الحلقة { 90 }
مها : الفساتين هنا حسه انها مش عجباكي ؟
علياء : انا لا والله بس انا بشوف فستان كدا عشان وسام عشان فرحها
حسام : هو امتى ؟
علياء : لسه والله يا حسام عمك عمر محددش مع عمرو بس اعتقد كدا بعد امتحنات التيرم
ميريهان : احنا جينا شوفو كدا
وسام : ( خارجت من اوضت القياس و هي لبسه الفستان والطرحه ) ها حلو
مها : ما شاء الله ايه الجمال دا ؟
علياء : دا الفستان هياكل منك حته يا وسام الله اكبر
وسام : انا كدا هتغر على فكره ، انا هصدق حسام ( وقفة قدامه ) ها يا حسام انفع عروسه ولا في حاجه نقصاني ؟
( وقتها حسام و مها فهمه معني كلام وسام وانها تقصد كلام حسن لما قالها انا ما اجوزش ابني واحده معاقه بس طبعا ميريهان و علياء مفهموش ودا اللي خلى حسام عينو تدمع لانه حس أن وسام موجوعه اوي بس مش مبينه و بتحاول تبقى عادي )
وسام : حسام هوهوهو ايه سرحان في ايه
حسام : سوري سرحت في الفستان بجد تحفه عليكي استني لما اصورك بيه ( وصورها )
ميريهان : انا كمان هصورك استني ( وبعد ما صورتها ) يبقى خلاص انا و وسام نفس المقاس يبقى اكيد هيبقى مظبوط عليا
مها : هو هيبقى عليكي حلو بس على وسام احلى هي لبسته خلاص شوفي انتي حاجه تانيه
وسام : بس انا مش جايه اشتري ليه فستان
علياء : ومالو بدل نزلنا والفستان هياكل منك حته والله دانا حسه ان الفستان هينطق ويقول انا بتاع العروسه وسام ههههههه
ميريهان : يا بختك يا عم كمان هتجيبي فستان بيتكلم
الله يسهلو يا بااااا
وسام : بس يا مي بدل ما حسام و طنط يقولو عليكي بيئه ههههههه
ميريهان : هههههه صح صح انا مؤدبه وكلاس اوي والله على فكره
مها : والله انتم بنات مشكله
علياء : يلا بقى شوفي فستان يا مي خلونا نخلص
وسام : يا ماما اومال انا لبست وقست دا ليه ؟
حسام : لا دا بتاعك خلاص مش هينفع يبقى لغيرك
وياريت تقبليه هديه مني ليكي
علياء : لالا يا حسام مينفعش
وسام : دا مش ماينفعش دا مستحيل انا مقبلش اخد منك هديه كدا
حسام : ليه بس هو احنا مش اخوات واصحاب ؟
وسام : اخوات واصحاب وكمان خطيب اختي وبكرا تبقى جوزها
وجوز اختي مينفعش يجبلي فستان فرحي ولا ايه يا طنط ؟
مها : ( محرجه ومش عارفه تقول ايه ) اااا بس انتم اخوات مفهاش حاجه
وسام : لا برضو معلش
علياء : تعالو لما نشوف طب فستان مي
ميريهان : بصو دا حلو اوي والتاتريز بتاعو تحفه
- تعالى قيسي يا وسام
وسام : تعالى
**** (بقلم : هند محمد ) ****
أم موني : انا عاوزه اقولكم كلمتين كدا وأبوكم مش هنا
فاطمه : في ايه يا تيته ؟
أم موني : عمرو هيتجوز وسام وانا حسه كدا انكم مش عاوزين صح ولا لا ؟
جنى : بصراحه انا مش عاوزه عشان هو جوز ماما ازاي بقى يتجوز وسام كدا لما ماما هترجع هيتخنقه سوي
أم موني : ما امكم مش هترجع خلاص
جنى : لا هترجع انا شفتها وانا نايمه وشفتها وهي بتقع في البلكونه
مصطفى : تيته كلامها صح مفيش حد بيروح عند ربنا وبيرجع تاني ؟
جنى : ماما مرحتش عند ربنا ماما راحت عند حنتوسه
فاطمه : جنى انتي صغيره ومش فهمه حاجه ، وبعدين بابا لما يتجوز وسام احسن ما يتجوز واحده غريبه منعرفهاش
أم موني : يسلم بؤك يا بطه ايوه كدا قولي لأخواتك
مصطفى : انا مش فارق معايا بس المهم متخنقش عليا وتقرفني في عشتي
أم موني : متقلقش في دي المهم تبقى متربي وتبطل الشيطنه اللى مسكاك دي
جنى : طب ما نجوز وسام واحد تاني وخلاص مش لازم بابا
أم موني : أذا كان انا عاوزه اجوز ابوكي تروحي انتي تجوزي وسام لحد تاني ؟
جنى : افهمي يا تيته شغلي دماغك شويه
أم موني : انا برضو اللى اشغل دماغي ؟
جنى : اه فتحي ، دلوقتي بابا اتجوز وسام تقدري تقوليلي هتنام فين ؟
أم موني : في الاوضه جوه عند عمرو
جنى : لا بابا مينمش جنب حد غير ماما
فاطمة : جنى الحاجات دي حاجات كبار منتكلمش فيها
جنى : انا بقى عشان تبقى عرفين هفضل مع بابا وهنام جنبه كل يوم
أم موني : كدا برضو يا جنى انا زعلانه منك
جنى : ازعلي شويه و هتصلحيني عادي
