
وصار اجازتين ماينزل من كثر المشاكل
باخر اجازة نزلها وجانت نهاية شهر السابع
حاول ويه علاء يرجعها
ماقبلت عهود ودكت رجل ومفاد بيها
كال لامه النزله الجايه احكمها ناشز
بس نزار مانزل الاجازة الجاية ...
راح ومارجع
انتظروا فترة طويله
وكاموا اهله يسالون وراه
بالبداية بلغوهم انه مفقود تالي جابولهم تابوت ملفوف بعلم للمرة الثانية
وهالمرة التابوت كان يحمل جثة متفحمة
جانت نورية دتصلي ودكوا عليهم الباب
ومن شافتهم راسا اتهربطت وصعد عدها الضغط
وبنفس اليوم دخلت للمستشفى
الخبر
جان صدمة للكل
وحتى ام زهير نفسها ماتحملت وضربتها ذبحة
اما عهود
وعلى الرغم من كثرة المشاكل بيناتهم
لكن هم انهارت وماتت من القهر عليه
خلال الاربع شهور اللي فاتت قبل الحادثة
مرة وحدة كعدت ويه نزار
وجانت اخر مرة من كلتله ماارجعلك اذا مو بيت وحدي
وهو رفض هذا الشي
وهددها ببيت الطاعة
عهود
ساعتها مصدكت الخبر
وهواية بجت عليه بس مراحت للفاتحة لا هي ولا امها
اللي صار بيناتهم مجان هين
جان صدع كلش جبير مستحيل يلتام
لكن ثاني يوم المغربية
وجان العزة منصوب
سامي واكف بباب الجادر ويدخن
واسما يم امها بالغرفة متمددة على الفراش
مثل اللي فاقدة الوعي
وزهوري تتراكض منا ومنا
ماتعرف تبجي على ابن اختها لو ترضي المعزيين
حتى لاحد يعيب عليهم ويكول سوو فاتحة شلون مجان
اجاهم تلفون .. والتلفون جان يحمل بشرى
وركض زهير شك القطعة السودى مالت العزة اللي باسم ابنه
لاكين اسم نزار من ضمن الاسرى
وبالفعل ركض زهير ثاني يوم ولمدة شهر كامل يتاكد من اسم ابنه موجود من ضمن الاسرى
ومن ضمن ماشافه وهو يتراكض منا ومناك
تلال من الرسائل بين الاسرى من الطرفين يحطوها بحاويات ويحروكها
من بين كل عشرة رسايل وحده فقط توصل وبعد تدقيق طويل
الخبر كان اله وقعه على نورية اللي كامت تمشي منتجية على بتها وتصيح على النسوان ابني عايش شيلوا العزة يالنسوان
ابني عايش
وركضت وزعت الجكليت على الجوارين
اللي الكل بقى مذهول مايعرف من الفرحة شيسوي
هذا الخبر انتشر مثل النار بالهشيم
صار كل شخص عنده مفقود او شهيد دون التعرف على جثته يبدي
يدور بلكت تطلع قصته مثل قصة نزار
لكن الغريب بالموضوع
واللي حركت كلب زهير
من سمع من ناس مقربين بلغوه بسريه الخبر
انه نزار هواللي اسر نفسه
هو اتقدم وشمر روحه عليم ورة ماخلصت ذخيرته عباله يستشهد
وبالفعل اتصوب بجتفه وبطنه طلقتين
جماعته عبالهم بالفعل استشهد لكن الاسم تم تاكيد من الجانب الايراني انه حي يرزق ويعالج كجريح
اتالم كلش انه ابنه وصل مرحلة من الالم والياس انه جان رايد الموت بارادته حتى يخلص من حياة الجحيم اللي عاشها
هاي النقطة بالذات كسرت ظهر زهير حيل
في 8/8/88
تم اعلان وقف اطلاق النار بشكل نهائي
جانت دنيا ليل
وعهود بغرفتها وحدها صافنة على السكف فكرة توديها وفكرة تجيبها
رسبت هالسنة بنص المواد وماتعرف شلون تعيد السنة
وفخرية لازمه سجادتها وتدعي
مابقت نذر مانذرته حتى تحل مشكله بتها
بدرية جانت يمهم تباوع اخبار وجكارتها بيدها
والجهال ديلعبون ويه سعد وميلاد بالصالة
رحاب نومت ابنها وجانت يمها ام محمود ديسولفون بباب الكراج على الدجة وجهال ام محمود يلعبون بيناتهم
وزهير نام من وكت بقت بس اسما وامها بالصالة وسامي برة مراجع
وطلع الخبر يزف بشرى وقف الحرب
الناس بالبداية مصدكت
الكل تباوع من الشبابيك
وواكفين بالبيبان يتاكدون صدك جذب اول تالي توكف الحرب
الا ان شافوا سيارات الشرطة والعساكر يحتلفون يله يصفرون بالصفارات ويدكون بالهورنات
كامت بدرية تبجي وتهلهل
خوفها جان على علاء هالمرة يلتحق ومايرجع
وعهود كامت تبجي هي وامها
وانقهرت كالت كاطع امنيته جان توكف الحرب سوده عليه مات ويله وكفت الحرب
والجهال ركضووا على امهم
ام محمود يمه يمه ابويه يكول وكفت الحرب !!
صدك جذب
هيجي راسا وبرمشة عين
يمكن هذا احلى خبر احد يسمعه ويمكن جانت الفرحة خلت ام منة تركض برة البيت بهدوم البيت تريد تشوف صدك لو جذب لزمت جيرانه وحضنت بيهم
واخيرا حيرجع زوجها خليل من الاسر ويشوف بته
واخيرا ام خليل حتشوف ابنها قبل لاتموت
كل الناس اتصورت انه الاسرى بعد شهرين تلاثة يرجعون
مساكين
على نياتهم
المسالة طولت اكثر من سنين يله بدت الوجبات الاولى بالعودة
نورية كعدت رجلها وهي ترجف
تكله كووم روح شوف صدك جذب
كوم اسال شوف شوكت يرجعون نزار النا ؟
ماصدك زهير
راح كعد كبال التلفزيون
كل شويه يعيدون الخبر
ووياه اغاني وانشيد وطنية وحربية ام الصفكات والهلاهل
يباوع وعيونه تجري دموع ويحرك جكارة ورة جكارة
اوف نزار هي شهرن ماكدرت تصبرها
الايام اللي بعدها
يمكن كانت من اجمل الايام الي مرت على الناس
فاضل بنهاية الشهروورة ماطلعت السنة مالت ابوهم كاطع الله يرحمه
سوة سفرة جماعية جبيرة راحوا بيها للحبانية
السفرة هم جانت لبيت فخرية واهم شي عهود حتى تطلع من الجو اللي هي بيها
تحولت عهود من ذيج الطفلة النشطة المفعمة بالحياة
الى بنت خاملة وحزينه
الدموع متفارك عينها
مجهولة المصير
ماتعرف شنو راح يصيرلها باجر
وحتى عائلة بدرية هم جتي وعلاء وامل
الطريق للحبانية اخذ ساعتين وشويه
همه بالبداية جانوا مفكرين يحجزون ويباتون لكن الشقق طلعت كلها مقبطة
الجو جان كلش حار فكعدوا علىمكان في في وفرشوا واتغدوا بعدين نزلوا للبحيره
المكان جان كلش هوسه وازدحام والعواءل كلها متجمعة
اللي نازله بتنورتها العريضة المبلله وتجرجر بيها واللي نازله ببنطلون وكافته للركبه
والرياجيل ماخذين راحتهم بالسبح ومنهم
متمدد بنص شورت ويدخن جكارة ويعاين على الناس
واكثر من اتونس همه الجهال يركضون بهذا المي يطبشون ويضحكون
وكل شويه واحد متزحلك ويبجي ويضحكون عليه
نزلت رحاب هي وحجابها اللي يسميه زوجها تك ردن
لابسه قميص نص ردن ركلان مشجر وتنورة خرط سمائية هم كصيرة وجانت لابسة جواريب شفافة نزعتها من طبت للمي
وجرت اختها وخالتها وكام واحد يطبش مي على اللاخ
هاي ونستهم
لكن جان اكو نسوان طبوا وسبحوا
خصوصا اللي جانوا متعلمين على المسابح اللي بالفنادق الجبيرة
واللي تفتح بالصيف للعوائل
ومنهن امل
بس طبعا بقت تلعب ويه جهالها
اللي ابد ولحد ذيج اللحظة محسستهم انه هي مو امهم
وهمه اتعلقوا بيها يمكن اكثر من ابوهم
الهوسة والصياح بقت للمغرب
شويه برد الجو وصعد المي
عاد ساعتها رجعوا للبيت وبقوا يومين بايتين بيت فخرية
اللي جان احلى شي عدها من يلتمون يمها مثل قبل
وعلى السنة الجديدة
جانت حياة جديدة لعهود همين
كذبت عليهم نوريه انه ابنها نزار حكمها ناشز سبع سنين
وكامت تتهرب من علاء من جان يسالها عن قرار المحكمة ماتنطيه حجاية
وبكل الاحول نزار مطلقها وهي هم استحت بعد تطلب الطلاق وهو اسير
صبرت الى ان يرجع وتشوف شيصير ساعتها
اكتشفت بنفسها انه هي ماتريد زواج
ماتحب جنس الرجال اصلا
خليها هيجي احسن حتى لو ناشز سبعين سنة
لكن مع ذلك هالسنة
رجعت للكلية مثل بقية البنات
صح هي اكبر منهم بس ميخالف مو مهم
هوايه اكو عايدين السنة
صارت تلبس مثلهم
وتتصرف مثلهم
صح جانت مرات تجيها الحالة من تحجي ويه احد تتلفت داير مدايرها اخاف نزار راجع ؟!!
بس عكس هذا الشي
كانت فرحانه جدا بحياتها الجديدة
صحيح بقت منعزلة ومارجعت مثل قبل
بس على الاقل دتسوي الشي اللي تحبه
وفاضل هم لكى سايق لسيارة التكسي مالتهم يشتغل بيها ويجيبلهم وارد لفخرية وجهالها
اضافة الى وارد المحل
وبشهر الثاني عام 89 اتلقى زهير خبر ثاني كان صفعة اخرى اله بحياته
....
نهاية الفصل الثالث
التقيكم باحداث جديدة في الفصل الرابع الي تشمل الحقبة الزمنية من التسعينات الى الالفينات
حيث تظهر احداث جديدة بحياة
نساء مخمليات
