Loving Out Loud

Ep - 53

Unicode

ဆေးပိုက်ပေါင်းများစွာဟာ ရှင်းယံ​၏သွေးကြောကိုဖောက်ဝင်၍ အသွယ်သွယ်အတန်းတန်း။

မော်နီတာတွင် ပြသနေသောနှလုံးခုန်စက်တွင် အတွန့်အချိုးများသော မျဉ်းကြောင်းကလေးတစ်ကြောင်း ပြေးလွှားနေသည်။ နှလုံးခုန်နေခြင်းကို ပြသနေခြင်းဖြစ်သည့်တိုင် နှလုံးပိုင်ရှင်မှာတော့ အိပ်ရာထက်တွင်လှဲလျက် မျက်လုံးများပိတ်ကျနေသည်။

လင်းနှစ်သက်ရသော ရှင်းယံ​၏မျက်တောင်စိပ်စိပ်များဟာ မှိတ်ကျလို့။ သူ​၏နှာခေါင်းနှင့်ပါးစပ်တွင်တော့ အောက်ဆီဂျင်ကို အဆက်မပြတ်ပေးထားသည်။

ရှင်းယံ သတိပြန်မရသေးပေ။ ထိုအရာက လင်းကိုရင်နာစေသည်။

လင်းသည် ကုတင်ခြေရင်းတွင်ရပ်လျက် ရှင်းယံကို တွေတွေလေးလေး ငေးကြည့်နေမိသည်။ အသက်အန္တရာယ်မှ လွတ်မြောက်သွားပြီဟု သိရှိပြီးသည့်တိုင် ရှင်းယံကိုယ့်ကိုယ်ကိုသတ်သေရန် ကြိုးစားသည် ဟူသောအသိက လင်းကိုမွန်းကြပ်စေတုန်းပင်။

သူ ဘာလို့များ ရှင်းယံ​၏ရင်တွင်းမှ ဒဏ်ရာများကို စောစောမမြင်ခဲ့သလဲဟု ကိုယ့်ကိုယ်ကိုအပြစ်တင်နေမိ​၏။
အမြဲတစေအပြုံးပါးပါးလေးကို ဆင်ယင်ထားတတ်သည့် ရှင်းယံဟာ အက်ကွဲရာများကို မျက်နှာဖုံးဆင်ထားမှန်း သူသိခဲ့ဖို့ကောင်းသည်။

ယခုမှတော့ ဘာမှမလုပ်နိုင်တော့။ လုပ်နိုင်သည့်အရာဟူ၍လည်း မရှိတော့။ ရှင်းယံ သတိပြန်ရမည့်အချိန်ကိုသာ စောင့်ဆိုင်းနိုင်တော့သည်။

ရှင်းယံသတိပြန်ရလာလျှင် သူရှင်းယံ​၏အနားတွင်သာနေမည်၊ ရှင်းယံ​၏စကားလုံးတိုင်းကို သေသေချာချာနားထောင်ပြီး ရှင်းယံ​၏စိတ်တွင်းကို ပိုပြီးနက်နက်နဲနဲမြင်ရအောင် ကြည့်ရှုမည်။ သူ ထိုမျှသာဆုံးဖြတ်ချက်ချမိသည်။

ရှင်းယံကို စိတ်ချရပြီဖြစ်သဖြင့် ထိုညနေ၌ လင်းနှင့်နိုးနိုးတို့ အိမ်ပြန်လာခဲ့သည်။ သူတို့နှစ်ဦးကို နက္ခတ်နှင့် ကျူးရင့်က အိမ်ပြန်လိုက်ပို့သည်။

နက္ခတ်နှင့်ကျူးရင့်သည်လည်း ရှင်းယံ​၏အချစ်ဆုံးသူငယ်ချင်းများဖြစ်သည်နှင့်အညီ မျက်နှာမကောင်းလှပေ။
အထူးသဖြင့်နက္ခတ်​၏မျက်ဝန်းထောင့်များ နီမြန်းနေသည်ကို တွေ့ရသည်။ အမြဲတစေ ပျော်ပျော်နေကာ တက်ကြွနေသူနက္ခတ်က ယခုလိုမှိုင်တွေနေသောပုံစံနှင့် မလိုက်ဖက်လှချေ။ ရှင်းယံအပေါ် နက္ခတ်​၏သံယောဇဉ်ကလည်း အတော်လေးကြီးကြောင်း လင်းပိုမိုသတိပြုမိလာသည်။