دبا ماريا وصلات لشهرها التاسع وبان عليها العيا مسكينة رغبني سامي نجي نجلس معاهم وقبلت جمعت حوايجي ومشيت واصلا كان بقاولي شي 3 دالامتيحانات و نسالي فرحات ماريا فاش شافتني.. دوزت معاهم سيمانة واليوم كان اخر امتيحان الحمد لله دوزتو مزيان مشيت طليت على ماما عاد مشيت للدار لقيت ماريا كتبكي انا: (بخوف) ماريا ماالكيي ماريا: (كتمسح دموعها) والو اختي يمكن مع الهرمونات انا: (بتشكيك) واخة اختي انا نطلع نبدل حوايجي ونرجع ماريا: اوكي.. مشيت بدلت حوايجي ونزلت عندها بقينا كنهدرو وحسيت بيها مهمومة.. دازت يوماين وسامي اضطر يمشي لطنجة على حساب شي خدمة فاش بغا يمشي عنقاتو ماريا وبدات كتبكي سامي: راه غير يوماين احبيبة ونرجع وهاهيا ليلى معاك ماريا: (زيرات عليه) كنبغيك بزااف سامي: وانا كنحماق عليك احبيبتي.. مشا سامي وهي طلعات لبيتها بقيت شوية وطلعت عندها لقيتها كتكتب شي حاجة شافتني وخباتها انا: طلعت نشوف واش محتاجا شي حاجة ماريا: لا اختي شكراا انا: اوكي هانا غنتكا فبيتي الى بغيتي شي حاجة عيطيلي ماريا: وااخة.. مشيت لبيتي وانا نطيح نعس حتى ضرباتني الفيقة على شي غوات شفت الساعة لقيتها 8 دالليل بديت كنسمع لقيت ماريا لي كتغوت مشيت كنجري لعندها ماريا: عتقيني كنولد انا: اويلي اش غاندير ماريا: اوف اوف ديني للصبيطار.. شديتها عونتها حطيتها فالطموبيل وطرت هزيت شال درتو على شعري وهزيت الساك دالحوايج وركبت الطموبيل عيطت لسامي فالطريق وعيطت لمالين الدار وصلنا وحطوها فوق الكرسي وهي شادا يدي بغاو يدخلوها للعمليات ماريا: دخلي معايا انا: لا منقدرش ماريا: عفااااك... بقات شادالي يدي دخلنا حطوها وقادوها باش تولد وهي شادا يدي وكتغوت لربي لي خلقها انا بديت كنبكي مقديتش نصبر حتى سمعت صوت البيبي كيغوت حليت عيني لقيتها واحد البنيتة صغيورة فنة حطوها فوق صدرها كان باين على ماريا العيا شوية بدات كتهضر بصوت متقطع ماريا: ل..يلى بنتي ا.. امانة عندك.. اشهد ان لا اله الا الله... وغمضات عينيها انا: (مصدومة) ماريا ختي فيقي.. مالها مكتجاوبش هدرو الطبيبة: (غطات وجها) الله يرحمها.. انا غير قالت هكاك وانا نغيب.. حليت عيني لقيت حدايا ليليا وعينيها حومر بالبكا انا: هئ هئ فين ماريا ليليا: الله يرحمها اختي انا: ميمكنش بنتها مزالة صغيرة.. دخل سامي وجا عنقني وبدا كيبكي سامي: علاش مشات وخلاتني حتى بغيتها وتعلقت بيها مشات وخلاتني انا وبنتها هئ هئ انا: هئ هئ الله يرحمها اخويا سامي: هي كانت عارفة راسها غتموت غير انا لي مفخباري والو انا: كيفاش وكيدرتي عرفتي سامي: (جبد رسالة وعطاهالي) هاكي قراي.. حليتها ويدي كيترعدو.. "حبيبي سامي يا من عشقته لمدة 4سنوات كنت كنتمنى انك تبغيني شي نهار ونحمل قطعة منك والحمد لله تحققت امنيتي وخا كنت مريضة بفقر الدم وكان الحمل خطر على حياتي مي ماقديتش نتخلا عليه فاش عرفت بلي حاملة منك فرحت ورجع عندي امل انك تبغيني كيفما كنبغيك والحمد لله رجعتي كتبغيني.. بغيت نقوليك ماتحزنش عليا مكاتجيش معاك التغوبيشة بقا ديما ضاحك وكنتمنى بنتي تسميها 'جوري' عنداك تسميها على سميتي مبغيتش يكون قدرها بحال ديالي.. ليلى ختي لي عاوناتني بدون مقابل واحتضنتيني ونتي معارفانيش كنشكرك وانا اكيدة ربي غادي يجازيك اما انا ماعندي منعطيك.. ليلى الطلب الوحيد والاخير بنتي جوري بغيتك تربيها وتعاونيها فحياتها كيفما عاونتيني.. واخيرا حبيبي سامي تزوج شي وحدة لي تعطيك الحب مدى الحياة ويلا بغيتي بنتك تعيش معاك لقا زوجة لي تعتابرها بحال بنتها ومتكرفسهاش انا عارفة ليلى مغاديش تخلا عليها وكنحمد الله حيت خليت بنتي فايدي امينة... كنبغيكم وبنتي امانة عندكم.. ماريا" بقيت كنبكي ماقديتش نتقبل انها ماتت ومشات عند الله وخلات بنت صغيرة قطعة لحم.......
