Loving Out Loud

Ep - 42

Unicode

ယနေ့ မြန်မာစာဆရာမ ကျောင်းမလာပေ။

ထို့ကြောင့် သူမ,ဝင်ရမည့် စာသင်ချိန်နှစ်ချိန်ဆက်တိုက် လွတ်နေ​၏။

လွတ်လပ်ရေးရနေသော ရှင်းယံတို့အတန်းသားများသည်
အချင်းချင်း စကားစမြည်ပြောရင်း၊ ရယ်မောရင်း၊ သီချင်းအော်ဆိုရင်း၊ ပေါက်ကရများလုပ်ရင်း ဆူညံပွက်လောရိုက်နေကြ​၏။

ထိုသို့သောအချိန်တွင် အတန်း​၏လူရွှင်တော်ရာထူး ယူထားသော တက်ကြွပျော်ရွှင်သည့်ကျောင်းသားတစ်ဦးသည် သူ့ထံတွင် Ouija board ပါလာသောကြောင့် တစ်တန်းလုံးအတူ ဝိုင်းဖွဲ့၍ သရဲခေါ်ကြရန် နှိုးဆော်​သည်။ များသောအားဖြင့် လူရွှင်တော်ကဲ့သို့ တစ်တန်းလုံးကို ဟာဒရရွှင်ဆေး တိုက်ကျွေးတတ်သော ကျောင်းသားဟူသည် တစ်တန်းလုံး​၏ အာရုံစိုက်ခြင်း၊ ဂရုပြုမိခြင်းကို အလိုလျောက်ရရှိထားသူဖြစ်သည်။ ထိုကျောင်းသားသည် ခင်မင်ရင်းနှီးသူပေါများပြီး အတန်း​​၏ mood maker ကဲ့သို့ဖြစ်နေသည်။

သို့ပါ၍ ထိုကျောင်းသားမှ အပျော်တမ်းသရဲခေါ်ဆိုရန် ပြောသောအခါ အတန်းသားအများစုက စိတ်ဝင်စား၍ သဘောတူကြလေသည်။

သရဲမခေါ်သော ကျောင်းသားဟူ၍ စာလုပ်နေသော စာဂျပိုးနှင့် သရဲကြောက်တတ်သူများသာကျန်သည်။

စာလုပ်နေသော စာဂျပိုးအုပ်စုတွင် အဆင့်တစ်ကျောင်းသားဖြစ်သော စိုင်းရှင်းယံမပါ။ ရှင်းယံသည် သရဲ ဟူသောအရာကို အလွန်အမင်းစိတ်ဝင်စားသူဖြစ်လေရာ သရဲခေါ်မည့်အရေးကို လုံးဝလက်လွတ်မခံနိုင်ပေ။

စာလုပ်နေသူမှာ ဖြိုးသတ္တိလှိုင်သာ ဖြစ်​၏။
သရဲကြောက်၍ မပါဝင်သူမှာတော့ နက္ခတ်ညီဖြစ်သည်။

နက္ခတ်ညီသည် သရဲခေါ်ရန် ဝိုင်းဖွဲ့ထိုင်နေကြသော အုပ်စု​၏ ခပ်ဝေးဝေးတွင် ထိုင်နေသည်။ သရဲခေါ်သောအသံကို မကြားရစေရန် နားကြပ်တပ်၍ ရုပ်ရှင်ကြည့်နေသေးသည်။

နက္ခတ်​၏အနောက်ခုံတွင် ဖြိုးက စာလုပ်နေသည်။

သရဲခေါ်ဆိုရန်အတွက် သရဲခေါ်ဆိုသောအုပ်စုသည် အခန်းအတွင်းရှိ လိုက်ကာများကိုပိတ်၍ မီးအလင်းရောင်များလျှော့ချလိုက်သည်။ တစ်ယောက်ထိုင် စားပွဲခုံများကို ဆက်,လိုက်၍ ထိုပေါ်တွင် Ouija board ကိုတင်သည်။
ရှင်းယံက Ouija board ​၏ထိပ်ဆုံး၌နေ​၏။ ခွန်စိုင်းက ရှင်းယံဘေးတွင်ရှိ၍ အတန်း​၏ Mood maker ဖြစ်သော ကျောင်းသားက သရဲခေါ်ဆိုခြင်းကို ဦးဆောင်သည်။