Loving Out Loud

Ep - 43

Unicode

ခတ်နှင့် ကစားကွင်းတွင်တွေ့ပြီးသည့်နောက် ခတ်ကို ရှင်းယံကိုယ်တိုင် အိမ်ပြန်လိုက်ပို့ပေးခဲ့သည်။ ပြီးမှ မိမိအိမ်သို့ ပြန်ခဲ့​၏။

ရှင်းယံ အိမ်သို့ရောက်၍ ဧည့်ခန်းထဲသို့ဝင်လိုက်လျှင် မားမားနှင့်တန်းတိုး​သည်။

မားမား​၏မျက်နှာသည် ပြတ်ထွက်မတတ်တင်းမာနေကာ ဒေါသအရောင်အဝါ ခြယ်သနေသည်။ ရှင်းယံ တစ်ကိုယ်လုံးတောင့်တင်းသွား​၏။ မားမား ဘာအတွက် ဒေါသထွက်နေသနည်း။ မားမား​၏ဒေါသကို ရှင်းယံလန့်သည်။

"စိုင်းရှင်းယံ...ငါနဲ့ခဏစကားပြောရအောင်"

မားမား​၏အသံမှာ မာကြောနေလျက်သား။

********************************

ရှင်းယံကိုစတွေ့သော စာမေးပွဲရက်မှစ၍ တိတ်တခိုးလိုက်ကြည့်ခဲ့ရသော ၂နှစ်တာကာလ။

နိုးနိုးစတင်လိုက်သော mission impossible။
ရှင်းယံရဲ့နှလုံးသားကို ခိုးယူဖို့ လုပ်ဆောင်ခဲ့ရသော
ခရီးရှည်ကြီး။

ထိုအရာအားလုံး​၏အဆုံးသတ်ကို ဆုံးဖြတ်ပေးနိုင်မည့် စာတစ်စောင်ကို တိတ်ဆိတ်သော ညဆယ့်တစ်နာရီတွင် စတင်ရေးသားဖြစ်သည်။

ရှင်းယံအတွက်...လင်း​၏Love letter...

ဖွဲ့နွဲ့ရေးသားရသော မြန်မာစာအရေးအသား၌ ပါရမီမပါသောလင်းသည် ကိုယ့်​၏ခံစားချက်များကို စာလုံးဖြင့် ပုံဖော်ရသည်ကိုပင် ခက်ခဲနေခဲ့​၏။ သို့သော်လည်း ညီမဖြစ်သူ မဒီ့​၏အကူအညီကိုယူ၍ ကြော့မော့နူးညံ့သောစာလုံးများကို ရှာဖွေကာ၊ စာကြောင်းများကိုဖွဲ့နွဲ့ကာ ရည်းစားစာတစ်စောင်ကို ကြိုးစားပမ်းစားရေးသည်။ ခံစားချက်တို့မည်သည် ခံစားရတာလွယ်သော်ငြား ချရေးရသည်မှာတော့အခက်သား။

အနည်းဆုံးတော့ စာဟာ ဝတ္ထုတစ်ပုဒ်လိုဖတ်လို့မကောင်းရင်တောင် 'ချစ်တယ်' ဟူသော ဆိုလိုရင်းလေးကို ရှင်းယံ သဘောပေါက်သွားရင် လင်းကျေနပ်ပါပြီ။

စိတ်လှုပ်ရှားရပါတယ် ရှင်းယံ။
ရင်ခုန်ရပါတယ်။ ကိုကြီးအတွက် စာရေးနေရင်း ဒီရည်းစားစာကို ကိုကြီးမြင်ရင် ဘယ်လိုဖြစ်သွားမလဲဆိုတာတွေးတောမိပြီး ရင်ခုန်ရပါတယ်။