#قصص_الأنبياء(٢)
#السيرة_النبوية_إيمان_شلبي
#الحلقة_مائة_وستة_وأربعون
#أحداث_السنة_السابعة_من_الهجرة
#تفسير_رؤيا_رسول_الله_عن_أهل_البرزخ
اتكلمنا المرة إللي فاتت عن الرؤيا إللي رآها رسول الله ﷺ وعرفنا تفسير أول حاجتين رسول الله ﷺ شافهم في الرؤيا ووقفنا عند سؤال مهم وهو:
ليه الكذب في المنام أشد من الكذب في الحقيقة، مع إن إللي بيكذب في المنام وإنه رأى رؤيا وهو مشفش حاجة يبقى كده هيضر نفسه بس،
لكن الكذب في الحقيقة يعني الكذب على البشر هيضر إللي حواليه وممكن يأخذ حق مش له ومشاكل كتير بسبب الكذب ده😕
الإجابة بكل بساطة هي إن الكذب في الرؤيا هي كذب على الله، والكذب على الله أشد من الكذب على المخلوقين، ربنا بيقول:
"وَمَنْ أَظْلَمُ مِمَّنِ افْتَرَىٰ عَلَى اللَّهِ كَذِبًا ۚ أُولَٰئِكَ يُعْرَضُونَ عَلَىٰ رَبِّهِمْ وَيَقُولُ الْأَشْهَادُ هَٰؤُلَاءِ الَّذِينَ كَذَبُوا عَلَىٰ رَبِّهِمْ ۚ أَلَا لَعْنَةُ اللَّهِ عَلَى الظَّالِمِينَ "
طيب ليه الكذب في الرؤيا يبقى كذب على ربنا😳
لأن رسول الله ﷺ قال :
"الرُّؤْيَا الصَّالِحَةُ جُزْءٌ مِنْ سِتَّةٍ وَأَرْبَعِينَ جُزْءًا مِنْ النُّبُوَّةِ"
والنبوة لا تكون إلا وحياً من الله👌
فاللي بيقول إنه شاف رؤيا وهو مشفهاش، فهو كده بيكذب على ربنا إنه أراه في المنام شيء محصلش أصلا وهو مشفش حاجة،
يعني كأنه بيدعي إن ربنا أوحى له بشيء وده محصلش🤷♂️
فكان الكذب على الله أشد وأَوْلى بعظيم العقوبة من إللي بيكذب على البشر، وبيسبب لهم أضرار أو يعطيهم حق مش لهم👌
◇طيب وإللي عمل كده فعلا يعمل إيه🤔
يجب عليه إنه يتوب ويستغفر👌
وطبعا يعمل الصالحات، لأن الحسنات بتمحي السيئات، ومش لازم يقول للي كذب عليه في الرؤيا إن كذب وإنه كان غلطان والكلام ده، يخليها بينه وبين نفسه وميكررهاش تاني👌
نرجع بقى لتفسير باقي رؤيا رسول الله ﷺ😁
الملكين أخبروا رسول الله ﷺ عن أول رجلين خلاص، وبيكملوا لرسول الله ﷺ تفسير باقي الأحداث وقالوا له:
أما بقى الرجال والنساء العراة إللي كانوا في التنور أو الفرن فهم:
《الزُّناة والزَّواني》
"وأَمَّا الرِّجَالُ والنِّسَاءُ العُرَاةُ الَّذِينَ في مِثْلِ بنَاءِ التَّنُّورِ، فإنَّهُمُ الزُّنَاةُ والزَّوَانِي"
يعني الرجال والنساء إللي بيقعوا في فاحشة الزنا والعياذ بالله،
فعقوبة الزناة إن ربنا بيجمعهم في فرن من نار يتعذبوا فيه إلى يوم القيامة، وعذاب الآخرة أشد،
طبعا العذاب ده إذا ما تابوش قبل ما يموتوا، لكن لو تابوا توبة نصوح وحالهم بعد التوبة أفضل من حالهم قبل التوبة، يبقى خلاص كده ربنا يغفر لهم ويبدل لهم سيئاتهم حسنات، ربنا بيقول:
"وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ ۚ وَمَن يَفْعَلْ ذَٰلِكَ يَلْقَ أَثَامًا ۩
يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا "
يعني إللي هيعمل كده ويموت هيتعذب عذاب شديد جدا؛
إلا إللي يتوب قبل ما يموت،
"إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا"
فكل إللي احنا بنتكلم فيه ده عن ناس بتعمل المحرمات دي وماتت من غير توبة، لكن إللي بيتوب في الدنيا بصدق ربنا يقبل توبته وميدخلش في العذاب ده👌
ربنا يعافينا وإياكم ويعصمنا من الزَّلل🤲
