الحلقة { 42 }
بيتر : الو
بتول : الو يا قيصر الغرام
بيتر : ايه دا بتول حبيبتي ؟
بتول : بتول ؟ تقصد تقول المرحومه ، كدا برضو يا بيتر بتفول عليا انت و وسام ؟
طب ليه دانا بحبها وبحبك ؟
بيتر : طب اعمل ايه يا بتول بس مانا كان لازم اتعرف عليها واكتب عنها تقرير و الا كانو هينقلوني الواحات و هتسوح
بتول : تقوم تقولها ان ابن البواب قتلني وبعدين احنا معندناش بواب اساسا ؟
بيتر : غصب عني انا كنت لازم اقولها قصه حلوه وجمده عشان تقتنع بيها وترضى تكلمني واعرف معلومات عنها ، ما كلو على ايدك ، اول ما الواء محمود عرف اني السبب اني طلعتها هوا كان هينفخني
بتول : عارفه دا كلو بس يعني دي كاتبه مش مشهوره ولا حد يعرفها ليه بقى تكتبو تقرير عنها و تعمل كل القلق دا ؟
بيتر : ما لما الصفحه بتاعتها تكون 20 الف و في يومين تبقى نص مليون لازم نقلق يا بتول و نعرف البنت دي مين بالظبط هي واهلها بدل ما تكون تبع منظمه كدا ولا كدا وتقلب علينا الدنيا
بتول : اممممم وطلعت ايه بقى هي واهلها ؟
بيتر : طلعه ناس طيبين اوي يا بتول والله ومحترمين جدا
بتول : طيب كدا بقى خلصلت معاها شغلك ممكن بقى متكلمهاش تاني ؟
بيتر : نفسي اعرف انتي خايفه من ايه ؟ ولا بتغيري عليا ليه ؟ هو انا هروح اتجوز وسام عليكي مثلا ؟
بتول : لا
بيتر : تبقى اتهدي واقعدي سكته انا وهي اصدقاء وانا بعتبرها زي سالي ، دا غير ان اخوها مسافر حنتوسه اتقي ربنا بقى
**** ( بقلم : هند محمد ) ****
لؤي : ها عملتي ايه ؟
موني : اديني زودة السرعة
لؤي : عملتيها الضعف زي ما قولتلك ؟
موني : لا عملتها 4 اضعاف
لؤي : ايه 😨
موني : مااااا انا اعمل ايه لقيت العداد 50 / 100 / 200 روحت عملتو 200 انا قولت اسرع عشان بدل ما نوصل في سناتين نوصل في 6 شهور
لؤي : 😔 لحسن يكون خطر ؟
موني : سبها لله احنا لو مكتوب لنا نرجع هنرجع
لؤي : صح ، تعالي بقى نقعد مع البنات شويه
موني : بمناسبة البنات انا حسه تيشو مهتميه بيك اوي وعماله تتمحلسلك ايها الفرعون الصغير وانته مديها وش
لؤي : والله ابدا بس اقولك ايه المصري يروح في اي مكان الستات تتلزق فيه
موني : خلي بالك انها متجوزه ومخلفه وعندها طفل رضيع
لؤي : طب ما يمكن اهتممها بيه دا تنفيس للامومه اللي جواها ؟
موني : ههههه تنفيس ليه هي انبوبه منفسه ؟
**** ( بقلم : هند محمد ) ****
( وتاني يوم )
حسن : الشقه حلوه اوي يا إمام
إمام : عشان تعرف يا جدو ان انا يعتمد عليا
حسن : وهو حد قال غير كدا ؟
إمام : أه بابا وتيته
حسن : لالا سيبك منهم انا لما اتجوز سيتك كل حاجه هتتغير ، وفي الاجازه هشغلك في السوبر مركت اللي هعملو وهعملك مرتب كل شهر عشان تعرف القرش بيجي ازاي
إمام : يا حبيبي يا جدو ربنا يخليك ليه
( وصلت مها ومعاها حسام )
حسام : ايه دا بابا اهلا أهلا
حسن : حبيبي ازايك
حسام : الحمد لله
حسن : سلامة رجلك ، مش تخلي بالك منه يا مها ؟
مها : اعمل ايه بس يا حسن هو اللي متهور و بيفكر بعند
حسن : عند أزاي يعني ؟
حسام : ولا حاجه يا بابا متحطش في دماغك
حسن : حاضر مش هحط في دماغي بس المهم تخلي بالك من نفسك
حسام : حاضر يا بابا
حسن : مال عينك يا مها منفخه كدا ليه ؟
حسام : من العياط على بتول هههههه
حسن : بتول ؟ وبتعيطي عليها ليه ؟
حسام : ( بص لمها ) اصل بتول ماتت ههههههههه
حسن : الله يرحمها طب بتضحك ليه هو الموت بيضحك ؟
إمام : اصلك يا جدو انت متعرفش مين بتول دي
حسن : مين واحده صحبتك ؟
مها : لا يا حسن دي بطلة القصه اللي كنت بقراها امبارح ، واتقتلت فانا عيط عشانها في مشكله ؟
حسن : بعدين في قلبك الحنين دا ؟ كدا هتتعبي
مها : اهو بقى بنفعل مع الاحداث
حسن : برحتك ولا يهمك بدل بتبقى مبسوطه خلاص
المهم : يلا بينا نروح نشوف الشقه اللي انا هشتريها
مها : طب نتغدا لاول
إمام : جدو هيغدينا باره بعد ما نتفرج على الشقه
حسام : اممم عارف انت كل الاخبار
إمام : اه طبعا
حسن : دا حبيبي دا ، اه صحيح سالم ابن عمك عاوزك تدورله على عروسه
حسام : انا اللي ادورلو ؟
حسن : اه وتكون حلوه وبيضه وعينها ملونها وشعرها بني
مها : والله ابن اخوك رايق وفايق
حسن : ليه بس كل دا عشان عاوز يتجوز واحده حلوه
حسام : في بنات كتير حلوين بس مجانين ، ولا ايه يا ماما ؟
مها : انا مش هرد عليك ، انا هقوم اغير عشان نروح نشوف الشقه الجديدة ( وقامت وسابتهم )
حسن : هي امك جيبالك عروسه مجنونه ولا ايه ؟
حسام : مجنونه وعنديه و دمغه نشفه
حسن : ههههههه عروستك انا اللي هجبهالك اصبر بس لما استقر هنا
حسام : اديني صابر على اقل اقل من مهلك
