Loving Out Loud

Ep - 54

Unicode

နောက်တစ်နေ့တွင် ရှင်းယံ​၏ဆေးရုံဆီသို့ လင်း,ထပ်မံသွားရောက်သည်။ ထိုအချိန်ထိ ရှင်းယံသည် သတိပြန်မရသေးဘဲ လူနာကုတင်ထက်တွင်သာ မလှုပ်မယှက် လဲလျောင်းနေဆဲဖြစ်​၏။

အခန်းတစ်ဖက်ရှိ ဆိုဖာခုံများတွင်တော့ ရှင်းယံ​၏ပါးပါးနှင့် မားမားထိုင်နေသည်။ လင်းသည် ရှင်းယံ​၏ပါးပါးနှင့်မားမားကို လူမှုရေးအရ နှုတ်ဆက်လိုက်သောအခါ ရှင်းယံ​၏ပါးပါးက ပြုံး၍ပြန်လည်နှုတ်ဆက်ပြီး မားမားက ခေါင်းညိတ်ရုံမျှသာ တုံ့ပြန်သည်။

လင်းတွေ့ဖူးသော ရှင်းယံ​၏မားမားသည် ပြုံးရယ်လေ့မရှိသော်လည်း အမြဲတစေနီးပါး အထက်စီးဆန်သောအကြည့်များနှင့် စိတ်နေမြင့်သောမျက်နှာထားတို့ရှိတတ်သည်။ ယခုကမူ သူမထံတွင် အပြုံးအရယ်မရှိတာချင်းအတူတူ မာနနှင့်အတ္တကိုမမြင်နေရချေ။

သူမသည် ထုံထိုင်းမှိုင်းညို့နေပြီး အထူးသဖြင့် သူမ​၏မျက်ဝန်းများတွင် ဝမ်းနည်းရိပ်များထင်ဟပ်နေသည်။ သူမသည် မည်မျှပင် သားဖြစ်သူကို ကြိုးကိုင်ခြယ်လှယ်တတ်သော၊ အတ္တကြီးသောမိခင်တစ်ဦးဟုဆိုချင်ဆိုပါစေ၊ ရှင်းယံကိုအလွန်တရာချစ်မြတ်နိုးသော အတွင်းစိတ်ကလေး သူမထံတွင်ကျန်ရှိနေသည်။ ထို့ကြောင့် ရှင်းယံ​၏သတ်သေရန်ကြိုးပမ်းမှုက သူမကိုအလွန်အမင်းတုန်လှုပ်သွားစေပြီး သူမ​၏ကြိုးကိုင်ခြယ်လှယ်တတ်သောဉာဉ်ကလေးကို လှုပ်ခတ်သွားစေပုံပင်။

ရှင်းယံ​၏မားမားကို လင်းမနှစ်မြို့သော်လည်း ယခုကိစ္စတွင်မူ သူမ​၏စိတ်ကိုစာနာပေးနိုင်သည်။

လင်းသည် ရှင်းယံကိုခေတ္တမျှကြည့်ရှုပြီး ရှင်းယံ​၏ကျန်းမာရေးအခြေအနေအကြောင်းကို ​ပါးပါးနှင့်စကားစမြည်ပြောဆိုခဲ့​၏။ ပါးပါး​၏စကားအရ ဆရာဝန်များက စိုးရိမ်စရာမလိုတော့ဘဲ သတိရမည့်အချိန်ကိုသာ စောင့်ဆိုင်းရတော့မည်ဟု ပြောဆိုခဲ့ကြောင်း သိရှိရသည်။
ရှင်းယံသတိရလာပါက လင်းထံသို့ အရင်ဆုံးဖုန်းဆက်ပေးမည်ဟုလည်း ပါးပါးကထပ်ဆင့်ပြောခဲ့သေး​၏။

ဆေးရုံ၌ တစ်နာရီခွဲခန့်နေပြီးသော် လင်းပြန်ရန် အချိန်ကျရောက်လာသည်။ ရှင်းယံအနားတွင်သာနေ၍ ရှင်းယံကိုပြုစုချင်သော်ငြား ရှင်းယံ​၏မိဘများက ရှင်းယံ​၏အစစအရာရာကို ဆောင်ရွက်ပေးရန် နပ်စ်များငှါးရမ်းထားပြီးဖြစ်သည်။ ကပျက်ကချော်နိုင်သောလင်းထက် နပ်စ်များပြုစုခြင်းက ရှင်းယံအတွက်ပိုမိုကောင်းမွန်လိမ့်မည်ဟုလည်း လင်းထင်သည်။ ထို့အပြင် ရှင်းယံ​၏မိဘနှစ်ပါးက ရှင်းယံ​၏ဘေးတွင် အမြဲရှိနေမည်ဖြစ်၍ လင်းစိတ်ချနိုင်သည်။