[Completed] The Breakers Corazon Sociedad Batch 1 Book 3: Matthew Azcarraga

Chapter 18.3

NAPABANGON sa pagkakahiga si Liezl sa kama niya nang mabasa ang message na ipinadala ni Matthew. Lumapit siya sa closet at nagpalit ng damit. Pagkatapos ay mabilis na siyang lumabas ng kuwarto at bumaba ng hagdan.

"Tamang-tama ang pagbaba mo, anak," wika ng Papa niya na nakaupo sa sofa ng living room. "Kararating lang ng bisita mo."

Napatigil siya sa paghakbang nang makitang tumayo mula sa pagkakaupo sa sofa si Justin. Hindi niya inaasahang makita ito kaya hindi kaagad siya nakapagsalita.

"Anak," pukaw sa kanya ng Papa niya. Pagtingin niya dito ay nakita pa niya ang pagtataka nito sa nakikitang pagkagulat sa mukha niya.

Lumipad ang tingin niya kay Justin nang lumakad ito palapit sa kanya. Naiilang na siyang pakiharapan ito.

"Kumusta ka na?" tanong nito.

"A-Ayos lang," tugon niya sa mahinang tinig. "Hindi ka man lang nagpasabi na babalik ka na."

"Pasensiya ka na kung hindi na kita natawagan," sagot nito.

"Iiwan ko na muna kayong dalawa dito," singit ng Papa niya, tumayo na ito at tumungo sa kuwarto nito at ng Mama niya.

Isang mahabang katahimikan ang namagitan sa kanila. Hindi niya alam kung ano ang sasabihin dito. Naalala niya ang sinabi ni Matthew na sabay nilang ipapaliwanag dito ang relasyon nila. Muli niya itong tiningnan, nakatingin din ito sa kanya.

"Justin," panimula niya. "Can I... Can I make a call? S-Sandali lang."

Tumango lang ito at ilang hakbang siyang lumakad palayo dito para i-dial ang number ni Matthew. Nagtaka pa siya nang hindi niya ito ma-kontak. Ilang beses niyang inulit pero wala pa rin. Unti-unti nang bumalot ang kaba sa dibdib niya. Come on, Matthew. Answer it, she thought. Nang muli siyang mapatingin kay Justin ay nasa mga mata na nito ang pagtataka.

The number you dialed is either unattended or out of coverage area. Please try again later... Napabuntong-hininga siya. Wala siyang magagawa kundi pakisamahan muna ito, tatawagan niya na lang ulit si Matthew mamaya. Bago siya lumapit dito ay pinadalhan niya muna ng mensahe si Matthew na bumalik na si Justin at kailangan niya ito ngayon.