كانت العيون كلها تترقب الوضع الجديد بحذر
وانملت الصالة بالحضور
جهال رحاب كعادتهم نغصوا على امهم الاكل
ماريد هذا واريد من ذاك
وظلت هي منشغلة بيهم حتى سمموها العافية
سامي كان يشوف روان لاول مرة
نحيفة بشعر اسود مجعد وانف كبير وعيون واسعة بيها ردة حسن
وصارت بالجديد اكثر مثل مانسميها حولة حسن
حتى سمير يصيحلها يالحولة بما انه عدنا عادة التقليد على الاخر شي جيني
مع ذلك كانت تتميز برقبة طويله وبروز عظم الكتفين
جسمها يشبه نوعا ما اجساد عارضات الازياء بالنحافة وعرض الكتفين
كان يسرق النظرات الها
مو اعجابا لكن فضولا
وطبعا ميلاد كانت بالمرصاد وبدرية ايضا رصدت نظرات ميلاد لسامي
فعلقت من يمها وهي توخر رجل اختها المادتها وطاخة خصرها
كلتلها فخرية كطعتي نفسي
---ههههه وج عيني مااكدر اطويها توجعني وحوضي يموتني
وظلت تضحك من الخجل فحتى تغير الموضوع
رجعت بدرية سالت نورية عن اسما شنو اخبارها ؟
ردت نوريه وهي مبتسمة والضحكة تسرق نظراتها
والله ياعمري مامصدكة تكول هسه احجز وارجعلكم
اريد اشم اخويه
سودة عليه مكانها خالي
----لعد ليش ماتجي
--- والله شكلج ام كريم ظروفها
الحمد لله هههه ان شاء الله ان شالله تجي
ورة الغدا البنات الصغار كلهن كامن يلملن مواعين ونور جانت اول وحدة راحت للمطبخ تغسلهم
هنا سامي ونزار ساعدوا فاضل حتى يكوم و يكعد على عربانته
من ديشيلوه صارت عينه بعين سامي وجانت رحاب تراقبهم
حزت بنفس فاضل حيل
اكثر ما يكرهه هو الاكل بالكاع لانه لازم واحد يكعده ومرة ثانية يكوموه
اتشكر منه وكله منون منك اخويه
ابتسم سامي ورفع نظره على رحاب وكله
عزيز وغالي
ومن ديجيبون الجاي اتعثرت قيم بالنعالات مالت الجهال خاليها بصف الصالة مع انه نور لمتهن كلهن وحطتهن ورة الباب الرئيسية مالت البيت
اعبلت بيهن وووكعت صينية الجاي واتكسرن الاستكانات نصهن
وكلها تصيح فدوة فدوة راح الشر
بس بدرية عدلت نظارتها وباوعت على بتها الي من خجلها انثولت وماتعرف شتسوي
ركضت نور على السريع لمته ومسحت الكاع
انتبهت نوريه عليها وكالت لرحاب خطية هذه شكد خدومة وشاغوله
ردت عليها رحاب بالدعاء الها انه الله يستر عليها ويريح بالها
خلت ايد على ايد نورية وكالت شوفيها شكد حلوة شعايزها
اي اممم هنه الحلوات دومهن ماعدهن حظ
ماعلقت رحاب على رد عمتها الي ربما كانت تقصد بتها على هذه الحالة ومعروف انه هي مامرتاحه ويه رجلها
اندارت عليها فخرية وسالتها على كرم وجعفر شنو صار منهم
كالتلها والله نتتظر يدزلها فيزا الزواج حتى تسافر ويعقدون لو سوريا لو عمان هيجي متفقين
---بيها الخير ان شاء الله
---ان شاء الله ربي يسهل
انجمعوا الشباب والزلم بالصالة والنسوان بالصالة الثانية القريبة من المطبخ
وجابن الكراسي البقية من ميز الطعام
وكعدن وعهود ادغ امها علمود تحجي بموضوعها
دنكت عليها فخرية وكالتلها خالتج تكول مو وكتها خلي همه يفتحون الموضوع
رفعت صوتها عهود وكالت لعد خو جان من البداية اني حجيت لخالتي
فتحت عينها بخزرة عليها بدرية وكانه دكللها سكتي
فهمت نورية راسا الموضوع
وظلت تضحك
هي جانت فرحانه
تماما مثل المريض الي ردت بيه الروح من جديد
اقتربت من فخرية وبدرية وجانت امل ونور هم بصفهم من نصت صوتها عرفت نور انه موضوع حساس فراسا كامت على الجهال ويه رحاب
كالت نورية وهي خجلانه ومنصيه صوتها ماتعرف مينين تبدي الحجي
ام سعد وداعت سامي وراس نزار هو نفسه اول مارجع سالني عن عهود هههه والله وداعتج
---خير ان شاء الله وقاطعتها بدرية
بس ماعرفنا ام سامي شو قبل مانعرف بيه متاسر كلتوا حاكمها نشاز
طلبنا حكم المحكمة كلتوا ضايع
وبعدين من تاسر وراها بجم شهر يله جيتي وكلتي تره هو كال مطلكها ؟؟؟
--- اي والله ام كريم هذا الي صار؟
--- شنو هذا الي صار مافتهمت عليج
مدام فتحتي الموضوع خلينا نحجي بيه نريد نفتهم اولها من اخرها
احنى وكتها لادكينا الباب ولاردنا لا حق ولاباطل منكم
عفنا الامور كما هي
بتنا شبعانة ومادور هالسوالف
عهود دنكت اكثر من اتذكرت هاي الفترة الي مرت بيها
وشلون فترة صعبة جانت عليها
بهتت نورية وماحجت
وظلت تتلوي بايديها ماتعرف شلون ترد
وكملت بدرية حجيها
هسه نريد نعرف وضع البنية شنو ؟
ام كريم اني حجيت وياه من اول يوم رجع
ساعة يكول بس حكمتها ناشز وساعة يكول لا طلكتها بس مااذكر
ودمعت عينها وكامت تبجي
ام سعد والله الولد صارت بيه حالة
رفعت راسها عهود باهتمام وهي تريد تعرف شنو الي مو تمام
--مو تعرفين الضربة الي براسه
تعرفين مو
خطية خلت يصير عنده صداع وجع بالراس يكوم يصيح ويعيط من عنده
وتجيه هاي الحالة بين فترة وفترة
ومرات هواية اشياء مايتذكرها
لساه والله وانتم مامحلفيني
والله العظيم يصرخ صريخ بالليل يهج الفرع كله
الظاهر صاحبه ناظم ميت كدامه
---يا شلون يعني خطية سالتها امل
كامت دموعها تهل وهي تسلوف
هذا ناظم صاحبه يكول هو الي مطلع نزار من الحفرة يكول برمضان جنا صايمين
هاي مصارلها هواية ها
واحد من الحرس مااعرف هذول التوابين ضاربه بكيبل على راسه
يكول للمغرب ظل يلوب مثل الطير المذبوح يدحرج بالكاع الى ان مات ماتحمل الله يرحمه
--- هاي شنو مامخذيه يعالجوه يشوفوه شبيه شلون كلوب ميته
-- والله يمه ماادري بس نزار
متاذي حيل عليه
خلت ايدها عهود على حلكها
واتذكرت الناس شلون تنصب على الاسير ويسموه شاخط
وشلون كل واحد عقله مو شي يعيروه يكولوله شبيك راجع من الاسر
يااا لو يعرفون الاسير شلون عايش جانوا باسوا جوه رجليه على العذاب الي شافه واتحمله
ساد صمت بالغرفة
وكملت نورية كلامها
يكول مااذكر يمه هواية اشياء ماذكرها
صار عنده مثل الوشه بعقله
ساعة يكول طلكتها وساعة يكول ردت انزل اجازة اطلكها
وساعة يكول حكمتها ناشز
مااعرف والله وداعتكم
ومسحت دموعها وابتسمت
كالت بس شكو بيها نكطعلهم مهرمرة ثانية
يعني اخاف كلشي يصير
وقبل ماتكمل كلامها نورية ضاجت منها بدرية
كالت شنو هالحجي ام سامي مايصلح هيجي
هذا مو خوش حال كعدوا ويه الولد افتهموا منه هاي شغلة مصيرية شنو مايتذكر هو يتذكر ناظم شلون انكتل ومرته مايذكر مطلكها لو لا هذا حجي ماقبول ابدا
يعني هاي لو اسما تقبلين عليها هيجي حال صارلها عشر سنين حالها واكف مانعرف راسها من رجليها
ثانيا وين ورقة الطلاق
عوفج منها علاء يكول بس اريد وثيقة الزواج اشوفها بعيني
عهود انت مو رحتي محكمة لو لا
---اي خالة رحت ووقعت
--كافي بدرية شبيج عصبتي جرت ايدها فخرية تحاول تهديها من حستها انطلقت بكلامها
ونورية من خجلها غاصت بالكاع
هي اكيد الها ايد بالموضوع وماتريد تعترف هيجي كالت ويه نفسها بدرية وبعدين منو يكول تقبل ترجعله عهود اذا صدك مطلكها شاورت فخرية ومنها سمعت نورية
الي من قهرها انلجم حلكها لجم
واتبلعمت كامت ونقذها سامي من صاح يريدها
راحت وكانه حملت جبال من الهم ولزمت سامي وشاورته
كلها لايظل بالج احنى الزلم نحل الموضوع
عافته وراحت
علاء طلب وثيقة الزواج منهم مباشرة زهير راسا جاوب بعد صمت الكل انه هواية اوراق ضاعت بالمعاملات مالت الاسر
لعب الشك بعقل علاء فسكت ماحجى عرف هو شلون يطلعها
نوعا ما عرف اكو لعبة بالموضوع
وحسما للموضوع اعتذر نزار من علاء كون خال عهود ومن سعد
علاء جان شاك انه نزار ممطلكها بس همه مرادوا يطلعون امهم كذابة
وهذا الحجي نقله لعهود نفسها
من كعدوا بيناتهم يتشارورون
وطلعت بدرية بخلاصة تفكيرها انه
نورية وزت ابنها يكول حكمتها ناشز حتى تجبرها ترجع
وتخليها معلقة متاخذ غيره لا هي المتزوجة ولاهي المطلكة واي حقوق ماعدها يمهم
من صار اسير كالت خلي اكول مطلقة خلي لاحد يدوخني بالراتب والبيت وغيرها
هاي اولها وتاليها
نورية قابل مااعرفها طبس شوفي الدهر شلون دولبها!!
اخر شي خالها طلب منها تعوف الموضوع ولاتلح بيه وترجع لرجلها احسن
اترددت عهود هواية بذاك اليوم وماردت جواب لاحد
هذا التردد صفن الكل واولهم امها
كل ظنها عزوفها عن التفكير برجال ثاني او فكرة الزواج من غيره
انه هي تحبه لنزار وماتقبل تكول
لكن كانت صدمة من كالت مااعرف خلوني افكر
طبعا شكله المتغير
وتصرفات كان الها تاثير كبير
وكل مرة تتذكر ابتسامته وسنونه الرمادية
اصابيعه المتشوهة
وصفناته وسرحانه
والقصص الي صار يريوها عن التعذيب في كل لقاء عائلي
جان يرعبها اكثر
اتذكرت من حجى شلون يسمموون نفسهم باي شي حتى يروحون يرتاحون بالمستشفى يومين تلاثه
وشلون يمشون بعز البرد حتى يوصلون مرحلة يفقدون احساسهم برجليهم
وشلون كانوا يعاقبوهم بنحت الجبال!
وشلون يتم الاحتفال بيهم بحيث يوضعون في حلبات وسط القاعة شبه عراة وينقض عليهم الحرس ضربا بالايدي والارجل يمارس ضدهم كل انواع الضرب العنيف ومن يكن محظوظ ينجوا من هذه الاحتفالات وبعضهم تكسر اضلعه او تفقا عينه
وهو غير قادر حتى على الدفاع عن نفسه
وشلون يقضي عليهم الالم الي ماله علاج و عمره ماينتهي
والي زاد الطين بله الحادث الي صار قبل فترة من رجوع نزار
من فزت رحاب بالليل على صياح ام منة وعياطها
جانت ساعة عشرة ونص بالليل
طلعت ام منة على صبة البيت وتصيح لحكولي
يبووووو
حيكتل بتي
ياناس ياعالم لحكولي
وادخلو الجيران كلهم واخذوا السجينة من ايد خليل الي جان مصر يذبح لنته
الي يحسها عار عليه
لانه تلبس تنورة وقميص!!
وماكو دقايق جتي الشرطة اخذته
جتي الشرطة تصاحبها زفة اطفال يدلوهم على البيت الي صارت بيه العركة وام منة ترجف بين ايدين رحاب
وتصيح اخذوه منريده هذا مخبل
يريد يكتلنا اني وبتي
ومن يومها مارجع خليل
راح يم اخته فترة وراها طلبت الطلاق منه
وجان الحجي كدام عهود من جانت تحجي عن العذاب الي شوفهم
خلال هاي الفترة الي اجى بيها
وكمية الضرب الي اتعرضوله
جانت كلها امور خلت موضوع رجعتها اصعب
وباتفاق الطرفين اتاجل الموضوع لفترة
خلالها زهير وصى ابنه في كل مرة يدزون عليه يروح للامن العامة ماياكل اي شي ولايشرب حتى المي مايكوسه والاهم من ذاك كله ماياكل اي جكليت
لانه وعلى طول فترة عودة الاسرى البعض منهم كان عندما يطلع من الامن العامة يصاب بسكتة قلبيه بعدها هكذا فجاءة بدون اسباب
كانت تصفية داخلية
بذيج الفترة كانت رحاب تعيش اوقات صعبة نوعا ما
صحة فاضل ادهورت اكثر وصاار حساس اكثر
وبدت المشاكل تنخلق من ابسط الاشياء
جان البيت كله متوتر خصوصا من رجعوا من كعدة العزومة على شرف رجعة نزار
كعدت عصرية لوحدها تحاول تركز وتقرا وبالها جان سارح
الى ان صاحتها نور تجي تشرب جايها دخلت وشافت فاضل مشمر عن رجليه حتى يشوفوه جهاله ويتعودون على منظر رجليه المبتورة الي كان يحاول يخيفها عنهم لفترة طويله
ومكعد بشار بحضنه
سراه بالتعليم وره عمار
الي جان كاعد بصفه ويباوع على ابوه
وعباس ديعلب اتاري ليغاد منهم
فرجع سال فاضل ابنه بشار كله يله كول وجاوبني
من ربنا؟
صفن ياشر فوك الله ربنا
--باباتي من نكول الله هيجي نكول الله سبحانه وتعالى ربنا
من نبينا ؟
يله بشار من نبينا صفن وكال محمد سبحانه وتعالى نبينا
ضحكوا عليه عمار وعباس
--- بشار صير ادمي وركز ويايه
محمد صلى الله عليه واله نبينا
مرة لخ من نبينا
مو علموك بالمدرسة ابني شبيك
---اي بابا محمد واله
باباتي مولها صح
---بابا اكو نبي اسمه صلعم؟
---ههههه هنا طك من الضحك عباس عليه
---لا باباتي هذا النبي محمد نكول عنه صلى الله عليه واله وسلم
لاتنسى واله
---بس المعلمة ماتكول؟
---احنى نكول
----ليش بابا؟
---احسن حبيبي
--- بابا المعلمة تقبل نكول
---اي باباتي جاوب عمار على هذا السؤال
زين بشار من امامنا ؟
هنا صاح بشار والله بابا ماعرف
--- كله حبيبي توني كتلك
---ها العباس
--- حبيبي علي امامنا
جتي نور شايله الاستكاين من سمعت اسم الامام علي
فكالت فدوة لاسمه
رجع ساله من امامنا
كله علي فدوة لاسمه
--كام فاضل يطرك الخاشوكة بالاستكان حيل من عصبيته وعباس يضحك عليه
ونور ورحاب بالمطبخ
فعلقت رحاب مااعرف بشار عليمن طالع شو هذا دماغة دجة
---هههه عليه طالع عليمن يعني ههههههه
رجع فاضل ساله مرة لخ
وهم كال فدوة لاسمه كله معليك بنور
فنط من يمه عمار كله اي نور ثوله معليك بيها
رزله ابوه وعصب كله بابا عيب مايصير هاي عمتك ومن هالحجي
رجع ساله
كله علي فدوة لاسمه نور الثوله كلتلي ههههههه
هنا كلهم ضحكوا وهو وياهم
مايدري عباله كالها بذكاء
ضاج كله كوم منا طيحت حظي
على الرغم من كونهم توأم الا ان عمار اخذ الذكاء كله من بشار ومامبقيله شي
حتى بالشجاعة والجراءة عمار كان الاسبق
والمعلمات على طول يكولون لرحاب هذا مامبقي لاخوه شي غير الكرش
لانه عمار ضعيف ونحيف
جانت رحاب يوم اداوم وعشرة لا خصوصا ايام غسيل الكلى مالت رجلها
جانت تسمعه بالليل يان ويبجي ويطلب من رب العالمين الخلاص
وهي عاجزة مكان بامكانها تسوي شي
تتالم لكن بصمت ماتعرف شتسوي هو عنودي مايقبل اي حلول تطرح عليه
حتى بزعلته ويه اخوه انسحب من الشراكة وصاوا يعيشون تماا على ابو فاضل الي اتكفل بموضوع بقية المحل
جان يخاف يموت وهو متعارك ويه اخوه علمود الفلوس
فصالح اخوه وفضها من الاساس
لكن بطبيعة الحال
وضعه مكان عاجبه نديمه الوحيد كان هادي!
اما ميلاد
فتعرفت على بعض الزميلات الجديدات ومن ضمنهم عبير
عبير هذه كانت خلطة عجيبة بدت تظهر لساحة المجتمع
محد يعرف اصلها من فصلها
من تشوف استاذ دوري تكول اني دورية
من تشوف شمري تكول اني شمريه اني من عشيرتك استاذ
من تحاول تنسق ويه طالب تطلع امها موسويه
ماتعرف منها الحقيقة من الكذب يوميه حجاية ولا حتى احد يندل بيتها
لبسها مرعبل ومخربط وتجيب صور اهلها وهمه واكفين بصف سيارات مرسيدس يسمونها الدب والبيت دبل فاليوم وهي شسوار ماتسشور شعرها
نفس التنورة والقميص السنة كلها فلس ماتصرف
ابويه هيجي وعمي هيج
وحتى اكو جماعة جانوا يسموها طكوك ضربة الكويت
الفئة الاسوء الي لمعت بذاك الوقت
الي غيرت مفاهيم الطبقية كلها
وحولت الذوق العام الى ذوق متردي تحكمه المادة
عبير لزكت بميلاد اكثر من شافتها عدها علاقة زمالة بحسن الطالب العربي
البسيط الطيب الي انعرف بين اوساط الكلية انه فرقد ضربته بوري بعد مااخذت منه كل ماكان بامكانه ان يقدمه
لكن عبير مو حبا بحسن ولا ميلاد
لا حبا بصديقه الي اتخبلت عليه
بعيونها الصغيره وبعظمة فكها البارز واصابع ايديها وكفها العريض كانت نسخة عراقية من المطربة احلام
معجبة بصديق حسن وهو طالب عربي اسمه فهد والي بيه شبه كبير من مطرب عراقي اسمه صلاح حسن
كانت كاتله روحها عليه
وميلاد تحذرها انه سمعة البنية العراقية تصير على المحك من تكبل ويه طالب عربي
لكن مع ذلك فهد هو اصلا جان رافضها وصار يتهرب منه
كونها ماتشمل ذوقه
هذا الشي حز بميلاد كلش انه تنزل بنية مستواها لهيجي مرحلة !!
وحتى تكمل السبحة اندارت على ميلاد وتهمتها انه هي السبب وره نفوره وانه تريده لنفسها
وشكو شي كانت سارته الها ميلاد عن علاقتها بشمس الدين
صار على لسان كل واحد بالقسم
حتى وصل الامر انه طالب وياهم بالخط حذر ميلاد من الحجي الي طالع عليها
انهارت ميلاد تماما
وماعرفت شلون تتصرف حتى شمس الدين نفسه الي كان يشعر بالحرج منها صار يعاملها بطريقة حقيرة
كام يتقصد يبين كدام الطلاب كلهم انه مايشتريها بفلس هكذا بصريح العبارة حتى من تنجمع شعبتين بقاعة وحدة وهي تكون حاضرة من الشعبة الثانية يعوف المحاضرة ويطلع
ومن تدخل للنادي ياخذ جماعته ويطلع
شعرت ميلاد برخصها
وصدفت انه جان القسم
الطلاب يعني مسوين سفرة بالبوت او العبارة
وبدوا يحجون عن السفرة الي فاتت وشكد اتونسوا
جانت ميلاد تعاني من وحدة فظيعة
اتخلوا عنها صديقاتها باعتبار انه كل وحدة منهن انخطبت ومصار الها وكت حتى صديقتها المقربة منها كلش فرقد كامت تسلم عليها من بعيد لبعيد
رجعت بذاك اليوم وهي ناويه تطلب من امها تروح لهذه السفرة
جانت ساعة خمسة ونص المغرب دغتها عهود حتى تكوم
وهي تكرر عليها كومي موزين نومة المغربية
جانت حتى غدا ممتغدية بوجهها لفت روحها ونامت
طلعت للمطبخ جانت فخرية توها مطلعة صينية الكليجة ام التمر وحلقوم
كسرت اثنين تلاثةوعافتهن
سالت امها ماكو ام الجوز
---هه لا عيني باجر نوصي نور السعيد يدزلنا ويه السايق فردكيلوين ولا ليش نجيبلج كونية
جاوبتها عهود وهي تحضر اللالات حتنطفي الكهرباء بعد شويه
وبالفعل انطفت بوقها تمام
ظلت ميلاد تاكل ام التمر ويه الجاي فسالت امها اذا تقبل تروح ويه كروبها بالقسم سفرة بالعبارة
وراسا جتيها كفخة من ورة ويه الظلمة من سعد
طشرت اللكمة بحلكها كلها
دروحي وشوفي شلون اشك حلكج
هاي العايزنه
طفرت الدمعة من عينها من الفزة
كالته لعد مو انت دتروح كل مرة
---انجبي اني ولد وانت بنية ماتستحين شيكولون عليج دايحة ؟
---ايبااه وصاحبتك علا مو دايحة
---كتلج انجبي لاتلغين زايد
لبس الهاينك مالته والسترة وطلع شايل ويه كليجتين
دردمت عليه عليه كلتله سم وزقنبوت تاكل بقلبك ان شاء الله
ضربت فخرية الصينية على الميز وكالتها سم ابطنج ولج بس هالاخ عندج منين يجيلج كلب تدعين عليه
كامت تبجي ميلاد وكلتلها والله انت هم ظالمة مثل ابويه توه كفخني سممني العافية
وانت حلكج مافتحتيه
بس كادرة عليه ساعة السودة الي الله خلقني بنية
صاحت عهود من يمها بالغرفة ولج حرام حرااام اتقي الله
انوبه مغربية شيسوين بينا الله بعد؟
---اسكتي انت اللخ حيري بدردج وشوفي حل لمشاكلج عوفيني بحالي
---شعندي مشاكل ولج ام لسان انت شنو من بشر
---بله دسكتي شوفي الله بعد شيسوي بيج انت معليج بيه
هنا حيل فخرية شمرت الخاولي مال الفرن الي تطلع بيه الصواني بنص وجه ميلاد
كلتلها ايا ادبسز تعيرين اختج
---خليها يوم خليها قابل هاي اول مرة لو اخرها
بس مو صوجها صوج قسمتي الكشرة الي خلتني علجة بحلك الي يسوى ومايسوى
وطبت بغرفتها ميلاد ماطلعت الا وجه الصبح للدوام كالبه خلقتها ماتحجي ويه احد
راحت ثاني يوم عهود للدوام بوجه حزين
جان عدها شاغر على الحصة الثانية
الغرفة مالت المعلمات جانت دافية صوبه صغيرة حاطين بيها على كتر
ومخدرين القوري مال الجاي فوك الكتلي
طلعت عهود لفة الجبن الي جايبته وياها وكعدت تتريك وحدها
على الرغم من كونها اجتماعية وتشارك الكل بنشاطاتهم
من السلف والمسواك ومن يلمون لما وحدة تخلف او تتزوج وغيرها
لكن بنفس الوقت مادوس عميق بعلاقتها وية البنات يمكن بس اخت مها مرة سامي صديقتها الي تعرف التفاصيل
وجانت تدعي من الله ماتكول لاحد
بس وين اكو
معقولة تعرف سر وماتحجيه اصلا اول مابدت لصديقتها الله عليج هاي حجاية بيني وبينج امانة الله ماتكولين لاحد لانه خطية مانريد نقهر عهود ونفضحها
سمعتهم وهمه يحجون بصف الغرفة بالممر منتجين على الحايط
وحجتلها الواقعة كلها بالتفاصيل
والثانية تكلها شعجب ماترجعله
اخاف خاله عينها على احد
اتبلعمت عهود من سمعت الكلام
وفتحت الباب حتى يسكتون ورمقت صاحبتها بنظرة استحقار اخذت جنطتها وبوجهها للادارة اخذت اجازة
ورجعت للبيت
جانت تمطر خفيف بس الجومغيم ويهيج المشاعر كعدت على الكرسي الصغير المتحرك بالكوستر
بهيجي وكت قليل اكونفرات يصعدون بالكوستر
معظم الطلاب والموظفين بالدوام
كعد بصفها عامل جتف ايده ومن جوة ليجوة يطخها باصبعه
وشويه تروح عهود ليغاد وهو مايجوز يتزحف عليها اكثر
ولعين صلفة صار يتقرب اكثرو يباوع على الجهة الثانية من الشباك بحساب مو يمها وحتى السايق ماينتبه
كامت تبجي عهود ونزلت دموعها بصمت
كتمت بنفسها وماحجت لانه ياما وياما
شافت حالات التحرش وخصوصا بالاسواق الشعبية الجبيرة ودائما يطلعون العيب والصوج بالمرة
مجانت هذه الظاهرة موجودة ابدا حتى نهاية الثمانينات وجانت فخرية دائما تكول علموها الغربة لشبابنا من جوي يشتغلون عمالة هنا هاي السولة النكسة
كل الحالات جانت تنتهي بالفشار على المرة
ولو هي شريفة ماتلبس هيجي ولو هي شريفة ماتطلع وحدها وهكذا وين ماوين من ينصفون المسكينة الي لو ماكاتلها الضيم ماتطلع بنص الحر لو بنص الليل وتتسابق ويه الشباب حتى تكضي حاجات البيت
كتمت عهود بنفسها
بعد ماكعدت على الحافة ومفاد بيه
بس دموعها كامت تنزل اربع اربع
عاد السايق انتبه وبطء بسياقته قبل مايوصل للكراج وقبل مايوكف بيهم
رجال جبير كوم واسمط هذا الشاب على علبته بكفخة مدوية
كله بعير ياعارسز ماعندك خوات ماتستحون شنو انتو من بشر
الرجال كان بعمر خالها علاء
وشويه اكبر اصلع وشورابه ثخينة جان لابس قمصلة رياضية عتيكة وبيده علاكة زركة
هنا راسا نزل السايق وجره حيل
حتى بعده مامستوعب ضربته
كله لك الطريق كله البنية تتسحب منك وانت ماتسحي عيني صارت بعينك وخزرتلك وانت ماتسحي
ووكعوا بيه دك وهو يكول والله معليه هي مكيفه جانت تريد بعد!!!!
انهزمت عهود وهي تمسح بعيونها وره مصارت لمة وهوسه
والناس كلها تباوع ولحكوها ااثنين يصجموها طبت للكراج وبعدين ماتحملت طلعت اشرت لتكسي وطلعت بيهوتنورتا العريضة ام الكبس تهف وراها
جانت برازيلي كوة تمشي وتعتعت
حتى بيتهم تيته من القهر
طلعته من هذا وذاك الفرع وهو يدردم عليها وهي ايدها على كلبها لاتوكف بيهم
رجعت ووكعت بحضن امها تشهك
طبعا فخرية عرفت علة بتها وهي نفس الشي من البارحة منايمة ظلت واكفه بباب المطبخ تدعي من الجامة مالت الباب كانه تريد دعائها يوصل بلا حواجز
كالتلها كافي يمه كافي الله يهدي سرج ويفك كربتج
صاحت عهود وهي تشهك بدموعها
---يمه والله والله تعبت تعبببت محد حاس بيه
محد عافني لحالي والله مرايدة شي من احد اني
بس كون يعوفون بحالي رضيت بقسمتي ونصيب وكلت الحمد لله
بس اووووف اوووف من هال الناس ماتترك احد لحالة ولكم لييييش
مو هذا الله شكبره مايضرب بحجار
ماتخافون من الله
شو اني هيجي ارجف من تجي سيرة احد كبالي يمه تعبت شسوي
---كافي يمه لاتاذين روحج والله الدنيا ماتسوة كافي يايمه
---باعي يوم هسه خابري عمتي كوليلها خلص اني مستعدة شوكت مايريد يرجعني ارجع
اريد اشوف شنو تاليتها
---يمه اذا ماترديه محد يغصبج عليه
كعدت وباعت على السما جانت تمطر ودق خفيف
والله يمه مالي نفس لا بيه ولا بغيره
بعيني كل الرياجيل نفس الشي ولا اطيقهم
ماادري يمكن من صوج ابويه الي ماشفت منه حنيه
لو اني مو طبيعية
بجت فخرية على بتها بحرارة
وجرتها الها وكلتلها يمه شبيج ليش هيجي تحجين ليش مو طبيعية انت بعدج شابه ومثل الورد
اشو احلى جسم عندج والف واحد يتمناج
جنج مصقولة صقل
ليش مالج نفس باحد بالعكس حبي الدنيا ورجعلي لرجلج بلكت الله يرزقج بولد حلو مثل شهيد
شفتي شلون تحبيه وماتنسيه
معناها انت عندج غريزة امومة وطبيعية يمه مابيج شي
ابوج الله يرحمه راح لدار حقه
شحجي شكول
الله يسامحه
هو ظلمنا كلنا مو بس انت
يله كومي
خابريهم
كومي انت خابري نزار واحجي وياه
شوفي نفسج
واذا مارتاحيتي
السلام عليكم وعليكم لسلام
كلمن يروح لحاله
مابيها شي
ها شكلتي؟
هزت راسها وراحت لغرفتها تبدل
وظلت فخرية تضرب اسداس باخماس شبيها البنية
ليش هيجي هاي
اخاف صايرلها شي من هي وصغيرة
اخاف احد متحرش بيها
لا لا جانت كالتلي هاي ماتعرف تضم حجاية بكلبها
يارب سترك علينا وعلى امة محمد
بذاك الوقت جان نزار بغرفته توه متريك وصعد فوك
دخن جكارته وصافن على الشارع كباله
جانت بغداد عبارة عن بيوت تغطيها الاشجار والنخلات
وكل بيت بيه حديقة شكبرها مو اقل من اربع اشجار بكل زاويه وحده
واكثر شي بيوت الكرخ من حي الجامعة وخصوصا العامرية جانت معروفة باشجار النارنج
وريحة الشبوي
ظل صافن يراقب الطريق
وشاف الطيور وهي تكمز من واير لوايير واحلى مابيها جان صوت طيور اليمامة وهي تغني كوكو ختي
فظل نزار يدخن وينفث بجكارته ويغني ويه نفسه ككوختي وين اختي
بالحلة
شتاكل باكله شتشرب مي الله
اووف يااسما والله مشتاقلج
اتذكر بيبته ام كاطع الله يرحمها
من جانو هو واسما بحضنها وحجتلهم القصة الخرافية انه اكو بنية اسمها كوكو صغيرونه وحلوة في يوم كمزوا قطاع الطرق والحرامية على بيتهم وباكوها
وسمعوا اهلها بعد سنين انه اتزوجت بكنيسة بالكوفة
فظلت اختها الصغيرة تندعي من رب العالمين تصير طيرر وتروح تشوف اختها
فغنتلها ككوختي وين اختي!!
ضحك ويه باله نزار وشرب اخر رشفة من استكانة الجاي
وباوع شاف القند ماكل منه بس حافته
اتذكر ايام الاسر جانت القنده لازم تكفيهم يوم او يومين
فكل استكامن جانوا يكرطون منه شويه
وحتى هنا اتعلم الجاي الا وياه القند
وقطعت سلسة افكاره صوت امه وهي تصيحه بلهفة عهود على التلفون
نزل على السريع وشبخ الدراج درجتين
جان مبهوت عباله صاير شي
كلها خير يمه شكو احجي
--ماكو شي يمه شبيك جفلتني
البنية تريد تسال عليك
---شبيها
--مابيها شي يمه شبيك
---مو وكتها بالدوام هسه ؟
---دشوف شبيها
شال التلفون واتبلعم
كللها راسا خير عهود خوما اكو شي
---مرحبا نزار شلونك لا ماكو شي حبيت اسال عليك
---ليش راجعة من الدوام صاير شي؟
---لا لا ماكو شي جنت تعبانة وكلت ارجع للبيت وشفت عندي وكت اسال عليك
---ها الحمد لله ظل بالي
بس شعجب حنيتي؟
--- ليش شعجب مو قبل يومين خابرت
انت الي متخابر
كل مااخابرج لو نايمة لو بالحمام وماترجعين ادكين عليه
اكول خليها براحتها
---لا والله نزار مو ماارجع اخابر بس لو ميلاد لو سعد اربعة وعشرين ساعة لازمين التلفون
---شلونج بالدوام ؟
بدت تحجيله عهود عن مدرستها بحي الامين وكيف انه معظم البنات من هنه وصغار محجبات
وانه مستوى التعليم كلش هابط مو مثل قبل
هسه كله خصوصي صاروا ياخذون الطالبات
لو يعتمدون على الملازم
وكل سنة تتغير المناهج
وطولت عهود بالحجي ونزار صافن
ماعنده شي يحجيه
ولا يناقشها عنه
وهو جان يحاول قدر الامكان انه مايحجي كدامها عن ايامه بالاسر
حتى من يسولف جان يذكر ايامه قبل ايام الثمانينات
والاغاني العراقية القديمة
الي جان على طول يدندنها ويه نفسه
واستمرت المكالمات لمدة اسبوعين
خلال هذه الفترة حضرت نورية غرفة نزار من جديد ورتبتها وخلتله تلفزيون جديد
جان نزار يستحي يطلع وينزل من تكون مها موجودة وتفتر بالبيت خصوصا وانه هي محجبة وهو مامتعلم على مرة غريبة وياهم
جانت تصرفاته غريبه تماما الهم
الصلاة بمواعيدها يصليها
صافن اكثر الوقت وكلشي جديد عليه
مايناقش احد
عهد خوف من ردة فعل اي شخص
معظم وقته صاريقضية بالمحل ويه سامي وجان يتعجب على التغيير الي صار بالعراق خلال العشر سنوات المضت
بعدها بشهر تقريبا بنهاية الثاني من عام 98
رجعت عهود لنزار بكعدة عشا بسيطة
لكن علاء بقى يدور ورة الموضوع وليش كل هذا التهرب
مع ذلك وحتى لاتطلع نورية كذابه عقدوا يم شيخ عقد شرعي على السريع
اول ايام رجعتهم اخذت عهود اجازة عشرة ايام
اول ليلة فرغولهم البيت حتى ياخذون راحتهم
كانت عهود ترجف من القلق والخوف
ماتعرف من شنو
كانه تتزوج للمرة الاولى سالها نزار وهو يمسح عرقه بعز الشتا اذا كانت اشتاقتله
فهزت راسها بالايجاب
وكللها بصوت حسن انه مامر يوم ماتذكرها بيه
ايام جان يشتاقلها كلش
وايام كان يكرهها كلش
وايام جان يتمنى يفقد الذاكرة حتى لايتالم
وبدى يحجي عن كم الالم الي تركته بداخله من قرر يروح ومايرجع
بينما جان كل همه تحصل منه الحقيقة
شنو اللي صار قبل مايتاسر
لكن ضعفها مخلاها وخصوصا من شافته انسان هش مايتحمل اي صدمة اخرى او عركة
الليلة انتهت بماساة عندما عرف نزار انه يعاني من العجز
وحاولت تواسيه واطمانه انه هذا شي طبيعي حالته النفسية تعبانه والي مر عليه مو قليل
لكن العشر ايام الي مرت كل يوم نفس الشي
حتى حجت لامه كلشي بعد ملحتها
فقررت نورية وزهير يطلعون من الصبح لحد ماترجع مها
منها يعوفوهم وحدهم ومنها
يروحون يدورون علاج وحل لابنهم ويقدموه على الجاهز حتى لاينجرح اكثر
وماان انتهى شهر كامل
كان نزار كل يوم يموت اكثر
وعهود تذوي بالزايد
حتى صار نادرا مايحجي وياها
مكان يحملها اي مسؤلية لكن بدى يشعر بمشاعر غريبة مزيج من الكره والغل والغضب والشفقة والعطف بنفس الوقت
عذبه وجود عهود حوله
ووجودظلها الي يذكره بماساته المستمرة
الى ان
اكتشف علاء حقيقة عقد زواج نزار المسجل بالمحكمة باسم ازهار كاطع مطلك
