Unicode
ကျောင်း၏ပန်းခြံလမ်းတွင် လမ်းလျှောက်သွားနေသော လင်းကိုမြင်သောအခါ ရှင်းယံမျက်ဝန်းများတောက်ပသွားသည်။ သူ ခပ်ရေးရေးပြုံးလိုက်ပြီး လင်းကိုလှမ်းခေါ်သည်။
"ခတ်..."
ခေါ်သံကြောင့် လင်းလှည့်ကြည့်လာသည်။
" ကိုကြီးရှင်းယံ..."
ရှင်းယံအနားသို့ လင်း, တက်တက်ကြွကြွပြေးသွားသည်။
"ကျွန်တော် ကိုကြီးကိုလိုက်ရှာနေတာ..."
" အစ်ကိုလည်း ခတ်ကိုရှာနေတာ...အစ်ကို ထမင်းစားဆင်းချိန် အလုပ်ရှိတာနဲ့ ခတ်ကိုစာသင်ပေးဖို့ မနက်ပိုင်းအချိန်ရွှေ့လိုက်တာ အဆင်ပြေတယ်မလား"
" ပြေပါတယ်...ကျွန်တော်က ဘာအလုပ်ရှိတာမှတ်လို့..."
ရှင်းယံကိုမော့ကြည့်ရင်း လင်း ဟီးခနဲရယ်ပြသည်။
"ကျွန်တော်တို့ အခုစာကြည့်တိုက်သွားကြမယ်မလား..."
"အင်း...သွားမယ်လေ..."
ထိုအခိုက်တွင် သူတို့အနားသို့ နက္ခတ်ညီ အမောတကြီးပြေး၍ရောက်ရှိလာသည်။ နက္ခတ်မှာ မောဟိုက်သံဖြင့်အသက်ရှူနှုန်းများ မြန်ဆန်နေ၏။ သူက ဟောဟောဟဲဟဲဖြင့်အသက်ရှူရင်း
" လင်း...ငါမင်းကိုလိုက်ရှာနေတာ အခုမှပဲတွေ့တော့တယ်..."
ဟုဆိုသည်။
"ဗျာ..."
လင်း နက္ခတ်ကို မျက်လုံးပြူးကြည့်သည်။ နက္ခတ်သည် လင်း၏လက်တစ်ဖက်ကို ဆတ်ခနဲဆွဲကိုင်လိုက်သည်။
" သွားရအောင်...ဟိုမှာ မင်းကိုစောင့်နေကြပြီ..."
နက္ခတ်မှ အားဖြင့်ဆွဲလိုက်သောကြောင့် နက္ခတ်အနောက်သို့ လင်းပါ,သွားသည်။ ရှင်းယံသည် လင်း၏ကျန်လက်တစ်ဖက်ကို လှမ်းဆွဲလိုက်၏။
" ဘယ်သွားမလို့လဲ..."
" ဘောလုံးကန်မလို့ လင်းကိုလာခေါ်တာ..."
ရှင်းယံကိုလှည့်ကြည့်ပြီး နက္ခတ်ပြောသည်။ ရှင်းယံ၏ဖြောင့်စင်းသောမျက်ခုံးများ တွန့်ချိုးသွားသည်။
YOU ARE READING
Loving Out Loud
Romanceလင်းသုခတ်ရဲ့အတွေးထဲမှာ နှစ်ပေါက်အောင် တိတ်တခိုးကြိုက်ခဲ့ရတဲ့ Crush ကိုလိုက်ဖို့ပဲ စိတ်ကူးရှိခဲ့တာ... Crush နဲ့တင်မက crush ရဲ့ Bff ကြီးနဲ့ပါ ဇာတ်လမ်းရှုပ်လာမယ်လို့ မထင်ထားခဲ့ဘူးလေ! လင္းသုခတ္ရဲ႕အေတြးထဲမွာ ႏွစ္ေပါက္ေအာင္ တိတ္တခိုးႀကိဳက္ခဲ့ရတဲ့ Crush ကိ...
