Loving Out Loud

Ep - 39

Unicode

ကျောင်း​၏ announcement room သည် ကျောင်းဝန်း​၏ထောင့်စွန်းတစ်နေရာ၌ဖြစ်သော ငါးထပ်အဆောက်အဦ​၏ အပေါ်ဆုံးနှင့် ဂျောင်အကျဆုံး တစ်နေရာတွင်ရှိသည်။ Announcement room ရှိရာအထပ်သည် အပေါ်ဆုံးထပ်ဖြစ်သည့်အပြင် စာသင်ခန်းများမရှိဘဲ ဟောခန်းတစ်ခန်းသာရှိသောကြောင့် လူသွားလူလာနည်း​၏။ ဆရာ၊ ဆရာမများနှင့် ခေါင်းဆောင်ရာထူးရထားသော၊ ကျောင်း​၏လုပ်ငန်းတစ်နေရာရာတွင်ပါဝင်တတ်သော ကျောင်းသားကျောင်းသူများသာ ထိုအခန်းနေရာနားသို့ သွားတတ်ကြသည်။

Announcement room ​၏နဂိုရည်ရွယ်ချက်သည် ကျောင်းတစ်ဝန်းတပ်ဆင်ထားသည့် speaker များနှင့် အသံချဲ့စက်များ မှတစ်ဆင့် ကျောင်းတွင်း သတင်းအချက်အလက်များကို ကြေညာရန်၊ ကျောင်းသားကျောင်းသူများတက်ကြွအောင် ​ကျောင်းသားအချင်းချင်း တာဝန်အလှည့်ကျဖြင့် ရေဒီယိုchannel ကဲ့သို့ ဖျော်ဖြေရန်၊ သီချင်းဖွင့်ရန် စသည်တို့အတွက်ဖြစ်သော်လည်း စင်စစ်၌ အနောက်တိုင်း အထက်တန်းကျောင်းရုပ်ရှင်များလို မဖြစ်ခဲ့ပါချေ။

ဆရာ၊ဆရာမများက Announcement Room ကို မနက်ပိုင်းနိုင်ငံတော်သီချင်းနှင့် ဇာတိမာန်သီချင်းဖွင့်ရန်သာ အသုံးပြုကြလေသည်။ တစ်ခါတလေတော့လည်း ကျောင်းအုပ်ဆရာမကြီးမှ တစ်ကျောင်းလုံးအား ကြေညာစရာရှိသောအခါ အသုံးပြုတတ်သည်။ ထိုအခါကလည်း ရှားသည်။

ထို့ကြောင့် Announcement room သည် တစ်ကျောင်းလုံး၌ လူသွားလူလာအနည်းဆုံးဖြစ်သော ဇိမ်ခံခန်းကြီးဖြစ်နေလေသည်။

ဇိမ်ခံခန်းဟု ခေါ်ရခြင်းမှာ အကြောင်းရှိသည်။ ယင်းအခန်းသည် အပေါ်ဆုံးနှင့်ထောင့်စွန်းအခန်းဖြစ်သည်နှင့်အညီ လှပသောအပေါ်စီးမြင်ကွင်းရှိသည်။ ယင်းမြင်ကွင်းကို မြင်တွေ့နိုင်ရန် မှန်ပြတင်းပေါက်များရှိသည်။ မှန်ပြတင်းကို လှပညွတ်နူးဖွယ် ဆင်စွယ်ရောင်ခန်းစီးများဖြင့် ကာရံထားသည်။ မည်သည့်ကျောင်းသားမိဘမှ လှူဒါန်းထားမှန်းမသိသော ကော်ဇောကိုခင်းထားသည်။ Air-Con တပ်ထားသည်။ ခေါက်ကုတင်တစ်လုံးထည့်ထားသည်။

ထိုသို့ရှယ်ပြင်ထားပြီးမှ အသုံးပြုမှုနည်းသောအခန်းဖြစ်နေသောကြောင့် ကျောင်းအုပ်ဆရာမသည် ထိုအခန်းတွင် ကွန်ပျူတာတစ်လုံးထည့်လိုက်ကာ ဆရာ၊ဆရာမများ​၏ စာစီစာရိုက်ခြင်းအတွက် အသုံးပြုစေလေသည်။