#قصص_الأنبياء(٢)
#السيرة_النبوية_إيمان_شلبي
#الحلقة_الواحدة_والستون
#قتلى_وأسرى_بدر
اتكلمنا المرة إللي فاتت عن غزوة بدر وعن الأحداث إللي حصلت مع المسلمين وإزاي إنهم ثبتوا في قتالهم ضد المشركين فربنا أرسل لهم مدد من الملائكة عشان يقاتلوا معهم ويثبتوهم، وانهزم المشركون وهربوا من أرض المعركة واتجهوا نحو مكة،
قُتل من المشركين في غزوة بدر سبعون رجل، وأُسر سبعون،
من السبعين إللي قُتلوا غير عتبة وابنه الوليد وشيبة أخو عتبة قُتل حنظلة بن أبي سفيان وإللي قتله زيد بن حارثة إللي كان في الوقت ده اسمه زيد بن محمد،
وقُتل أبو البُخْتري بن هشام مع إن رسول الله ﷺ قال لو رأيتم أبو البختري بن هشام في المعركة محدش يقتله،
من باب حفظ الجميل له،
فاكريييين الناس إللي شاركت في نقض الصحيفة في شعب أبي طالب وكان أبو البختري واحد منهم😁
أهه رسول الله ﷺ كان عايز يرد جميل أبو البختري بن هشام فقال للمسلمين محدش يقتله،
لكن أبو البختري كان بيقاتل واحد من المسلمين فقال له المسلم رسول الله ﷺ أمر إننا لا نقتلك فخليك على جنب وكان أبو البختري معاه واحد صاحبه فقال للمسلم :
طيب وصاحبي😕
فقال له الصحابي : صاحبك لأ، معندناش أمر بعدم قتله،
فقام أبو البختري يدافع عن صاحبه ويقاتل المسلم فاضطر الصحابي إنه يدافع عن نفسه فقاتل أبو البختري بن هشام فقتله👌
وبعدين اعتذر لرسول الله ﷺ وقال له إنه اضطر يدافع عن نفسه فسامحه رسول الله ﷺ،
من الناس إللي قُتلت كمان نوفل بن خويلد أخو أم المؤمنين خديجة بنت خويلد، وإللي قتله علي بن أبي طالب🙊
وعمر بن الخطاب قتل خاله العاص بن هشام بن المغيرة أخو أبو جهل،
وعبد الرحمن بن أبي بكر الصديق مكنش لسه أسلم فكان بيقول لأبوه بعد إسلامه أنا شفتك في غزوة بدر وكنت ببعد عنك عشان مقتلكش،
فقال له أبو بكر الصديق رضي الله عنه أنا لو كنت شفتك كنت قتلتك👌
☆لازم نقف هنا وقفة مهمة جدا😶
الصحابة كانوا بيقتلوا أقاربهم بكل بساطة عادي كده إزاي؟
هم مش كان بينهم ذكريات وعيش وملح وعلى طول مع بعض واحنا عارفين العصبية القبلية عندهم كانت عاملة إزاي،
ودلوقتي كده بكل بساطة يقتلوا أقاربهم!
لأ والأب يقول لابنه أنا لو كنت شفتك كنت قتلتك كده عادي😳
انتم عارفين إن في شريعة الإسلام على قول جمهور أهل العلم إن الأب لا يُقتل قصاصا لو قتل ابنه،
وده لأن مفيش أب عاقل هيقتل ابنه في الوضع الطبيعي،
بقول في 《الوضع الطبيعي》 😅 وإلا في حالات يُقتل الوالد بابنه👌
لأن الأب مفطور على حبه لابنه يعني عاطفة لا إرادية،
فإزاي وصل بأبي بكر الصديق رضي الله عنه إنه يقول لابنه أنا كنت هقتلك لو شفتك،
والناس دي مكنتش بتهوّل ولا تقول كلام كده وخلاص، كانوا على أد كلمتهم فعلا👌
وشوفوا مصعب بن عمير هو كمان في قصته مع أخوه لما أُسر قال للي أسره وكان واحد من الأنصار:
امسكه كويس وخد بالك منه، أمه غنية وعندها فلوس كتير هتفديه بيها👌
فأخوه قال له: هي دي وصيتك بأخوك😳
فقال له مصعب وهو بيشاور على الأنصاري : هو إللي أخويا مش إنت🤚
《قصة مصعب مع أخيه فيها ضعف بسيط》
لكن بتؤدي نفس المعنى، إن الصحابة بقى انتماؤهم لدينهم، وإن صلة القرابة دي لا تعني لهم أي شيء وإن أهم حاجة هي الدين،
في حين إن في الواقع بتاعنا تلاقي البنت مثلا تحضر فرح أخوها ولّا فرح أختها ولا أي حد من قرايبها إللي كله منكرات ومحرمات بحجة إن دي أختي وإزاي أسيبها في يوم زي ده،
وده أخويا إزاي محضرش فرحه😱
ده هيزعل والناس هتزعل وأمي وأبويا و...و...
طيب هو انتم متخيلين إن الناس إللي احنا عصينا ربنا عشانهم دول هينفعونا يوم القيامة😑
متخيلين إن واحد فيهم هييجي يقول لربنا يارب سامحه أصله عصاك عشان ميزعلنيش☺
عارفين أهلنا دول هيعملوا إيه معانا يوم القيامة؟
مش أنا إللي هقولكم شوفوا ربنا عالم الغيب والشهادة بيقول لنا إيه إللي أهلنا أو أبنائنا أو أي حد هيعمله معانا يوم القيامة:
"يَوْمَ يَفِرُّ الْمَرْءُ مِنْ أَخِيهِ ۩ وَأُمِّهِ وَأَبِيهِ۩ وَصَاحِبَتِهِ وَبَنِيهِ۩لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ"
هيطلعوا يجروا مننا ومحدش فيهم هينفعنا ولا يعطينا حسنة واحدة،
هو لما يبقى حد فينا عنده امتحان والأم أو الأب قالوا لك متذاكرش وسيبك من المذاكرة والكلام ده هتسمع كلامهم؟ ولّا هنقعد نذاكر لأننا هنبقي محتاسين في الإمتحان ومش عارفين نجاوب حاجة😑
أنا عارفة إنهم مش بيقولوا كده بالعكس ده هم مش وراهم طول النهار غير قوم ذاكر قوم ذاكر🙄
ولو كان الأهل حريصين الحرص ده على آخرة عيالهم زي ماهم حريصين على دنيتهم مكنش ده بقى حال الشباب😞
فاحنا نخلينا حريصين على مصلحة نفسنا،
محدش هينفعنا يوم القيامة عند ربنا غير عملنا الصالح، غير كده كله هيهرب مننا👌
