#قصص_الأنبياء(٢)
#السيرة_النبوية_إيمان_شلبي
#الحلقة_مائة_وأربعة
#أحداث_السنة_السادسة_من_الهجرة
#البراءة_من_الإفك
وقفنا المرة إللي فاتت عند رسول الله ﷺ لما خرج للناس عشان يكلمهم ويحاول يهديهم شوية ويسكّتهم،
فوقف وسط المسلمين وبدأ يخطب فيهم وقال:
يا معشر المسلمين، من يعذُرني مِن رجل قد بلغني عنه أذاه في أهلي، ووالله ما علمتُ على أهلي إلا خيرا،
ولقد ذكروا رجلا ما علمتُ عليه إلا خيرا، وما يدخل على أهلي إلا معي👌
يعني رسول الله ﷺ بيقول للمسلمين مين ينصفني أو ياخد حقي من رجل بيقول على زوجتي كلام سيء ونشر الكلام ده بين الناس، وزوجتي متزوجها من سنين ومشفتش منها إلا كل خير،
وحتى الرجل إللي بيتكلموا عنه بالكلام الفاحش ما عرفتش عنه إلا كل خير،
ولما كان بيدخل بيتي مكنش بيدخل إلا وهو معايا فمفيش مجال لأي علاقة بينه وبين زوجتي فإزاي هتحصل الفاحشة بين اتنين مفيش بينهم حتى كلام،
فقام أُسَيد بن حضير سيد الأوس وقال لرسول الله ﷺ:
أنا أعذرك منه يا رسول الله، يعني أنا أخد لك حقك منه،
إن كان من الأوس ضربت عنقه، وإن كان من إخواننا من الخزرج، أُأمرنا واحنا هننفذ أمرك على طول 👌
☆واخدين بالكم إن رسول الله ﷺ مأنكرش على أُسيد بن حضير موضوع القتل، لأن من يؤذي رسول الله ﷺ حده القتل👌
واحنا اتكلمنا قبل كده في الجزء الواحد والعشرين لو تفتكروا عن حكم من يشتم رسول الله ﷺ وقلنا إن حده القتل حتى لو تاب،
سعد بن عبادة سيد الخزرج سمع إللي قاله أُسيد بن حضير فاتضايق وغضب وأخذته الحمية إزاي يتقال على واحد من قبيلته كده وقال:
انت غلطان ، متقدرش تقتله ولو كان من قومك مكنتش هتحب يتقال عليه الكلام ده😤
فرد عليه أسيد وقال :
إنت إللي غلطان والله لنقتله، وانت منافق تجادل عن المنافقين😠
☆سعد بن عبادة كان صحابي صادق الإيمان، لكن أخذته العصبية إن إزاي الأوس يكون لهم الفضل والفخر ويبقوا أحسن منهم قصاد رسول الله ﷺ، وهم كانوا لسه من كم سنة بس الحروب شغالة بينهم،
فكأن الأوس غلبتهم في الفضل وإن واحد من قبيلة سعد هو إللي سبب في الأزمة دي، فاتضايق سعد بن عبادة وبدأ يقول الكلام ده،
وأُسيد غضب لرسول الله ﷺ إزاي سعد بن عبادة يدافع واحد منافق، خلاص يبقى انت كمان منافق زيه عشان كده بتدافع عنه،
طبعا قبيلة ده اتعصبت وقبيلة ده اتعصبت راحوا قايمين على بعض ومعاهم السيوف وهيقتتلوا وهتبقى حرب أهلية🙊
والكلام ده كله بيحصل قصاد رسول الله ﷺ وهو واقف على المنبر وشايف إللي بيحصل،
متخيلين إحساس رسول الله ﷺ في الوقت ده وهو بيشوف بعينه الناس إللي رباهم وعلمهم وخرجوا معاه في الجهاد وضحك معاهم وأكل معاهم هيقتلوا بعض😓
وكل ده بسبب كلمة اتقالت والناس قعدت تنقل الكلام من هنا لهنا من غير ما يفكروا في العواقب،
رسول الله ﷺ كان عايز يه يحل الموضوع بأي طريقة لكن للأسف الأمور اتعقدت أكثر،
قعد يسكّت فيهم ويهديهم لحد ما سكتوا وسكت رسول الله ﷺ عشان متحصلش حرب بينهم، والمستفيد طبعا من الموضوع ده المنافقين وكل أعداء المسلمين،
يعني الواحد متخيل شكل عبد الله بن أبي بن سلول وهو بيبتسم في خُبث وفرح لما شاف الوقيعة إللي حصلت بين الصحابة وإنه حقق هدفه، عليه لعنة الله😑
