Loving Out Loud

Ep - 6

Unicode

- Dear White

ကျွန်တော် အခုတလောလုပ်ဖြစ်နေတဲ့အရာတွေကို ကြားရင် ခင်ဗျားအံ့ဩမလားတော့ မသိဘူး။ ကျွန်တော့်ဘဝမှာလေ တစ်ခါမှဒီလောက်ထိ ကျွန်တော့်ကိုကျွန်တော် ဂရုမစိုက်ဖူးဘူး။ ကျွန်တော် ညတိုင်းနွားနို့တစ်ခွက်သောက်ဖြစ်နေတယ်။ မနက်ဆိုလည်း ငှက်ပျောသီးစားလိုက်၊ ပန်းသီးစားလိုက်နဲ့ ကျွန်တော့်ရဲ့အစာစားတဲ့ပုံစံစနစ်ကိုပါ အတော်ကြီးပြောင်းလဲထားရတယ်။ ကျွန်တော် ဝိတ်တက်အောင်လုပ်နေရတယ်လေ။ ကျွန်တော်က ဘယ်လောက်စားစား မဝတဲ့သူမို့လို့ ဝိတ်တက်အောင်လုပ်ရတာ တော်တော်ကြီးခက်ခဲတဲ့ကိစ္စပဲ။ ကျွန်တော့်နဖူးမှာ ဝက်ခြံပိစိလေးတွေထွက်နေလို့ဆိုပြီး ကျွန်တော့်သူငယ်ချင်းက ဆီကြော်တွေမစားခိုင်းဘူး။ အစားရှောင်ရတာ ငိုချင်စိတ်အပေါက်ဆုံးပဲ TT. သူတို့မသိအောင်တော့ ခိုးစားတာပေါ့ ဟဲဟဲ။

Skin care လုပ်ရမယ်ဆိုလို့ Skin Care products တွေအကြောင်း နားထောင်ရတာနဲ့တင် ချာချာလည်မူးတယ်။
ကျွန်တော့်သူငယ်ချင်းကောင်မလေးတစ်ယောက်နဲ့အတူတူ product တွေလိုက်ဝယ်ဖြစ်သေးတယ်။ ပျားရည်တို့လို၊ ရှားစောင်းလက်ပပ်တို့လို သဘာဝပစ္စည်းတွေနဲ့ care လုပ်တာကောင်းတယ်လို့တော့ သူငယ်ချင်းကပြောတယ်။ ဒါပေမဲ့ ကျွန်တော်ကငပျင်းလေ။ DIY တွေမလုပ်ဖြစ်ပါဘူး။ အခုဆို အသားအရေအလှကုန်ပစ္စည်းတွေအပြင် မိတ်ကပ်အကြောင်းပါ ကျွန်တော် သိနေပြီသိလား။ ခင်ဗျား အဲ့တာတွေနဲ့ပတ်သက်ပြီးသိချင်ရင် ကျွန်တော့်ကိုဆရာတင်ပြီး မေးလို့တောင်ရနေပြီ။ ကျွန်တော် ဆံပင်ညှပ်ထားသေးတယ်။ အဖွားက ကျွန်တော့်ကို ဒီဆံပင်ကေနဲ့လိုက်တယ်တဲ့။ မေမေကတော့ နင် အရှေ့ဆံပင်ကြီးချထားတာ မျက်စိမစူးဘူးလားတဲ့လေ။ မျက်စိစူးတာတော့
တကယ်ပါ။ အဲ့တာကြောင့် အိမ်မှာနေရင် ကလစ်နဲ့ညှပ်တင်ထားဖြစ်တယ်။ ကျွန်တော့်ကိုကျွန်တော် Barbie ကားထဲက နောက်ဆုံးဇာတ်သိမ်းခါနီး လှလှပပပုံစံပြောင်းသွားတဲ့ ကောင်မလေးလိုခံစားနေရတယ်။ ကျွန်တော်ငယ်ငယ်တုန်းက ကျွန်တော့်ညီမနဲ့ပေါင်းပြီး Barbie ကားတွေ ခဏခဏထိုင်ကြည့်ဖြစ်တယ်လေ။